1. Maganu daninni kalaqammoommo daafira, mayi dandoo noonke?

 DUUCHA wote, “Beettu horo fiire anna lawanno” yaa rosantinote. Addaho, batinye ooso fiidhe annansanna amansa labbanno. Qoleno mittu mittunku qaaqqi annisinna amasiwiinni adhe ilamanno akati heeꞌranno. Heeshsho uyinonkehu iimi Annanke Yihowaati. (Far. 36:9) Oososi ikkinoommo daafira, woꞌmunni woꞌma ikka hoogirono, iso lambeemmo. Danisinni kalaqammoommo daafira, mitto coye heeshshi gotti assine hende kuni konneeti yaatenna jaalooma kalaqiꞌrate dandoo noonke.—Kal. 1:26.

2. Yihowa Jaalanke ikkanno gede xinta ikkannohu maati?

² Yihowa muli Jaalanke assiꞌra dandiineemmo. Togoo jaalooma kalaqiꞌra dandiineemmohu, Maganu baxannonke daafiraatinna isonna Beettosi ammanneemmo daafiraati. Yesuusi togo yiino: “Maganu alame lowo geeshsha baxino daafira, beettosi ammanannota loosunni leellishannohu baalunku hegere heeshsho afiꞌranno gede ikkinnina baꞌꞌannokki gede, mitto Beettosi uyino.” (Yoh. 3:16) Yihowa ledo muli jaalooma kalaqiꞌrinohu lowo manni no. Hanni kuri giddo lame laꞌno.

3, 4. Abirahaamira Yihowa ledo noosi fiixoomi, Isiraeelete dagara Yihowa ledo noonsa fiixoominni baxxannohu mayinniiti?

³ Yihowa Isiraeelete anna Abirahaami, “Jaaliꞌya Abirahaami”  yiinosi. (Isa. 41:8) Layinki Zeena 20:7 aanano, Abirahaami Maganu jaala ikkinota kulloonni. Kuni ammanamino manchi Kalaqaanchisi ledo togooha geedanno jaalooma kalaqiꞌranno gede xinta ikkinori maati? Ammanasiiti.—Kal. 15:6; Yaaqoobi 2:21-23 nabbawi.

⁴ Gedenaanni Isiraeelete daga ikkitinori Abirahaami ooso umi qara Yihowa Annansanna Jaalansa assidhino. Gedensaanni kayinni Maganu ledo noonsa jaalooma huꞌnitino. Hiittoonni? Yihowa coyiꞌrino qaale ammana hoogansanniiti.

5, 6. (a) Yihowa Jaalakki ikkinohu hiittoonniiti? (b) Ninkeneeto mayine xaꞌma hasiissannonke?

⁵ Yihoware rossanni haꞌritto kiiro, iso albinni roore ammanatto; hattono isira noohe baxilli roore lexxanno. Hanni umo Maganu addinta nooha ikkinotanna isi ledo jaalooma kalaqiꞌra dandaattota rositto yanna hedi. Qoleno, ninke baalunku Addaami finqillenni kainohunni cubbo ragiꞌne ilammoommota rosootto. Mannu ooso gudisidhe Maganuwiinni xeertidhinota huwatootto. (Qol. 1:21) Hakkiinnino baxillaanchu iimi Anninke mulihanna ninkera assaawannoha ikkinota rositto. Isi qixxeessinote Yesuusite wodote kakkalore ronsummonna tenne kakkalo ammannummo wote, Maganu ledo jaalooma kalaqiꞌra jammarrummo.

⁶ Yihowa anfummo gara hendeemmo wote ninkeneeto togo yine xaꞌma hasiissannonke: ‘Maganu ledo nooe jaaloomi lexxanni haꞌranno gede assiꞌranni noommo? Ammanaꞌya jawaatate? Muxxe Jaaliꞌyara Yihowara nooe baxilli barru barrunku lophanni no?’ Hunda Yihowa ledo muli jaalooma kalaqiꞌrinohu wolu manchi Geediooniiti. Hanni isi xagge ronse lawishshasi harunsa dandiineemmo gara laꞌno.

