1, 2. (a) Yihowa mannasi baxanno yite ammanatto gede assinoheri maati? (b) Mannu ooso baalantera hiitti hasatto noonsa?

 YIHOWA mannasi baxannota ammanatto gede assinoheri maati? Tenne xaꞌmora dawaro mannu mannu garinni babbaxxitara dandiitanno. Hanni mito lawishsha lai: Taaliini yinanniti mitte rodoo, assanni noommari garire diꞌꞌikkino yite quwa saꞌannokki gede ammanate roduuwise duucha higge amaaltinose. Ise togo yitino: “Yihowa baxannoekkiha ikkoommero, togo marro marro hige diamaalannoe.” Minaannise reyihu gedensaanni lame qaaqquulle callase lossidhinoti Birijati yinanni rodoo togo yitino: “Sheexaanu alamera heeꞌne ooso lossiꞌra, hakko iso annu callisi woy ama callase lossidhannoha ikkiro, lowo geeshsha qarraho. Ikkirono, Yihowa buutote qarrinna dadillu yannara massaginoe daafira baxannoeta huwatoomma; qoleno wolqaꞌyara aleenni ikkinori iillaera wore diagurannoe.” (1 Qor. 10:13) Sandira yinanni rodoo hurannokki dhibbi waadannose. Qoqqowu gambooshshiwa mittu egennamino rodii galte affe hasaawissuse. Sandira minaanni togo yiino: “Tenne rodoo ledo alba egennammoommokkiha ikkirono, ise ninke daafira togo ikkite xissiisiꞌrase wodaninke hagiidhanno gede assitino. Roduuwinke baxxannonketa leellishate shiimare nafa assituro, hatti Yihowa mageeshshi geeshsha baxannonkero huwateemmo gede assitannoe.”

 ² Yihowa mannu oosora baxatenna baxamate hasatto oye kalaqino. Ikkirono, xiwanu amadannonke wote, woy angate anje heedhunkero, woy soqqanshonkenni guma afiꞌra hoongeemmo wote, Yihowa xaate dibaxannoe yine hendammora dandiineemmo. Hatto yine heda hananfoommoha ikkiro, Yihowa albaanni lowo waagi noonketanna isi “qiniiticho [anganke] amade” kaaꞌlanni noonketa qaaga hasiissannonke. Isira ammanammoommore ikkinummo geeshsha, horonta dihawannonke.—Isa. 41:13; 49:15.

3. Yihowara ninkera noosi baxilli baꞌꞌannokkiha ikkinota albinni roore ammanneemmo gede kaaꞌlannonkeri maati?

³ Aleenni qummi assini roduuwi, Maganu qarru yannara ledonsa ikkinota dihuluullantino. Ninkeno isi ledonke ikkannota ammana dandiineemmo. (Far. 118:6, 7) Konni birxichira Yihowa baxannonketa leellishshannota shoole elto laꞌneemmo; insano (1) kalaqote loososi, (2) ayyaanunni borreessamino Qaalesi, (3) huuccattotenna (4) wodote kakkalooti. Yihowa assinoha dancha coye hiincanke woy heeshshi gotti assine hedanke baꞌꞌannokki baxillesi albinni roore naandeemmo gede assitannonke.—Faarso 77:11, 12 nabbawi. a

4. Yihowa kalaqinore hiincanke maa huwanteemmo gede assitannonke?

⁴ Yihowa kalaqino coyibba laꞌne baꞌꞌannokki baxillesi huwata dandiineemmo? Ee, dandiineemmo; korkaatuno Yihowa kalaqate kaꞌꞌasi umise baxillesi leellishshannote. (Rom. 1:20) Isi uulla kalaqinohu heeshshote heeꞌra dandiinanni bayicho asseeti. Ikkollana, Yihowa mulla heeꞌra calla ikkikkinni hagiidhinanni heeꞌnammora hasiꞌranno. Heeꞌrate sagale ita hasiissannonke. Yihowa uulla kalaqinohu dancha sagale ikkitara dandiitannota kiirre tunqannikkita addi addi haqqe fushshitanno gede asseeti. Wole agurina, ita umise hagiirsiissannotanna kassi assitannota ikkitanno gede assino! (Mek. 9:7) Kanaadaho heedhannoti Katiraani yinanni rodoo, roorenka badheessu woggara kalaqo hixamanyite laꞌe baasa hagiidhitanno. Heeshshote kalaqami ikkito dhagge ikkitannose; ise togo yitino: “Daraaro yannase agadhite fultanno gari, cea darantinowiinni higansa, wole agurina haamingiberdi yinanniti shiimicco ceicho nafa kusheenu maskooteꞌyara seekkoommase minira galagalte dagganno gari dhaggete. Yihowa hagiirsiisannore konne baalankare uyinonkehu baxannonke daafiraati.” Baxillaanchu iimi Anninke kalaqinore lae hagiidhanno; ninkeno kalaqino coyibbanni hagiidhinammora hasiꞌranno.—Hawaariyaatete Looso 14:16, 17.

