1. Yesuusi harunsaanosira dancha lawishsha ikkinohu hiittoonniiti? Insa maa assituyya? (Aaniidi qoolira noo misile lai.)

 YESUUSI uullate aana noo yanna baalantera soqqanshote gara ikkitino lao noosi; harunsaanosirano soqqanshote gara ikkitino lao heedhansara hasiꞌranno. (Yoh. 4:35, 36) Yesuusi ledonsa noo yannara rosaanosi diinaggaabbe sabbakkino. (Luq. 10:1, 5-11, 17) Yesuusa amande shinihu gedensaanni kayinni insa shiima yanna geeshsha diinaggaabbe soqqama agurtino. (Yoh. 16:32) Yesuusi reyotenni kaihu gedensaanni rosaanosi sabbakate looso illachishshanno gede jawaachishinonsa. Isi iimira haꞌrihu gedensaanni, insa diinaggaabbe sabbakkino daafira diinnansa nafa “Yerusaalame rosiꞌnenni wonshitinoonni” yite hanqitino.—Soq. 5:28.

2. Yihowa sabbakate looso maassiꞌrinohu hiittoonniiti?

² Yesuusi umi xibbi diri Kiristaani loosino looso massagino; Yihowano batinyu manni sokkansa macciishshanno gede asse loosonsa maassiꞌrino. Lawishshaho, 33 M.D. Phenxeqostete ayyaanira 3,000 ikkanno manni cuuamino. (Soq. 2:41) Rosaanote kiirono dhagge ikkanno garinni lexxitino. (Soq. 6:7) Ikkirono Yesuusi goofimarchu yannara hakkiinni sainohu batinyu manni dancha duduwo macciishshe adhannota masaalino.—Yoh. 14:12; Soq. 1:8.

3-4. Mitootaho sabbakate looso loosa shota ikkitinonsakkihu mayiraati? Konni birxichira maa ronseemmo?

³ Ninke baalunku soqqanshote dancha lao heedhannonke gede assiꞌrate sharrammeemmo. Mite gobbuwara tenne assa diqarrissanno. Mayira? Korkaatuno batinyu manni Qullaawa Maxaafa xiinxalla baxanno; halashshaano xiinxallo hanafisiisate mitu manni isinni tara agadhanno gede assitanno! Mite gobbara kayinni  roduuwaho sabbakate looso loosa shota diꞌꞌikkitannonsa; duucha woyite mannu mine diheeꞌranno; mine heeꞌriro nafa Qullaawu Maxaafi daafira hasaawate hasatto hooggansara dandiitanno.

⁴ Heeꞌrattohu sabbakate looso loosa shota ikkitinokki qooxeessira ikkiro, konni birxichira kulloonni hedo kaaꞌlitahera dandiitanno. Mitu roduuwi qoqqowinsara mannunni xaadate assitinore laꞌneemmo. Qoleno mannu kulleemmonsa sokka adhono adhano hoogo, soqqanshote gara ikkitino lao heedhannonke gede assiꞌra dandiineemmohu hiittoonniitiro ronseemmo.

5. Batinye halashshaanora qarra ikkannonsari maati?

⁵ Batinye halashshaanora manna mine marte xaada albinni roore qarra ikkitanni noonsa. Mite halashshaano heedhannohu seekkine agarranni hintsuwanna huxxinoonni qoqqowi qooxeessiraati. Qoleno kuri hintsuwa agartino agaraasine heedhara dandiitanno; insa kuri hintsuwa woy qoqqowi giddo heeꞌranno manchi woshshikkinni ayino eannota hooltannoha ikkara dandaanno. Wole halashshaano kayi minunni mine haꞌra dandiitannoha ikkirono, gari manninni dixaaddanno. Mite halashshaano sabbakkannohu gaxarete woy xeertowa shiimu manni calla heeꞌranno qooxeessiraati. Insa mittu manchinni nafa xaadate lowo doogo haꞌra hasiissannonsaha ikkara dandaanno; hakku manchino mine nookkiha ikkara dandaanno! Togoori tuncu yiinkero hexxo mudha dihasiissannonke. Togoo fonqolo qeelatenna soqqanshonkenni dancha guma afiꞌrate maa assa dandiineemmo?