7-9. (a) Geedioonira tuncu yiinosihu baxxino coyi maati? Tini maaho kaaꞌlitinosi? (Umi misile lai.) (b) Yihowa ledo noonke jaaloomi lexxanni haꞌranno gede assiꞌrate kaaꞌlannonkeri maati?

⁷ Daanyu Geediooni Yihowara soqqaminohu Isiraeele Hexxote Gobba eꞌuhu gedensaanni noote qarru yannaraati. Mesaafinti fooliishsho 6, Yihowa sokkaanchi Ofira yinanni bayicho Geediooni coyishiishinota kultanno. Hatte yannara Miidiyaami daga Isiraeele horritanni wotto worte no. Hakko daafira, Geediooni sinde xawoho ayiddummete gaꞌna agure woyine kandanni basera gaꞌnanni no; tenne assinohu gidesi rahe maaxira dandaanno gedeeti. Geediooni sokkaanchu daye “jawaata olamaancho” yee woshshisita dhagge assiꞌrino. Geediooni, alba Isiraeele Gibitsete anganni gatisino Magani Yihowa xaano kaaꞌlannonsatanna teꞌee buuxa hasiꞌrino. Sokkaanchu Yihowa riqiwe, Geediooni Yihowa kaaꞌlannonsata huluullamannokki gede kulinosi.

⁸ Geediooni “Isiraeele Miidiyaami daga anganni” hiitto asse ‘gatisannoro’ dibuuxino. Yihowa xawise togo yee qolisi: “Ani ledokki ikkeemmo daafira, Miidiyaami daga mittu manchi gede assite ganatto.” (Mes. 6:11-16) Geediooni xaano Maganu tennera malaate leellishannosi gede xaꞌmi; tenne assinohu lede buuxa hasiꞌre ikkikki digatino. Konni hasaawi yannara Geediooni, Yihowa addinta noo Maganooti? yee huluullaminokkita buuxa dandiinanni.

⁹ Hakkiinni aane ikkinori Geediooni ammana jawaattanno gedenna albinni roore Maganunniwa shiqanno gede assinosi. Geediooni sagale qixxeesse sokkaanchoho shiqishi. Hakkiinnino sokkaanchu sagale siqqosinni kise maalaletenni bubbanno gede assi. Geediooni tenne laiti, sokkaanchu addinta Yihowa soyinoha ikkinota huwati. Geediooni mase togo yii: “Yihowa sokkaancho alba laoommona, Bayira Mooticha Yihowa, ballo anera bayisibao!” (Mes. 6:17-22) Geedioonira hatte yannara tuncu yiinosiri Yihowawiinni xeertiꞌranno gede assinosi? Horonta diassinosi! Geedioonira Maganu ledo salaame noosihu gede ikke macciishshaminosi. Tenne mayinni anfeemmo? Geediooni hatte basera kakkalote bayicho seekke, “Yihowa-shalomi” yee suꞌma fushshino. Ibirayisxete afiinni hatto yaa, “Yihowa Salaamete” yaate. (Mesaafinti 6:23, 24 nabbawi.)  Yihowa barru barrunku assannonke coye hiincineemmo wote, isi halaalaancho Jaalanke ikkinota huwanteemmo. Ganyine huuccatto assiꞌranke, salaamenkenna Maganu ledo noonke jaaloomi roore lexxanno gede assitanno.

