1. Zelewaawuyaani maxaafi kaaꞌlannonkehu ma garinniiti?

 ZELEWAAWUYAANI maxaafi qullaambete daafira wolu maxaafinni roorse kulanno. Yihowa soqqamaanosi baalanti qullaawoota ikkitara hasiꞌrannohura konne maxaafa seekkine buuxanna kaffi asse laꞌꞌa qullaawoota ikkine heeꞌrate kaaꞌlitannonke.

2. Zelewaawuyaani maxaafira borreessinoonni coyibba giddo mitu maati?

² Masaalaanchu Muse borreessinohu Zelewaawuyaani maxaafi, rosiisate kaaꞌlitannote ‘Qullaawa Borro’ widooti. (2 Xim. 3:16) Konni maxaafite mitte mittente fooliishshora Yihowa suꞌma mereerimunni tonne hinge borreessinoonni. Zelewaawuyaani maxaafi amadino sokka seekkine buuxanke Maganu suꞌma mishiishanno coyiwiinni xeertiꞌneemmo gede kaaꞌlitannonke. (Zel. 22:32) Konni maxaafi giddo marro marro hinge borreessinoonniti “Ani Yihowaati” yitanno qaalla Maganoho hajajama hasiissannonketa qaagiissitannote. Konni xiinxallote birxichiranna aanannohura Zelewaawuyaani maxaafi giddonni qullaawa mangansiꞌrankera kaaꞌlitannonketa mite mite assaawe laꞌneemmo.

3, 4. Aarooninna oososi hayishshiꞌransa maa leellishshanno? (Umi misile lai.)

³ Zelewaawuyaani 8:5, 6 nabbawi. a Yihowa Aarooni Isiraeelete dagara kakkalaanote biilo ikkanno gedenna isi ooso kayinni kakkalaano ikkite soqqantanno gede doorino. Aarooni Yesuusi Kiristoosi riqiwanno; oososi kayinni Yesuusire buurantino harunsaanosi riqibbanno. Ikkina, Aarooni biso hayishshiꞌrasi Yesuusi keeraaꞌma hasiissannosita leellishshannote? Deeꞌni, korkaatuno Yesuusi cubbunna “xuru noosikkiho”; konni daafira isira keeraaꞌma dihasiissannosi. (Ibi. 7:26; 9:14) Ikkollana Aarooni hayishshiꞌre keeraaꞌmasi, Yesuusi xuru noosikkihanna keeraancho ikkinota leellishshanno. Ikkina, Aarooni ooso hayishshiꞌransa maa leellishshannoyya?

⁴ Aarooni ooso hayishshiꞌransa iima kakkalaano ikkate doorantannori keeraaꞌma hasiissannonsata leellishshanno. Buurantinori cuuamansa Aarooni ooso keeraaꞌma ledo xaado afidhinoni? Diafidhino, cuuama cubbo hayishshite hooltannota diꞌꞌikkitino; hatteentenni cuuama mittu manchi woꞌmunni woꞌma isonooto Yihowara sayise uyinota leellishshannote. Buurantinori hayishshidhinohu “qaalu widoonniiti”; tenne assate Kiristoosi rosiisino rosira woꞌmu wodaninni hajajama hasiissannonsa. (Efe. 5:25-27) Konni garinni insa qullaabbino, hattono keeraabbino. Ikkina “wolu geꞌreewi” hiikkannoyya?—Yoh. 10:16.

