Le itu lē lelei: E mafai e le matamuli ona taofia oe mai i le mauaina o ni faauōga lelei ma le aʻoaʻoina o ni mea aogā.

 Le itu lelei: E lē o taimi uma e lē lelei ai le matamuli. E mafai ona fesoasoani iā te oe e mafaufau muamua ai a o leʻi fai atu se tala, ma avea ai oe o se tagata e sili ona mataalia ma faalogologo lelei.

 Le itu e sili ona lelei: E mafai ona e pulea aafiaga lē lelei o le matamuli, ona e lē o se uiga e tumau pea. O le a talanoaina i lenei mataupu le auala e faia ai faapea.

•  Ia iloa māfuaaga e te matamuli ai

•  Auala e fai ai

•  Tala a isi talavou

 O le matamuli e māfua ai ona e popole e talanoa faafesagaʻi ma tagata. O le iʻuga, e te ono lagona ai le faaesea mai i isi, e tai pei o loo e iai i se potu pogisa. Peitaʻi, pe a e malamalama i māfuaaga e te matamuli ai, o le a e iloa ai e lē manaʻomia ona e popole. Mātau māfuaaga nei e tolu.

•   Māfuaaga #1: “Ou te lē iloa po o ā mea e talanoa ai.”

   Mea moni: E sili atu ona manatua e tagata o latou faalogona i la outou talanoaga, nai lo o au tala na fai atu. E mafai ona e pulea lenā popolega e ala i le atiaʻe o le tomai e faalogologo lelei ai, ma faaalia le naunau moni i faamatalaga o loo fai mai e isi.

   Mea e mafaufau i ai: O lē fea uō e sili ona e fiafia i ai? O se uō e tautala soo, po o se tasi e faalogologo lelei?

•   Māfuaaga #2: “O le a manatu tagata ou te lē fiafia iā i latou.”

   Mea moni: E tusa pe e te matamuli pe e leai, e eseese uma manatu o tagata e faatatau iā te oe. E mafai ona e pulea lenā popolega, pe a e fesoasoani i tagata e maua le manatu saʻo e faatatau iā te oe, e ala i le faailoa atu o le ituaiga tagata e iai oe.

   Mea e mafaufau i ai: Pe afai e te mafaufau e sesē le vaaiga a tagata iā te oe, pe ua e lē faia ai se faaiʻuga lē saʻo e faatatau iā i latou?

•   Māfuaaga #3: “O le a ou māsiasi pe a sesē saʻu tala e fai.”

   Mea moni: E tupu lenā mea i tagata uma. E mafai ona pulea lenā popolega, e ala i le vaai i lenā mea sesē, o se avanoa e faailoa atu ai e te lē o manatu e saʻo atoatoa ou manatu i taimi uma.

   Mea e mafaufau i ai: Pe e te fiafia e faifaimea faatasi ma tagata e ioe e iai foʻi taimi e latou te faia ai mea sesē?

 E te silafia? E manatu nisi tagata e lē o i latou o ni tagata matamumuli ona e tele ina talanoa i feʻau tusitusia. Ae e faigofie atu ona maua ni faauōga moni pe a talanoa faafesagaʻi. Na tusi Sherry Turkle, o se fomaʻi o le mafaufau ma o sē e tomai faapitoa i le faatekinolosi: “E faatoʻa atoatoa fesootaʻiga pe a vaai atu i foliga o le isi ma faalogo atu i lona leo.” a

•   ʻAlofia le faatusatusa. E lē faapea e tatau ona tele ni au uō. Peitaʻi, o lou sini o le pulea o lou uiga matamuli, ina ia aua ai neʻi e misia le mauaina o ni faauōga lelei ma aʻoaʻoina ai le tele o mea aogā.

   “E lē faapea ai e tatau ona uumi talanoaga pe tautala i taimi uma. E na o le faailoa atu lava o oe i se tasi faatoʻa lua feiloaʻi, pe fai atu ni nai fesili.”—Alicia.

   Mataupu silisili o le Tusi Paia: “Ia taʻitoʻatasi ma iloilo ana lava galuega, ona iai lea o se mea e mitamita ai iā te ia lava, ae aua le faatusatusa atu i le isi tagata.”—Kalatia 6:4.

•   Ia mataalia. Ia mātau tagata e fiafia e talanoa i isi ma le auala e latou te talanoa ai. O ā mea e latou te faia? O ā mea e latou te lē faia? O ā o latou tomai e te manaʻo e atiaʻe?

   “Ia mātau ma aʻoaʻo mai iā i latou e faigofie ona talanoa atu i isi. Mātau a latou gaoioiga ma faamatalaga pe a faatoʻa feiloaʻi i se tagata.”—Aaron.

   Mataupu silisili o le Tusi Paia: “E pei ona faamaʻai e le uʻamea le uʻamea,E faapena foʻi ona faamaʻai e le tasi tagata o lana uō.”—Faataoto 27:17.

•   Ia fai atu ni fesili. E masani lava ona fiafia tagata e faaali o latou manatu i mataupu eseese. O le fai atu la o ni fesili, o se auala lelei e amata ai ni talanoaga ma i latou. O le a lē uaʻi atu ai foʻi le talanoaga iā te oe.

   “O le a faaitiitia lou popole pe a e sauniuni se tala e fai atu. E mafai ona e mafaufau i ni mataupu po o ni fesili e fai atu a o leʻi auai i se faatasiga, ina ia faaitiitia ai lou popole pe a feiloaʻi i ni tagata fou.”—Alana.

   Mataupu silisili o le Tusi Paia: “Vaavaai ma le naunau e lē gata i au lava mea, ae i mea foʻi e lelei ai isi.”—Filipi 2:4.