1. Kumu Diri Gashshooti yannara hiikku hagiirsiisanno coyi ikkanno?

 KIRISTOOSIHU Kumu Diri Gashshooti yannara, reyino manni uullate aana reyotenni kaꞌꞌanno yanna lowo geeshsha hagiirsiissannota ikkitanno! Shiiꞌrino manni, reyitinori kaꞌeenna insa ledo galagale xaadate quqquxamanno. Yihowano quqquxamanno. (Iyo. 14:15) Uulla woꞌmate noo manni reyino fiixinsa reyotenni kaeenna galagale xaadanno woyite mageeshshi geeshsha hagiidhannoro hanni hedi. Sai birxichira ronsummonte gede, suꞌminsa heeshshote maxaafira borreessamino “keeraano” ‘lubbotenni heeꞌrate reyotenni kaꞌanno.’ (Soq. 24:15; Yoh. 5:29) Shiiꞌnoommo manni giddo batinyu, Armagedooni gedensaanni mulenni uullate aana reyotenni kaꞌannori wido ikkitara dandiitanno. b Qoleno ‘cubbaataammu’ yaano Yihowa daafira rosatenna isira ammanante soqqamate faro afidhukki reyitinori, ‘reyotenni kaꞌeenna yoo yinanninsa.’

2-3. (a) Isayaasi 11:9, 10 kultanno garinni, uullate aana hiikkoye taalle nookki looso loonsanni? (b) Konni birxichira maa ronseemmo?

² Reyotenni kaꞌꞌanno mannira baalaho biddishshu hasiisanno. (Isa. 26:9; 61:11) Hakko daafira, uullate aana alba loonse egenninoonnikki deerrinni halaꞌlado rosiisate looso loonsanni. (Isayaasi 11:9, 10 nabbawi.) Mayira? Korkaatuno reyotenni kaꞌanno cubbaataammi, Yesuusi Kiristoosi  daafira, Maganu Mangiste daafira, wodote daafira, hattono Yihowa suꞌminna aliidimmasi daafira rosa hasiissannonsa. Wole agurina keeraano nafa Yihowa uullate hedinore mannisira sunu sununni xawisino gara rosa hasiissannonsa. Konni ammanamino manni giddo gamu reyinohu, Qullaawu Maxaafi borreessame goofara lowo diri albaanniiti. Hakko daafira cubbaataammuno keeraanono rossannori lowori no.

³ Konni birxichira aante noo xaꞌmuwa hasaambeemmo: Konne halaꞌlado rosiisate looso loonsannihu hiittoonniiti? Konne roso maahoyye yee adhanno manni hiikkanno? Adhannokkihuna? Tenne xaꞌmuwara qollanni dawaro afanke hasiissannote. Konninni aanchine laꞌneemmonte gede, Daanieeli maxaafinna Ajuujate maxaafira nooti mite dhagge ikkitanno masaalo, reyino manni kaꞌꞌanno woyite ikkannore lainohunni konni albaanni huwantoommo gara biddi assiꞌrate kaaꞌlitannonke. Hanni umo, Daanieeli 12:1, 2 masaalotenni kulloonnita dhagge ikkitanno ikkito laꞌno.

4-5. Daanieeli 12:1 goofimarchu yanna daafira maa kultannonke?

⁴ Daanieeli 12:1 nabbawi. Daanieeli maxaafi, goofimarchu yannara aante aantenni ikkannoha dhagge ikkanno coye kulanno. Lawishshaho, Daanieeli 12:1 ‘[Maganu] manna agarate’ Mikaeeli yaano Yesuusi Kiristoosi ‘leellannota’ woy kaꞌꞌannota kultanno. Tenne masaalohu mitu gafi woꞌma hanafinohu 1914nni Yesuusi iima Maganu Mangiste Moote ikke shoomami woyiteeti.

⁵ Ikkirono Daanieelira, Yesuusi ‘mannu kalaqaminkunni ikke egenninokkihu lowo qarri ikkanno’ yannara ‘leellannota’ woy kaꞌꞌannotano kulloonnisi. Tini “lowo qarri” yanna Maatewoosi 24:21 kulloonnite “lowo qarri” woy bayiru qarri yanna ledo mittete. Yesuusi hakkuyi bayiru qarri jeefora yaano Armagedooni yannara Maganu manna gatisate kaꞌꞌanno yaano qaafo adhanno. Ajuujate maxaafi “lowo qarra qeelte fulte dagginoreeti” yee konni ‘lowo manni’ daafira kulanno.—Aju. 7:9, 14.

6. Lowo daga bayira qarra qeelte saꞌuhu gedensaanni mayi ikkanno? Xawisi. (Tenne metseetera fulinoha, reyotenni kae uullate aana heeꞌranno manni daafira kulannoha, “Nabbawaano Xaꞌmitanno Xaꞌmo” yaanno birxichono lai.)

