Hundinni jammare, mannu wedellimmate jawaantenna fayyimma afiꞌre hegerera heeꞌra halchanno. Ikkirono, ninke mannu ooso reyineemmoreeti; tini dadillissannote. Iyyoobi sasu kumi diri albaanni coyiꞌrinohu aleenni qummi assini qaali xaano addankolla.

Mannu duuchunku gawalo nookki heeshsho heeꞌra lowo geeshsha hasiꞌranno. Maganu hegerera heeꞌrate halchonna hegere heeshsho daafira hedate dandoo wodaninke giddo worinota Qullaawu Maxaafi kulanno. (Mekibibi 3:11) Tenne hendanni wote, shaqqadu Magani afiꞌneemmokki coye halchinammora tenne hasatto giddonke worannoha lawannohe? Diworanno yite hedattoha ikkiro, hatti garaho. Maganu Qaali reyo diina ikkitinotanna ‘baꞌannota’ kulanno.—1 Qorontoosi 15:26.

Reyo diinaho yaa garankolla. Garunni assaawanno manni baalunku reya dihasiꞌranno. Gawajjannonkeri tuncu yaannonke wote, milinqeemmo, maaxammeemmo, woy xoonqeemmo. Xiwammeemmo wote, hurreemmo doogo hasiꞌneemmo. Reyote widira massannonke coye baala hooꞌlate duuchare assineemmo.

Ikkina, lowo diro heeꞌrinohu kuni diini baꞌꞌanno yineemmo gede assannonkeri no? Ee, no. Kalaqaanchinke Yihowa manna kalaqinohu shiima diro heeꞌre kae reyara diꞌꞌikkino. Reyo hunda Maganu alaami giddo noore diꞌꞌikkino. Isi hedo mannu ooso uullate aana hegerera heedhanno gedeeti; qoleno tenne hedosi wonshanno.—Isayyaasi 55:11.

Reyo baꞌannohu hiittoonniitiyya? Lowo diro mannu ooso reyo hunate sharrantanni keeshshitino; kayinni sharronsa tennera abbitino mali dino. Yannankerano tenne sharro diagurroonni. Sayinsete fullahaano qixxeessitino kittiwaatinna xagga mito dhibba qeela dandiitino. Qolteno tini fullahaano heeshshote kalaqami loosamino gara seekkite xiinxallitino. Xaphoomunni laꞌniro, duuchu qooxeessira mannu xibbu diri albaanni heeꞌranno dirinni sae heeꞌranni no. Ikkollana, reyo dibaꞌino. Qullaawu Maxaafi yaannonte gede, “baalunku bushsha higganni no.”—Mekibibi 3:20.

Lowo diro keeshshinoha konne diina qeelate, mannu egenno addaxxa hasiissannonkekkita afanke hagiirsiissannote. Korkaatuno, Maganu Yihowa reyotenni ganteemmo doogo qixxeessinonke; tenne doogo qixxeessinohu Yesuusi Kiristoosi widoonniiti.