“Tau ina ia faatutumuina outou i le olioli uma ma le filemu e le Atua e aumaia ai le faamoemoe ona ua outou talitonu, ina ia tupu tele ai lo outou faamoemoe i le mana o le agaga paia.”—Roma 15:13, Faaliliuga a le Lalolagi Fou.

 “O le Atua foi e tupu mai ai le faamoemoe, ia faatutumuina outou e ia i le olioli uma atoa ma le filemu, ina ua faatuatua; ina ia tele lava lo outou faamoemoe ona o le mana o le Agaga Paia.”—Roma 15:13, Tusi Paia Samoa—Lomiga 1969.

 E ala mai i nei upu, na faailoa mai ai e Paulo lona faanaunauga ina ia faatumulia e le Atua ona uso talitonu, i le “olioli ma le filemu.” O nei uiga lelei e fesootaʻi atu i le faamoemoe ua aumaia e le Atua, ma le malosi o le agaga paia.

 Ua tatou aʻoaʻoina le faamoemoe ua aumaia e le Atua e ala mai i lana Afioga le Tusi Paia. Ua taʻua i le Roma 15:4, “o mea uma na tusia i aso ua mavae [i le Tusi Paia], na tusia e faatonu ai i tatou, ina ia tatou maua le faamoemoe e ala i lo tatou tumau, ma le faamāfanafana mai o Tusitusiga Paia.” Ua faailoa mai i le Tusi Paia le folafolaga a le Atua e foʻia faafitauli lea e foliga mai ai ua leai se faamoemoe i aso nei e pei o le mativa, faiga lē tonu, maʻi, ma le oti. (Faaaliga 21:4) O le a faataunuuina e le Atua nei folafolaga e ala iā Iesu Keriso. O le māfuaaga lea e mafai ai ona tatou faamoemoe mo se lumanaʻi sili ona lelei.—Roma 15:12.

 E faatoʻā mafai ona “tupu tele” lenei faamoemoe ua tuuina mai e le Atua iā i tatou, pe a tatou maufaatuatuaina o ia. O le tele e tatou te aʻoaʻoina e faatatau iā te ia, o le tele foʻi lenā o le tatou mautinoa o le a ia faataunuuina ana folafolaga. (Isaia 46:10; Tito 1:2) E mafai e se tasi ona maua le olioli ma le filemu e tusa po o feagai ma faigatā, ona o le faamoemoe maufaatuatuaina ua aumaia e le Atua.—Roma 12:12.

 O le filemu, olioli, ma le faamoemoe e fesootaʻi atu foʻi i le “agaga paia,” o le mana galue lea o le Atua. a E faaaogā e le Atua lona agaga paia e faataunuu ai ana folafolaga, ma o lenā mea ua aumaia ai se faamoemoe. E mafai foʻi e lenei agaga ona atiaʻe uiga lelei i tagata, e pei o le olioli ma le filemu.—Kalatia 5:22.

 O le tusi o Roma o se tusi na avatu i Kerisiano na nonofo i le aai o Roma. O nisi o na Kerisiano o ni tagata Iutaia. Na faalaeiauina i latou e Paulo ia galulue malolosi ina ia autasi i manatu ma gaoioiga, e ui i le eseese o latou talaaga ma aganuu.—Roma 15:6.

 Na faamanatu atu e Paulo i Kerisiano i Roma le valoaga a le Atua, o le a iai se taimi o le a autasi ai tagata o nuu uma e vivii iā te Ia. Ina ia faamaonia lenā manatu, e faafā ona sii mai e Paulo Tusitusiga Paia Eperu. b (Roma 15:9-12) O le manatu tāua lenei: E mafai e tagata Iutaia ma tagata o nuu uma lava ona maua aogā mai le faiva a Iesu. E mafai e i latou uma ona maua le faamoemoe mai i le Atua. Sa tatau la iā i latou uma i le faapotopotoga i Roma ona “talia e le tasi le isi,” e tusa pe e eseese o latou talaaga ma aganuu.—Roma 15:7.