10. Faarso 15:3, 5 yitanno garinni, Yihowa jaalla ikkate mayi hasiisannonke?

¹⁰ Ikkollana, Yihowa Jaalanke ikkanno gede ninke assa hasiissannonkeri no. Faarso 15 aana, Daawiti ‘Yihowa dunkaanira wosina ikkate’ yaano Maganu jaala ikkate ma assa hasiissannonkero coyiꞌrino. (Far. 15:1) Kuri giddo hanni lame laꞌno: suꞌma huna hooganna baalunku coyira ammanammoommore ikka hasiissannonke. Daawiti Yihowa dunkaanira wosincho ikkanno manchire coyiꞌranni togo yiino: “Arrawisinni suꞌma dihunanno. . . . Beebbaataamo gawajjate gubbo diadhanno.”—Far. 15:3, 5.

11. Suꞌma huna qoropha hasiissannonkehu mayiraati?

¹¹ Daawiti wole Faarso aana togo yiino: “Arrawokki bushu coyinni agadhi.” (Far. 34:13) Tenne amaale harunsa hoongummoro, iimi Anninke ledo noonke fiixoomi diseyanno. Suꞌma huna waannu Yihowa baarigaari Sheexaanu akataati. “Daawuloosi” yaanno qaali “suꞌma hunannoha” yitanno tiro afiꞌrinohunni Girikete qaalinni haaꞌnoonniho. Wolu mannire coyiꞌneemmo wote qorophine coyiꞌranke, Yihowa ledo noonke jaaloomi baꞌꞌannokki gede agartanno. Roorenkanni, songote giddo shoomantino roduuwa laꞌneemmo gara qoropha hasiissannonke.—Ibiraawuyaani 13:17; Yihuda 8 nabbawi.

12, 13. (a) Baalunku coyira ammanammoommore ikka hasiissannonkehu mayiraati? (b) Ammanammoommore ikkanke mayi guma abbitanno?

¹² Yihowa soqqamaanohu wolu akati, ammanamate yaano hanaaqa woy wira hoogate. Hawaariya Phaawuloosi togo yee borreessino: “Ninkera huuccatto assa agurtinoonte; korkaatuno, baalunku coyira ammanammoommore ikkine heeꞌra hasiꞌneemmo daafira keeraanchu tiiꞌꞌi noonketa dihuluullammeemmo.” (Ibi. 13:18) “Baalunku coyira ammanammoommore ikkine heeꞌrate” murciꞌne kaꞌnoommo daafira, ammanate roduuwinke xiqime hanaanqe adha dihasiꞌneemmo. Lawishshaho woxunni loossankera coyiꞌrammoommoha ikkiro, insa garunni amadanna coyiꞌrammoommo garinni woxensa kaffala hasiissannonke. Kiristaana ikkinoommo daafira, qaxarre loosiisiꞌneemmo mannano ikko wolu baalunku manni jajjanna wolqa doogimale dihoroonsiꞌneemmo. Mittu ammanate rodiinkera qaxaramme loonseemmoha ikkiro qole, ninkera bade baxxinore assankera agadha dihasiissannonke.

¹³ Yihowa Farciꞌraasine ammanantinore ikkitino daafira mannu duucha wote galatannonsa. Lawishshaho mitte jawa gimbaatu dirijjite sooreessi, Yihowa Farciꞌraasine coyidhinore wonshitannore ikkitinota huwate, togo yiino: “Kiꞌne ayewoteno yitinoonnire assitinanni mannaati.” (Far. 15:4) Togoo akati Yihowa ledo noonke jaaloomi baꞌꞌannonkekki gede agaranno. Hakkiinni saeno, baxillaanchu iimi Anninke ayirranno gede assanno.

14, 15. Wolu manni Yihowa jaala ikkanno gede kaaꞌla dandiineemmohu hiittoonniiti?

