1, 2. (a) Isayaasi 60:22 giddo masaalloonni masaalo konni goofimarchu diri giddo woꞌmitanni noohu hiittoonniiti? (b) Yihowa dirijjitete uullayidi kifilera mayi hasiisanno?

 “AJJINO ilama kume, woꞌmunkura maaꞌne ikkitinori, wolqaataame gosa ikkitanno. (Isa. 60:22) Tini masaalo konni heeꞌnoommohu goofimarchu dirira woꞌmitanni no. Saihu 2015nnihu soqqanshote diri giddo 8,220,105 ikkitannoti Maganu Mangiste halashshaano diinaggaabbe soqqantanni sayisansa tenne leellishshanno! Iimi Anninke “Ani Kaaliiqi kuni coyi yannasinni rahe woꞌmanno gede asseemmo” yee coyiꞌrino daafira mittu mittunku Kiristaanchi tenne masaalo ledo sumuu yaannore assa hasiissannosi. Kaameelu giddo noo manni kaameelu rahe haꞌrannota huwatannonte gede, ninkerano xaa yannara manna rosaano assate looso ranke loonsanni heeꞌnoonniti xabbe leeltanni noonke. Mitti mittinke konne rahe loosamanni noo looso kaaꞌlate maa assinanni heeꞌnoommo? Konne looso diinaggaambe loosate dandaaminkere baala assinanni heeꞌnoommo? Batinyu roduuwi woꞌma yanna suwisaanonna kaaꞌlaano suwisaano ikke soqqamate forme wonshanni no. Lowo roduuwi sabbakkannori roore hasiissannowa hadhe soqqantanno gede xaꞌmininsa yannara maahoyye yite haꞌransanna wole tiokiraasete looso loosansa hagiirsiissannota diꞌꞌikkitino?

² Xaano ikkiro loosaasine lowo geeshsha hasiissanno. Diru kiiro  mite 2,000 ikkitannota haaro songo xintinanni. Mitte mittente haaro songora 5 cimeessi hasiisanno yiniro nafa, 10,000 songote soqqamaano diru kiiro cimeeyye ikkate ikkadda ikka hasiissannonsa. Hatto ikkiro, lowo kume ikkitannori labballu roduuwi songote soqqamaano ikkate sharrama hasiissannonsa. Qoleno, labballuno meya roduuwino loonseemmohu bacu ‘Mootichu loosi’ no.—1 Qor. 15:58.

3, 4. Ayyaanaamittetenni lophate yaa mayyaate?

³ 1 Ximootewoosi 3:1 nabbawi. ‘Hasiꞌra’ yine tirroonnihu Giriikete qaali mittoricho marre iillate hiixata xawisannoho; hiixantannihu iille adhate qarrisannorira ikkara dandaanno. Soqqamaasinchu Phaawuloosi konne qaale horoonsiꞌre ayyaanaamittetenni lophate sharrama hasiissannota xawisino. Hanni mittu rodii albillitte songote afiꞌranno qoosso daafira hedanni noohu gede assite hedi. Isi songote soqqamaancho ikka hoogirono, Kiristaanu akatta lossiꞌra hasiissannosita afino. Isi balaxe songote soqqamaancho ikkate sharramanno. Hakkiinnino, cimeessa ikke soqqamara ayyaanaamittetenni gikki yaate mixo fushshiꞌranno. Qoleno, songote giddo wole loosu qeecha afiꞌrate ikkado ikkate sharrama hasiissannosi.

⁴ Hatteente gede roduuwu, suwisaano, Beeteelete soqqamatenna Mangistete Addaraashe minate mixo fushshidhuro hattenne mixo wonshiꞌrate sharrama hasiissannonsa. Hanni Maganu Qaali addu magansiꞌra magansidhannore ayyaanaamittetenni lophitanno gede jawaachishannonsahu hiittoonniitiro laꞌno.

