Ua toʻaitiiti i latou e faaalia amioga lelei. E soona ʻinaʻinā tagata mamaʻi i fomaʻi; e lē faaaloalo tagata e aai i se faleʻaiga i tagata faigaluega; e soona fai e nisi tagata faamaualuluga e femalagaaʻi i vaalele tagata e faigaluega ai; e taufaifai, taufaamataʻu, ma osofaʻia e tamaiti lē usiusitaʻi faiaʻoga; ma o nisi ʻaufaipolotiki e latou te faia faiga faapiʻopiʻo, ae o isi ʻaufaipolotiki e taumafai e faatalitonu tagata o i latou o ni ē e amiolelei.

 O le Tusi Paia o se taʻiala maufaatuatuaina e iloa ai po o le ā e faasino i ai amioga lelei. O loo faamatala mai ai foʻi le māfuaaga ua toʻaitiiti ai tagata e faaalia amioga lelei i aso nei.

 Ua matuā manino mai i le lalolagi aoao, le paʻū maulalo o tapulaa tauamio mo amioga lelei ma talafeagai.

•   E tusa ai o se suʻesuʻega na faia talu ai nei e taʻua o le Gallup, na ioe ai tagata Amerika ua matuā paʻū maulalo tapulaa tauamio i le Iunaite Setete i le taimi lenei, nai lo o se isi lava taimi talu mai le 22 tausaga ua mavae.

•   I se isi suʻesuʻega na faia i le silia ma le 32,000 tagata mai i atunuu e 28, o le 65 pasene o i latou na faapea mai ua sili atu ona toʻaitiiti tagata e faaalia amioga lelei i aso nei, nai lo o se isi lava taimi.

 Na valoia mai i le Tusi Paia amioga ua tatou vaaia i aso nei.

•   “O aso e gata ai e oo mai ai aso e sili ona faigatā. Auā e avea tagata ma ē e alolofa iā i latou lava, o ē e mananaʻo tele i tupe, o ē e gugutu, o ē e faamaualuluga, o ē e fai upuleaga i isi, o ē e lē usiusitaʻi i mātua, o ē e lē lotofaafetai, . . . o ē e lē amio pulea, [ma] ē e sauā.”—2 Timoteo 3:1-3.

 Ina ia iloa atili le auala ua faataunuuina ai lenei valoaga, faitau i le mataupu “Po o Valoia Mai e le Tusi Paia le Auala e Mafaufau ma Gaoioi ai Tagata i Aso Nei?”

 I se lalolagi ua toʻaitiiti ai tagata e faaalia amioga lelei, e faitau miliona ua latou iloa o le Tusi Paia o se taʻiala sili mo amioga lelei. O taʻiala tauamio o loo iai e “maufaatuatuaina pea i le taimi nei e oo i le faavavau.” (Salamo 111:8) Mātau nisi o faataʻitaʻiga:

•   Manatu o le Tusi Paia: “O mea uma tou te mananaʻo e faia mai e tagata iā te outou, ia faapea lava ona outou faia iā i latou.”—Mataio 7:12.

   Lona uiga: E tatau ona tatou feutagaʻi ma isi i se auala agalelei ma faaaloalo, e pei o le auala e tatou te mananaʻo e feutagaʻi mai ai isi iā i tatou.

•   Manatu o le Tusi Paia: “Ona ua outou tuu ese le taufaaʻoleʻole, ia taʻitasi outou ma tautala i le mea moni ma lona tuaoi.”—Efeso 4:25.

   Lona uiga: E tatau ona tatou faamaoni i a tatou upu ma gaoioiga.

 Mo nisi faamatalaga i lenei mataupu, faamolemole faitau i:

•   Le Olomatamata ua faaulutalaina “Saʻo ma le Sesē—Taʻiala E te Maufaatuatuaina.”

•   Le mataupu “Magafagafa—Le Vaaiga Paleni a le Tusi Paia.”