5. Mannu ooso kalaqantino gari Yihowa baxille leellishannohu hiittoonniiti?

⁵ Yihowa heeshshonkera hagiirru lexxanno gede assannoha gumu noo looso loosa dandiineemmo gede asse kalaqinonke. (Mek. 2:24) Isi hedinohu mannu uulla woꞌmanno gede, ise gashshanno gedenna qulxuꞌme, ceanna wole heeshshote kalaqama gashshanno gedeeti. (Kal. 1:26-28) Hakkiinni saeno, Yihowa isi faale haꞌra dandiineemmo gede kaaꞌlitannonke akatta oye kalaqasi baasa baxannonketa leellishshannote!—Efe. 5:1.

6. Maganu Qaale lowo geeshsha naada hasiissannonkehu mayiraati?

⁶ Maganu ayyaanunni borreessamino Qaalesi ninkera aasi lowo geeshsha baxannonketa leellishshanno. Qaalisi isirenna isi manna ma garinni laꞌꞌannoro anfeemmo gede kaaꞌlannonke. Lawishshaho, Qullaawa Borro Yihowara duucha higge finqiltinori Isiraeelete daga ledo noosi xaadooshshe kultannonke. Faarso 78:38 togo yitanno: “Isi maarannoho; soꞌronsa gatona yiino, hattono insa dihunino. Hanqosi baala dirrisa agure, duucha hige hanqosi badhera qolino.” Konne qummeeshsha hiincakki Yihowa baxannohetanna ate daafira hedannota huwatatto gede kaaꞌlitannohe. Yihowa  ninke daafira lowo geeshsha hedannota dihuluullammeemmo.—1 Pheexiroosi 5:6, 7 nabbawi. b

7. Qullaawa Maxaafa kaffi assine laꞌꞌa hasiissannonkehu mayiraati?

⁷ Maganu ninke hasaawisannonketi qara doogo Qullaawa Maxaafa ikkino daafira, Qaalesi kaffi assine laꞌꞌa hasiissannonke. Annunna beettu mimmitu ledo giddonsata fushshite hasaabbannoha ikkiro, mereeronsa noo baxilli lexxanno, hattono mimmito roore addaxxitanno. Yihowa baxillaancho Annankeeti. Ninke iso laꞌne woy coyiꞌranna macciishshine egenninoommokkiha ikkirono, isi ayyaanunni borreessamino Qaalisi widoonni “coyishiishannonke”; hakkawote macciishsha hasiissannonke. (Isa. 30:20, 21) Yihowa heeshshonke isira sayinse uyinoommore ninke mannasi massagankera, hattono gawajjotenni agarankera hasiꞌranno. Qoleno, seekkine anfammosiranna addaxxinammosira hasiꞌranno.—Faarso 19:7, 8, 11 nabbawi; c Far. 19:9, 10; Lawishsha 1:33 nabbawi. d

8, 9. Yihowa maa anfammora hasiꞌranno? Tenne leellishshannota Qullaawu Maxaafi xagge kuli.

⁸ Yihowa baxannonkehanna guuntete xeꞌnenke calla laꞌꞌannokkiha ikkinota anfammora hasiꞌranno. Isi giddonke danchare afiꞌrate hasiꞌranno. (2 Zee. 16:9) Lawishshaho, Yihudu nugusira  Iyyoosaafixira hatto assino. Mitte hige Iyyoosaafixi, Isiraaelete nugusira Akiaabira haꞌle Raamooti-giliyaadi yinanniwa Sooriyu daga ledo olamate kaino; kuni assootisi digaraho. Hatte yannara, 400 ikkitannoti kaphaano masaalaano bushu nugusi Akiaabi ola qeele higanno yitinoha ikkirono, Yihowahu addu masaalaanchi Mikaaya kayinni qeelame higannota coyiꞌrino. Hakkiinni Akiaabi olu bayicho reyi, Iyyoosaafixino hilirella gatino. Isi Yerusaalame higita, Akiaabi ledo buusaminotera seejjinoonnisi. Hakkoyeno ikkiro, Hanaanii beetti Iyyu Iyyoosaafixi togo yiinosi: “Giddokki danchu coyi noota anfoonni.”—2 Zee. 18:4, 5, 18-22, 33, 34; 19:1-3.

