Na valoia i le Tusi Paia “o le a siitaua atu isi atunuu i isi atunuu,” ma o le a iai mala faalenatura i “le taufaaiʻuiʻuga o le faiga o mea a le lalolagi.” (Mataio 24:3, 7) Ua tatou vaaia le faataunuuina o lenā valoaga a o faagasolo le tausaga faaleauaunaga 2023. a Ae na faaatagia mai e Molimau a Ieova le alofa o Ieova, a o tutupu taua ma mala faalenatura i le toetoe 100 atunuu. O ā auala na latou faia ai faapea?

 A o faagasolo le tausaga faaleauaunaga 2023, na aafia o tatou uso i le silia ma le 200 mala faalenatura po o mala na faapogaia e tagata. Na faaaluina e asosi faaletulafono na faaaogā e Molimau a Ieova le silia ma le $10 miliona b na maua mai i foaʻi tauofo mo le galuega i le lalolagi aoao, ina ia saunia ai fesoasoani laveaʻi. Ae e lē o aofia ai tupe na faaalu e le toʻatele o uso ma tuafāfine i le vaipanoa a o latou tauofo e fesoasoani. Ia mātau auala na faaaogā ai a outou foaʻi e fesoasoani i ē na aafia i ni mala faalenatura se lua, e ese mai i le tele o isi mala na aafia ai o tatou uso.

 E masani ona aafia nisi vaipanoa o Nigeria i lologa. Peitaʻi e sili atu ona leaga lologa na aafia ai le atunuu iā Oketopa 2022 i le sefulu tausaga talu ai nei. E silia ma le 1,670,432 eka (676,000 eka faatafafā) o faatoʻaga na faatamaʻia ae e silia ma le lua miliona tagata na tuua o latou fale. Na vave ona tofia e le lālā i Nigeria ni Komiti mo Fesoasoani Laveaʻi, e faamaopoopoina galuega laveaʻi ma saunia le fesoasoani faaleagaga.

•   E 7,505 tagata talaʻi na tuua o latou fale

•   E 860 fale na faaleaga pe faatamaʻia

•   E 90 Maota mo Sauniga ma se Maota Fono na lolovaia

 E silia ma le $250,000 na faaaluina i fesoasoani laveaʻi, e aofia ai:

•   Meaʻai e pei o araisa, beans, ma saimini

•   Mea e faaaogā e aiga e pei o faamalū ma taʻinamu

•   Le toe faaleleia po o le toe fausia o fale na faaleagaina

 Na faapefea ona faamautinoa e o tatou uso e faaaogā lelei foaʻi tauofo? O se tasi o auala o le siaki lelei o fale taʻitasi ina ia iloa ai pe e manaʻomia ona toe faaleleia. Pe afai na manaʻomia ona fausia se fale fou, e faaaogā se fausaga faigofie e taatele i le vaipanoa.

 Na matuā talisapaia e o tatou uso ma tuafāfine le fesoasoani na latou maua. Na faapea mai se tuafafine: “Na matuā aafia o matou olaga i lologa, ona na faaleagaina a matou faatoʻaga, ma leai se mea e matou te nonofo ai. Na faamāfanafanaina i matou ina ua ō mai uso ma tuafāfine i le aso lava lenā e fesoasoani mai, ma saunia se nofoaga malupuipuia e matou te nonofo ai. Na matou talisapaia meaʻai na auina mai e le lālā. E matou te lē iloa faamatala o matou faalogona a o matou vaaia le faataunuuina o le Ioane 13:34, 35 i o matou olaga. . . . Maʻeu le moni o le alofa o uso! E fia faaleo atu lo matou agaga faafetai i uso na fesoasoani i lo matou aiga atoa i le taimi tonu na matou manaʻomia ai le fesoasoani.”

 Na mātauina e tagata o le aai a tatou galuega laveaʻi. Na taʻua e se matai i le nuu o Sabagreia i le Setete o Bayelsa: “E tele faalapotopotoga ma lotu i le lalolagi aoao, ae e na o Molimau a Ieova o loo faia lenei galuega laveaʻi. . . . E leai se isi faalapotopotoga e sōsō iā te outou.”

 E silia ma le 400 afi na sasao ma matuā faaleagaina ai laufanua o Chile iā Fepuari 2023. E silia ma le 1,062,553 eka (430,000 eka faatafafā) o fanua ma mea e faaaogā e tagata lautele i Chile na faaleagaina. E pe ā ma le 8,000 tagata na aveesea mai i o latou fale. E leʻi leva talu ona sasao na afi, ae faamaopoopo loa e le ofisa o le lālā fesoasoani laveaʻi.

•   E 222 tagata talaʻi na aveesea mai i o latou fale

•   E 20 fale na faatamaʻia

 E silia ma le $200,000 na faaaluina i fesoasoani laveaʻi, e aofia ai:

•   Meaʻai ma vai

•   Penisini, sapalai o mea faamamā, fualaau ma vailaau faafomaʻi

•   Le toe fausia o fale na faaleagaina

 Na faateʻia se aiga i le iloaina ua faaleagaina uma a latou meatotino, e aofia ai lo latou fale ma le pisinisi. O le iʻuga, ua leai se auala e tausia ai lo latou aiga. I le taimi muamua, na matuā faigatā iā i latou le vaavaai atu i le tulaga na tū ai lo latou fale. Ae na amata ona faaleleia o latou faalogona a o faasolo ina toe fausia lo latou fale. O le alofa ma faalogona māfana o ē na tauofo, na fesoasoani i le aiga e feagai ai ma na taimi faigatā. O lenā mea na tupu na uunaʻia ai i latou e galulue faatasi ma le ʻautauofo e fesoasoani i le toe fausiaina o le fale o se isi uso.

 Na pāʻia loto o le toʻatele o uso ma tuafāfine ona o nei galuega laveaʻi. Na faapea mai se tasi uso: “E mataʻina le faatulagaga a Ieova o Komiti mo Fesoasoani Laveaʻi. Na latou iai i nofoaga na aafia i mala i le aso na sosoo ai e saunia mea na manaʻomia. O se faalaeiauga le faitau i fesoasoani laveaʻi i isi vaega o le lalolagi. Ae pe a e tofo totino i ai, e matuā ese lava ou faalogona. O le a atili ai ona e talisapaia le faalapotopotoga a Ieova, o auala o loo faaaʻoaʻo ai uso i uiga o Ieova, ma lo latou naunau moni e saunia mea o loo matou manaʻomia i le itu faaletino, faaleagaga, ma tau faalogona, ma ua matou vāaitino ai i le alofa o Ieova.”

 A o tatou iai i le taufaaiʻuiʻuga o le faiga o mea a lenei lalolagi, o le a tatou vaaia pea le faateteleina o mala faalenatura. (Luka 21:10, 11) O le a tatou vaaia foʻi le lagolagosua alofa a lo tatou Tupu o Keriso Iesu, e ala i le faapotopotoga Kerisiano “i aso uma lava seʻia oo i le taufaaiʻuiʻuga o le faiga o mea a le lalolagi.” (Mataio 28:20) O a outou foaʻi e faia i le galuega i le lalolagi aoao e ala i le donate.jw.org ma isi auala, faapea lo outou taimi ma le malosi, ua faaalia ai lo outou lagolagoina o le Malo ma lona Tupu alofa. Faafetai tele lava mo foaʻi o loo faaauau ona outou faia.