Faransayete gobbara wodiidoonni gaxarete anniꞌyanna amaꞌya ledo anjeꞌyanni heeꞌroommata hagiirraame heeshsho hedeemma wote tashshi yaannoe. Hakkawaro anniꞌya suutto seekkeennae godoꞌleemma; qoleno gate dodamanni godoꞌla baxisannoe. Yihowa Farciꞌraasine 1966nni qaenke dagge, anniꞌya ledo seeda yanna hasaabbu. Lamalu agani gedensaanni, anniꞌya Yihowa Farciꞌraasincho ikki. Amaꞌyano mulenni isi faale harunsitino. Insa baxillunni lossinoe.

Anniꞌyanna amaꞌya ilantino gobba yaano Ispeene hinganni heeꞌneennanni, qarru heeshsho heeꞌra jammarumma. Angatenna soodo miqichiꞌya mule silliiqa jammarie. Addi addi akimewa haꞌranni lame diro keeshshumma gedensaanni, mikitate xibba xagisate fullahino akimichiwa massinie; kuni akimichi dadille, “Lowo geeshshawe keeshshiishshinoonnise” yii. Hakkiinnino amaꞌya wiꞌla jammartu. Akimichu, bisiꞌyati xibba gargartanno seella wole seella gawajja jammartinotanna konninni kainohunni juvinayil poliarterayitis a yinanni xibbi amadinoeta kulanna macciishshumma. Hakkawote tonne diro calla ikkinoe daafira yaannori gari geeshsha leella hoogierono, coyiꞌrinori busha duduwo ikkinota afoomma.

Akimichu xiwamino qaaqquulle gamba assine xaginsanni bayicho heeꞌranni xagisiꞌreemma gede kuli. Hakkira mare, heeꞌrate injaannokkiha hakkoye hintsa laummati lowo geeshsha yaadumma. Higgensa kabbaadete: meya molokosooti umoꞌya meede huni, qoleno busha yuniforme mite uddisiisie. ‘Xa koye hiitto ikke heeꞌreemma?’ yee wiꞌlumma.

Anniꞌyanna amaꞌya Yihowara soqqameemma gede rosiisinoe daafira, xagisiꞌreemma qaera Kaatolikete ammaꞌno bude harunsa giwumma. Mayira giweemmaro molokosootaho leella giwinsa. Yihowa tuge agurannoekki gede eeggifatumma; hakkawontenni Yihowa shaqqadu anni baxillunni hanqafannohu gede asse hanqafinoehu gede ikke macciishshamie.

Anniꞌyanna amaꞌya Qidaame Qidaame daye hirbu aana heeꞌrenni lae higaera fajjininsa. Insa ammanaꞌya jawaattanno gede, nabbaweemmata Qullaawu  Maxaafi aana xintantino borro abbannoe. Hakkiicho qaaqquulleho uminsa borro heedhansara fajjinanninsakkiha ikkirono, tenne borro barru barrunku nabbaweemmahu Qullaawu Maxaafiꞌya ledo wodheemma gede molokosootu fajjie. Qoleno mittu manchino xiwamannokkiwa uullate aana Gannatete hegerera heeꞌrate hexxo nooeta wole oosora kula dandoomma. (Ajuuja 21:3, 4) Dadilleemmanna callateemma woti nooha ikkirono, Yihowara nooe ammana yannate kiiro lexxitanni hadhinoe daafira hagiidheemma.

Anera seede qarrisinoehu lewu agani saita, dokiterootu qae higeemma gede assitu. Xibbu higa hoogierono, anniꞌyanna amaꞌyawa higoomma daafira tashshi yiie. Mikita mikita noowi albinni roore raga soorramanni haꞌrie, hattono bodiꞌre roore lexxitue. Wedellitte ikkoommahu wolqa bae heeꞌreeti. Ikkirono, 14 diro ikkieta cuuame, iimi Anniꞌyara wolqaꞌya assitu geeshsha seekke soqqamate murciꞌre kaumma. Mito wote kayinni isira caaccaaweemma. “Kuni anera iillanna sammi yoottohu mayiraati? Eeggatena hursie. Mageeshshi geeshsha shete noommaro dilaꞌꞌatto maaho?” yee huucciꞌreemma.

Qeedhimmate yanna lowo geeshsha quuxxo ikkitue. Xiwaniꞌyanni hureemmakkita ammane adha hasiissinoe. Ordu fayyimma noonsarinna hagiirraame heeshsho heedhanni noo jaallaꞌya ledo aneneeto heewisiisaꞌya kaaꞌlitinoeri dino. Mannuwiinni ajoommahu gede ikke macciishshamie, hattono saalfataame ikkumma. Ikkollana, anniꞌyanna amaꞌya hattono jaallaꞌya irko ikkitinoe. Lowo geeshsha baxeemmata Aleshiya yinanni jaalaꞌya horo dihaweemma; 20 diro bayirtannoeti tini rodoo addu jaala ikkitinoe. Ise umiꞌya qarra calla hedanni dadilla agure, wolu mannira hedeemmata ikkeemma gede kaaꞌlitinoe; tini qolte xiwaniꞌya aana illachisheemmakki gede assitinoe.

Tonaa sette diro ikkieta, xiwanu galagale kae buuto xiwie; hakko daafira Kiristaanu gambooshshe haꞌre higa nafa anera horo reyote. Shiima beedho afiꞌreemma yannara mine Qullaawa Maxaafa seekke xiinxallate woꞌnaaleemma. Iyyoobinna Faarsote maxaafa nabbawaꞌya, xaa yannara Maganu Yihowa roorenka towaatannonkehu maalaamittetenni ikkikkinni ayyaanaamittetenni ikkinota huwateemma gede kaaꞌlitinoe. Ganye huuccatto assiꞌraꞌya, ‘mannu wolqara aleenni ikkitino wolqanna’ “wodancha baalantera aleenni ikkitinota Maganu salaame” afiꞌreemma gede assitinoe.—2 Qorontoosi 4:7; Filiphisiyusi 4:6, 7.