5. Wedellu wolqansa Maganu Mangiste looso loosate horoonsiꞌra dandaannohu hiittoonniiti?

⁵ Wedellu jawaata wolqa noonsahura Yihowa soqqanshora lowo looso loosa dandaanno. (Lawishsha 20:29 nabbawi.) Mitu wedellu roduuwi Beeteelete giddo borro attamate loosira kaaꞌlanno; hattono Qullaawa Maxaafanna Qullaawu Maxaafi aana xintantino borruwa xarrazanno. Batinyu wedelli Mangistete Addaraashe minatenna gatamarate loosira kaaꞌlanno. Wedellu gikki yiino roduuwi ledo dano iillitinonsare kaaꞌlitanno. Batinyu suwisaano ikkino wedelli dancha duduwo gobbansaranna wole afoo coyiꞌranno mannira duduwanno.

6-8. (a) Mittu wedellichi Maganoho soqqamate daafira noosi lao biddi assiꞌrinohu hiittoonniiti? Tini mayi guma abbitinosi? (b) Yihowa ‘shaqqado ikkinota shinqe laꞌꞌa’ dandiineemmohu hiittoonniiti?

⁶ Atino Yihowara woꞌmu wodanikkinni soqqama hasiꞌrattoti dihuluullissannote. Ikkollana, aterano alba Aaroonira macciishshaminosiri gedeeri macciishshamahera dandaanno. Isi Yihowa Farciꞌraasine ikkitino maate giddo lophinoha ikkirono, “Songo haꞌranna soqqansho fula ceeꞌmisha hanaffinoe” yee coyiꞌrino. Aarooni Yihowara hagiirrunni soqqama hasiꞌrinoha ikkirono, hagiirraamo ikka didandiino. Ikkina isi maa assiyya?

⁷ Aarooni ganye ayyaanaamittete coye assa yaano, Qullaawa Maxaafa nabbawa, gambooshsheho qixxaawanna gambooshshunniwa dawaro qola hanafino. Roorenkanni isi ganye huuccatto assiꞌra hanafino. Yihowara noosi baxilli lexxita dancha gede ayyaanaamittete lopha hanafino. Isi hatte yanna kawa suwisaancho ikke soqqamino, wolu roduuwi ledo kalaqamu dano iillitinonsare kaaꞌlino, hattono wole gobba haꞌre sabbakino. Aarooni xa Beeteeletenna songote cimeessa ikke soqqamanni no. Isi heeꞌranni noo heeshsho daafira mayi macciishshamannosi? Isi togo yiino: “Yihowa shaqqado ikkinota qamase laoommo. Yihowa maassiꞌrinoehura Isira asalu nooehu gede ikke macciishshaminoe; hakko daafira isira albinni roore soqqamate kakkaummo; tini qolte lowo atoote afiꞌreemmo gede assitinoe.”

⁸ Faarsaanchu, “Kaaliiqa hasidhannori. . danchare dihoogganno” yee faarsino. (Faarso 34:8-10 nabbawi.) Ee, Yihowa isira diinaggaabbe  soqqantannore horo diꞌꞌirrawisanno. Ninkeno mitti mittinke Yihowara soqqamate dandiinummore baala assineemmoha ikkiro, Isi ‘shaqqado ikkinota shinqe (woy, qamanse) laꞌꞌa’ dandiineemmo. Magano woꞌma lubbonkenni magansiꞌnummoro, lowo geeshsha hagiidhineemmo.

9, 10. Cincite ‘agadha’ hasiissannohehu mayiraati?

⁹ Mixokki wonshiꞌrate sharramatto yannara cincite ‘agadhi.’ (Mik. 7:7) Yihowa soqqamaano songote giddo qoosso afiꞌrate cincite agadha hasiissannonsaha ikkirono, Isi aye woteno irkisannonsa. Maganu Abirihaamira labbaa qaaqqo aasira qaale einoha ikkirono, isi kayinni cince ammanatenni agadha hasiissinosi. (Ibi. 6:12-15) Abirihaami Yisihaaqi ilama geeshsha lowo diro cince agadha hasiissinosiha ikkirono hexxo dimudhino; Yihowano diꞌꞌirraawisinosi.—Kal. 15:3, 4; 21:5.

