Iloiloga: Po o oʻu popole tele i oʻu foliga vaaia?
O lē fea faaupuga e fetaui lelei iā te oe?
E lē taitai ona ou fiafia i oʻu foliga vaaia.
E iai taimi ou te fiafia ai i oʻu foliga vaaia.
Ou te fiafia i oʻu foliga vaaia i taimi uma.
O le ā se vaega o lou tino e te manaʻo e sui?
Umī
Mamafa
Fuaitino
Lauulu
Paʻu o le tino
Tetelē o maso
Isi vaega
Faauma le fuaiupu lenei.
Ou te matuā popole i loʻu tino . . .
pe a fua loʻu mamafa.
pe a ou vaai i le fāʻata.
pe a ou faatusatusa aʻu i isi (o aʻu uō, tagata i ata tifaga, models).
Faauma le fuaiupu lenei.
Ou te fuaina loʻu mamafa . . .
i aso taʻitasi.
i vaiaso taʻitasi.
a tele e faatasi i le vaiaso.
O lē fea faaupuga e sili ona faamatalaina ai ou faalogona?
E lē fiafia i foliga vaaia. (Faaaʻoaʻoga: “O taimi uma ou te vaai ai i le fāʻata, ou te mafaufau o loo oʻu vaai atu i se tagata lapoʻa ma matagā le fuaitino. Ua oo lava ina ou lē ʻai ina ia mafai ai ona ou lusi.”—Serena.)
Talia foliga vaaia ua iai. (Faaaʻoaʻoga: “E iai lava se mea e tatou te lē fiafia ai e faatatau i o tatou foliga vaaia, ae e iai isi mea e tatau ona tatou talia. E leai se aogā o le popole i se mea e lē mafai ona tatou suia.”—Natanya.)
Ua faapea mai le Tusi Paia ia aua neʻi faasili o tatou manatu iā i tatou lava “i lo o le mea e tatau ona manatu i ai.” (Roma 12:3) O lea, o se mea e lelei ma talafeagai lo tatou naunau i o tatou foliga vaaia. O le māfuaaga lenā e faia ai a tatou teuga ma tausia le tumamā e pei o le fufulu mamā o nifo.
Ae faapefea pe afai e masani ona e lotovaivai ona o ou foliga vaaia, ma oo atu ai lava i le soona popole i ai? Pe afai o le tulaga lenā, e te ono taumānatu . . .
‘Aiseā ou te lē fiafia ai i oʻu foliga vaaia?’
E ono tele ni māfuaaga. E aofia ai:
Aafiaga mai i faasalalauga. “Ua matuā faaosoosoina talavou i ata ia e uunaʻia ai i tatou ina ia matuā paeee ma aulelei i taimi uma. O le iʻuga, afai e tatou te lē ausia na tulaga o le a tatou ʻinoʻino iā i tatou lava.”—Kellie.
Aafiaga mai i mātua. “Ua ou mātauina pe afai e popole tele se tinā i ona foliga vaaia, e masani foʻi ona faapena lana tama teine. E mafai foʻi ona tupu lenā tulaga i tamā ma o latou atalii.”—Rita.
E leai se lagona mautinoa. “O tagata e popole tele i o latou foliga vaaia e masani ona latou mananaʻo e fai atu e isi ni faamatalaga mananaia e faatatau i o latou foliga vaaia. E lē umi ae fati ai i na ituaiga o tagata.”—Jeanne.
Po o le ā lava le māfuaaga, ae atonu o loo e tuufesili . . .
‘Pe e tatau ona suia oʻu foliga vaaia?’
Mātau tala a isi talavou.
“E lē mafai ona e suia mea uma e te lē fiafia ai e faatatau iā te oe, o lea ia talia itu lē lelei i ou foliga vaaia. Pe a e faia faapea, o le a lē ano foʻi isi i na itu lē lelei.”—Rori.
“Ia tausi lelei lou soifua mālōlōina. Pe afai e te ola mālōlōina, o le a atagia mai i lou fuaitino. Afai e faatāua e se tasi ou foliga vaaia ae e lē talisapaia le ituaiga tagata moni e iai oe, e lē o sau uō la lenā tagata.”—Olivia.
Manatu autū: Ia fai le mea e te mafaia ina ia e foliga aulelei ai. Ae aua le soona faamamafaina i lou mafaufau. O le soona popole i ou foliga vaaia e mafai ona avea o se lamatiaga. (Tagaʻi i le “Faamatalaga a Julia.”)
I le isi itu, o le iai o se vaaiga paleni o le a fesoasoani iā te oe e aua le soona popole i lou fuaitino, e pei ona taʻua e se tamaʻitaʻi talavou e igoa iā Erin. Ua ia faapea mai: “O le mea moni e iai oʻu lagona lē mautonu, ae ua ou mātauina pe a sesē mea ou te taulaʻi i ai ou te lagona le lotovaivai. O lea ou te faamalositino ai e lē aunoa ma taumafa i meaʻai paleni. O le iʻuga, o le a faasolosolo ina iai ni suiga lelei.”
Le itu e sili ona tāua!
Pe a iai se vaaiga paleni iā te oe lava e faatatau i ou foliga vaaia, e lē gata o le a lelei ou faalogona ae e te foliga aulelei ai foʻi. E mafai ona fesoasoani mai le Tusi Paia. O loo faalaeiauina ai oe ina ia taulaʻi i vala nei:
Lotomalie. “E sili ona lelei o le mea ua maua mai, i le mea ua manao i ai le loto; o le mea faatauvaa foi lea, ma le ʻai i le matagi.”—Failauga 6:9, Tusi Paia Samoa-Lomiga 1969.
Se vaaiga paleni i le faamalositino. “E itiiti le aogā o le faamalositino.”—1 Timoteo 4:8.
Uiga lelei. “O le tagata e vaai i le tino; a o Ieova e vaai i le loto.”—1 Samuelu 16:7.
“E iloa i o tatou foliga o tatou faalogona e faatatau iā i tatou lava. Pe afai e lotomalie se tasi, e mafai ona iloa mai e isi ma faigofie ona tosina atu i lenā tagata.”—Sarah.
“E vave ona uaʻi atu tagata iā te oe pe afai e te aulelei, ae o le a sili atu ona latou manatua oe pe a lelei ou uiga.”—Phylicia.
