Atera togoo xaꞌmuwa huluullitannohe? Hatto ikkiro, huluullitannohu atera calla diꞌꞌikkino. Alamete aana batinyu mannira togoo xaꞌmuwa huluullitannonsa. Tenne xaꞌmuwara dawaro afiꞌra dandiinanni?

Lowo miliyoone ikkanno manni tenne xaꞌmora, “Ee!” yee qolanno. Mayira? Xaꞌmuwansara Qullaawu Maxaafi giddonni dancha dawaro afiꞌrino daafiraati. Tenne xaꞌmuwara Qullaawu Maxaafi qolanno dawaro afa hasiꞌratto? Yihowa Farciꞌraasine mannaho Qullaawa Maxaafa rosiisate qixxeessitino pirogiraame noo daafira woxe kaffaꞌlittokki xiinxalla dandaatto. a

Qullaawa Maxaafa xiinxallannire kayinsanni wote mitu manni togo yaanno: “Yanna dinoe.” “Xiinxalla kabbaadete.” “Togoo coyi giddora ea dihasiꞌreemmo.” Wolootaho kayinni wolu gari lao noonsa. Hakko daafira Qullaawu Maxaafi yaannore rosate maahoyye yitanno. Hanni kuri giddo gamu yitinore laꞌno.

• “Kaatoliketenna Pirotestaantete beetekiristaane, Sikihi beetemeqidesenna Budistete gadaame haꞌroomma; qoleno ayyaanaamo roso rosiinsanni yuniversite eꞌꞌe rosoomma. Ikkollana Maganu daafira nooete batinye xaꞌmuwara dawaro afiꞌrummakki keeshshoomma. Hakkiinni mitte Yihowa Farciꞌraasincho qaeꞌya daggu. Ise Qullaawa Maxaafa horoonsidhe qoltinoe dawaro dhagge ikkitinoe daafira, Qullaawa Maxaafa xiinxallate sumuu yuumma.”—Giili, Ingilaande.

• “Alba heeshshote daafira batinye xaꞌmo nooe; beetekiristaanenke qeesooti qoltannoe dawaro kayinni diduushshitinoe. Ikkollana, mittu Yihowa Farciꞌraasinchi Qullaawa Maxaafa calla horoonsiꞌre xaꞌmuwaꞌyara dawaro qolie. Isi lede afa hasiꞌreemmoronna teꞌee xaꞌmieta hagiidhe maahoyye yuummo.”—Koofi, Beniini.

• “Reyino manni noo gara afa lowo geeshsha hasiꞌroommo. Reyitinori lubbote noore gawajjitara dandiitanno yee ammaneemmoha ikkirono, tenne hajo daafira Qullaawu Maxaafi yaannore afa hasiꞌrummo. Konni daafira Yihowa Farciꞌraasincho ikkinohu mittu jaaliꞌya ledo Qullaawa Maxaafa xiinxalla jammarummo.”—Zhuze, Biraazile.

• “Qullaawa Maxaafa nabbawate woꞌnaaloommaha ikkirono, yaannore huwata didandoomma. Hakkiinnino Yihowa Farciꞌraasine dagge Qullaawu Maxaafite batinye masaalore xawisse kultue. Qoleno, rosiissannori wolurino nooro afa hasiꞌrumma.”—Deniizi, Meksiko.

• “Alba Maganu isi addinta ane daafira assaawannokka yee hedeemma. Hakko daafira, Qullaawa Maxaafa borreessiisino Maganiwa huuccatto assiꞌrumma. Layinki soodo Yihowa Farciꞌraasine mineꞌya daggu; hakkiinni insa ledo Qullaawa Maxaafa xiinxallammara koyissueta maahoyye yuumma.”—Anju, Neppaali.

Tini temokkiruwa Yesuusi togo yee coyiꞌrinota qaagiissitannonke: “Ayyaanaamittete coye goodhinori hagiirraammaho.” (Maatewoosi 5:3) Ee, mannu oosora kalaqamunni ayyaanaamittete coyira hasatto noonsa. Qaalisi Qullaawu Maxaafi widoonni tenne hasattonsa wonsha dandaannohu Magano callaho.

Ikkina Qullaawa Maxaafa xiinxallinseemmohu hiittoonniiti? Qullaawa Maxaafa xiinxalla kaaꞌlitannohehu ma garinniiti? Tenne xaꞌmuwara dawaro aananno birxichira qollanni.