5. Wolu geꞌreewi Maganu Qaalinni keeraaꞌmitino yaa dandiinannihu mayiraati?

⁵ Aarooni ooso Yesuusihu wolu geꞌreewi wido ikkitinota “lowo daga” riqibbannore diꞌꞌikkitino. (Aju. 7:9) Ikkina, kurino Maganu Qaalinni keeraaꞌmite qullaabbinoni? Ee! Kuri uullate aana heeꞌrate hexxo noonsari, Yesuusi mundee afidhino waagire Qullaawu Maxaafinni buuxxuti, hakko qaale ammante “hashshanna barra qullaawa soqqansho” shiqisha jammartino. (Aju. 7:13-15) Buurantinorinna wolu geꞌreewi ‘danchu akatinsa’ baꞌꞌa hoogi geeshsha qullaambensa leeltanno. (1 Phe. 2:12) Buurantinorinna wolu geꞌreewi xuru noonsakkire ikkitinotanna mittimma afidhinota laꞌꞌanno wote Yihowa lowo geeshsha hagiidhannoti dihuluullissannote; insa Allaalaanchonsa Yesuusa macciishshitanno, hattono ammanante harunsitanno.

6. Ninkeneeto mayine xaꞌma kaaꞌlitankera dandiitanno?

⁶ Isiraeelete kakkalaano ikkitannori bisu xuri noonsakkire ikka hasiissannonsata kulanno biddishshi Yihowa mannira lowore rosiisanno. Qullaawa Maxaafa xiinxallinseemmo manni manginsiꞌrate horoonsiꞌneemmo bayichi doofaarinokkitanna uduunninke xuru nookkihanna amanyoote afiꞌrinoha ikkinota laꞌꞌanno. Kakkalaano xuru nookkire ikkansa Yihowaha kaffi yiino ilaala fulannohu baalunku “xalalu wodani” noosiha ikka hasiissannosita leellishshannote. (Far. 24:3, 4; Isa. 2:2, 3) Maganoho qullaawa soqqansho xurtinokki surrenninna mannimmanni hattono keeraanchu wodaninni shiqishiꞌra hasiissannonke. Tenne assate ganyine meessaneeto layiꞌra hasiissanno; mitu insaneeto layidhu gedensaanni qullaawoota ikkate biddi assiꞌra hasiissannonsari heeꞌrara dandaanno. (2 Qor. 13:5) Lawishshaho, mittu cuuamino Kiristaanchi haja asse teeda baꞌino misilla laꞌꞌannoha ikkiro isonooto togo yee xaꞌma hasiissannosi: ‘Ani qullaawa ikkoommota leellishshanni noommo?’ Hakkiinnino tenne busha gade agurate kaaꞌlo xaꞌmiꞌra hasiissannosi.—Yaq. 5:14.

7. Zelewaawuyaani 8:22-24 ledo sumuu yaanno garinni Yesuusi lawishsha ikkinonkehu hiittoonniiti?

⁷ Isiraeelete dagara kakkalaanote soqqansho xintini yannara, geꞌrechu goci mundee Kakkalaanote Biili Aarooninna oososite qiniiticho maccara, qiniiticho anganna lekkahu jawu qubbichira  buurroonni. (Zelewaawuyaani 8:22-24 nabbawi. b) Insara mundee buura, kakkalaano uyinanninsa looso loosate dandaaminsare baala assa hasiissanonsata leellishshannote. Hattonni, Kakkalaanote Biili Yesuusi buurantinoriranna wolu geꞌreewira dancha lawishsha ikkino. Maccasi Maganu biddishsha seekkite macciishshitannote. Yesuusi angasi Yihowa fajjo assate horoonsiꞌrino; hattono lekkasi qullaawa doogonni fulte diegentino.—Yoh. 4:31-34.

8. Yihowa magansidhannori baalunku maa assa hasiissannonsa?

⁸ Buuramino Kiristaaninna wolu geꞌreewi Kakkalaanote Biili Yesuusi lawishsha harunsa hasiissannonsa. Yihowa magansidhannori baalunku Maganu Qaali garinni heeꞌra hasiissannonsa; hatto assansa ayyaanasi dadillissannokki gede kaaꞌlitannonsa. (Efe. 4:30) ‘Lekkansara doogo suwisiꞌra’ hasiissannonsa.—Ibi. 12:13.

9. Aliidi Bisi miilla ledo loossinori sasu roduuwi mayitino? Insa coyidhinori qullaawa ikkakki leellishatto gede kaaꞌlannohehu hiittoonniiti?

