Yesuusa gibbannori isonna rosaanosi bushiishate afidhino faro giddo mitte tenneeti. Muse Higge mittu manchi sirote bisisi giddonni duꞌnamaanchu fuliro, dhiigu dhibbi amadisironna saadatenna mannu reeshsha kisiro battaawannota kultanno. Tini higge mittu manchi togoo coyinni battaawiro keeraawate maa assa hasiissannosirono kultanno. Togoo manchi keeraawannohu kakkalo shiqishe, hayishshiꞌre, woy waa aanaho winxeennasiiti.—Lew., fool. 11-15; Kir., fool. 19.

Yihudu rosiisaano tenne higge aana uminsa wodho leddino. Mittu maxaafi kulino garinni, insa mittu manchi battaawannohunna hakku manchi wole manna batteessannohu hiittoonniitiro kulanno biddishsha leddino. Qoleno, Yihudu rosiisaano battaawannonna bataawannokki uduunnichire kultanno higgenna battaawino manchi keeraawate harunsa hasiissannosi bude fushshitino.

Yesuusa gibbannosiri togo yite xaꞌmitino: “Rosaanokki albi manni woga diigge, sagale lagaabbino [woy, battaabbino] anganni mayira ittanno?” (Maq. 7:5) Insa togo yitinohu anga hayishshiꞌnikki ita gawajjitannota kulate yite diꞌꞌikkino. Yihudu rosiisaanora mittu manchi sagale itara albaanni angate waa gaꞌna hasiissannosi yaanno budi noonsa. Aleenni qummi assini maxaafi lede togo yiino: “Waa angate worate hiikkonne uduunnicho horoonsiꞌra hasiissannoro, hiittoo waa horoonsiꞌra hasiissannoronna waa ayi wora hasiissannosiro, hattono anga hiikko worre hayishshiꞌra hasiissannoro heewisantanno.”

Yesuusi tenne mannu fushshino higgera hiittoo lao noosi? Isi umi xibbi sanira heedhinote Yihudunnite ammaꞌnote sooreeyyera togo yiino: “Kiꞌne lawisiisaano! Isayaasi, ‘Tini gosa afiinsanni ayirrissannoe; wodaninsa kayinni anewiinni [Yihowa] xeertiꞌrinoho. Mannu woga ane Seeri gede assite rosiissanni, kaphunni magansidhannoe’ yine borreessinoonni garinni kiꞌnere himanasi garaho. Kunnira, kiꞌne Maganu hajajo agurtine mannu woga agadhitinanni.”—Maq. 7:6-8.