1. Umi Teselonqe 5:11 kultanno garinni ninke baalunku loonseemmo loosi hiikkonneeti?

 GAMBOOSHSHU ADDARAASHEꞌNE mintine woy gatamartine egentinoonni? Hatto ikkiro, mite yitine haaro Addaraashera gambooshshe assidhini yanna qaagginayiti dihuluullissannote. Yihowa lowo geeshsha galattinoonni. Isinni hagiirru batinyinni hanafote faarso faarsa nafa hoogginoonniha ikkara dandaanno. Dancha gede assine minnoonniti Gambooshshu Addaraashuwa Yihowa ayirranno gede assitanno. Ikkollana wolu gariha minate looso loonseemmo woyite isi roore ayirranno gede assineemmo. Kuni loosi mine minate loosinni roore hasiisannoho. Kuni loosi Magano magansiꞌrate konni minira daanno manna jawaachishate. Soqqamaasinchu Phaawuloosi 1 Teselonqe 5:11 noota cuꞌmote qummeeshshira noo hedo borreessinohu, Giriikete Afiihu “jawaachisha” yaanno qaali “mina” yitanno tirono afiꞌrino daafira, Kiristaanu “minate loosira” kaaꞌlamannota hedeeti.—Qummeeshsha nabbawi.

2. Konni birxichira maa ronseemmo?

² Soqqamaasinchu Phaawuloosi ammanate roduuwasi jawaachishe dancha lawishsha ikkinonke. Isira insa qarri leellannosi. Konni birxichira isi ammanate roduuwisi, (1) qarra dandiite saꞌanno gede, (2) mimmitu ledo keere kalaqqanno gedenna (3) Yihowara noonsa ammana kaajjishidhanno gede kaaꞌlinonsahu hiittoonniitiro laꞌneemmo. Hanni xa ninkeno isi faale haꞌra dandiineemmohu hiittoonniitironna xaa yannara ammanate roduuwanke dhaawa dandiineemmohu hiittoonniitiro laꞌno.—1 Qor. 11:1.

3. Phaawuloosira soqqanshotenna loosoho hiittoo lao noosi?

³ Phaawuloosi ammanate roduuwasi lowo geeshsha baxanno. Isira lowo qarri iillinosi; hakko daafira ammanate roduuwisira qarru iillannonsa woyite mararannonsa hattono qarrinsa leellannosi. Mitte yannara Phaawuloosi woxe hoogino; hakko daafira  isiniitiranna jaallasira hasiisannore afiꞌrate looso hasiꞌra hasiissinosi. (Soq. 20:34) Isi dunkaana gowe hiranno. Isi Qorontoosi haꞌri woyite, umo Aqiilanna Phirisqilla ledo dunkaana gowino. Ikkollana ‘Fooliishshote Barra baala’ Ayihudetenna Giriikete mannira sabbakanno. Silaasinna Ximootewoosi martu yannara, Phaawuloosi “farciꞌranninna rosiisanni hosanno.” (Soq. 18:2-5) Phaawuloosi qaru coyi Yihowara soqqama ikkinota dideino. Isi diinaggaawe loose dancha lawishsha ikkino daafira ammanate roduuwasi jawaachisha dandiino. Isi ammanate roduuwisi iillannonsa qarrinna maatensara hasiisannore shiqishate sharramansa roore “woyyanno coye” yaano Yihowa magansiꞌra lawashshi assitanno gede assitansara wodha hasiissannonsakkita qaagiissinonsa.—Fil. 1:10.

