Ua fai mai se talavou e igoa iā Will: “E ono mafai ona avea le Tusi Paia o se mea e lē fiafia i ai pe afai e te lē iloa le auala saʻo e faitau ai.”

 Pe e te fia iloa le auala e te maua ai le fiafia i lau faitauga Tusi Paia? O le a fesoasoani lenei mataupu iā te oe.

•  Ia ola manatu o le Tusi Paia o loo faitauina

•  Saʻiliʻili atili!

•  Tala a isi talavou

 Ia faaaofia ai oe i mea o loo e faitauina. E te ono faaaogā auala nei:

1.   Filifili se tala mai le Tusi Paia o loo e manaʻo e suʻesuʻe. E te ono filifili se mea na tupu o loo i le Tusi Paia po o se mau mai tusitusiga a Evagelia, pe filifili foʻi se tala mai le tuufaatasiga o tala faalogologo faale-Tusi Paia o loo i le jw.org.

2.   Faitau le tala. E mafai ona faitau na o oe lava, po o le faitau leotele foʻi faatasi ma uō po o tagata o lou aiga. E mafai ona faitau e le tasi vaega a le faamatala ae faitau e isi vaega a tagata o le tala.

3.   Faataʻitaʻi se mea se tasi pe sili atu foʻi o fautuaga nei:

   •   Tusi ni ata e faamatala mai ai le tala. Pe tusi se faasologa o ata o loo faamatala mai ai se tala​—o ni ata e faigofie ona faataʻitaʻi mai ai le faagasologa o ni mea na tutupu. Tusi se faamatalaga e faamatala mai ai mea o loo tutupu i vaaiga taʻitasi i ata.

   •   A o e faitau faatatau i se tagata faamaoni, tusi i lalo ona uiga ma ana gaoioiga faatasi ai ma faamanuiaga na ia maua.

   •   Ia sui le ata i se tala fou o loo e faasalalauina atu. Ia faia se lipoti o le mea na tupu mai ni vaaiga eseese, ma faaaofia ai ni “faatalanoaga” ma tagata autū o le tala ma ē na molimau.

   •   Seʻi faaata le ese o se iʻuga e oo i ai le tala pe afai na faia e se tasi i le tala se filifiliga lē atamai. Mo se faataʻitaʻiga, mafaufau i le faafitia e Peteru o Iesu. (Mareko 14:66-72) Sa faapefea ona ono tali lelei atu Peteru i omiga?

   •   Afai o oe o se tagata sogasogā, ia faataʻitaʻi la ona tusi sau lava tala e faavae mai se tala mai le Tusi Paia. Ia faaaofia ai lesona e mafai ona aʻoaʻoina mai le tala.​—Roma 15:4.

 Pe a toe iloilo faamatalaga, e mafai ona e maua ai ni ʻoa sa natia i se tala. O le mea moni, o se upu se tasi pe lua e te maua mai se tala i le Tusi Paia, e tāua.

 Mo se faataʻitaʻiga, faatusatusa le Mataio 28:7 ma le Mareko 16:7.

•    Aiseā na faaaofia ai e Mareko le manatu faapea, o le a faaali atu Iesu i ona soo “ma Peteru”?

•  Faamatalaga: E leʻi molimauina e Mareko nei mea na tutupu, ae manino mai, na maua mai ana faamatalaga mai iā Peteru.

•  ʻOa natia: Aiseā na lagona ai e Peteru le mautinoa, ina ua faalogo o loo manaʻo Iesu e fia feiloaʻi iā te ia? (Mareko 14:66-72) Na faapefea ona avea Iesu ma uō moni a Peteru? E faapefea ona e faaaʻoaʻo iā Iesu ma avea ai oe ma uō moni i isi?

 Pe a ola manatu o loo e faitauina ma saʻiliʻili atili faamatalaga, o le a avea la le faitauina o le Tusi Paia o se mea e sili ona e fiafia i ai!