⁹ Hanni lowo diro Aliidi Bisi miilla ledo mitteenni loossinori uullate aana heeꞌrate hexxo noonsari sasu roduuwi coyidhinore laꞌno. Mittu togo yiino: “Kuri roduuwi ledo soqqama lowo qoossooti; kayinni ledonsa loosaꞌya insa qullaawu ayyaaninni buurantinore ikkiturono guuntete xeꞌne noonsare ikkitinota huwateemmo gede assitinoe. Ikkirono fushshiꞌroommo mixo giddo mitte kuri albisa ikkitinorira hajajamate.” Layinki rodii togo yiino: “‘Kiristoosira hajajama’ hasiissannota kultannoti 2 Qorontoosi 10:5 gedee xiqisubba, albisa ikkitinorira hajajameemmo gedenna insa ledo buusame looseemmo gede kaaꞌlitinoe. Hajajameemmohu woꞌmu wodaniꞌyanniiti.” Sayikki rodii qole togo yiino: “Yihowa baxannore baxa, isi giwannore giwa, hattono ganyine isi biddishsha harunsanna iso hagiirsiisannore assate yaa, dirijjitesiranna Isi uullate noosi alaama wonshate horoonsiꞌranni noorira hajajamate.” Kuni rodii, gedensaanni hige Aliidi Bisi miila ikkinohu Naataani Noori 1925⁠nnite Agarooshshu Shaera fulinohu “Dagate Ilama” yaanno birxichira fultino assaawe wolootaho ammane adhate qarrissinonsaha ikkirono isi kayinni maahoyye yee adhinota afino. Kuni rodii Noori hajajamino gara lae dhagge assiꞌrino. Aleenni qummi assini roduuwi coyidhinore hiincanke, Maganoho hajajamme qullaawoota ikkanke leellinsheemmo gede kaaꞌlitannonke.

MAGANU MUNDEE LAINOHUNNI UYINO HIGGE AYIRRINSE QULLAAWOOTA IKKA

10. Maganu mundee lainohunni uyino biddishshira hajajama mageeshshi geeshsha hasiissannote?

¹⁰ Zelewaawuyaani 17:10 nabbawi. c Yihowa Isiraeele “kalaqamu baalu mundee” sagalimmate horonta horoonsidhannokki gede hajajino. Kiristaanuno saadanniteno ikko mannu mundeewiinni xeertiꞌra hasiissannonsa. (Looso 15:28, 29) Yihowa hanqe ‘albasi ninke widira qolannotanna’ songote giddonni bade hunannonketa heda nafa lowo geeshsha waajjishshannote. Ninke iso banxeemmo hattono hajajammeemmosi. Reyo abbara dandaannohu buutote coyi tuncu yaannonke wote nafa, Yihowa affinokkirinna isira hajajama hasidhannokkiri amaaltannonke amaale diadhineemmo, woy insa hasatto diharunsineemmo. Mundeetewiinni xeertiꞌranke mannu qacifatannonke gede assitannonketa anfoommo; ikkirono hajajama hasiꞌneemmohu Maganohooti. (Yih. 17, 18) Mundee sagalimmate woy xaginaateho horoonsiꞌneemmokki gede ‘qorophinoommo’ gedeenni heeꞌrate kaaꞌlannonkehu maati?—Marro 12:23.

11. Dirunni mitte hinge Cubbo Diwate Barra assinanniri mulla wogate geeshshira calla assinannire diꞌꞌikkino yineemmohu mayiraati?

