Ua faapea mai Nicole o se tuafafine talavou i Kolomepia: “E ese loʻu fiafia i le matou Maota mo Sauniga, auā o i inā ou te faatasi ai ma loʻu aiga faaleagaga.” Po o ou faalogona foʻi na?

 E pe ā ma le 63,000 Maota mo Sauniga e faapotopoto ai Molimau a Ieova i le lalolagi aoao. O na maota ua avea o ni nofoaga lelei e tatou te tapuaʻi ai i le Atua. Ae e tele foʻi isi aogā o na maota. Ua faapea mai David o se paeonia sauatoa i Kolomepia: “O Maota mo Sauniga e faamamaluina ai upu moni o loo tatou aʻoaʻoina. E maofa le toʻatele o ē e asiasi mai i le auala o loo tausia lelei ai o tatou maota.” E lē tupu faafuaseʻi lenei mea. E tatou te galulue mamafa e faamamā ma tausia lelei Maota mo Sauniga. E faapefea ona faatino lenei galuega?

 O faapotopotoga e faaaogāina se Maota mo Sauniga, e latou te gafa ma le tausia o lenā maota. O lea, e faamamā e lē aunoa e uso ma tuafāfine lo latou Maota mo Sauniga. E latou te siaki foʻi nei maota ina ia iloa vaega e manaʻomia ona faaleleia ma toe lipea.

 Ina ia fesoasoani i faapotopotoga e tausia o latou Maota mo Sauniga, e tofia e le Matagaluega mo Faugāfale i le Vaipanoa (LDC) ni uso e saunia toleniga. E ono i le sefulu Maota mo Sauniga e vaaia e uso taʻitasi. E asiasi atu uso e toleni le ʻautalaʻi i faapotopotoga i auala e tausia ai o latou maota. E taʻitolu tausaga ma ia iloiloina maota taʻitasi, e iloa ai po o saogalemu ma lelei le tulaga o na maota.

 E talisapaia e o tatou uso ma tuafāfine toleniga e saunia e na uso. Ua faapea mai Indhumathi o se tuafafine i Initia: “E ese le manaia o le toleniga. Ua mafai ona ou aʻoaʻoina ai le auala e tausia lelei ai le maota.” Ua faapea mai Evans o se uso i Kenya: “Ua matou iloa sefe le tele o tupe e ala i le faaleleia o mea lāiti e leaga i le maota, a o leʻi oo ina matuā leaga.”

 E faitau selau pe faitau afe tālā a le aofaʻi o tupe e faaalu i tausaga taʻitasi i le faaaogāina ma le tausia o se Maota mo Sauniga, e fua i le vaipanoa e iai le maota, o le tuai o le maota, ma le tele o faapotopotoga e faaaogāina. E faapefea ona totogi na tupe faaalu?

 E fesoasoani foaʻi tauofo i le tausiaina o Maota mo Sauniga. Ua faapea mai Alexander o se uso i Kazakhstan: “E faaaogā se vaegātupe e totogi ai le Initaneti ma pili e pei o le vai ma le eletise. Ae e faaaogā se isi vaegātupe e faatau ai mea e manaʻomia e pei o pepa solo, totinilima, vailaau faamamā, ma vali.” O foaʻi tauofo faaopoopo e tuuina atu mo le galuega i le lalolagi aoao, e fesoasoani i poloketi tetele ma taugatā o le toe faaleleia o maota i le lalolagi aoao.

 Pe afai e telē le tupe e faaaluina e toe faaleleia ai se Maota mo Sauniga e sili atu nai lo o tupe e masani ona faaalu i le lua po o le tolu masina, e faafesootaʻi e toeaina le uso e saunia toleniga mai le LDC. Pe a talia e le LDC le talosaga, e masani ona faaaogā foaʻi tauofo mo le galuega i le lalolagi aoao. E 8,793 poloketi na faia a o faagasolo le tausaga faaleauaunaga 2023, ma e $76.6 miliona le tupe na faaaluina ai. O nisi nei o poloketi se lua.

 E iai se Maota mo Sauniga i Angola ua 15 tausaga talu ona iai, ma e tele ni mea na manaʻomia ona faaleleia. Sa manaʻomia ona toe sui atoa mea tau eletise, na vetevete puipui, ma na faailoa mai e tuaoi ua tafe atu le vai i o latou fale. Na faatulaga e le LDC se poloketi e toe faaleleia ai na faafitauli, lea na faaaluina ai le $9,285. Na talisapaia e tuaoi le galuega, ma na maofa i le auala na faatino ai.

 Na tutulu se Maota mo Sauniga i Polani ma na matuā leaga foʻi le kapeta. Na faatulaga e le LDC se poloketi e toe faaleleia le taualuga ina ia aua neʻi tutulu ma toe sui le kapeta, lea na faaaluina ai le $9,757. O le iʻuga, e lē manaʻomia ona faia se galuega tele e toe faaleleia ai lenei maota mo ni tausaga.

 O galuega toe faaleleia, e lē gata e sefe ai foaʻi tauofo ae e viia ai foʻi Ieova. Ua faapea mai Shaun o se uso mai Toga: “O a tatou galuega o le toe faaleleia o maota, ua mafai ai ona tatou tapuaʻi iā Ieova i se Maota mo Sauniga e mamā ma lelei, ma viia ai e tagata o le nuu lona suafa. E tatou te mitamita e valaaulia tagata i a tatou Maota mo Sauniga.”

 E mafai e i tatou uma ona fesoasoani e faamamā ma tausia lelei o tatou maota mo le tapuaʻiga. Ua faapea mai Marino o sē e faia toleniga mo le tausia o maota i Ausetalia: “E mafai e i tatou uma ona faia se sao i le faaeaga tautele o le tausia lelei o o tatou Maota mo Sauniga. O le a tatou fesoasoani ai e sefe foaʻi tauofo mo galuega e sili ona manaʻomia ai.”

 E fiafia Joel o se uso i Initia e tausia lelei lo latou Maota mo Sauniga. Ua ia faapea mai: “O le galulue faatasi ma oʻu uso e fesoasoani iā te aʻu e faaata ai le olaga i le lalolagi fou.” Ua faapea mai Nicole lea na taʻua i le amataga: “Na ou fesoasoani e solo le fola a o galulue uso e taofi le liki o le vai o le falelētaʻua. Ou te leʻi fesoasoani e taofia le liki, ae e tāua laʻu galuega na fai ina ia lē see ai se isi.”

 Pe afai e te fia tauofo e fesoasoani i le tausia lelei o lo outou Maota mo Sauniga, ia talanoa i toeaina o le tou faapotopotoga. E lē gata i lea, o a outou foaʻi tauofo e fesoasoani e tausia lelei ai lo outou Maota mo Sauniga, faapea isi Maota mo Sauniga i le lalolagi aoao. E mafai ona faia na foaʻi i pusa mo meaalofa tauofo i lo outou maota, pe faaaogā le donate.jw.org. E matou te matuā talisapaia lo outou agaga foaʻi.