4. Phaawuloosinna Ximootewoosi ammanate roduuwinsa qarra dandiite saꞌanno gede kaaꞌlitinonsahu hiittoonniiti?

⁴ Teselonqe songo xintantuhunni shiima yanna gedensaanni, haarote Kiristaana ikkitinorira buutote qarri iillinonsa. Lowo geeshsha hanqino manni Phaawuloosinna Silaasi hoogiti, ‘mito roduuwa amade goshooshanni katamu gashshaanowa masse’ kuni manni “Roomu moote hajajo ajishshanno” yiino. (Soq. 17:6, 7) Kuri haarote Kiristaana ikkitinori katamu manni gawajjansara kainota affuti mageeshshi geeshsha massinoro heda dandiineemmo. Insa Yihowara diinaggaabbe soqqama nafa agurtara dandiitanno; Phaawuloosi kayinni togoori kalaqamara dihasiꞌrino. Isinna Silaasi katamunni fulte haꞌra hasiissinonsaha ikkirono, haarote xintantino songo hasiisannonsare afidhanno gede assitino. Phaawuloosi Teselonqe noo Kiristaana togo yee jawaachishinonsa: “Rodoonke Ximootewoosi sonkoommoꞌne. Sonkoommoꞌnehu ammanatenni jawaachishaꞌneranna kaajjishaꞌnera yineeti. Qoleno iillinoꞌne qarrinni hembeelantinannikki gedeeti.” (1 Tes. 3:2, 3) Ximootewoosira ilamino katamira Lisxiraho lowo qarri iillisikki digatino. Isi Phaawuloosi hakko heeꞌranno roduuwa jawaachishino gara afino. Ximootewoosi Yihowa Lisxiraho heeꞌranno Kiristaana kaaꞌlinonsata afino daafira, haarote Kiristaana ikkino roduuwasino kaaꞌlannonsata kule jawaachishansara dandaanno.—Soq. 14:8, 19-22; Ibi. 12:2.

5. Biriyaanti yinanni rodoo mittu songote cimeessi kaaꞌlinosihu hiittoonniiti?

⁵ Phaawuloosi ammanate roduuwasi jawaachishinoti wole doogo hiitteeti? Phaawuloosinna Barnabaasi, Lisxira, Iqooniyonna Antsookiya martuti ‘Beetekiristaannate [“songuwate,” NW] cimeeyye wortino.’ (Soq. 14:21-23) Kuri shoomantino labballi yannankera noo cimeeyye gede songuwate jawaantete buicho ikkitinoti dihuluullissannote. Biriyaanti yinanni rodii coyiꞌrinore wodanche: “Ani tonaa ontu dirihu heeꞌreenna anniꞌya hune haꞌrinonke; amaꞌya kayi bohantino. Callatoommohu gede asse hedoommo; hattono hexxo mudhoommo.” Biriyaanti konne qarra dandee saꞌꞌanno gede kaaꞌlinosiri maati? Isi togo yiino: “Tooni yinannihu mittu songote cimeessi gambooshshunniwanna wole yannara hasaawisinoe. Isi qarru amadinsarono hagiirraamma ikkino manni daafira kulinoe. Qoleno Faarso 27:10 nabbawinoe; hattono duucha hige Hiziqiyaasi daafira kulannoe; Hiziqiyaasi annisi dancha lawishsha ikkinosikkiha ikkirono Yihowara ammaname soqqamino.” Tini Biriyaanti kaaꞌlitinosihu hiittoonniiti? Biriyaanti togo yiino: “Tooni jawaachishinoe daafira gedensoonni woꞌma yanna soqqansho hanafe hagiirraamo ikkoommo.” Cimeeyye, Biriyaanti gede jawaachishanno qaale macciishsha hasiissannonsari nooronna teꞌee seekkitine hedde.—Law. 12:25.

6. Phaawuloosi ammanate roduuwasi hunda heedhinori ammanantino soqqamaano xagge kule jawaachishinonsahu hiittoonniiti?

⁶ Phaawuloosi ammanate roduuwisira, Yihowa kaaꞌleennansa qarra dandiite saꞌinori ‘batiꞌru gomichi gede ikkitino naqaashshe’  noota qaagiissinonsa. (Ibi. 12:1) Phaawuloosi baalunku gari qarra dandee saino manni xagge, ammanate roduuwisi worbuulle ikkitanno gedenna, “heeshshote Magani katama” illachisha agurtannokki gede kaaꞌlitannonsata huwatino. (Ibi. 12:22) Yannankerano hattooti. Yihowa, Gedewooni, Baaraaqi, Daawiti, Saamueelinna wole batinye manna kaaꞌlino gara nabbambeemmo woyite ninke baalunku jawaante afiꞌneemmo. (Ibi. 11:32-35) Yannankerano ammanatenni dancha lawishsha ikkanno manni xagge no. Batinyu roduuwi yannankera noorita ammanantino soqqamaano xagge nabbawansa ammanansa kaajjishshinota kultannota borrote sokka duucha woyite qara biiro sokkanno.