 ¹¹ Biꞌre Isiraeelete yannara dirunni mitte hinge Cubbo Diwate Barra kakkalaanote biili saadate mundee horoonsiꞌranno gari, Maganu mundee ma garinni laꞌꞌannoro huwatate kaaꞌlitannonke. Hakkawaro mundee baxxitino hajora yaanno cubbo loossinori Yihowa maaro afidhe cubbinsanni keeraabbanno gede assate horoonsiꞌnanni. Bootu woy meichu mundee gondooru taawooti tuani wido qolle woy qooxeessaho winxanni. (Zel. 16:14, 15, 19) Cubbo loossino Isiraeele tenne qixxaawo widoonni Yihowa maaro afidhanno. Qoleno, Yihowa mittu manchi saada sagalimmate gorriro mundee dunannonna bushsha gananno gede hajajino; korkaatuno “kalaqamu baalu heeshsho mundeesiiti.” (Zel. 17:11-14) Kuni baalu mulla wogate geeshshira assinannireeti? Deeꞌni. Cubbo Diwate Barra mundee horoonsiꞌnanni gari hattono mundee uulla dunnanni gede uyinoonni hajajo, Yihowa hunda Nohiranna sirchisira mundee laꞌinohunni uyino hajajo ledo sumuu yitanno. (Kal. 9:3-6) Yihowa biꞌrenni mundee sagalimmate horoonsiꞌnannita hoolino. Ikkina Kiristaanu tennenni maa rosanno?

12. Phaawuloosi Ibiraawuyaani Kiristaanira borreessino sokka giddo mundee cubboho maaro afiꞌrate ledo xaadisinohu hiittoonniiti?

¹² Hawaariya Phaawuloosi Ibiraawuyaanete Kiristaanira mundee afidhinota keereensate wolqa xawisanni togo yiino: “Higge yitanno garinni baalunku coyi keerawannohu mundeete widoonniiti; mundee duꞌnama hoogguro cubboho maaro dino.” (Ibi. 9:22) Qoleno Phaawuloosi xawisinonte gede, saadate kakkalo mito geeshsha kaaꞌlitannota ikkiturono, Isiraeele cubbaataamma ikkansanna woꞌmunni woꞌma cubbunni keeraaꞌmate rooru coyi hasiisannonsata qaagganno gede assitinonsa. Ee, hatti Higge “daannohu danchu coyira caaleho ikkinnina tenne coyibbara addu biso diꞌꞌikkitino.” (Ibi. 10:1-4) Cubboho maaro afiꞌnanni faro faꞌnantinohu hiittoonniiti?

13. Yesuusi mundeesi waaga Yihowa albaanni shiqishinotera mayi macciishshamannohe?

¹³ Efesooni 1:7 nabbawi. d ‘Isonooto ninkera sayise uyinohu’ Yesuusi Kiristoosi kakkalo ikke reyasi, isonna Annasi baxxannorira baalaho lowo horo afidhino. (Gal. 2:20) Ikkollana,  cubbu giddonni fushshinonkehunna keeraaꞌmate faro faninonkehu Yesuusi reyotenni kai gedensaanni assinoreeti. Yesuusi Muse Higge yannara Cubbo Diwate Barra assinanniri caale ikkinoha qara coye assino. Hakko barra kakkalaanote biili kakkalote shiqinshoonni saadata gama mundee haare xaadooshshu dunkaanite gedensaanni kayinni Salamooni beetemeqidesete Bayira Qullaawa Base eꞌꞌe, lawishshu yaattonni Yihowa albaanni shiqishanno. (Zel. 16:11-15) Hatteente gede, Yesuusi iimira ei wote mundeesi waaga haare Yihowa albira shiqishino. (Ibi. 9:6, 7, 11-14, 24-28) Yesuusi mundeera ammana noonketa leellishankenni cubbinkera maaronna keeraancho tiia afiꞌranke lowo geeshsha naandeemmo!

14, 15. Yihowa mundee lainohunni uyino higge huwatanna hajajama hasiissannohu mayiraati?

