AANIIDI QOOLIHA COYI UMO | MAGANU OLA OLAMMANNITA BAXANNO?
Hundi Waro Maganu Ola Laꞌꞌanno Gara
Hundi waro baasa gadadaaꞌmitinoti mitte daga no. Insa Maganu kaaꞌlansara duucha higge huuccidhinoha ikkirono, hakka wotira kaaꞌlinonsahu mittuno dino. Tini daga hundi waro Maganu manna ikkitinote Isiraeelete. Insa gadachitinori wolqaataamma Gibitsete dagaati. (Wolapho 1:13, 14) Isiraeele, Maganu Gibitsennihu kadote gashshooti giddonni fushshannonsa gede lowo diro agadhitanni keeshshsitino. Yannate gedensaanni, Maganu insa kaaꞌlanno yanna iillitu. (Wolapho 3:7-10) Qullaawu Maxaafi Maganu umisi Gibitsete ledo olaminota kulannonke. Isi hoode hoodete buutote qoomama dirrise Gibitsete manna qorichishino; hattono Gibitsete nugusanna olantosi Duumu Baari giddo itantanno gede assino. (Faarso 136:15) Maganu Yihowa mannisira “wolqaataamo olamaancho” ikkinota leellishino.—Wolapho 15:3, 4.
Maganu umisi Gibitsete ledo olamasi, isi baalanka ola giwanno yaa ikkitinokkita leellishshanno. Qoleno, isi mannasi Isiraeele olantanno gede hajajino woti no. Lawishshaho, lowo geeshsha bushuulle ikkinohu Kanaani manni ledo olantanno gede hajajino. (Marro 9:5; 20:17, 18) Maganu Isiraeelete Nugusa Daawiti kaajjadda Filisxeemete daga ledo olamara kulino. Wole agurina, Maganu Daawiti qeelle afiꞌrate ma garinni olamannoro nafa kulinosi.—2 Saamueeli 5:17-25.
Isiraeele bushu manni gadadisannonna waadannonsa yannara, Maganu mannasinna halaalu magansiꞌra agarate ola fajjino woti noota Qullaawu Maxaafi kulanno. Ikkollana, Maganu hajajannoha togoo ola lainohunni aane nooha sase qara coye wodanchi.
-
OLA OLAMANNOHU AYETIRO DOORINOHU MAGANO CALLAHO. Mitte hige Maganu Isiraeele togo yiino: “Konne ola olantinanniri kiꞌne diꞌꞌikkitinoonni.” Togo yiinohu mayiraati? Insa daafira olamannohu Magano umosi ikkinohuraati. (2 Zeena 20:17; 32:7, 8) Isi tenne assinohu duucha higeeti; lawishshaho mannisira yee Gibitsete ledo olaminohu iso umosiiti. Wole wote qole Maganu, mannisi Isiraeele isi fajjino ola olantanno gede hajajino; lawishshaho, Hexxote Gobbansa danna agadhate olantara fajjinonsa.—Marro 7:1, 2; Iyyaasu 10:40.
-
TOGOO OLA OLAMMANNI YANNA MURINOHU MAGANO CALLAHO. Maganu soqqamaano doyisse amadinonsa gadadinninna bushu coyi giddonni fulate olantannota, Maganu dinyino yanna cincite agadhitanno. Hatti yanna iillita geeshsha uminsanni fulte olama dihasiissannonsa. Hatto assitu yannara, Maganu dikaaꞌlinonsa. Isinni Qullaawu Maxaafi, Isiraeele Maganu fajjinokki ola olantu yanna baalantera gawajjantinota kulanno. a
-
Though God waged war against the Canaanites, he spared some, such as Rahab and her family
MAGANO MANNU REYO WOLE AGURINA BUSHUULLU REYO NAFA DIHAGIIRSIISSANNOSI. Maganu Yihowa heeshshote Buichootinna mannu ooso Kalaqaanchooti. (Faarso 36:9) Hakko daafira, isi mannu reyanna laꞌꞌa dihasiꞌranno. Ikkollana, manna gadachate wole agurina shaate seedhanno manni no; tini dadillissannote. (Faarso 37:12, 14) Togoo bunshe hoolate, Maganu ola fajjino woti no. Ikkirono, Isiraeele olantanno gede hajajino diri baalunku giddo insa gadachanno mannira isi “maarannohanna” “rahe hanqannokkiha” ikkinota leellishino. (Faarso 86:15) Lawishshaho, Maganu Isiraeele mitto katama qassara albaanni, hakko katami giddo noo manni hedonsa biddi assiꞌranno faro afiꞌreenna olu gatara ‘araaru sokka sokkanno’ gede kulinonsa. (Marro 20:10-13) Konni garinni, Maganu ‘bushu manchi reyo hagiirsiissannosikkita, hatteentenni bushu manchi doogosi biddi assiꞌre lubbote heeꞌrara hasiꞌrannota’ leellishino.—Hiziqeeli 33:11, 14-16. b
Kageeshsha laꞌnummonte gede, Maganu hundi waro duuchu gari gadadonna bunshe hunate ola horoonsiꞌrino. Ikkollana, hakkoye ola ayi olamannoronna mamoote olama hasiissannoro doorinohu manna ikkikkinni Maganoho. Maganu ola baxannohanna mannu mimmito gudanna laꞌꞌa hasiꞌrannoha ikkinoni? Hattooha diꞌꞌikkino. Isi finqille lowo geeshsha giwanno. (Faarso 11:5) Umi xibbi diro Beettisi Yesuusi Kiristoosi uullate aana soqqama hanafi yannara, Maganoho olaho noosi lao soorrantinoni?
a Lawishshaho, Isiraeele mitte higge Maganu Amaaleeqinna Kanaani daga ledo olantinoonte yee kule heeꞌreennansanni olantu yannara qeelantino. (Zehulqu 14:41-45) Lowo diri gedensaanni, ammanamino Nugusi Iyyoosiyaasi Maganu fajjinokki ola olamara fulino; kuni muddame assinori heeshshosi hooganno gede assinosi.—2 Zeena 35:20-24.
b Isiraeele Kanaani daga ledo olantara albaanni araaru sokka disokkino. Sokkinokkihu mayiraati? Korkaatuno Kanaani daga doogonsa biddi assidhanno gede 400 diro uyinoonninsa. Isiraeele insa ledo olantara daggu yannara Kanaani daga doogonsa biddi assiꞌra agurte lowo geeshsha bushshe no. (Kalaqo 15:13-16) Hakko daafira insara bao hasiissinonsa. Ikkollana, doogonsa biddi assiꞌrinohu mitu Kanaani manni lubbonsa gatisiꞌrino.—Iyyaasu 6:25; 9:3-27.
