FESOASOANI MO Ē E FAAVAUVAU

Le Fesoasoani Sili mo Ē Faavauvau

PLAY

O LE TIGĀ O LE MALIU O SĒ E PELE I SE TASI O SE MATAUPU UA TELE INA SUʻESUʻE E TAGATA I ASO NEI. Peitaʻi e pei ona taʻua muamua, o le fautuaga e sili ona lelei a tagata atamamai, e masani lava ona ōgatusa ma le atamai anamua o loo i le Tusi Paia. Ua faaalia mai ai o loo aogā pea taʻiala o le Tusi Paia. Peitaʻi e lē na o fautuaga e sili ona maufaatuatuaina o loo taʻua ai. Ae o loo iai foʻi faamatalaga e lē o maua lava i se isi tusi lea e mafai ona aumaia ai le faamāfanafanaga e lē mafaatusalia mo ē o loo faavauvau.

E lē o faapuapuagatia ē e pele iā i tatou ua maliliu

O loo taʻua i le Tusi Paia i le Failauga 9:5 e faapea, “o ē ua oti latou te lē iloa se mea.” E lē toe iai ni o latou “manatunatuga.” (Salamo 146:4) O loo faatusaina foʻi le oti i le moe.—Ioane 11:11.
O le faatuatua malosi i se Atua alofa e maua ai le faamāfanafanaga

O loo taʻua i le Tusi Paia i le Salamo 34:15 e faapea: “O loo silasila mai fofoga o Ieova a i ē e amiotonu, ma e faafofoga mai foʻi ona taliga i la latou alaga mo se fesoasoani.” E sili atu le faamatala o o tatou faalogona i le Atua e ala i le tatalo, nai lo o faamāfanafanaga e maua mai i le faailoa atu i se tasi o o tatou faalogona. E fesoasoani le tatalo iā i tatou e atiaʻe ai se faiā māfana ma Lē na foafoaina mea, o lē e na te faaaogā lona mana e faamāfanafanaina ai i tatou.
Se lumanaʻi e sili ona lelei e tulimataʻia

Seʻi faaata le taimi o le a toe faatūina mai ai i latou o loo i tuugamau i luga o le lalolagi! E tele ina taʻua i le Tusi Paia lenā taimi ma o loo faamatalaina ai foʻi le tulaga o le lalolagi o le a iai pe a oo mai. O le a ʻsoloiesea e le Atua loimata uma i o tatou mata, e lē toe iai se oti, po o se faanoanoa, po o se tagiauē, e lē toe iai foʻi se tigā.’—Faaaliga 21:3, 4.

O le toʻatele o i latou o ē e talitonu iā Ieova le Atua o le Tusi Paia, ua latou maua le malosi e feagai ai ma le faavauvau ona o le faatuatua i le faamoemoe, o le toe vaai atu i ē e pele iā i latou ua maliliu. O se faataʻitaʻiga, ina ua maliu le tane a Ann, o lē sa la faaipoipo mo le 65 tausaga, na ia faapea mai: “Ua faamautinoa mai i le Tusi Paia iā te aʻu, e lē o faapuapuagatia i latou o ē e pele iā i tatou ua maliliu, ma o le a toe faatūina mai e le Atua i latou uma o loo ia manatuaina pea. E oso aʻe nei manatu pe a ou toe mafaufau i le tigā o le oti, ma o le iʻuga ua mafai ai ona ou feagai ma se mea pito sili ona tigā na oo iā te aʻu!”

Na faapea mai Tina lea na taʻua muamua: “Talu mai lava le taimi na maliu ai Timo, na ou lagona le taʻitaʻiga a le Atua. Na ou lagona foʻi le fesoasoani a Ieova i taimi o oʻu puapuaga. Ma ua moni iā te aʻu le folafolaga a le Tusi Paia i le toetū. Ua faamalosia ai aʻu e faaauau pea seʻia oo i le aso ou te toe vaai ai iā Timo.”

Ua faapena foʻi faalogona o le faitau miliona o tagata o ē ua talitonu i le maufaatuatuaina o le Tusi Paia. E tusa lava pe e te manatu e lē moni faamatalaga o loo taʻua i le Tusi Paia pe ua na o se miti, ae ia iloilo e oe lava faamaoniga o fautuaga ma folafolaga pe e moni. Atonu e te iloa ai o le Tusi Paia o le fesoasoani sili lea mo i latou e faavauvau.