¹⁰ Cince agadha shota ikkitinokkiti egennantinote. (Law. 13:12) Mixonke wonshiꞌra hongoommota calla hendeemmoha ikkiro, hexxo mudhinammora dandiineemmo. Konnira, yannanke ayyaanaamittete akatta lossiꞌrate horoonsiꞌra hayyote. Hanni tenne assa dandiineemmota sase doogga laꞌno.

11. Hiikkuri ayyaanaamittete akatta lossiꞌrate sharrama hasiissannonke? Tini akatta hasiissannohu mayiraati?

¹¹ Ayyaanaamittete akatta lossiꞌri. Maganu Qaale nabbawanna hiincanke, hayyo, wodancha, taashsha, egenno, hedate dandoonna xiinxalla lossiꞌrate kaaꞌlitannonke. Kuri akatta addu magansiꞌrara albisa ikkitannorira hasiissannote.  (Law. 1:1-4; Tit. 1:7-9) Qullaawu Maxaafi aana xintantino borruwa nabbawanke mitte haja lainohunni Yihowa hedo afate kaaꞌlitannonke. Barru baala, boohaarshu daafira, uddiꞌratenna seesate daafira, woxe amaxxate daafira, mannu ledo sumuu yine heeꞌrate daafiranna wolu coyi daafira mitto coye doodhineemmo gede assannori tuncu yaannonke. Togoori tuncu yaannonke yannara Qullaawu Maxaafinni ronsoommore loosunni leellishanke, Yihowa hagiirsiisanno doorsha doodhate kaaꞌlitannonke.

12. Songote miilla ammanantinore ikkitinota leellisha dandiitannohu hiittoonniiti?

¹² Ammannanniheha ikki. Baalinke uyinanninkeha tiokiraasete looso loosate dandiinummore baala assa hasiissannonke. Gashshaanchu Nehimiya Yihowa daga mereerinni albisa ikke loosanno manna doora hasiissinosi. Isi hiittoo manna dooriyya? Nehimiya Magano waajjannoha, halaalaanchonna ammanamino manna doorino. (Neh. 7:2; 13:12, 13) Xaa yannarano, “Maganu mini soqqanshora hendoonniri ammanantinore ikka hasiissannonsa.” (1 Qor. 4:2) Danchu loosinke maaxame gatannokkihura uyinanninke looso loosate dandiinummore baala assa hasiissannonke.—1 Ximootewoosi 5:25 nabbawi.

13. Mannu gara ikkinokkire assannohe wote Yooseefi lawishsha harunsa dandaattohu hiittoonniiti?

¹³ Yihowa filahera wodhi. Wolu manni gara ikkinokkire assihero maa assatto? Kalaqamino qarra hakkawontenni tira dandaattoha ikkara dandaanno. Kayinni ati gara ikkoottota leellishate woꞌnaalattoha ikkiro, coyi roore bushara dandaanno. Yooseefira roduuwisi gara ikkinokkire assitinosiha ikkirono isi insara dikoꞌmino. Gedensaanni Yooseefi kaphunni kassanse usuru minira eessinoonnisi. Ikkirono, Yooseefi qarru yannara Yihowa massagannosi gede assiꞌrino. Togo assasi maaho kaaꞌlitusiyya? ‘Kaaliiqi qaalisinni jifinosi [“filinosi,” NW].’ (Far. 105:19) Yooseefi fonqolo baala qeele sai gedensaanni baxxino looso uyinoonnisi. (Kal. 41:37-44; 45:4-8) Mannu gara ikkinokkire assannohe yannara Yihowa hayyonna jaawaante aannohe gede huuccatto assiꞌri; assattore shaqqillunni assi; hattono manna awu afiinni hasaawisi. Qoleno, Yihowa kaaꞌlannohe.—1 Pheexiroosi 5:10 nabbawi.