⁶ Daanieeli 12:2 nabbawi. Lowo daga tenne qarru yanna gatte saꞌuhu gedensaanni mayi ikkanno? Tini masaalo, alba huwantummo gede goofimarchu barra ikkitannote lawishshu kao daafira yaano Maganu manni haaro ikke ayyaanaamittetenni jawaatannota kultannota diꞌꞌikkitino. c Hatteentenni, tini masaalo kultanni noohu haaro alamera reyotenni kaꞌꞌanno manni daafiraati. Tini kao goofimarchu barruwa gooffuhunna Armagedooni oli saihu gedensaanni hanaffanno.

7. (a) Mitu manni “hegere heeshsho” afiꞌrate kaꞌꞌannohu hiittoonniiti? (b) Tini ‘roore kaooti’ yineemmohu mayiraati?

⁷ Ikkina Daanieeli 12:2 gamu “hegere heeshsho” afiꞌrate kaꞌanno yitannohu mayyaateeti? Hatto yaa 1,000 diri yannara reyotenni kaꞌe Yihowanna Yesuusi daafira rossannorinna insa albinni roore afate sharrantannori insara hajajantannoha ikkiro jeefote hegere heeshsho afidhanno yaate. (Yoh. 17:3) Tini kao konni albaanni uullate  aana mitu manni kaino kaonni ‘roortannote.’ (Ibi. 11:35) Mayira yiniro, guuta ikkinokkihu hakkawaro kaino manni galagale reyino.

8. Mitu manni ‘hegere saalinna gadadira’ kaꞌꞌannohu hiittoonniiti?

⁸ Kayinni reyotenni kaꞌannori baalu Yihowa rosiisannonsare macciishshite adhitanno yaa diꞌꞌikkino. Daanieeli masaalo gamu manni ‘hegere saalinna gadadira’ kaꞌꞌannota kultanno. Insa finqiltanno daafira suꞌminsa heeshshote maxaafira diborreessamanno; hattono hegere heeshsho diafidhanno. Hatteentenni insara “hegere saali” woy bao iillitannonsa. Hakko daafira Daanieeli 12:2 kultanni noohu, reyino manni reyotenni kaihu gedensaanni loosanno loosi garinni jeefote yinanninsa yoo daafiraati. d (Aju. 20:12) Mitu manni hegere heeshsho afiꞌranno, mitu kayi diafiꞌranno.

9-10. Bayiru qarri gedensaanni ikkannori woluri maati? ‘Gordu xawaabbi gede xabbannori’ ayeooti?

⁹ Daanieeli 12:3 nabbawi. Daannohu “lowo qarri” gedensaanni ikkannori woluri maati? Daanieeli 12:2no agurranna, kiiro 3 bayiru qarri gedensaanni ikkannoha wole coyeno kultanno.

¹⁰ ‘Gordu xawaabbi gede xabbannori’ ayeooti? Yesuusi Maatewoosi 13:43 coyiꞌrinori tenne afate kaaꞌlannonke; qummeeshshu, “Keeraano kayinni Anninsa Gashshootira arrishshote gede xabbanno” yaanno. Konni qummeeshshira qooxeessaho noo hedo leellishshannonte gede, Yesuusi kowiicho coyiꞌranni noohu ‘Maganu Gashshooti ooso’ yaano iimi Gashshootira ledosi soqqantannori buurantino roduuwisi daafiraati. (Mat. 13:38) Hakko daafira Daanieeli 12:3, buurantinori daafiranna insa Kumu Diri Gashshooti yannara loossanno loosi daafira kultanni nooti dihuluullissannote.

11-12. Kumu diri yannara 144,000 loossanno loosi maati?

¹¹ Buurantinori ‘lowo manna halaalu widira qoltannohu’ hiittoonniiti? Buurantinori 1,000 diri gashshooti yannara uullate aana loonsanniha rosiisate looso Yesuusi Kiristoosi ledo massagganno. Kuri 144,000 mootoolla ikkite gashshitannoha calla ikkikkinni kakkalaano ikkiteno soqqantanno. (Aju. 1:6; 5:10; 20:6) Hakko daafira insa, ‘gosa hursate’ looso kaaꞌlitanno; hattono mannu ooso sunu sununni guuta ikkitanno gede kaaꞌlitanno. (Aju. 22:1, 2; Hiz. 47:12) Hatti yanna buurantinorira lowo geeshsha hagiirsiissannota ikkitanno!

¹² Halaalu widira qollanniri ‘lowo manni’ wido ikkitinori ayeooti? Reyotenni kaꞌꞌanno mannaati, Armagedooni gate saꞌꞌanno mannaatinna haaro alamera ilantanno oosooti. Kumu diri jeefora uullate aana heeꞌranno manni baalunku guuta ikkanno. Ikkina suꞌminsa heeshshote maxaafira irsaasetenni ikkikkinni baꞌꞌannokki garinni biiretenni borreessamannohu mamooteeti?

13-14. Uullate aana heeꞌrannohu guuta ikkino manni baalu hegere heeshsho afiꞌrara albaanni maa leellisha hasiissannonsa?

¹³ Mittu manchi guuta ikkino daafira calla hegere heeshsho afiꞌranno yaa ikkitinokkita qaango. Hanni Addaaminna Heewani daafira hendo. Insa guuta mannaati; kayinni hegere  heeshsho afidhara albaanni Yihowara hajajantannota leellisha hasiissannonsa. Ikkirono insa Yihowara dihajajantino.—Rom. 5:12.

