O nisi talavou e lē usitaʻi i tulafono a o latou mātua. O nisi e taufaasesē i o latou mātua, atonu e pepelo i ai, pe sosola ese mai i le fale ina ia faatasitasi ma a latou uō. O le ā e te faia pe a lē usitaʻi lau tama talavou ma lē maufaatuatuaina ai?

•  Pe e fouvale laʻu tama?

•  Ae ā pe a taufaasesē laʻu tama?

•  O ai e tuuaʻia?

•  E faapefea ona ou fesoasoani i laʻu tama talavou ina ia toe maufaatuatuaina o ia?

•  Tala a isi mātua

 E leai. Ua faapea mai le Tusi Paia: “Ua fusifusia le loto o le tama i le valea,” ma e masani lava e saʻo lenā manatu i talavou. (Faataoto 22:15) Ua faapea mai Dr.  Laurence Steinberg, “E vave ona faia e talavou ni filifiliga valea. O lea la, e faatalitalia lo latou faia o mea sesē.” a

 Aua e te manatu o le faanaunauga o lau tama ia lē usiusitaʻi iā te oe. Ua faailoa mai i suʻesuʻega, e manatu mamafa talavou i manatu o latou mātua e faatatau iā i latou. E tusa lava pe e foliga mai e lē o le manatu na o mātua. E ui e lē o faailoa mai e se talavou ona manatu, ae atonu e lē o fiafia o ia iā te ia lava, ma o loo mafatia ona o lona faia o se mea e lē fiafia ai mātua.

•    Po o lona siʻomaga? Ua faapea mai le Tusi Paia: “O aumea leaga e faaleagaina ai mea lelei ua masani ai tagata.” (1 Korinito 15:33) O le mea moni, e malolosi aafiaga o uō i talavou. E malolosi foʻi taaʻiga o le initaneti ma faalauiloaga o ni oloa fou. E lē gata i lea, e lē lava le poto masani o talavou. O le māfuaaga lenā e latou te faia ai filifiliga lē atamai. O lona uiga la, e tatau ona latou nofosauni e fesagaʻia iʻuga o a latou filifiliga, ina ia avea ai i latou o ni tagata e taʻumatuaina pe a matutua.

•    Po o aʻu le māfuaaga? Atonu e te manatu ua e faasāsā naʻuā ma ua māfua ai ona lē usitaʻi lau tama. Po ua e manatu foʻi ua tuufau lau tama ma saʻoloto ai o ia e fai so o se mea. Nai lo o le uaʻi atu i le mea na e faia atonu na māfua ai le faafitauli, ia mafaufau pe faapefea ona e fesoasoani e foʻia le faafitauli.

•   Ia pulea le auala e tali atu ai. Atonu e faatalitalia e lau tama oe o le a e ita. Aiseā la e lē suia ai le auala e te tali atu ai? Ia talanoa ma lau tama i se auala toʻafilemu i le māfuaaga na tupu ai le faafitauli. Po o lona fia iloa? Po o le leai o ni ana mea e fai? Po o le tuua toʻatasi foʻi? E lē avea na mea ma faamolemolega o le lē usiusitaʻi, ae e mafai ona fesoasoani iā oulua ma lau tama e malamalama lelei ai i le māfuaaga na tupu ai le faafitauli.

   Mataupu silisili o le Tusi Paia: “Aua le vave ona tautala, ma aua foʻi le vave ona ita.”—Iakopo 1:19.

•   Fesoasoani i lau tama e aʻoaʻo se lesona i le mea na tupu. Ia fesili i ai, O le ā e te aʻoaʻoina mai i le mea na tupu? O le ā se isi auala e te faia pe a toe tupu le mea lava lea e tasi? O na fesili e fesoasoani iā te oe e atiaʻe ai i lau tama le tomai e mafaufau ai.

   Mataupu silisili o le Tusi Paia: “Ia aʻoaʻi atu, ia matuā faatonu atu, ia apoapoaʻi atu ma le faapalepale ma le tomai e aʻoaʻo atu.”—2 Timoteo 4:2.

•   Fesoasoani i talavou ia malamalama e iai āuga o a latou gaoioiga. E fesoasoani faasāsāaga i talavou e latou te aʻoaʻoina mai ai ni lesona i mea sesē na latou faia. O se faataʻitaʻiga, pe a faaaogā e lau tama lau taavale e aunoa ma se faatagaga, e mafai ona e faasāina mo sina taimi ona toe fealuaʻi i le taavale.

   Mataupu silisili o le Tusi Paia: “O le mea e lūlūina e le tagata, o le mea lava lea e na te seleseleina mai.”—Kalatia 6:7.

•   Ia uaʻi atu i le auala e atiaʻe ai lou toe maufaatuatuaina o lau tama. E umi le taimi e alu ai. Peitaʻi, e tatau ona iloa e talavou e mafai ona e toe maufaatuatuaina o ia. Ia faamautinoa atu iā te ia lenā manatu. Pe a manatu le talavou e lē mafai ona e toe maufaatuatuaina o ia, atonu o le a lotovaivai ai.

   Mataupu silisili o le Tusi Paia: “Aua le faaonoono i a outou fanau, ina neʻi lotovaivai i latou.”—Kolose 3:21.