O le ā e Faasino Atu i ai Papelonia le Aai Tele?

PLAY

Le tali a le Tusi Paia

O loo faamatalaina i le tusi o Faaaliga se “fafine,” “o le fafine talitane sili” ma o lona igoa “o le mea lilo lea: ‘Papelonia le Aai Tele.’” (Faaaliga 17:1, 3, 5) Ua faaata mai e lenei fafine le tuufaatasiga o lotu sesē uma a le lalolagi, o i latou ia ua “fesuiaʻia le upu moni a le Atua ma le upu pepelo.” a (Roma 1:25) E ui e eseese auala e fai ai a latou tapuaʻiga, ae o loo latou taʻitaʻieseina tagata mai i le tapuaʻi atu i le Atua moni o Ieova.—Teuteronome 4:35.

Auala e iloa ai Papelonia le Aai Tele

O Papelonia le Aai Tele e faafaatusa. O le tusi o Faaaliga o loo faailoa mai “i faailoga,” ma e talafeagai ona faapea atu o Papelonia le Aai Tele e lē o se fafine moni, ae e faafaatusa. (Faaaliga 1:1) E lē gata i lea, o loo ‘tiʻetiʻe o ia i luga o vai e tele,’ lea e faaata mai ai “tagata, ma motu o tagata, ma nuu, ma gagana.” (Faaaliga 17:1, 15) E lē mafai e se fafine moni ona faia lenā mea.
O Papelonia le Aai Tele o se faalapotopotoga faavaomalo. E taʻua o ia o “le aai tele lea e pule i tupu o le lalolagi.” (Faaaliga 17:18) O lona uiga, e iai lona aafiaga ma ana taaʻiga i le lalolagi atoa.
O Papelonia le Aai Tele o se faalapotopotoga faalotu, ae lē o se vaega faapolotiki pe faapisinisi. O Papelonia anamua o se aai mapolotu, ae lauiloa foʻi i ana faiga “faalauatau” ma “togafiti faataulāitu.” (Isaia 47:1, 12, 13; Ieremia 50:1, 2, 38) O le mea moni, na auai tagata o le aai i tapuaʻiga sesē e tetee atu ai i le Atua moni o Ieova. (Kenese 10:8, 9; 11:2-4, 8) O le faasausili o tupu o Papelonia na latou faasilisilia ai i latou lava nai lo o Ieova ma lana tapuaʻiga. (Isaia 14:4, 13, 14; Tanielu 5:2-4, 23) E faapena foʻi Papelonia le Aai Tele, ua lauiloa i ana “faiga faaagaga,” ma ua iloa ai o ia o se faalapotopotoga faalotu.—Faaaliga 18:23.

E lē mafai ona faapea atu o Papelonia o se faalapotopotoga faapolotiki, ona e taufaitagituʻi “tupu o le lalolagi” i lona faaumatiaga. (Faaaliga 17:1, 2; 18:9) E lē mafai foʻi ona faapea atu o ia o se faalapotopotoga faapisinisi, ona o loo faaeseese o ia e le Tusi Paia mai i “le ʻaufaatauʻoa o loo femalagaaʻi o le lalolagi.”—Faaaliga 18:11, 15.
Ata na puʻeina e le British Museum

O le maa faamanatu o le tupu Papelonia o Naponita, ma o loo iai faailoga o atua tolutasi o Sin, Ishtar, ma Shamash

Ua talafeagai ona faaata mai e Papelonia le Aai Tele ia lotu sesē. Nai lo le aʻoaʻoina o tagata e vavalalata atu i le Atua moni o Ieova, ae ua latou taʻitaʻisesēina tagata e tapuaʻi atu i isi atua. O loo faamatalaina lenei gaoioiga i le Tusi Paia, o le “faitaaga” faaleagaga. (Levitiko 20:6; Esoto 34:15, 16) O loo faaauau pea ona aʻoaʻo e le tele o lotu sesē aʻoaʻoga na amata mai i Papelonia anamua, e pei o le tolutasi, o le ola pea o le agaga pe a oti, ma le faaaogāina o faatusa i tapuaʻiga. Ua nini faatasi a latou tapuaʻiga ma le manaʻo i le lalolagi. O loo faamatalaina nei gaoioiga lē faamaoni i le Tusi Paia, o le mulilua faaleagaga.—Iakopo 4:4.

Ua talafeagai lelei le tulaga tamaoaiga ma le faalialiavale o lotu sesē, ma le auala o loo faamatala ai i le Tusi Paia Papelonia le Aai Tele, o loo ‘ofu i ofu violē ma le ofu mūmū sesega’ ma ua “teuteuina i auro, ma maa tāua, ma penina.” (Faaaliga 17:4) O Papelonia le Aai Tele, o le faapogai o “mea e inosia i le lalolagi,” po o aʻoaʻoga ma gaoioiga e lē faamamaluina ai le Atua. (Faaaliga 17:5) O i latou e auai i lotu sesē, o “tagata, ma motu o tagata, ma nuu, ma gagana” ia o loo lagolagoina Papelonia le Aai Tele.—Faaaliga 17:15.

E tuuaʻia Papelonia le Aai Tele i le feoti o “tagata uma ua fasiotia i le lalolagi.” (Faaaliga 18:24) A o faagasolo taimi, na tausolomua lotu i le lagolagoina o taua ma faiga faatupu faalavelave, nai lo o le aʻoaʻoina o tagata i le upu moni e faatatau iā Ieova le Atua alofa. (1 Ioane 4:8) Ua iʻu atu ai i le faateleina o le faamasaatoto.

O le ā le silafaga a le Atua iā Papelonia le Aai Tele?

I le silafaga a le Atua, ‘ua tele agasala a Papelonia le Aai Tele ma ua oo atu i le lagi.’ (Faaaliga 18:4, 5) Ua matuā lē fiafia le finagalo o le Atua i lotu sesē ona o aʻoaʻoga sesē ua latou faia e faatatau iā te ia, faapea le faileagaina o ona tagata tapuaʻi.

O le ā o le a tupu iā Papelonia le Aai Tele?

Ua faapea mai le Tusi Paia, “ua faailoa atu e le Atua lana faasalaga” o Papelonia le Aai Tele. (Faaaliga 18:20) O loo valoia i le Tusi Paia i se gagana faafaatusa, le auala o le a faaumatia ai e le Atua lotu sesē uma. (Faaaliga 18:8) O le a ia uunaʻia se manufeʻai e lanu mūmū sesega, lea e faaata mai ai se faalapotopotoga malosi faapolotiki o le a osofaʻia lotu sesē ma faaumatia atoatoa. (Faaaliga 17:16, 17) Ioe, ‘o le a vave ona lafotūina Papelonia le aai tele, ma e lē toe maua lava o ia.’ (Faaaliga 18:21) O lea, ua tatau ai iā i latou e mananaʻo e faafiafia le finagalo o le Atua ona “ō ese ai mai iā i latou,” ma vavaeese mai i lotu sesē.—2 Korinito 6:14-17.

a Tagaʻi i le mataupu “E Faapefea Ona Ou Iloa le Tapuaʻiga Moni?”