E silia ma le 60 pasene o i latou e galulue faataimi atoa i galuega faaliliu, e galulue i ofisa faaliliu ae e lē o ofisa o lālā. Aiseā e aogā ai lenei faatulagaga? O ā meafaigaluega e manaʻomia e le ʻaufaaliliu i ofisa faaliliu ina ia sologa lelei ai a latou galuega? Pe e iai ni aafiaga lelei i faaliliuga ona o nofoaga e faatutū ai ofisa faaliliu?

 E nonofo le ʻaufaaliliu i le ofisa faaliliu lea e tū i le nofoaga e toʻatele ai tagata e tautatala i le gagana a le ʻaufaaliliu. Na faapea mai Karini, o se tagata faaliliu i le gagana Low German: “Talu ona matou siitia i Cuauhtémoc, Chihuahua, i Mekisikō, ua matou tautatala i taimi uma i le Low German ma isi ʻaufaaliliu ma pe a auai i le talaʻiga pe matou te ō foʻi e faatau. Ua matou faaaogāina i taimi uma la matou gagana, ona ua matou nonofo i le vaipanoa e tautatala ai tagata i la matou gagana. Ua matou faalogo i muagagana ua leva matou te leʻi toe faalogo i ai, ma matou iloa ai foʻi suiga i upu o loo faaaogā e tagata.”

 Na taʻutino mai James e galulue faatasi ma le ʻaufaaliliu i le gagana Frafra i Ghana, e iai taimi e na te misia ai le faatasitasi ma le aiga Peteli i le lālā. Ae na ia faapea mai: “Ou te matuā fiafia lava e galue i le ofisa faaliliu. O le talaʻi i le gagana e tautatala ai tagata i lenā vaipanoa ma mātauina le tali mai o tagata i le tala lelei, e pāʻia ai loʻu loto.”

 E faapefea ona filifilia e o tatou uso se nofoaga e faatū ai se ofisa faaliliu? Ua faapea mai Joseph o se sui o le Matagaluega mo Faugāfale i le Lalolagi Aoao i Warwick i Niu Ioka: “O se tasi o faafitauli o loo matou fesagaʻia, o nisi nofoaga e fai ma pē le eletise ma le vai ma e lē saoasaoa le Initaneti lea e manaʻomia e lafo atu ai lomiga e faaliliu. O lea, pe a filifilia se nofoaga e faatū ai se ofisa faaliliu, atonu e tele ni nofoaga i le vaipanoa e tautatala ai tagata i lenā gagana, e filifilia mai ai.”

 Ae o le faiga e sili ona vave ma taugofie e faatū ai se ofisa faaliliu, o le faaaogā lea o se Maota mo Fonotaga, Maota mo Sauniga po o se fale o misionare o loo iai se avanoa e tausāvali i ai le ʻaufaaliliu e galulue ai. Pe afai e leai ni avanoa i na fale, atonu e maua mai se faatagaga e faatau ai e uso se fale po o se ofisa e nonofo ma galulue ai le ʻaufaaliliu. Pe a iai nisi suiga, e faigofie ona faatau lenā fale ma faaaogā le tupe i mea o loo tele ai le manaʻoga.

 I le tausaga faaleauaunaga 2020, e pe ā ma le 13 miliona tālā Amerika na faaaluina mo meafaigaluega e manaʻomia e i latou o loo galulue i ofisa faaliliu. E manaʻomia e le ʻaufaaliliu i na ofisa komepiuta, polokalame faapitoa faakomepiuta, o meafaigaluega mo le puʻeina o leo, Initaneti, ma isi mea. I se fua faatatau, e pe ā ma le $750 (tālā Amerika) le tau o mea uma e manaʻomia mo se komepiuta e faaaogā e se tagata faaliliu. Ua tuu i totonu o na komepiuta polokalame faakomepiuta ua faatau mai, ma le polokalame e taʻua o le Watchtower Translation System, lea e faaaogā e le ʻaufaaliliu e faatulaga ai a latou galuega, ma faigofie ai ona latou maua lomiga e fesoasoani i a latou galuega faaliliu.

 E maua foʻi e le ʻaufaaliliu meafaigaluega e puʻeina ai leo i le ofisa faaliliu. Na iloa le aogā tele o nei meafaigaluega i le amataga o le pepesi o le faamaʻi o le KOVITI-19. Na mafai ona ave e le ʻaufaaliliu mea puʻe leo i o latou fale, ma faaauau ai le puʻeina o le faitauina o lomiga po o leo mo vitiō.

 E fesoasoani uso ma tuafāfine tauofo mai i na vaipanoa, e autalu lomiga ua uma ona faaliliuina ma tausia lelei ofisa faaliliu. Ua faapea mai se uso e igoa iā Cirstin, e galue i le ofisa e faaliliu ai le gagana Aferika i le Lālā i Cape Town i Aferika i Saute: “E toʻatele le ʻau talaʻi ma paeonia sauatoa ua maua le avanoa e faaaogā ai o latou tomai.”

 E matuā olioli na tagata tauofo i le faaeaga e galulue ai i ofisa faaliliu. Na faamatalaina e se tuafafine e galue i se ofisa faaliliu, e pei le galue i le ofisa faaliliu o loo ia “mānavaina se ʻea fou.” E faaaogā foʻi e nisi uso ma tuafāfine o lenā vaipanoa o latou siʻufofoga mo le puʻeina o leo. Ua faapea mai Juana o se tuafafine e faaliliu i le gagana Totonac i le Setete o Veracruz i Mekisikō, “Ona o lea ua matou latalata i taulaga ia e tautatala ai tagata i la matou gagana, ua faigofie la ona maua uso ma tuafāfine e puʻe o latou leo mo vitiō ma le faitauina o lomiga.”

 Ae po o fesoasoani ofisa faaliliu i le faaleleia o le faaliliuina o lomiga? E faitau miliona i latou o loo faitau i a tatou lomiga ua ioe i lenā fesili. Ua taʻua e Cédric, o se tasi e galue i le faaliliuina o le gagana Kongo, i le atunuu o Congo: “Sa masani ona faaigoa e nisi uso ma tuafāfine le auala sa matou faaliliuina ai lomiga i le gagana Kongo, o le ʻfaa-Kongo a le Olomatamata,’ ona e lē tutusa ma le auala e masani ona tautatala ai tagata i le gagana Kongo. Ae o le taimi lenei, ua latou fai mai ua faaliliuina a tatou lomiga i le auala e tautatala ai tagata i aso uma.”

 E faapena foʻi le tala na faalogo i ai Andile, lea e galue ma le ʻaufaaliliu i le gagana Xhosa i Aferika i Saute: “Ua faapea mai le toʻatele ua latou mātauina le suiga o le auala ua faaliliuina ai a tatou lomiga, e oo lava i tamaiti sa masani ona faitau i le Olomatamata i le faa-Peretania, ua faitau nei i le Olomatamata i le gagana Xhosa. Ae e sili atu ona latou fiafia i le malamalamagofie o le auala ua faaliliuina ai le toe teuteuga o le Faaliliuga o le Tusi Paia a le Lalolagi Fou.”

 O tupe uma o loo faaalu i le faatūina o se ofisa faaliliu, tausia ma le vaaia o tagata o loo galulue ai, ua faatupeina e foaʻi tauofo mo le galuega i le lalolagi aoao, e aofia ai ma foaʻi o loo faia i luga o le donate.jw.org.