⁹ Iyyoosaafixi moohi wote umi qara, mootuullu, Leewaawootunna kakkalaano Yihudu katamma baalanta hadhe mannisira Yihowa Higge rosiissanno gede assino. Kuni zamachi dancha guma abbino daafira, qooxeessaho noo daga Yihowa waajja hanaffino. (2 Zee. 17:3-10) Ee, Iyyoosaafixi gowwimmate coye assinoha ikkirono, Yihowa isi assinoha dancha coye laikki diagurino. Guuntete xeꞌne noonkere ikkinummorono, woꞌmu wodaninkenni Yihowa hagiirsiisate sharrammeemmoha ikkiro, isi baxannonketa tini Qullaawu Maxaafi xagge huwachishshannonke.

10, 11. (a) Huuccatto Yihowa uyinonkete baxxitino eltooti yineemmohu mayiraati? (b) Maganu huuccattonkera dawaro qolannohu hiittee doogganni ikkara dandaanno? (Umi misile lai.)

¹⁰ Shaqqadu anni oososi coyishiishshasira hasidhanno wote haja asse macciishshanno. Isi insa daafira lowo geeshsha hedannohura, dhiwinonsarenna yaachishinonsare afa hasiꞌranno. Iimi Anninke Yihowano kaajja huuccattote qoossonke horoonsiꞌne coyishiinsheemmosi wote macciishshannonke.

¹¹ Ayewoteno huuccattotenni Yihowa coyishiisha dandiineemmo. Isi Jaalanke ikkinohura ayewoteno huuccattonke macciishshate qixxaawinoho. Umo qummi assiniti Taaliini, “Hasiꞌnummore baala huuccattotenni isira kuꞌla dandiineemmo” yitino. Maganoho giddonketa fushshine hasaaphinummoro, isi Qullaawu Maxaafi, metseetenke woy mittu ammanate rodiinke coyiꞌrinohu jawaachishanno qaali widoonni huuccattonkera dawaro qolara dandaanno. Yihowa eeggifante huucciꞌneemmo huuccatto macciishshanno; qoleno woleho leeltannokkiti giddonke hedo isira leeltannosi. Isi huuccattonkera dawaro qolanno gari ninkera baꞌꞌannokki baxilli noosita leellishanno.

12. Qullaawu Maxaafi giddo borreessantino huuccatto xiinxalla hasiissannonkehu mayiraati? Lawishsha kuli.

¹² Maganu Qaali giddo borreessantino huuccattonni lowore rosa dandiineemmo. Konni daafira, saꞌne saꞌne maatete magansiꞌranke yannara tenne huuccatto xiinxalla kaaꞌlitankera dandiitanno. Hundiri Yihowa soqqamaano giddonsa hedo isira hasaaphitino gara hiincanke huuccattonke woyyeessiꞌrate kaaꞌlitannonke. Lawishshaho, Yoonaasi jawa qulxuꞌmicho godowira heeꞌre eeggifate huucciꞌrino huuccatto hedde. (Yon. 1:17–2:10) Salamooni beetemeqidesete maasso yannara woꞌmu wodanisinni Yihowara shiqishino huuccatto laꞌe. (1 Neg. 8:22-53) Yesuusi rosiisinota lawishshu huuccatto hiince. (Mat. 6:9-13) Roorenka kayinni, ganyitine “dhiwinoꞌne coye Maganoho kulle.” Hatto assitinoro, “wodancha baalanta roortannoti Maganu salaame, wodanaꞌnenna surreꞌne . . . agartanno.” Hakko garinni Yihowahu baꞌꞌannokki baxillira noonke galati lexxanno.—Fil. 4:6, 7.

13. Maganu baxille leellishshannoti wodote kakkalo mannu oosora mayi faro fantino?

¹³ Elto ikkitinoti Yesuusiti wodote kakkalo qixxaabbinohu ninke “heeshsho afiꞌneemmo gedeeti.” (1 Yohaannisi 4:9) Hawaariya Phaawuloosi Maganu baxille leellishshannote tenne kaajja elto daafira togo yee borreessino: “Kiristoosi dinyinoonni yannara cubbaataamu mannira reyino. Keeraanchu manchi daafira reyannoha afiꞌra qarraho; danchu manchi daafira reyannohu kayinni miteekke  heeꞌrara dandaanno. Ikkirono, Maganu cubbaataamma ikkine heeꞌneenna Kiristoosi ninke daafira reyanno gede asse baxannonketa leellishino.” (Rom. 5:6-8) Maganu baxillesi leellishinoti wole baalantenni roortannoti tini elto, mannu oosora Yihowa ledo muli jaaloomi heeꞌrannonsa gede faro fantino.