¹⁴ Yihowa “kalaqamu baalu mundee” sagalimmate horoonsiꞌnannikki gede hajajinohu mayiraatiro xa huwatitto? (Zel. 17:10) Maganu mundee qullaawa asse laꞌꞌannohu mayiraatiro buuxootto? Isi mundee heeshshote ledo taalo ikkitino gede asse laꞌꞌanno. (Kal. 9:4) Mundee Maganu laꞌꞌanno garinni laꞌꞌanna isi mundeetewiinni xeertiꞌnanni gede uyino hajajora hajajama hasiissannonke. Maganu ledo danchu fiixoomi heeꞌrannonkehu Yesuusita wodote kakkalo ammanneemmohanna Kalaqaanchinke mundee baxxino garinni laꞌꞌannota huwanteemmoha ikkiro callaati.—Qol. 1:19, 20.

¹⁵ Ninke baalunkura mundeete ledo xaado afiꞌrinohu buutote coyi hedeweelcho iillankera dandaanno. Woy maatenke miilira woy banxeemmo jaalinkera hedeweelcho togoo coyi iillara dandaanno. Hattoo coyi tuncu yaanno wote mundeete beehachenna xaginsanninke gara wossaꞌna hasiissannonke. Konni daafira hedeweelcho iillara dandaanno coyira xiinxalline balanxe qixxaawa lowo geeshsha hasiissannote. Huuccatto assiꞌne konni garinni qixxaawanke, konni fatanira anga uyineemmokki gedenna qeelammeemmokki gede kaaꞌlitannonke. Yihowa Qaalisi giddo hoolinore assine iso dadillisa dihasiꞌneemmo! Yannankera batinye akimenna mundee aa garaho yee hedannohu wolu manni lubbo gatissanno yite heddanno daafira mannu mundee aanno gede xixxiibbanno. Ikkollana, Yihowahu qullaawu manni mundee ma garinni horoonsiꞌra hasiissannoro wossanate qoosso afiꞌrinohu Kalaqaancho ikkinota afino. Isi albaanni “kalaqamu baalu mundee” qullaawate. Konnira isi mundee lainohunni uyino hajajo harunsate murciꞌne kaꞌꞌa hasiissannonke. Qullaawu amanyootinkenni heeshsho gatisate wolqa afidhinota Yesuusi mundee kaffi assine laꞌneemmota leellinsho; korkaatuno cubbu maaronna hegere heeshsho afiꞌnannihu tenne mundeenni callaati.—Yoh. 3:16.

YIHOWA QULLAAWOOTA IKKINAMMORA HASIꞌRANNOHU MAYIRAATI?

16. Yihowa daga qullaawoota ikka hasiissannonsahu mayiraati?

¹⁶ Maganu Isiraeele Gibitsete borojjimmanni fushshi yannara, togo yiinonsa: “Maganoꞌne ikkoommota leellishate Gibitsetenni fushshanni noommoꞌnehu ani Yihowaati; ani qullaawa ikkoommo daafira kiꞌneno qullaawoota ikka hasiissannoꞌne.” (Zel. 11:45) Yihowa qullaawa ikkino daafira Isiraeelete dagano qullaawoota ikka hasiissinonsa. Ninkeno Yihowa Farciꞌraasine ikkinoommo daafira qullaawoota ikka hasiissannonke. Zelewaawuyaani maxaafi tenne seekke xawisanno.

17. Konne birxicho xiinxallinummo kawa Zelewaawuyaani maxaafa ma garinni laꞌꞌatto?

¹⁷ Zelewaawuyaani maxaafita mite mite assaawe xiinxallanke lowore kaaꞌlitinonke. Tini, qullaawu ayyaaninni borreessaminoha konne maxaafa albinni roore kaffi assine laꞌneemmo gede assitinonketi dihuluullissannote. Zelewaawuyaani maxaafi giddo noote mite muxxe ikkitino assaawe hiincanke, qullaawoota ikka hasiissannonkehu mayiraatiro albinni roore buunxeemmo gede assitinonke. Ikkina, kuni qullaawu ayyaaninni borreessamino maxaafi wolere maa kulannonke? Yihowara qullaawa soqqansho shiqishiꞌra lainohunni konni maxaafinni wolere maa ronseemmo? Aananno birxichira tenne hajore ronseemmo.