7. Roomu Sokka 14:19-21 noote Phaawuloosi amaalino amaalenni maa ronseemmo?

⁷ Songote giddo keeru heeꞌranno gede dandiinummore baala assine roduuwanke dhaawa dandiineemmo. Mereeronke babbadooshshe kalaqannore horo diassineemmo. Qoleno Qullaawu Maxaafiha xintu seera diiga hoongi geeshsha ani yoommoti calla ikkito diyineemmo. Hanni mitto lawishsha laꞌno. Roomaho heedhanno songora Yihudunna Yihudu wido ikkinokki Kiristaani no. Muse Seeri shaaramihu gedensaanni Yihowa magansidhannori mite sagale intannita hoolanno seera agadha dihasiissannonsa. (Maq. 7:19) Hatte yannanni kayise mitu Yihudu Kiristaani duuchunku gari sagale ita dandiineemmo yee hedino. Wolu Yihudu Kiristaanira kayinni hatto assa gara dilabbinonsa. Hakko daafira songote mereero babbadooshshu kalaqami. Phaawuloosi keerunni heeꞌra hasiissannota ikkitinota kulanni togo yiino: “Ledo ammanaasine gufisannoha ikkiro, maala ita woy woyinete xajje aga, woy wole coye assano agura woyyate.” (Roomu Sokka 14:19-21 nabbawi.) Konni garinni Phaawuloosi ammanate roduuwisi togoo heewo mitto mittonka mancho hattono songo woꞌma gawajjitannota huwatanno gede kaaꞌlinonsa. Qoleno isi woloota gufisiisannokki gede heeshshosi biddi assiꞌrate maahoyye yiino. (1 Qor. 9:19-22) Ninkeno manni hajora eꞌneemmokkiha ikkiro woloota dhaawanna mereeronke keeru heeꞌranno gede assa dandiineemmo.

8. Phaawuloosi coyi kawa kaꞌaanni higi woyite songote mereero keeru heeꞌranno gede assinohu hiittoonniiti?

⁸ Phaawuloosi coyi kawa kaꞌaa higanno woyite keere kalaqate dancha lawishsha ikkinonke. Lawishshaho umi xibbi diro heedhino songora noori mitootu haarote Kiristaana ikkinohu Yihudu wido ikkinokki manni barcima hasiissannonsa yitino; insa hatto yitinohu Yihudu wido ikkitinori mishshannonsakki gede yite ikkara dandaanno. (Gal. 6:12) Phaawuloosi tenne hedo dibaxino; ikkirono ane hedo calla garaho yaantenni tenne hajo daafira umosi heeshshi asse soqqamaasinenna Yerusaalamete heedhanno cimeeyye amaaꞌlino. (Soq. 15:1, 2) Phaawuloosi kalaqamino qarra konni garinni tire kuri Kiristaani hagiirri baꞌꞌannokki gedenna songote mereero keeru heeꞌranno gede kaaꞌlino.—Soq. 15:30, 31.

9. Phaawuloosi lawishsha harunsa dandiineemmohu hiittoonniiti?

⁹ Shima ikkitinokki heewo kaꞌanno woyite Yihowa songote biddishsha uyitara shoominore amaaꞌline keeru heeꞌranno gede assineemmo. Togoo woyite Qullaawu Maxaafi aana xintantino amaale borruwanke giddonni, woy wole Yihowa dirijjite qixxeessitino qixxaawonni afiꞌra dandiineemmo. Ninke yinoommori calla ikko yaa agurre konne biddishsha harunsineemmoha ikkiro, songote giddo keeru heeꞌranno gede kaaꞌlineemmo.

10. Phaawuloosi songote giddo keeru heeꞌranno gede wolere maa assino?

¹⁰ Phaawuloosi ammanate roduuwisiha gara ikkinokki akata ikkikkinni dancha akatansa luphi  asse keeru heeꞌranno gede assino. Lawishshaho isi Roomaho heeꞌranno Kiristaanira borreessino sokkara jeefote, batinyu manni suꞌma qummi assino; hattono insa daafira dancha danchare kulino. Ninkeno ammanate roduuwinketa dancha akatta kulle Phaawuloosi lawishsha harunsa dandiineemmo. Togo assineemmo woyite, ammanate roduuwinke albinni roore mimmitunniwa gamba yitanno gede assinanni heeꞌnoommo; tini qolte songote giddo baxillu heeꞌranno gede assitanno.