¹⁴ Uullate aana heeꞌranno manni kumu diri jeefora ma ikkanno? Baalunku guuta ikkanno. Guuta ikkanno manni baalu hegerera Yihowa gashshootira hajajamannonso Addaaminna Heewani gede guuta ikkirono isira ammanamikki gata ikka? Kuri xaꞌmuwara dawaro afa hasiissanno. Hiittoonni?

15-16. (a) Baalunku manni Yihowara ammanamannota leellishanno faro afiꞌrannohu mamooteeti? (b) Konni fonqolihu jeefote gumi maati?

¹⁵ Sheexaanu 1,000 diro usuramanno. Hatte yannara isi mitto manchono soꞌrisiisa didandaanno. Ikkirono kumu diri jeefora Sheexaanu usurunni tidhamanno. Hakkiinni isi guuta ikkino manna soꞌrisiisate woꞌnaalanno. Hatte yannara guuta ikkinohu uullate aana heeꞌranno manni baalunku, Maganu suꞌmanna aliidimmasi ayirrisannoronna teꞌee leellishanno faro afiꞌranno. (Aju. 20:7-10) Hattee yannara mittu mittunku manchi assanno coyi, suꞌmisi heeshshote maxaafira baꞌꞌannokki garinni borreessamanno gede woy borreessamannokki gede assanno.

¹⁶ Hatte yannara mitu manni Addaaminna Heewani gede Yihowa gashshoote giwannota leellishanno. Kuni manni hiikkanno?  Yohaannisi Ajuuja 20:15 togo yite kultannonke: “Suꞌmansa heeshshote maxaafira borreessinoonnikkire baala giirate baari giddo tungi.” Ee, kuni finqilino manni hegerera baꞌꞌanno. Kayinni guuta ikkinohu rooru manni konne fonqolo saꞌꞌanno. Hakkiinni insa suꞌmi heeshshote maxaafira baꞌꞌannokki garinni borreessamanno.

17. Daanieelira yannankera mayi ikkannota kulloonnisi? (Daanieeli 12:4, 8-10)

¹⁷ Konni albillitte ikkanno coyi daafira heda lowo geeshsha hagiirsiissannote! Ikkirono, sokkaanchu Daanieelira heeꞌnoommote ‘goofimarchu yanna’ daafira mite kaajja mashalaqqe kulinosi. (Daanieeli 12:4, 8-10 nabbawi; 2 Xim. 3:1-5) Sokkaanchu Daanieelira, “Halaalu egenno batidhanno” (NW) yiinosi. Addanko, Daanieeli maxaafi giddo kulloonni masaalo Maganu manni woꞌmunni woꞌma huwatanno. Sokkaasinchu lede tenne goofimarchu yannara “Haxawarrootu kayinni mittoreno wodanchitannokkihura bunshete aana bunshe leddanno” yiino.

18. Muli yannara bushuullu hiikkitanno?

¹⁸ Xaa yannara bushuullu bunshensara qorichishantannore dilabbanno. (Mil. 3:14, 15)  Ikkollana, muli yannara Yesuusi meꞌꞌeho yinoonnihu bushu mannira yoo yaanno; qoleno insa geꞌreewoho yinoonni manniwiinni badanno. (Mat. 25:31-33) Bushuullu bayira qarra gatte disaꞌanno; hattono haaro alamera heeꞌrate reyotenni dikaꞌanno. Insa suꞌma Milkiyaasi 3:16 kulloonnihu heeshshote maxaafira diborreessinoonni.

19. Tini yanna ma assa hasiissannonkete? Mayira? (Milkiyaasi 3:16-18)

¹⁹ Ninke bushuullu wido ikkinoommokkita leellinsheemmo yanna xaati. (Milkiyaasi 3:16-18 nabbawi.) Yihowa ‘baxxino woxi’ woy jajji gede asse laꞌꞌannore gamba assanni no. Ninkeno insa wido ikka hasiꞌneemmoti egennantinote.

20. Yihowa Daanieelira mayyee hexxo uyinosi? Tini hexxo woꞌmitanna laꞌꞌate quqquxamattohu mayiraati?

²⁰ Addanko heeꞌnoommohu dhagge ikkitanno yanna giddooti. Kayinni muli yannara roore dhagge ikkanno coyi ikkanno. Muli yannara bunshe baala baꞌanna laꞌneemmo. Hakkiinni Yihowa Daanieelira eino qaali woꞌmanna laꞌneemmo. Isi Daanieelira, “Goofimarchu [barra] kaꞌe qeechakki adhatto” yiinosi. (Dan. 12:13) Daanieelinna shiiꞌrootto manni reyotenni ‘kaeenna’ laꞌꞌate quqquxamootto? Hatto ikkiro, xa ammanante heeꞌrate dandiittore baala assi; hatto assittoro, suꞌmikki Yihowahu heeshshote maxaafira borreessame heeꞌranno.