6. Sabbakate loosi qulxuꞌme woshshaadate loosi gedeeti yineemmohu mayiraati?

⁶ Yesuusi sabbakate loosi qulxuꞌme woshshaadate loosi gede ikkinota coyiꞌrino. (Maq. 1:17) Mitu qulxuꞌme woshshaaxxanno manni qulxuꞌme afiꞌrikki lowo barra keeshshara dandaanno. Kayi insa hexxo dimudhitanno. Hatteentenni woshshaaxxitanno yannanna bayicho hattono woshshaaxxitanno gara soorritanno. Ninkeno soqqammeemmo woyite hatto assa dandiineemmo. Hanni tenne assa dandiineemmota mite doogga laꞌno.

7. Soqqansho fulleemmo yanna soorrinummoro mayi guma afiꞌnammora dandiineemmo?

⁷ Mannu minira maratto yanna soorrate woꞌnaali. Soqqansho mannu minensa heeꞌrara dandaanno yannara fullummoro, lowo manninni xaandammora dandiineemmo. Qoleno mannu mininsara higansa digattanno! Batinye halashshaano barri widoonni woy hawarro lowo manninni xaaddanno daafira tenne yannara soqqama dancha ikkitinota wodanchitino. Qoleno mannu tenne yannara anga mitiiꞌma hoogaranna hasaawa hasiꞌrara dandaanno. Deevidi yinanni cimeessi coyiꞌrinore assakki ateno kaaꞌlitahera dandiitanno. Deevidi, isinna soqqanshote jaallasi umo martu woyite mannu mine nookki minna galagalte marte woꞌnaaltannota coyiꞌrino. Isi “Galagalle marreemmo woyite lowo manninni xaadanke dhagge ikkitannoe” yiino. b

8. Soqqammeemmo woyite Rosiisaancho 11:6 noo amaale harunsa dandiineemmohu hiittoonniiti?

⁸ Hexxo mudha dihasiissannonke. Kuni birxichi xintaminohu cuꞌmote qummeeshshinni tenne ronseemmo. (Rosiisaancho 11:6 nabbawi.) Aleenni kullihu Deevidino hexxo dimudhino. Mittu minira duucha hige mare qaete anna hoogihu gedensaanni jeefote qaete anninni xaadino. Hasaawisino manchi Qullaawu Maxaafire hasaawa hasiꞌrino; isi “Koye sette meddi yaanno diro heeꞌroommona, kayi mittu  Yihowa Farciꞌraasinchino miniꞌyara daye diegennino” yiino. Deevidi togo yiino: “Duucha hinge woꞌnaalle xaandeemmo manni dudumbeemmo sokka macciishshara dandaannota huwatoommo.”

9. Mite halashshaano mine marre xaada dandiinannikki manninni xaadate maa assitanno?

⁹ Wole basera soqqamate woꞌnaali. Mite halashshaano qaete marte hooggino manninni xaadate wole basera soqqantanno. Lawishshaho minunni mine haꞌne sabbaka dandiinannikkite jajjabba hintsuwara heeꞌranno manninni xaadate, doogote soqqamanna gaarete borro worre sabbaka dancha ikkitinota huwantoonni. Tini, halashshaano wolu garinni xaada dandiitannokki manninni xaadde hasaabbanno faro fantannonsa. Qoleno batinye halashshaano paarkete, dikkotenna daddalu qooxeessira mannu roore hasaawa woy borro adha hasiꞌrannota huwattino. Boliiviyaho woradu aliidi laꞌꞌaancho ikke soqqamannohu Filooreeni yinanni rodii togo yiino: “Daddalaasinete dikko batidhannokki yannara yaano barrihunni lamala saatenna honse saate mereero dikkonna daddalu qooxeessa haꞌneemmo. Duucha woyite mannu ledo dancha gede hasaambeemmo; mito woyite isinni Qullaawu Maxaafi xiinxallo hanafisiinseemmo.”

