“O so o se mea e tou te faia, ia galue i ai ma le lotoatoa, e pei o loo faia iā Ieova ae e lē o tagata.”—Kolose 3:23, Faaliliuga a le Lalolagi Fou.

 “O mea uma lava tou te faia, ia faia ma le loto, peiseai ua faia i le Alii, a e le o tagata.”—Kolose 3:23, Tusi Paia Samoa—Lomiga 1969.

 E tatau i se Kerisiano ona taumafai malosi e avea o sē e galue mamafa, ona e fesootaʻi lana vaaiga i galuega ma lana tapuaʻiga iā Ieova le Atua.

 “O so o se mea e tou te faia.” O i latou e mananaʻo e tapuaʻi iā Ieova, e taumafai e faatatau fautuaga a le Tusi Paia i mea uma e latou te faia. E latou te taumafai e galulue mamafa, faamaoni, ma maufaatuatuaina i a latou galuega i aso faisoo i le fale, i galuega ma i le aʻoga.—Faataoto 11:13; Roma 12:11; Eperu 13:18.

 “Ia galue i ai ma le lotoatoa.” O le faaupuga “ma le lotoatoa” ua faaliliuina mai i le faaupuga Eleni lea e “faamatala ai se tasi o loo maumauaʻi e faia le finagalo o le Atua e ala i lona malosi atoa.” a

 O se tagata e galue faapena, e na te faaaogā atoa lona malosi i le tino ma le mafaufau, e faia ai le mea sili i se galuega o loo ia galue ai. I isi Tusi Paia ua faaliliuina ai le faaupuga lenei i le “lotoatoa” (New Catholic Bible) po o le “faia ma le loto.” (Tusi Paia Samoa—Lomiga 1969).—Tagaʻi i “ Isi Faaliliuga o le Kolose 3:23.”

 “Faia iā Ieova ae e lē o tagata.” E faatāua e Kerisiano so o se galuega e latou te faia, ona e aafia ai la latou faiā ma Ieova le Atua. E latou te faamuamua le faafiafiaina o ia, nai lo o pule o galuega po o se isi tagata. Pe a galue mamafa se Kerisiano ma faaalia uiga lelei i le galuega, o le a atagia atu ai le ituaiga tagata e iai o ia, ma le Atua o loo ia tapuaʻi i ai. O le faia faapea, e faia ai e se Kerisiano le mea e na te mafaia ina ia “aua lava neʻi upuleagaina le suafa o le Atua.”—1 Timoteo 6:1; Kolose 3:22.

 O le tusi o Kolose na tusia e le aposetolo o Paulo mo Kerisiano i le aai o Kolose anamua. b Na ia tusia a o lata ina uma lona faasalaga i Roma, i le pe ā o le 60-61 T.A.

 O loo iai i le tusi o Kolose fautuaga e fesoasoani i Kerisiano e eseese talaaga ma tulaga, ina ia tapuaʻi i le Atua ma le autasi. (Kolose 3:11) Ua faalaeiauina ai i latou e faaaʻoaʻo i uiga o le Atua e pei o le alofa, agalelei, ma le alofa mutimutivale. (Kolose 3:12-14) O loo faamatala ai foʻi le fesootaʻiga o la tatou tapuaʻiga i le Atua ma isi vala uma o o tatou olaga.—Kolose 3:18–4:1.

 “O so o se mea e te faia, ia faia ma le lotoatoa, e pei o loo e faia mo le Alii ae lē mo nisi.”—New Catholic Bible.

 “O mea uma lava tou te faia, ia faia ma le loto, peiseai ua faia i le Alii, a e le o tagata.”—Tusi Paia Samoa—Lomiga 1969.

 “O so o se galuega e te faia, ia tuu atoa i ai lou loto ma lou malosi, e pei o loo e galue mo le Alii, ae lē o tagata.”—The New Testament in Modern English, saunia e J. B. Phillips.

 Ia matamata i lenei vitiō puupuu o loo aumaia ai se aotelega o le tusi o Kolose.