14, 15. (a) Sabbankeemmo gara seekkine heda hasiissannonkehu mayiraati? (b) Addi addi hayyo horoonsidhe sabbakate maa biddi assiꞌra hasiissannoheha ikkara dandaanno? (Hanafote noo misilenna “Addi Addi Hayyo Horoonsidhe Sabbakate Woꞌnaaltanni Nootto?” yitanno saaxine lai)

¹⁴ Phaawuloosi Ximootewoosi togo yee jawaachishino: “Qullaawa maxaaffa mannaho nabbawate, kulatenna rosiisate jawaati. Ateneenna rosiisatto roso seekkite agadhi.” (1 Xim. 4:13, 16) Ximootewoosi gikki yiinoho Maganu Mangiste sawaakichaati. Ikkirono, soqqanshosinni dancha guma afiꞌrannohu rosiisanno roso ‘seekke agadhiro’ callaati. Qoleno mannu bashsho gede ikke macciishshannoella yee agadha didandaanno. Isi rosiisannore mannu macciishshanno gede, rosiisanno rosi insara hasiise noori ledo sumuu yaanno gede assa hasiissannosi. Ninkeno Maganu Mangistere dudumbeemmore ikkinoommo daafira hatto assa hasiissannonke.

¹⁵ Duucha wote minunni mine haꞌne soqqammeemmo yannara manna minensa dianfeemmo. Mite gobbara mite fooqqanna hasiꞌni gede ea dandiinannikki qooxeessa haꞌne sabbaka didandiineemmo. Ati heeꞌrattohu hattoo qooxeessira ikkiro, dancha duduwo duduwate wole doogga mayira diwoꞌnaalatto?

16. Gudumaaleho farciꞌra dancha guma abbitannota leellishannori maati?

¹⁶ Gudumaaleho farciꞌra dancha duduwo halashshate kaajja doogooti. Batinye Yihowa Farciꞌraasine tenne soqqanshonni dancha guma afidhanni no. Insa baaburunna otobise uurritannowa, dikkote, paarkenniwanna wolewa lowo manni heeꞌrannowa sabbakate yanna gaaꞌmitino. Yihowa Farciꞌraasine wolu manni ledo yannate odoo kayisse, hasaawissanni noo manchi ooso danchumma daafira woy loosanno loosi daafira kayisse hasaawate woꞌnaaltanno; tenne assitanno yannara wodanchitannore ikka hasiissannonsa.  Insa hasaawu mereero ayyaanaamittete hasaawa kayissanno; hattono hasaawissanni noo manchi hedosi xawisanno gede assate sharrantanno. Duucha wote manchu qolanno dawaro, aantanno yannara Qullaawu Maxaafi hasaawa hasaabbanno gede assitanno.

17, 18. (a) Gudumaaleho waajjittokkinni farciꞌrate mayi kaaꞌlahera dandaanno? (b) Soqqansho Daawiti gede Yihowa guwisiꞌrate kakkaꞌꞌatto gede assitannohe yineemmohu mayiraati?

¹⁷ Gudumaaleho farciꞌra qarra ikkitinoheha ikkiro, hexxo mudhitooti. Niyoorkete Katamira heeꞌrannohu Ediye yinanni suwisaanchira alba gudumaaleho manna hasaawisa qarra ikkitinosi. Ikkirono, yannate gedensaanni isi waajjikkinni gudumaaleho sabbaka dandiino. Tenne assate mayi kaaꞌlinosi? Isi togo yiino: “Maatete magansiꞌra assiꞌneemmo yannara, aninna minaamaꞌya mannu sokkanke adha giwanno wote maa assa dandiineemmoro afate borro seekkine xiinxallineemmo. Qoleno wole Yihowa Farciꞌraasine mite hedo kultannonke gede xaꞌmineemmo.” Xa Ediye gudumaaleho waajjikkinni farciꞌranno.