10. Mannaho farciꞌrate hiikkuri hayyo horoonsiꞌra dandaatto?

¹⁰ Addi addi garinni soqqamate woꞌnaali. Hanni mitto mancho xaadde hasaawisate marro marro higge woꞌnaalootto yine hendo. Addi addi yannara qaesi maroottoha ikkirono, isi kayi mine diheeꞌranno. Togoo manchira farciꞌra dandaattoti wole doogo no? Katariina yinanni rodoo togo yitino: “Mine mare hoogeemma mannira, insanni xaadoommaro coyiꞌreemmare  borrote sokka borreesse kuleemmansa.” Tennenni maa ronseemmo? Sabbakatto gari ikkihano ikkiro, qoqqowikkira heeꞌranno mannira baalaho farciꞌrate sharrami.

11. Mitu manni sokkanke macciishsha hasiꞌrannokkihu mayiraati?

¹¹ Mitu manni kulleemmonsa sokka macciishsha dihasiꞌranno. Insa Maganu daafirano ikko Qullaawu Maxaafire rosa hasiissannonke yite diheddanno. Insa alamete aana qarru batiꞌrinota laꞌanno woyite Magano diammantanno. Kaꞌaa Qullaawu Maxaafi yaannore assineemmo yitanni kaꞌaa bushare assitannore lawisiisaano ammaꞌnote murroota laꞌanno woyite Qullaawu Maxaafire afa dihasidhanno. Mitootaho loosu, uminsatinna maatete dilgo batidhinonsa daafira Qullaawu Maxaafi kaaꞌlannonsa gara diheddanno. Mannaho kulleemmonsa sokka macciishshate gari hasatto hooggunsarono, hagiirrinke baikkinni soqqama dandiineemmohu hiittoonniiti?

12. Filiphisiyusi Sokka 2:4 noo amaale harunsanke soqqammeemmo woyite kaaꞌlitankera dandiitannohu hiittoonniiti?

¹² Mannaho hedattota leellishi. Umi qara dancha duduwo macciishsha hasiꞌrannokki manni Yihowa Farciꞌraasine insa daafira heddannota wodanchiti dancha duduwo macciishshino. (Filiphisiyusi Sokka 2:4 nabbawi.) Lawishshaho aleenni kullihu Deevidi togo yiino: “Mittu manchi dihasiꞌreemmo yiiro, Qullaawa Maxaafa fanne nabbawa woy borro ela agurre ‘Dihasiꞌreemmo yoottohu mayiraatiro kulattoe ballo?’ yaa dandiineemmo.” Mannu insa daafira hendeemmota leellinsheemmo woyite tenne huwatara dandaanno. Coyiꞌnoommore qaaga hoogiro nafa, insara hendoommo gara qaagara dandaanno. Qaete anni coyiꞌneemmota hoꞌlinkero nafa, akatinkenninna albinkenni isira hendeemmota leellisha dandiineemmo.

13. Mittu mittunku manchira hasiisanno garinni farciꞌra dandiineemmohu hiittoonniiti?

¹³ Qaete anna kaaꞌlasira dandaannorenna isi macciishsha hasiꞌrannore kayinse hasaambeemmoha ikkiro isira hendeemmota leellinshanni heeꞌnoommo. Lawishshaho, isira ooso noosita leellishannore laꞌnummoro maa assa dandiineemmo? Annuwunna amuuwu Qullaawu Maxaafi ooso lossiꞌrate woy maate hagiirru noota assiꞌrate daafira kulanno amaale macciishsha hasidhannoha ikkara dandaanno. Mannu minensa duucha qulfe gaꞌninoha ikkirona? Alamete aana batiꞌrinohu waajjishanno coyinna jaddo daafira kayinse hasaambammora dandiineemmo; qaete anni togoo coyi heeꞌrannokki yanna daggannota kulleemmosi woyite macciishshara dandaanno. Ikkihano ikkiro, macciishsha hasiꞌranno manni Qullaawu Maxaafi amaale  kaaꞌlitannonsa gara wodanchanno gede assate sharrami. Aleenni qummi assiniti Katariina “Halaalu heeshshoꞌya woyyaabbanno gede assino gara hedeemma” yitino. Tini Katariina rossinore ammantannota leellishanno garinni coyidhanno gede assitinose; macciishshanno mannino tenne huwatansa digattanno.

