Ia Faaalia le Tigā Alofa
Le Faafitauli
Pe a tatou mafaufau tau lava o mea e ese ai isi mai iā i tatou, e tatou te ono manatu o na mea o ni vaivaiga. O le iʻuga, o le a tatou manatu faatauvaa ai iā i latou. Pe a tatou atiaʻe se vaaiga sesē i isi, o le a faigatā ai ona tatou faaalia le tigā alofa ma iʻu ai i le faailoga tagata.
Mataupu Silisili Faale-Tusi Paia
“Ia olioli faatasi ma ē o loo olioli; ia fetagisi faatasi ma ē o loo fetagisi.”—ROMA 12:15.
O le ā le uiga? Ua aʻoaʻoina i tatou e lenei mataupu silisili ia faaalia le tigā alofa. O le tigā alofa o le tuu lea o oe i le tulaga o isi.
Le Tāua o le Tigā Alofa
O le faaalia o le tigā alofa i se tasi, e tatou te iloa ai e tutusa i tatou ma lenā tagata. O le a tatou iloa ai foʻi e tutusa o tatou faalogona ma gaoioiga. E fesoasoani le tigā alofa e tatou te vaai ai i tagata o se ʻauaiga e tasi, e tusa lava po o le ā lo latou faasinomaga. Pe a taulaʻi atu i mea e tutusa ai i tatou ma isi, o le a saʻo ai la tatou vaaiga e faatatau iā i latou.
E fesoasoani foʻi le tigā alofa ia tatou faaaloalo ai i isi. Na manatu faatauvaa Anne-Marie mai i Senegal, i se vaega o tagata na vaai maulalo i ai le toʻatele. Na ia taʻua le auala na fesoasoani ai le tigā alofa iā te ia: “Ina ua ou vaaia mafatiaga o nei tagata, na ou fesili ifo po o ā ni oʻu faalogona pe a tuu aʻu i o latou tulaga. O le faia faapea, na amata ai ona ou iloa e leai se mea po o se mea na ou faia e sili ai aʻu nai lo o i latou.” Ioe, pe a tatou taumafai e malamalama i faafitauli o isi, o le a tatou faaalia le tigā alofa nai lo o le faitio.
Mea e Mafai Ona E faia
Ia taumafai e ʻalofia le vaai i mea e eseese ai, ae ia uaʻi atu i mea e tutusa ai oe, ma se vaega o tagata e te ono vaai maulalo i ai. Mo se faataʻitaʻiga ia faaāta o latou faalogona pe a
E fesoasoani le tigā alofa e tatou te vaai ai i tagata o se ʻauaiga e tasi
aai faatasi ma o latou aiga
mānava mai i galuega
faatasitasi ma uō
faalogologo i pese e fiafia ai
Ia taumafai e tuu oe i o latou tulaga. Ia fesili ifo:
ʻO ā ni oʻu faalogona pe a vaai maulalo mai nisi iā te aʻu?’
ʻO ā ni oʻu faalogona pe a faamasino aʻu e se tasi e aunoa ma lona iloa lelei o aʻu?’
ʻO le ā le auala ou te manaʻo e feutagaʻi mai ai isi iā te aʻu pe afai e avea aʻu o se vaega o na tagata?’
E te Ono Fiafia Foʻi
LE OLOMATAMATA
Pe e Tigā Alofa Mai le Atua?
Ua faamautinoa mai e le Tusi Paia e tigā alofa mai le Atua.
ALA MAI!
Faaleleia Lou Olaga—Aiga ma Faauōga
O le a tatou maua ni faiā lelei ma isi pe a tatou taulaʻi atu i mea e mafai ona tatou faia mo i latou, nai lo o mea e mafai ona latou faia mo i tatou.