¹⁴ Soqqanshonke yannara xaandeemmohu lowo manni Maganu noota ammanannoha ikkirono, iso muli Jaalinsa gede asse dilaꞌꞌanno. Konne manna kaaꞌla dandiineemmohu ma garinniiti? Hanni Yesuusi 70 rosaano lame lame asse sabbakkara soyi yannara uyino biddishsha laꞌno: “Minira eꞌinanniwa baalankawa balaxxine, ‘Konni minira salaame ikkito’ yiiyye. Hakko salaame baxanno manchi heeꞌriro, salaameꞌne aanasi ikkitanno. Hoogiro kayinni, salaameꞌne kiꞌnewa higganno.” (Luq. 10:5, 6) Manna coyishiinsheemmo wote jaalu gede ikkine shinqeemmoha ikkiro, halaalunniwa daara dandaanno. Taqaawwantannonkereno awu  afiinni coyishiinsheemmoha ikkiro, hanqinsa qiidaranna wole yannara halaale macciishshate maahoyye yitara dandiitanno.

¹⁵ Kaphu ammaꞌno giddora horo lixe eino woy Qullaawa Borro ledo sumuu yaannokki bude harunsanno manninnino xaandummoro, jaalu gede ikkine shaqqillunni coyishiinsheemmo. Baalanka manna, roorenkanni alamete ikkitonni hexxo mudhe magansiꞌneemmo Maganire roore afa hasiꞌranno manna gambooshshenke daanno gede faasiinqe koyinseemmo. “Qullaawu Maxaafi Mannu Heeshsho Soorre Biddi Assanno” yaanno birxichira togoo mannire kultanno temokkiruwa fultanno.

16. Yihowa jaalla ikkatewiinni saꞌne ‘ledosi loonseemmore’ ikka dandiineemmohu hiittoonniiti?

¹⁶ Looso mitteenni loosanno manni duucha wote roore jaalooꞌmanni haꞌranno. Heeshshonsa Yihowara sayise uyino manni baalunku, jaalasi ikka calla ikkikkinni ‘isi ledo loosate’ qoosso afiꞌrino. (1 Qorontoosi 3:9 nabbawi.) Sabbakatenna manna rosaano assate looso loonseemmo wote, iimi Anninketi dhaggete akatta roore xabbe leeltannonke. Qoleno qullaawu ayyaanisi dancha duduwo sabbakate loosonke seekkine loosate kaaꞌlannonke gara huwanteemmo.

17. Awuraajjunna wolu jajjabbu gambooshshira shiqqannoti ayyaanaame sagale, Yihowa Jaalanke ikkinota leellishshannohu hiittoonniiti?

¹⁷ Manna rosaano assate looso lende loonsummo kiiro, Yihowawa albinni roore shinqanni haꞌneemmo. Lawishshaho, Yihowa taqaawwantannonkeri loososi uurrissannota hoolanno gara huwanteemmo. Hanni saꞌu dirrara assinore hedi. Isi addanka marraꞌꞌanni noonketa huwata dandiineemmo. Qoleno falakkinota ayyaanaame sagale shiqishanni noonke gari dhaggete. Awuraajjunna wolu jajjabbu gambooshshi pirogiraame, iimi Anninke qarrankenna hasiisannonkere seekke afinota leellishshanno. Mitte maate awuraajju gambooshshe beeqqitu gedensaanni togo yite galatu dabdaabbe sokkino: “[Gambooshshu] pirogiraame wodananke lowo geeshsha kakkayissino. Yihowa ninke mitto mittonka mageeshshi geeshsha baxannonkeronna seyankera hasiꞌrannoro huwantoommo.” Jarmanetenni dayino minaanninna minaama Ayerilaandete mitto baxxinoha awuraajju gambooshshe beeqqi gedensaanni, hakko roduuwu faasiiqqe haadhinonsanna towaattinonsa daafira galatino. Insa lede togo yiino: “Roorsine galanteemmori kayinni Yihowaatinna isi shoomino Nugusa Yesuusi Kiristoosiiti. Tenne halaalu mittimma noo daga ledo karsammeemmo gede koyissinonkeri insaati. Mittimmate daafira hasaawa calla ikkikkinni mittimma afiꞌne hagiidhinanni heeꞌnoommo. Debiliini katamira baxxinohu awuraajju gambooshshi yannara sayinsoommo yanna, kiꞌne baalunku ledo bayiru Maganinkera soqqamate qoossonke ayewoteno qaangeemmo gede assitannonke.”