14, 15. Wodote kakkalo (a) buuramino Kiristaanira (b) uullate aana heeꞌrate hexxo noonsarira kaaꞌlitannohu hiittoonniiti?

¹⁴ Yihowa baꞌꞌannokki baxillesi boodu Kiristaanira baxxino garinni leellishino. (Yoh. 1:12, 13; 3:5-7) Kuni Kiristaani qullaawu ayyaaninni buuramino daafira “Maganu ooso” yaamamanno. (Rom. 8:15, 16) Phaawuloosi buuramino Kiristaani, ‘Kiristoosi Yesuusi ledo mittimmatenni kainotanna iimiidi basera ofollinota’ coyiꞌrino. (Efe. 2:6) Kuni Kiristaani tenne basera noota kulloonnihu, ‘raggensara taje ikkinohu qullaawu ayyaaninni sumudamino’ daafiraati; raggensa qolte ‘iima agarte noonsa hexxooti.’—Efe. 1:13, 14; Qol. 1:5.

¹⁵ Wodote kakkalo ammanannota leellishannohura rooriidi mannira kayinni, Yihowa jaalla ikkanno faro faꞌnantinonsa; qoleno, albillitte Maganu ooso ikkatenna uullate aana Gannatete hegerera heeꞌrate hexxo noonsa. Konni daafira, Yihowa wodote kakkalo widoonni mannu oosora baxillesi leellishino. (Yoh. 3:16) Uullate aana hegerera heeꞌrate hexxo noonkeha ikkironna Yihowara ammanamme soqqammeemmoha ikkiro, haaro alamera heeshsho baxissannota ikkitannota dihuluullammeemmo. Ee, wodote kakkalo Maganunniha baꞌꞌannokki baxille leellishshannote wole baalantenni roortanno tajeeti yaa garankolla!

16. Yihowa baxillesi leellishinonketa batinye doogga hiincanke maaho kaaꞌlitannonke?

¹⁶ Yihowa ninkera baꞌꞌannokki baxillesi leellishino doogga kiirre digundannite. Faarsaanchu Daawiti togo yee faarsino: “Hedokki anera lowo geeshsha muxxete! Magano, hedatto coyibba kiiro lowote! Kiirate woꞌnaalummoro, shaafa roortanno.” (Far. 139:17, 18) Yihowa baxillesi leellishinonketa batinye doogga seekkine hiincanke, ninkeno iso lubbora banxeemmo gede kakkayissannonke. Qoleno, isira assa dandiineemmore baala assineemmo.

17, 18. Magano banxeemmota leellisha dandiineemmoti mite doogga hiikkuriiti?

¹⁷ Yihowa banxeemmota leellinsheemmoti batinye doogga no. Lawishshaho, Maganu Mangisteha sabbakate looso diinaggaambe loonse Maganonna olliichonke banxeemmota leellisha dandiineemmo. (Mat. 24:14; 28:19, 20) Ammanate fonqolo dandiine saꞌꞌanke Yihowa addinta banxeemmota leellishshanno. (Faarso 84:11; e Yaaqoobi 1:2-4 nabbawi; f Yaaqoobi 1:5) Iillannonke fonqoli kabbaade ikkanno wote, Maganu albaanni muxxe ikkinoommo daafira isi shettonke huwatannota, hattono kaaꞌlannonketa addaxxa dandiineemmo.—Far. 56:8.

¹⁸ Yihowara noonke baxilli kalaqino coyibbanna wole dhaggete loososi hiincineemmo gede kakkayisannonke. Qullaawa Maxaafa ceeꞌminummokki xiinxalline Magano banxeemmotanna Qaalesi kaffi assine laꞌneemmota leellinsheemmo. Yihowara noonke baxilli huuccattote widoonni isiwa albinni roore shinqeemmo gede assannonke. Qoleno, Maganu cubbinke daafira qixxeessinota wodote kakkalo hiincanke isira noonke baxilli lexxanno gede kaaꞌlitannonke. (1 Yohaannisi 2:1, 2) Yihowaha baꞌꞌannokki baxille kaffi assine laꞌneemmota leellinsheemmote batinye doogga giddo tini gamatella.