I le lalolagi i aso nei, ua vāai tagata i le faamaoni o se mea e lē lelei. Ona o lea, ua manatu ai nisi e faapea:

•   ʻA ou lē pepelo i oʻu mātua, o le a lē mafai la ona ou toe faia mea ou te manaʻo ai.’

•   ʻA ou lē kopi i le suʻega lenei, ou te ono lē pasi la.’

•   ʻA ou lē gaoia le mea lea, e tatau ona ou faaputuina le tau.’

 E ono faapea mai nisi, ʻE lē o se faafitauli lenā mea. Pe lē o tagata uma e lē faamaoni?’

 O le tali i lenā fesili o le leai. E toʻatele tagata​—e aofia ai ma le toʻatele o talavou​—e talitonu e tauia le faamaoni, ma i ni māfuaaga lelei. Ua taʻua i le Tusi Paia, “o le mea e lūlūina e le tagata, o le mea lava lea e na te seleseleina mai.” (Kalatia 6:7) I nisi faaupuga, e iai lava āuga o a tatou gaoioiga​—a lē o le lelei, o le leaga.

 Seʻi iloilo, mo se faataʻitaʻiga, ni āuga leaga na selesele e tagata ona o le pepelo.

“Na ou pepelo i loʻu tinā e faatatau i loʻu talanoa i se tama. Na matuā iloa lelei e loʻu tinā ou te lē o tautala saʻo. Ina ua uma le faatolu o taimi o oʻu pepelo pea, na matuā lē fiafia loʻu tinā. Na lē mafai ona ou toe faia mea ou te manaʻo ai mo le lua vaiaso, ma na faasā ona toe faaaogā laʻu telefoni pe matamata i le TV mo le masina. Ou te leʻi toe pepelo lava i oʻu mātua!”​—Anita.

 Ia mafaufau i ai: Aiseā na umi ai se taimi ona faatoʻā toe talitonuina lea o Anita e lona tinā?

 Ua faapea mai le Tusi Paia: “Ona ua outou tuu ese le pepelo, ia taʻitasi outou ma tautala i le mea moni ma lona tuaoi.”​—Efeso 4:25.

“Na ou pepelo i oʻu mātua ma loʻu manatu la te lē iloa, ae mulimuli ane na la faatonu aʻu e toe faamatala atu le mea na ou fai atu ai sa tupu. Na matuā ese lava mai le mea na tupu ua ou lē manatua ai aʻu tala sa fai. A e tautala saʻo i le amataga, o le a leai la se faafitauli!”​—Anthony.

 Ia mafaufau i ai: Na ono mafai faapefea e Anthony ona ʻalofia lenā tulaga faalumaina?

 Ua faapea mai le Tusi Paia: “O laugutu pepelo e inosia e Ieova, ae e fiafia o ia iā i latou e gaoioi ma le faamaoni.”​—Faataoto 12:22.

“E iai lau uō o le fiafia ia e teuteu faamanaia ana faamatalaga e fai. E na te faatelē pe aumaia foʻi na o se vaega o se faamatalaga. Ou te alofa i ai ma ou te taumafai e aua le soona faamamafaina ana tala e fai. Ae o le faigatā ia ona ou talitonu pe maufaatuatuaina o ia.”​—Yvonne.

 Ia mafaufau i ai: E ono mafai faapefea i le faatelē o se faamatalaga ma ni tala lē saʻo “lāiti” ona aafia ai le talaaga o le uō a Yvonne?

 Ua faapea mai le Tusi Paia: “Matou te mananaʻo ina ia faia mea uma ma le faamaoni.”​—Eperu 13:18.

 Seʻi iloilo nisi o āuga lelei e seleseleina pe a faamaoni.

“Na paʻū se tupe a se fafine na savali atu i oʻu luma. Na ou valaau atu iā te ia ma toe faafoʻi i ai lana tupe. Sa ia matuā lotofaafetai. Na ia faapea mai: ʻE ese ma lou lelei. E lē o toe toʻatele ni tagata faamaoni e mafai ona faia lenā mea.’ O se faalogona lelei le iloaina o loo mātau mai e isi o loo e faia le mea saʻo!”​—Vivian.

 Ia mafaufau i ai: Aiseā na ono faateʻia ai le fafine i le vaaia o lenei ituaiga faamaoni? Na faapefea ona maua e Vivian aogā ona o lona faamaoni?

 Ua faapea mai le Tusi Paia: “E fiafia i latou e . . . faia le amiotonu i taimi uma.”​—Salamo 106:3.

“Matou te galulue o se aiga i se pisinisi e faia galuega faamamā, ma o nisi taimi matou te tau ai i se tupe o taatia i le fola o le fale. Pe a tupu lenā mea, ona matou tuu lea o le tupe i luga o se kesi o loo latalata ane. Na tau lē fiafia se tasi o tagata faigaluega ona o lo matou faamaonit​—Na ia faapea mai, ʻE na o se tupe siliva!’. Ae tou te iloa? Sa ia maufaatuatuaina i matou.”​—Julia.

 Ia mafaufau i ai: Na faapefea i le iai o se talaaga lelei o le faamaoni ona tauia ai Julia ina ua ia manaʻomia se tusi faamaonia mo le saʻilia o se isi ana galuega?

 Ua faapea mai le Tusi Paia: “Ia e taumafai malosi e avea oe ma lē ua finagalo malie i ai le Atua, o se tagata faigaluega e leai se mea e mā ai.”​—2 Timoteo 2:15.

“Na maua loʻu totogi mo le 80 itula faigaluega nai lo o le 64 itula. E ui o se mea manaia pe ana tuu pea, ae e lē mafai ona ou faia faapea. Na ou faailoa atu i le pule o le vaega o tupe, ma na ia matuā talisapaia. O loo taulau manuia le kamupani, ae ou te leʻi fuafua e faaaogā se mea e pei o se tupe gaoi.”​—Bethany.

 Ia mafaufau i ai: Pe itiiti le lē faamaoni pe a e gaoia se tupe mai i se kamupani nai lo o le gaoia o se tupe mai i se isi tagata?

 Ua faapea mai le Tusi Paia: “E inosia e Ieova le tagata fai mea piʻopiʻo, ae e mafuta vavalalata atu o Ia i ē ua amio saʻo.”​—Faataoto 3:32.