Yihowa Farciꞌraasine poletiku hajora anga wodhitannokkihu ammaꞌnonsanni kainohunni yaano Qullaawu Maxaafi yaannore harunsitanno daafiraati. Gashshaasine kakkayisate diwoꞌnaalleemmo; poletiku paarte woy dooramate shiqqinore didoorreemmo; dooramate dishinqeemmo; woy gashshoote soorrate sharrammanni sharro baalantera dikarsammeemmo. Tenne doodhinoommohu Qullaawu Maxaafi giddo ammansiisanno korkaati noo daafiraati.

•   Yesuusi poletiku silxaane uyinisita maahoyye diyiino; ninkeno isi faale haꞌneemmo. (Yohaannisi 6:15) Isi rosaanosi ‘tenne gobbare (alamere) ikka hasiissannonsakkita’ rosiisino; qoleno poletiku hajora karsantannokki gede xawise coyiꞌrino.—Yohaannisi 17:14, 16; 18:36; Maarqoosi 12:13-17.

•   Maganu Mangistera ammanama hasiꞌneemmo; Yesuusi tenne Mangistere kulanni togo yiino: “Kuni Maganu Gashshootihu Danchu Duduwi gobba baalate kulamanno.” (Maatewoosi 24:14) Maganu Mangiste daggannota dudumbeemmorenna tenne Mangiste riqimbe loonseemmore ikkinoommo daafira, baalante gobbahu wole agurina heeꞌneemmo gobbahu poletiku coyira nafa anga diwodhineemmo.—2 Qorontoosi 5:20; Efesooni Sokka 6:20.

•   Poletiku coyira karsammeemmokki daafira, babbaxxitinoti poletiku lao noonsa manni baalunkura Maganu Mangisteha dancha duduwo kulate huxuxxi diyineemmo. Coyiꞌneemmo coyinnino ikko assootinkenni, alamete qarra tirtannoti Maganu Mangiste ikkitinota ammanneemmota leellishate sharrammeemmo.—Faarso 56:11.

•   Mereeronke poletiku babbadooshshi nookki daafira, alamete deerrinni mitto ikkinohu roduuwu maamari noonke. (Qolasiyaasi Sokka 3:14; 1 Pheexiroosi 2:17) Poletiku coyira karsantanno ammaꞌno giddo noori kayinni mittimma diafidhino.—1 Qorontoosi 1:10.

 Gashshoote ayirrisa. Poletiku coyira anga wodhineemmokkiha ikkirono, heeꞌneemmo gobba gashshoote ayirrinseemmo. Tenne assanke, “Mannu baalu aleenni noo gashshaanora hajajama hasiissanno” yitannote Qullaawu Maxaafi hajajo ledo sumuu yitannote. (Roomu Sokka 13:1) Higge ayirrinseemmo, giwire baanteemmo, hattono gashshootu dagoomu keerunni eꞌꞌe fulanno gede sharramanno sharrora buusammeemmo. Gashshoote karate sharrammanni sharrora aye garinnino dikarsammeemmo; hatteentenni, “mootoollatenna gashshaano baalate Magano huuccensa” yitannota Qullaawu Maxaafi amaale harunsineemmo; roorenkanni gashshaasine magansiꞌranke kisannore assitanno woyite konne assineemmo.—1 Ximootewoosi 2:1, 2.

 Qoleno poletiku hajo lainohunni wolootu uminsa doorsha doodhate qoosso afidhinota anfoommo. Lawishshaho, gashshaasine doorranni woyite eꞌne qarra dikalanqeemmo; woy doortannore hoolate diwoꞌnaalleemmo.

 Poletiku coyira anga wodha giwa ninke haarote abbinoommote? Deeꞌni. Yesuusi soqqamaasinenna umi xibbi dirihu wolu Kiristaanino poletiku silxaane lainohunni togoo lao nooho. Biyondi Gudi Intenshiinsi yaanno maxaafi togo yaanno: “Hundi Kiristaani gashshootu aana noore ayirrisa hasiissannonsata affinoha ikkirono, poletiku hajora anga wodha hasiissanno yite diammantanno.” Oni ze Roodi tu Sivilayzeeshiini yaanno maxaafino, hundi Kiristaani “poletiku silxaane diadhanno” yiino.

 Poletikaho karsama hooganke gobbate hobbaate hunannore ikkinoni? Diꞌꞌikkino. Ninke gashshaasine yaachishannore mittoreno assineemmokkireetinna keere banxeemmo mannaati. Lawishshaho, Yukireenete gobbati Sayinsete Akkaadaame 2001nni fushshitino rippoorte laꞌno. Tini rippoorte poletikaho karsammeemmokki gara kultanni togo yitino: “Xaa yannara mitootu Yihowa Farciꞌraasineta tenne ikkito baxa hooggara dandiitanno; alba kade gashshannohu Naazinna Koministete gashshooti Yihowa Farciꞌraasine kassasinohu qaru korkaati konneeti.” Ikkollana, Yihowa Farciꞌraasine Sooviyetete gadadi yannarano “higge ayirrissanno qansichoota ikkansa leellishshino. Mangistete gatenna fabirikkate giddo ammanante loossino; qoleno Koministete gashshoote yaachishannore mittoreno diassitino.” Tini rippoorte jeefote yitannonte gede, yannankerano Yihowa Farciꞌraasine ammananna assooti “aye gobba hobbaatenna mittimma hunannore diꞌꞌikkino.”