TALA A NISI TAGATA

Na fasiotia e tagata Roma Iesu, e ala i le faatautauina o ia i se koluse e faia aʻe i ni laau se lua.

MANATU O LE TUSI PAIA

Na fasiotia Iesu e ala i le “faatautauina o ia i se laau.” (Galuega 5:30, The New Jerusalem Bible) E tutusa lava upu o loo faaaogā e tusitala o le Tusi Paia e faamatala ai le laau faaoosala na fasiotia ai Iesu, o se laau e tasi ae e lē lua. E tusa ai ma le faamatalaga a le Crucifixion in Antiquity o le upu Eleni stau·rosʹ, “o se upu taatele lea mo se laau saʻo. E lē tutusa ma se ʻkoluse.’” O le upu xyʹlon o loo taʻua i le Galuega 5:30, e faasino atu “i se laau saʻo po o se pou lea na faatautauina ai e tagata Roma ē na fasiotia.” *

E talitutusa le auala na fasiotia ai Iesu ma se tulafono o loo taʻua i le Tusi Paia i Isaraelu anamua. Na taʻua manino i le tulafono: “Afai e faia e se tamāloa se agasala ua tatau i ai le oti, ma ua fasiotia o ia, ua e faatautau foʻi o ia i luga o le laau, . . . ua faamalaia e le Atua lē ua faatautauina i se laau.” (Teuteronome 21:22, 23) E tusa ai ma lenā tulafono, na tusi le aposetolo o Paulo na “malaia [Iesu] e sui ai i tatou, auā ua tusia: ʻE faamalaia i latou uma ua faatautauina i se laau [xyʹlon].’” (Kalatia 3:13) O lea, ua faaalia mai ai e Paulo na maliu Iesu i luga o se laau; o se laau saʻo e tasi.

“Na latou fasiotia o ia i le faatautauina i se laau.”—Galuega 10:39, The New Jerusalem Bible.

MANATU O LE TUSI PAIA

E leai se faamatalaga i le Tusi Paia e faapea na faaaogā e uluaʻi Kerisiano le koluse e avea o se faailoga tau tapuaʻiga. Nai lo o lea, na faaaogā e tagata Roma i lenā vaitaimi le ata o le koluse e fai ma faailoga o o latou atua. Ae pe ā ma le 300 tausaga talu ona maliu Iesu, na faaaogā ai e le emeperoa Roma o Konesetatino le koluse e fai ma faailoga o ana fitafita, ma na mulimuli ane avea o se vaega o lotu “Kerisiano.”

Talu ai na faaaogā e nei tagata faapaupau le koluse e tapuaʻi ai i o latou atua, pe na faaaogā foʻi la e soo o Iesu i a latou tapuaʻiga i le Atua moni? E leai. Na latou iloa ua leva ona taʻusalaina e le Atua tapuaʻiga e faaaogā ai “se mea e foliga i se faatusa,” ma e tatau i Kerisiano ona “sosola ese mai i le ifo i tupua.” (Teuteronome 4:15-19; 1 Korinito 10:14) “O le Atua o le Agaga” e lē mafai ona vaaia e mata o tagata. O lea la, e leʻi faaaogāina e uluaʻi Kerisiano mea e vaaia ma ni faailoga, ina ia fesoasoani iā i latou e vavalalata atu ai i le Atua. Nai lo o lea, na latou tapuaʻi atu iā te ia “i le agaga” lea e taʻitaʻia e lona agaga paia e lē vaaia, ma “le upu moni” lea e ōgatusa ma le finagalo o le Atua o loo i le Tusi Paia.—Ioane 4:24.

“O ē o loo i le tapuaʻiga moni, latou te tapuaʻi i le Tamā i le agaga ma le upu moni.”—Ioane 4:23.

TALA A TAGATA

“O se mea e masani ma talafeagai le faaalia o le faaaloalo faapitoa ma matuā faatāuaina se mea e maua ai le faaolataga. . . . O lē e faamamaluina le faatusa, ua ia faamamaluina foʻi le tagata o loo faaataina e lenā faatusa.”—New Catholic Encyclopedia.

MANATU O LE TUSI PAIA

E lotofaafetai Kerisiano iā Iesu ona o lona maliu ua mafai ai ona faamagaloina a latou agasala, faalatalata atu i le Atua, ma maua ai le ola e faavavau. (Ioane 3:16; Eperu 10:19-22) E leʻi aʻoaʻoina i latou e faaalia le faaaloalo i lenā meaalofa, e ala i le faia o se faatusa o Iesu po o le tau lava ina faapea mai e talitonu iā te ia, auā e “mate le faatuatua pe a leai ni galuega.” (Iakopo 2:17) E tatau i Kerisiano ona faaalia lo latou faatuatua iā Iesu. E faapefea?

Ua taʻua i le Tusi Paia: “Ua faamalosia i matou ona o le alofa o le Keriso, ma o lo matou manatu lenei, e toʻatasi lē na maliu mo tagata uma . . . Ia lē toe ola i latou mo i latou lava, ae ia ola mo ia o lē na maliu mo i latou ma toe faatūina mai.” (2 Korinito 5:14, 15) O le gaoioiga matilatila o le alofa o Keriso, ua uunaʻia ai Kerisiano e fetuunaʻi o latou olaga ina ia mulimuli ai i lana faaaʻoaʻoga. O le faia faapea, ua latou faamamaluina ai Iesu i se auala e sili atu nai lo o le faaaogāina o se faailoga tau tapuaʻiga.

“O le finagalo lenei o loʻu Tamā, o i latou uma e iloa le Atalii ma faatuatua iā te ia, e ao ona maua le ola e faavavau.”—Ioane 6:40.