Lemiina lame diro ikkieta, bisu xeꞌne noonsari horoonsidhanno gaarera ofolle haꞌra gidde ikkitue. Mannu xaate mannu kiiro ikkoommakkihu gedenna gaare nookkiha milli yee afeemmakkita wolqiweelo ikkoommahu gede asse hedannoe yee yaadumma. Ikkollana, ofolle haꞌreemma gaare umiꞌyanni millisa dandeemma gede kaaꞌlitue; konni daafira bushareeti yee hedoommari danchare ikkie. Isabeeli yinanni jaalaꞌya ise ledo mittu agani geeshsha 60 saate soqqamate mixo fushshiꞌreemma gede amaaltue.

Umi qara, yitinori ikkannokki coye lawinoe. Ikkollana Yihowa kaaꞌlannoe gede huucciꞌrumma, hakkiinnino maateꞌyanna jaallaꞌya kaaꞌliteennae 60 saate soqqama danduumma. Loosu batiꞌrinoehu hakku agani rahe goofi; qoleno waajjanna saala qeeꞌla dandeemmata huwatumma. Lowo geeshsha hagiidhoomma daafira 1996nni woꞌma yanna suwisaancho ikke aganu giddo gaamme worroonni saate soqqamate kaumma. Kageeshsha wossaꞌnoommate dancha coyibba giddo mittu konneeti; suwisaancho ikkaꞌya Maganunniwa albinni roore shiqeemma gede kaaꞌlitinoe, hattono bisiꞌya nafa jawaatanno gede assitinoe. Soqqansho fulaꞌya ammanaꞌya lowo mannira kuleemma gedenna mito manna qole Maganu jaala ikkara kaaꞌleemma gede assitinoe.

Lamu kuminna mittunni hawadi woggara, makeenu dano iilliteennae lamenti lekkaꞌya hiqqantu. Hospitaalete goxe buuto xisse heeꞌreennae wodaniꞌyanni, “Yihowa, ballo agurtootie!” yee eeggifatumma. Hakkawontenni muleꞌya noo daallasira goxxe noo mancho, “Ati Yihowa Farciꞌraasinchooti?” yite xaꞌmitue. Coyiꞌre fushshiꞌra hoogoomma daafira, malaatunni calla ee yuumma. Mancho qolte, “Ani kiꞌne seekke afoomma! Borroꞌne duucha wote nabbaweemma” yitu. Tenne macciishshaꞌya lowo geeshsha sheshifachishshinoe. Buuto qarrame heeꞌre nafa, Yihowa daafira farciꞌra dandoomma. Tini anera lowo ayirrinyeeti!

Shiima geeshsha woyyieta, roore soqqamate hasiꞌrumma. Lamenti lekkaꞌya pilaasteretenni usurroonniwa heedheenna, amaꞌya gaareꞌya xiibbannae hospitaalete hoowe giddo milli yaa jammarumma. Barru barrunku, xiwame hakko noo manni giddo mito marre laꞌneemmo, hattono Qullaawu Maxaafi aana xintantino borro uyineemmonsa. Tini millimmo anera lowo daafurooti; ikkirono Yihowa jawaante uyinoe.

Saihu boodu diri giddo, xibbiꞌya lexxanni haꞌrino;  hakkuyira aanaho annaꞌya shiiraꞌya roore xissiissinoe. Ikkirono, hexxo mudha hoogate woꞌnaaleemma. Hiittoonni? Wolqaꞌya assitu geeshsha ayewoteno, jaallaꞌyanna ayiddiꞌya ledo boohaareemma; tini qolte qarriꞌya daafira hedeemmakki gede kaaꞌlitannoe. Qoleno, callaꞌya noomma wote borro nabbaweemma, Qullaawa Maxaafa xiinxalleemma, woy silketenni sabbakeemma.

Qoleno shiimu coyinni hagiidhate woꞌnaaleemma; lawishshaho, diilallo albaꞌya gantanni saꞌannota woy awawu suꞌnaannota baxisannoe. Togoo coyibba galateemmata ikkeemma gede assitinoe. Haariimanna osoꞌlano hattonni lowore kaaꞌlitanno. Mitto barra jaalaꞌya ledo soqqansho fulle heeꞌneenna, ise gaareꞌya xiibbanni noowiinni agurte qaagiishsha borreessiꞌrate higgu. Hakkiinnino hedeweelcho eelallicho gongoꞌmanni haꞌre uurre noo makeenira mare gaꞌnumma. Lamenti lowo geeshsha mansummo; kayinni gari geeshsha gaꞌnoommakki daafira agurre osoloho hingummo.

Xa asse afeemmakkihu lowo coyi no. Kuri coyibba donaho wodhoomma coyi gede asse laeemma. Duucha wote ille ximbiiꞌle wodaniꞌya “maskoote” faꞌne Maganu abbeemmo yiinota haaro alame laeemma. (2 Pheexiroosi 3:13) Ordu fayyimma afiꞌranna, lekkaꞌyanni haꞌranna hattono guuta hagiirre afiꞌranna leellannoe. Nugusu Daawiti togo yee coyiꞌrino qaale kaffi asse laeemma: “Yihowa hexxi; jawaati, hattono wodanikki shabbaramoonke.” (Faarso 27:14) Manninaatiꞌya albinni roore wolqa baꞌꞌanni haꞌrinoha ikkirono, Yihowa kayinni jawaante uyinoe. Laanfeꞌyanni jawaante afiꞌraꞌya diagureemma.