11. Coyi kawa kaꞌaanni higanno woyite keeru baꞌꞌannokki gede assa dandiineemmohu hiittoonniiti?

¹¹ Mito woyite ayyaanaamittetenni gikki yiino Kiristaani nafa mimmitu ledo sumuu yaa hoogara woy mereeronsa heewo kaꞌara dandiitanno. Phaawuloosinna muli jaalisi Barnabaasi mereero togoori kalaqamino. Insa misiyoone ikkite hadhu woyite, mittu Marqoosi ledonke haꞌro yaanna mittu dihaꞌranno yaanna mereeronsa lowo heewo kaꞌino. Hakko daafira lamunku mereero “lowo gibbo” kaꞌeenna insa babbaxxitino. (Soq. 15:37-39) Ikkirono Phaawuloosi, Barnabaasinna Marqoosi songote keerinna mittimma baꞌara hasidhannokki daafira mereeronsa kawa kaꞌaa higino coye tirtino. Gedensoonni Phaawuloosi, Barnabaasinna Maarqoosi daafira danchare coyiꞌrino. (1 Qor. 9:6; Qol. 4:10) Ninkeno songote giddo noo roduuwinke ledo kawa kaꞌaanni higinonke coye heeꞌriro hasaambe tiranna insata dancha akattansa illachisha hasiissannonke. Konni garinni keerunna mittimma heedhanno gede assineemmo.—Efe. 4:3.

12. Xaa yannara ammanate roduuwinkera iillannonsahu mitu qarri hiikkoyeti?

¹² Yihowara noonsa ammana kaajjitanno gede assine ammanate roduuwanke dhaawa dandiineemmo. Mito roduuwanke Yihowa Farciꞌraasine ikkitinokkiri maatensa miilla, ledonsa rossannori woy ledonsa loossannori qacifattannonsa. Woloota buutote dhibbi waadannonsa woy xissiisidhanno gede assannonsari iillannonsa. Wolootaho qole cuuantunkunni lowo diro ikkinonsa; hattono insa tini busha alame baꞌanno yanna agadhite lowo diro keeshshitino. Togoo coyi xaa yannara Kiristaanu ammana jifantanno gede assara dandaanno. Umi xibbi diro heeꞌrinohu mitu Kiristaanirano togoo coyi iillinonsa. Phaawuloosi ammanate roduuwasi jawaachishate maa assino?

13. Phaawuloosi ammanansanni kainohunni mannu qacifatannonsa Kiristaana kaaꞌlinohu hiittoonniiti?

¹³ Phaawuloosi roduuwisi ammana dhaawate Qullaawa Borro horoonsiꞌrino. Lawishshaho Yihudu Kiristaana ikkitinori, Kiristaana ikkitinokkiri maatensa miilla Yihudu ammaꞌno Kiristaanunnita roortanno yituro mayitannoro afa hooggara dandiitanno. Phaawuloosi Ibiraawootaho borreessino sokka konne Kiristaana lowo geeshsha jawaachishshinoti dihuluullissannote. (Ibi. 1:5, 6; 2:2, 3; 9:24, 25) Insa Phaawuloosi borreessinota kaajja sokka horoonsidhe xaꞌmannonsa mannira dawaro qola dandiitanno. Xaa yannarano ammanate roduuwinke ammanansanni kainohunni qacifatannonsa mannira, Qullaawu Maxaafi aana xintantino borro horoonsidhe ammanansa daafira kultanno gede kaaꞌla dandiineemmo. Wedellu roduuwinke kalaqaanchu noota ammantanno daafira mannu mishannonsaha ikkiro, Heeshsho Dagginohu Kalaqanteeti? (Amaaru Afoo) yitannotanna Heeshshote Kaima—Dawaronsa Afa Hasiissannota Onte Xaꞌmuwa (Amaaru Afoo) yitanno biroshere horoonsiꞌne kalaqaanchu noota ammantanno gede assinonsari maatiro kultanno gede kaaꞌla dandiineemmo.

