E faaosoosoina oe pe afai e te tosina i se mea, aemaise lava se mea sesē. O se faataʻitaʻiga, a o fai sau faatau ua e vaaia se mea ua e manaʻo lava i ai. Ua oso aʻe i lou mafaufau le manatu e faigofie ona e gaoia lenā mea ma e lē maua oe. Peitaʻi, ua faapea mai lou lotofuatiaifo e leai. O lea ua e faateʻa ai mai i lou mafaufau lenā manatu. O le taimi lava lenā e uma ai le faaosoosoga, ma e manumalo mai ai.

LE MANATU O LE TUSI PAIA

Pe a faaosoosoina oe, e lē faapea ai o oe o se tagata leaga. Ua faailoa manino mai i le Tusi Paia e oo uma lava iā i tatou faaosoosoga. (1 Korinito 10:13) O le mea e sili ona tāua o le auala e tatou te tali atu ai pe a faaosoosoina i tatou. O nisi e mafaufau pea i le faaosoosoga ma iʻu ina lolo atu i ai. Ae o isi o le taimi lava e aliaʻe mai ai faaosoosoga, o le taimi foʻi lenā e latou te teena ai.

“A ua faaosoosoina tagata taʻitoʻatasi ona ua tosina ma maileia i ona lava tuʻinanau.”​—Iakopo 1:14.

Ua faailoa mai i le Tusi Paia mea e iʻu atu ai i le faia o se mea sesē. Ua taʻua i le Iakopo 1:15: “Auā a tō le tuʻinanau, ona fanau mai ai lea o le agasala.” I se isi faaupuga, pe a tatou mafaufau pea i tuʻinanauga sesē, o le a iʻu atu ai i le leai o se mea e mafai ona toe fai i ai, e tai pei o se fafine o le a fanau. Peitaʻi, e mafai ona ʻalofia le avea o i tatou o ni pologa i tuʻinanauga lē mamā. E mafai ona tatou pulea na tuʻinanauga.

FESOASOANI MAI I LE TUSI PAIA

Afai e mafai ona tatou mafaufau i tuʻinanauga lē mamā, e mafai foʻi la ona tatou aveesea na mafaufauga. E faapefea? E ala i le taulaʻi atu i se isi mea, e pei o se galuega, se talanoaga ma se uō, po o se manatu lelei. (Filipi 4:8) E fesoasoani foʻi le mafaufau i iʻuga o le lolo atu i faaosoosoga, lea e ono aofia ai le faaleagaina o i tatou i le itu tau faalogona, faaletino, ma le faaleagaga. (Teuteronome 32:29) E telē foʻi le fesoasoani a le tatalo. Na fetalai Iesu Keriso: “[Ia] tatalo e lē aunoa, ina ia aua neʻi outou lolo atu i faaosoosoga.”​—Mataio 26:41.

“Aua neʻi faasesēina outou: e lē ulagia le Atua. Auā o le mea e lūlūina e le tagata, o le mea lava lea e na te seleseleina mai.”​—Kalatia 6:7.

LE MEA MONI

Ia vaai i faaosoosoga o se maunu po o se mailei, lea e mafai ona taʻitaʻiina atu ai se tagata valea, leai se poto masani, pe lē mataala foʻi i lamatiaga. (Iakopo 1:14) E moni lenā manatu i faaosoosoga e aofia ai feusuaʻiga lē mamā, lea e iai iʻuga leaga.​—Faataoto 7:22, 23.

FESOASOANI MAI I LE TUSI PAIA

Na fetalai Iesu: “O lenei, afai e te tausuai ona o lou mata taumatau, ia sali ese ma lafoaʻi.” (Mataio 5:29) Sa talanoa Iesu i se uiga faafaatusa e faapea, pe afai e tatou te mananaʻo e faafiafia le Atua ma maua le ola e faavavau, e tatau ona fasiotia o tatou itutino uma lea e fesootaʻi atu i tuʻinanauga leaga. (Kolose 3:5) Atonu e manaʻomia ai ona faia gaoioiga maumauaʻi e tetee atu ai i faaosoosoga. Na tatalo se tagata faamaoni i le Atua: “Ia e liliuese oʻu mata mai i le vaai atu i mea e lē aogā.”​—Salamo 119:37.

E moni e lē faigofie ona faaalia le amio pulea, auā ua taʻua i le Tusi Paia e “vaivai le tino.” (Mataio 26:41) O lea la, e lē mafai ona tatou ʻalofia le faia o mea sesē. Peitaʻi, pe afai e tatou te salamō moni ma taumafai malosi e ʻalofia le faia pea o mea sesē, e mautinoa ʻe alofa mutimutivale ma alofa fua’ mai Ieova le Atua, o Lē na foafoaina i tatou. (Salamo 103:8) Maʻeu le faamāfanafanaloto o lenā mea!

“Ioa e, ana faapea e te mātaulia mea sesē, Ieova e, o ai sē e mafai ona tū atu i ou luma?”​—Salamo 130:3.