Ilamoommohu Latiiviyaho qaru katamira Rigahooti. Bayira rodooꞌyanna ani amanke anga lophinoommo. Amanke Kaatolikete ammaꞌno harunsitanno; kayinni beetekiristaane haꞌneemmohu ayyaanna heedhanno wote callaati. Ayewoteno duuchanka roortanno wolqa no yee ammaneemmo; ikkirono, anjeꞌyanni duuchu coyira kabbi facci yeemmoho.

Lophanni haꞌrummota, amaꞌya uduunne tittire kae galagale xaadisa baxeemmota huwattu. Mine tittirre xaadisa dandiinannihu lowo uduunni noo daafira, amaꞌya ane callicho mine agurte haꞌra dibaxxanno. Konni daafira tittirranni godoꞌlinanniha mitto uduunnicho uyitue; hakkoye tittire billaallisanna qole xaadisa lowo geeshsha baxeemmo. Hatte yannara dhoqidhoqqe kadano lowo geeshsha baxeemmo daafira, lamenti hasattoꞌya sumuu yitannote. Amaꞌya Zalta Mopatisi (Kaajja Manaadda Dhoqidhoqquwa) yinannite dhoqidhoqqete qolchanshora eꞌꞌeemmo gede mazaggawisiissue. Qolchansho jammaroommohu manaadda dhoqidhoqquwanniiti; gedenaanni kayinni jajjabbatenni qolchameemmoha ikkummo.

Busullete giira itoommoha ikkoommo daafira, mulenni tenne iima billanni qolchammannite dano abbitara dandiitanno ispoortera worba ikkummo. Latiiviyu gobbara jajjabba dhoqidhoqquwa qolchanshora sase hige qeeloommo; hattono Baaltiki Gobbuwate jajjabba dhoqidhoqqe qolchanshora lame hige qeeloommo.

Loosunni dancha deerra mare heeꞌreenna, jaalaꞌya Eviya (gedensaanni hige ise adhoommo) Yihowa Farciꞌraasine ledo xaaddu. Ise hakkuyira albaanni, Qullaawa Maxaafa xiinxalla hasidhannori wonshitanno forme noota insa borro  afidhu. Hakkiinnino hatte forme wonshite sokku. Mulenni lame Yihowa Farciꞌraasine isewa dayi; konni garinni ise insa ledo Qullaawa Maxaafa xiinxalla jammartu. Tenne xiinxallose digiwoommo; anera kayinni hatte yannara ammaꞌnote coyira gari hasatto dinoe.

Gedensaanni kayinni Eviya xiinxallissanno Farciꞌraasine, ise Qullaawa Maxaafa xiinxallitanno wote ledose ofolle macciishshammora koyissue. Anino maahoyye yuummo; macciishshoommo coyeno baxummo. Wodanaꞌya hagiirsiissino coyibba giddo mittu, uulla gannate ikkitannota kultannote Qullaawu Maxaafi hexxooti. Lawishshaho, Faarso 37:10, 11 aana togo yaannohu noota afummo: “Boode yanna ikkinnina, bushu manni digeedanno; noowa afate hasatto, kayinni diafatto. Jooguullu kayinni uulla ragidhanno; keeru woꞌmanno daafira lowo geeshsha tashshi yaannonsa.” Tini hexxo lowo geeshsha baxissue.

Ayyaanaamu coyira nooe hasatto yannate kiiro lexxitanni hadhu. Kaphu ammaꞌno mageeshshi geeshsha kaphitanni nooro wodancha jammarummo. Qullaawu Maxaafi kayinni noore xawise rosiisanno daafira dhagge ikkie.

Qullaawa Maxaafa xiinxallanni haꞌrummoti, Yihowa heeshsho mageeshshi geeshsha kaffi asse laꞌꞌannoronna isi albaanni heeshsho mageeshsha muxxe ikkitinoro rosummo. (Faarso 36:9) Tini qolte dhoqidhoqqete qolchanshoꞌyare seekke assaaweemmo gede assitue; konni kawa heeshshoꞌyara dano abbannore assa hasiissannoekkita huwatummo. Togoore agure, heeshshoꞌya Yihowara ayirrinye abbanno garinni horoonsiꞌrate kaummo. Konni daafira dhoqidhoqqete qolchanshora maccaha ikka, ayirrinye afiꞌranna konninni hagiidha anera kaajja coye ikkase gattu.

Istooniyaho Taliini katama 1996⁠nni Yihowa Farciꞌraasineha daga dagiyyote gambooshshe haꞌrummo; kuni bayichi alba dhoqidhoqqete qolchameemmo istaadeemera muleeti. Gambooshshunniwa addi addi gobbanni dayinohu batinyu manni sumuu yee salaametenni gamba yiinota laoommo. Lawishshaho, mitte Yihowa Farciꞌraasinchora gambooshshu basera woxu borsi baise; hakkawote anera borsase horonta afidhannoha dilawinoe. Ikkollana, mulenni mitte Yihowa Farciꞌraasincho hakkoye borsa affe mitturino baikki abbite uyituse. Tini lowo geeshsha dhagge ikkitue! Yihowa Farciꞌraasine addinta Qullaawu Maxaafi seeri garinni heedhannota huwatummo. Eviyanna ani xiinxallonkenni jawaantanni haꞌne, 1997⁠nni cuuamme Yihowa Farciꞌraasine ikkinummo.

Jaallaꞌya giddo mitootu dhoqidhoqqetenni akkimale ikkitanni reyitino. Ani kayinni Qullaawa Maxaafa xiinxallaꞌya, heeshsho uyinoehu Yihowa assootiꞌyara xaꞌmannoeta huwateemmo gede assitinoe. Tenne huwataꞌya heeshshoꞌya gattissinoeha lawannoe.

Aninna Eviya Rigu katamira Yihowa Farciꞌraasinete sinu biirora woꞌma yanna soqqansho eꞌne shoole diro soqqamate qoosso afiꞌnoommo. Xa kayinni Aliise yinanni qaaqqo ille, ise Yihowa baxxanno gede assine hagiirrunni lossiꞌnanni heeꞌnoommo. Qoleno tirote looso loonsanni biiro hoowera lamalate giddo mitto barra haꞌre, makeenanna hiiqqamino uduunne seekkeemmo. Anjeꞌyanni rosoommo ogimma xa dancha gede horoonsiꞌra dandaaꞌya lowo geeshsha hagiirsiissinoe! Ee, xaano ikkiro uduunne tittire kae qole xaadisanni noommo.

Maateꞌya ledo callichu halaalaanchu Maganire farciꞌrate faro afiꞌraꞌya lowo geeshsha kaffi asse laeemmo; konne ayirrinye afiꞌroommohu Qullaawa Maxaafa xiinxallaꞌyanniiti. Addaho, uulla gannate ikkitannota kultanno hexxo heeshshoꞌya soorrite biddi assitinoe!