18. Yihowa ledo hasaambeemmo yanna lainohunni ninkeneeto mayine xaꞌma dandiineemmo?

¹⁸ Jaalla ganyite hedonsa mimmitoho kultannoha ikkiro, jaaloominsa jawaatanni haꞌranno. Yannankera mannu Interneetenna borrotenni sonkannita silkete sokka ganye horoonsiꞌranno. Tenne ledo heewisiinsiro, ninke gilletenni muli Jaalinke Yihowa ledo xaandeemmo yanna mageeshshite? Isi “huuccatto macciishshanno [Magano]” ikkinoti egennantinote. (Far. 65:2) Ninke kayinni isi ledo hasaawate mageeshshi yanna gaaꞌminoommo?

19. Wodaninke hedo iimi Anninkera fushshine kuꞌla qarrissunkero, mayi kaaꞌlankera dandaanno?

¹⁹ Mite Maganu soqqamaanora wodaninsanna giddonsa hedo fushshite hasaapha qarrissansara dandiitanno. Ikkirono, Yihowa giddonketa fushshine kullammosira hasiꞌranno. (Far. 119:145; Qurto 3:41) Wodaninke hedo coyiꞌne fushshiꞌra hoongeemmo wote, tennera kaaꞌlannonkeri dino yaa diꞌꞌikkino. Phaawuloosi Roomaho noo Kiristaanira togo yiino: “Qarra ikkannonkehu huuccatto assiꞌra hasiꞌneemmo wote, mayine huucciꞌra hasiissannonkero afa hoogankeeti; ikkirono, coyiꞌne fushshiꞌra hoonge urreemmo wote, ayyaanu umisi ninkera huuccannonke. Wodana marammaranno Magani ayyaanu tiro maatiro afanno; korkaatuno ayyaanu qullaawootaho huuccannohu Maganu fajjo ledo sumuu yaanno garinniiti.” (Rom. 8:26, 27) Qullaawu Maxaafiha Iyyoobi, Faarsotenna Lawishshu maxaafa nabbambe hiincanke, giddonke hedo fushshine Yihowara kuꞌla dandiineemmo gede kaaꞌlitannonke.

20, 21. Phaawuloosi Filiphisiyusi 4:6, 7 aana coyiꞌrinori sheshifachishannonkehu hiittoonniiti?

²⁰ Yaachishanno coyi tuncu yaannonke wote, Phaawuloosi qullaawu ayyaani marraeennasi Filiphisiyusi Kiristaanira uyino amaale harunsino. Isi togo yiino: “Aye coyirano yaaddinoonte; hatteentenni baalunku coyira huuccattotenninna eeggifatatenni galatu ledo xiwinoꞌne coye Maganoho kulle.” Konni garinni muli Jaalinkera hedonke xawinse kulanke sheshonna jawaante uyitannonke. Phaawuloosi lede togo yiino: “Wodancha baalantera aleenni ikkitinoti Maganu salaame, wodanaꞌnenna surreꞌne Kiristoosi Yesuusinni agartanno.” (Fil. 4:6, 7) Konni daafira, wodanankenna surrenke agartannota taalle nookkita “Maganu salaame” ayewoteno kaffi assine laꞌno.

²¹ Huuccatto Yihowa ledo noonke jaaloomi albinni roore jawaatanni haꞌranno gede kaaꞌlitannonke. Konni daafira, “agurrummokki huucciꞌno.” (1 Tes. 5:17) Maganu ledo noonke jaaloomi lexxanni haꞌranno gede assiꞌra agurroonke; qoleno isi assinammora hasiꞌrannore assino. Yihowa Annanke, Maganonkenna Jaalanke ikkasinni afiꞌnoommo atoote heeshshi gotti assine hedate yanna gaaꞌmino.