14. Lawishsha 27:17 kultanno garinni, sabbankeemmo woyite mimmito kaaꞌla dandiineemmohu hiittoonniiti?

¹⁴ Wolootu kaaꞌlitannohe woyite maahoyye yii. Umi xibbi diro Phaawuloosi isi sabbakatenna rosiisate horoonsiꞌranno hayyo Ximootewoosira kulinosi; Ximootewoosi woloota kaaꞌlate tenne hayyo horoonsiꞌranno gede jawaachishinosi. (1 Qor. 4:17, NW) Ximootewoosi gede ninkeno songote giddo woꞌnaalshu noonsa roduuwiwiinni rosa dandiineemmo. (Lawishsha 27:17 nabbawi.) Hanni Shooni yinanni rodii lawishsha laꞌno. Isi boode yanna geeshsha gaxarete rooru manni ammaꞌninoommoreeti yaanno qooxeessira suwisaancho ikke soqqamino. Isi hagiirrisi baikkinni soqqama dandiinohu hiittoonniiti? Shooni togo yiino: “Dandaamie deerrinni wolootu ledo soqqameemmo. Mittu mininni wolunniwa haꞌneemmo woyite rosiisate dandoonke woyyeessiꞌra dandiineemmo gara hasaambeemmo. Lawishshaho, qaete anna hasaawinsoommo gari hiittootiro mimmito xaꞌmineemmo. Hakkiinni woyyeessiꞌra hasiissannonkeri heeꞌriro, aantete hattoo manchinni xaandummoro ma garinni hasaawisa dandiineemmoro hasaambeemmo.”

15. Huuccatto soqqanshote kaaꞌlitannonkehu hiittoonniiti?

¹⁵ Yihowa kaaꞌlannohe gede huuccatto assiꞌri. Soqqansho fulatto yanna baalantera Yihowa kaaꞌlannohe gede huucciꞌri. Wolqaataamu qullaawu ayyaanisi kaaꞌlinkekkinni ninke giddonni mittuno aye coyeno assa didandiineemmo. (Far. 127:1; Luq. 11:13) Yihowa kaaꞌlannohe gede huucciꞌratto woyite hasiisannohere badde kuꞌli. Lawishshaho suwashshu wodani noonsarinna macciishsha hasiꞌranno manninni xaadatto gede kaaꞌlahera huucciꞌri. Hakkiinni xaaditto mannira baalaho farcidhe huucciꞌrootto huuccatto ledo sumuu yaannore assi.

16. Qullaawa Maxaafa xiinxalla soqqanshote kaaꞌlitannonkehu hiittoonniiti?

¹⁶ Yanna gaaꞌmite hojju xiinxallo xiinxalli. Qullaawu Maxaafi, “Maganu hedo dancha, hagiirsiissannotanna guuta ikkitinota [affe]” yaanno. (Rom. 12:2) Maganu daafira ronsoommori halaale ikkinota seekkine buunxummoro, soqqammeemmo woyite mannaho mittoreno huluullammummokkinni farciꞌneemmo. Aleenni kulliti Katariina togo yitino: “Boode yannara albaanni, mito xinta ikkinoha Qullaawu Maxaafi roso seekke buuxiꞌra hasiissannoeta huwatoomma. Konnira Kalaqaanchu noota, Qullaawu Maxaafi addinta Maganu Qaale ikkinota hattono xaa yannara Maganoho iso riqibbanno dirijjite noosita leellishshanno taje buuxate seekke xiinxalloomma.” Katariina seekkite xiinxallase ammanase kaajjitanno gedenna soqqanshosenni albinni roore hagiirraame ikkitanno gede kaaꞌlitinoseta coyidhino.