14. Phaawuloosi sabbakatenna rosiisate loosi batiꞌrinosiha ikkirono maa assino?

¹⁴ Phaawuloosi ammanate roduuwisi “dancha looso” loosse baxille leellishshanno gede jawaachishinonsa. (Ibi. 10:24) Isi ammanate  roduuwasi coyiꞌrinorinni calla ikkikkinni assinorinnino kaaꞌlino. Lawishshaho Yihudu gobbara hude ubbu yannara, Phaawuloosi hakko heedhanno roduuwira hasiisannonsare haaꞌre massinonsa. (Soq. 11:27-30) Phaawuloosi sabbakatenna rosiisate loosi batiꞌrinosiha ikkirono, woꞌmanka woyite maalaamittete kaaꞌlo hasiissannonsare kaaꞌlanno faro hasiꞌrino. (Gal. 2:10) Isi konni garinni ammanate roduuwisi Yihowa towaatannonsata addaxxitanno gede kaaꞌlino. Xaa yannara yannanke, wolqankenna dandoonke horoonsiꞌne kaaꞌlo hasiissannonsare uminke fajjonni kaaꞌlinummoro ninkeno roduuwinke ammana dhaambeemmo. Ganyine alamete doyicho loosira woxe fushshineemmo woyiteno kaaꞌlo hasiissannonsa roduuwanke kaaꞌlinanni heeꞌnoommo. Konni garinninna wole doogganni ammanate roduuwinke Yihowa horo tuge agurannonsakkita addaxxitanno gede kaaꞌla dandiineemmo.

15-16. Ayyaanaamittetenni shoshshoggitinore ma garinni kaaꞌla hasiissannonke?

¹⁵ Phaawuloosi ammanatenni shoshshoggitinore hexxo mudhikkinni kaaꞌlino. Isi insara shaqqille leellishinonsa hattono jawaachishanno garinni hasaawisinonsa. (Ibi. 6:9; 10:39) Lawishshaho isi Ibiraawootaho borreessino sokkara amaalino amaale, isino harunsa hasiissannosita leellishate duucha hige “ninke” yaanno qaale horoonsiꞌrino. (Ibi. 2:1, 3) Ninkeno ammanatenni shoshshoggitinore hexxo mudhinummokkinni kaaꞌla hasiissannonke. Insara addinta hendeemmota leellinshe dhaambeemmonsa. Konni garinni insa banxeemmonsata leellinsheemmo. Shaqqillunninna baxillunni coyiꞌra roduuwanke roore dhaabbansara dandiitanno.

¹⁶ Phaawuloosi ammanate roduuwisira Yihowa dancha loosonsa laꞌꞌannota buuxisinonsa. (Ibi. 10:32-34) Ninkeno ammanatenni shoshshoggino rodoonke kaaꞌlineemmo woyite hatto assa dandiineemmo. Halaale macciishshinohu  hiittoonniitiro kulannonke gede xaꞌma woy Yihowa kaaꞌlinosi yanna qaaganno gede jawaachisha dandiineemmo. Tenne faro horoonsiꞌne kuni rodii Yihowa baxanno daafira alba assinore Yihowa hawannokkitanna albillitteno tuge agurannosikkita buuxinsammosira dandiineemmo. (Ibi. 6:10; 13:5, 6) Togoo hasaawi ayyaanaamittetenni shoshshoggitinori kuri muxxe roduuwi Yihowara soqqama agurtannokki gede kakkayisansara dandaanno.

17. Hiittee dandoonke woyyeessiꞌra hasiissannonke?

¹⁷ Mittu mine minanno manchi minate dandoosi yannate kiiro woyyeessiꞌrannonte gede, ninkeno mimmito dhaawate dandoonke woyyeessiꞌra dandiineemmo. Alba qarra dandee saino manni lawishsha kulle roduuwinke iillannonsa qarra dandiite saꞌꞌate jawaante afidhanno gede kaaꞌla dandiineemmo. Wolootunniha dancha akata illachinshe, keere hunannori kalaqamanno woyite keeru baꞌꞌannokki gede assate sharramme, hattono kawa kaꞌaanni higino coye tirate woꞌnaalle keeru baꞌꞌannokki gede assa dandiineemmo. Qullaawu Maxaafi giddonni kaaꞌlitannonsata kaajja amaale kulle, mitore assine kaaꞌline hattono ayyaanaamittetenni shoshshoggitinore kaaꞌline woꞌmanka woyite roduuwinke ammana dhaawa dandiineemmo.

18. Maa assate murciꞌrootto?

¹⁸ Magano magansiꞌnanni mine mintannori hagiirrenna harshammo afidhanno. Ninkeno roduuwinke ammana jawaattanno gede kaaꞌlineemmo woyite hagiidhineemmo hattono harshammo afiꞌneemmo. Mittu minnoonni mini gedensoonni akkale diigamasi digattanno; roduuwinke ammana dhaawanke abbitanno gumi kayinni hegerera dibaꞌꞌannoho! Hakko daafira woꞌmanka woyite, ‘mimmitonke jawaachishatenna dhaawate’ murciꞌno.—1 Tes. 5:11.