¹⁸ Addi addi hayyo horoonsidhe waajjittokkinni dancha duduwo duduwate sharramattoha ikkiro, ayyaanaamittete lophokki xabbe leeltanno. (1 Ximootewoosi 4:15 nabbawi.) Atino faarsaanchu Daawiti gede iimi Annanke togo yite galatattoti egennantinote: “Kaaliiqa woꞌmanka woyite galateemmosi; galatisino woꞌmanka woyite afiiꞌyanni dibaxxanno. Loosisi daafira Kaaliiqa woꞌmu wodaniꞌyanni galaxxeemmo; gadadaammuno [“jooguulluno,” NW] tenne macciishshite hagiidhito.” (Far. 34:1, 2) Soqqanshokki jooguullu woy suwashshu wodani noonsari ate ledo halaalaancho Magano magansidhanni hagiidhitanno gede assitara dandiitanno.

19. Ammanantinori Yihowa soqqamaasine buutote qarri iillinsarono hagiirraamma ikkitannohu mayiraati?

¹⁹ Daawiti togo yee faarsino: “Kaaliiqa, kalaqoottohu baalu galatannohe; mannikki baalu guwisannohe. Mootimmakki gaacheenire hasaabbanno; wolqakkireno coyidhanno. Mannu baalu kunni garinni, wolqakkinni loosoottoha jajjabba loosonna, jawa gashshootikki gaacheena afanno.” (Far. 145:10-12) Kuni Daawiti coyiꞌrinori Yihowate ammanantino soqqamaano baalate hedo xawisannoho. Kayinni xisso woy geedhimma hasiꞌritto gede ikkite soqqamattokki gede ataawe ikkituhero maa assa dandaatto? Towattannoheriranna wolootaho dancha duduwo duduwattoha ikkiro, qullaawa soqqanshokki Yihowa ayirranno gede assitannota aye woteno deꞌooti. Ammanakkinni kainohunni usurante noottoro; injaannoheha ikkiro halaale kula dandaatto, tini qolte Yihowa wodana hagiirsiissanno. (Law. 27:11) Ammanatenni bebbeehantino maate giddo noottoha ikkirono ayyaanaamittete looso loosattoha ikkiro Yihowa hagiidhanno. (1 Phe. 3:1-4) Qarrissanno ikkito giddo noottoha ikkiro nafa, Yihowa guwisiꞌranna ayyaanaamittetenni lopha dandaatto.

20, 21. Yihowa dirijjite giddo qoosso afidhe soqqamate sharramattoha ikkiro, tini woloota kaaꞌlitannohu hiittoonniiti?

²⁰ Aye woteno ayyaanaamittetenni lophate sharramattoha ikkiro, Yihowa addinta maassiꞌrannohe. Heeꞌratto gara woy yannakki biddi assidhe Yihowa uyino hexxo afa hasiꞌranno mannira Maganunniha muxxe ikkino halaale kula dandaatto. Qoleno, ayyaanaamittetenni lophattohanna umikki horo agurattoha ikkiro, tini ayyaanaamittete roduuwakki kaaꞌlitara dandiitanno. Songote giddo umokki heeshshi assite loosate sharramattoha ikkiro, ayyaanaamittete roduuwikki baxxannohe, naaddannohe, hattono kaaꞌlitannohe.

²¹ Yihowara soqqammoommohu lowo diro woy shiima agana ikkirono, ayyaanaamittetenni lopha dandiineemmo. Ikkina, gikki yiino Kiristaani haaruuddu ayyaanaamittetenni lophitanno gede kaaꞌla dandaannohu hiittoonniiti? Aananno birxichira tenne hajo daafira ronseemmo.