17. Yesuusi hexxo mudhikkinni soqqaminohu mayiraati?

¹⁷ Yesuusi mitu manni sokkasi macciishsha giwirono, hexxo mudhe farciꞌra diagurino. Mayira? Isi mannu halaale macciishsha hasiissannonsata afino; qoleno dandaamisi deerrinni lowo manni Maganu Mangiste sokka macciishshanno gede kaaꞌla hasiꞌrino. Hakkiinnino sae, umi qara sokkasi macciishsha giwinohu mitu manni gedensoonni kayi macciishshannota afino. Hanni maatesi giddo ikkinore laꞌno. Yesuusi soqqaminohu sasu dirinna lewu agani giddo, roduuwisi giddo rosaanosi ikkinohu dino. (Yoh. 7:5) Ikkirono isi reyotenni kaihu gedensaanni insa rosaanosi ikkitino.—Soq. 1:14.

18. Sabbaka agura hasiissannonkekkihu mayiraati?

 ¹⁸ Rosiinseemmoha Qullaawu Maxaafi halaale gedensoonni macciishshe adhannohu ayetiro dianfoommo. Mitu manni sokkanke macciishshe adhannohu lowo yanna gedensaanni ikkara dandaanno. Kulleemmonsa sokka macciishsha hasiꞌrannokki manni nafa, dancha amanyootenke lae gedensoonni ‘Magano galatara’ dandaanno.—1 Phe. 2:12.

19. Umi Qorontoosi 3:6, 7 kultanno garinni, maa dea dihasiissannonke?

¹⁹ Kaanseemmorinna waa hayikkinseemmori ninke ikkinummorono, lossannohu kayi Magano ikkinota dea dihasiissannonke. (1 Qorontoosi 3:6, 7 nabbawi.) Itiyophiyaho soqqamannohu Geetahuni yinanni rodii togo yiino: “Gari geeshsha soqqammoonnikkihu mittu qoqqowira 20 saꞌꞌanno diro calliꞌya soqqamoommo. Xa kayinni kowiicho 14 halashshaano no. Insa giddo 13 cuuantinoreeti; kuri giddo mitte minaamaꞌyaati, sasu oosoꞌyaati. Gambooshshe daanno manni kiiro mereerimunni 32te.” Roduu Geetahuni Yihowa suwashshu wodani noonsa manna dirijjitesiwa abba geeshsha cince soqqamasinni lowo geya hagiidhino.—Yoh. 6:44.

20. Ninke manna hasse gatissannori gedeere ikkinoommohu ma garinniiti?

²⁰ Mannu baalunku heeshsho Yihowara muxxete. Isi tini alame baꞌara albaanni Beettisi ledo baalante daga giddonni manna gamba assate looso loonseemmo gede asse ayirrisinonke. (Hag. 2:7) Sabbakate loosinke taqu toe amadino manna hasate gedeeti. Ninke konne manna hasse fushshitannori gedeeti. Reyikkinni fushshinanni manni kiiro shiima ikkiturono, hassuri baalu loossino loosi shaaꞌꞌa diꞌꞌikkino. Sabbakate loosinkeno hattooti. Sheexaanu alamenni gatannohu mageeshshi manni nooro dianfoommo. Ikkollana, Yihowa insa gatisate ninke giddo ayeno horoonsiꞌrara dandaanno. Boliiviyaho heeꞌrannohu Andireyaasi yinanni rodii togo yiino: “Qullaawu Maxaafi halaale rose cuuamannoha mitto mittonka halashshaancho, lowo roduuwi kaaꞌliteenna dayinohu gede asse laeemmo.” Ninkeno soqqanshote togoo lao heedhannonke gede assiꞌno. Hatto assinummoro Yihowa maassiꞌrannonke, soqqanshonkennino addu hagiirre afiꞌneemmo.