Ati Tenne Afootto?
Hundi waro haqalunni yowolo seekkinanni?
Haqale
BATINYU manni, hunda Gibitsete gobbara woraqata seekkinannihu roore anga haqalunni ikkinota afino. Giriiketenna Roomu mannino haqalunni * seekkinoonni woraqati aana borreessanno. Ikkollana haqalunni woraqata calla ikkikkinni yowolono seekkinannita gari manni diafino.
Gibitsete manni waamma giddo anfoonnita lame haqalunni seekkinoonni yowolo akeeka
Masaalaanchu Isayaasi 2,500 saˈˈanno diri albaanni, “Itiyophiyu Wayibbara widoonni noo gosa” “sokkaano haqalunni seekkinoonni markaawe gulufisiisse” sokkannota borreessino. Yannate gedensaanni masaalaanchu Ermiyaasi Meedooninna Faarisi gosa Baabiloone horritanno yannara, Baabiloonootu xooqqe fultannokki gede “haqalunni seekkinoonni yowolonsa” giirtannota masaalino.—Isa. 18:1, 2; Erm. 51:32, NW.
Hundi waro haqalunni yowolo seekkinannita umme fushshinoonni taje leellishshanno; ninke Maganu ayyaaninni borreessinoonniha Qullaawa Maxaafa xiinxallineemmore ikkinoommo daafira tini xagge diˈˈikkitinonke. (2 Xim. 3:16) Arkiyolojete xiinxallaano affinori maati? Insa hunda Gibitsete gobbara haqalunni yowolo seekkinannita leellishshanno taje affino.
HAQALUNNI YOWOLO SEEKKINANNIHU HIITTOONNIITI?
Gibitsete gobbara waammate aana kayinsoonni misillanna waammate girgiddira borreessinoonni borro, haqale mindannihunna yowolo seekkinannihu hiittoonniitiro leellishshanno. Labballu haqalu agada nadala nadala assite usurtanno; hakkiinni baalanta nadalla gamba assite biqqe usurtanno. Konni haqali agashshi sasi-midaadoho. Hakko daafira gamba assine binqe usurranni woyite cifame kaajjado nadala ikkanno. Mittu maxaafi (A Companion to Ancient Egypt) yaanno garinni haqalunni seekkinoonni yowolo hojja 17 meetire geya ikkitara dandiitanno; qoleno mitto widoonni calla 10 kayise 12 laaqiˈraasinchi geya amaddara dandiitanno.
Yowolo haqalunni seekkinanni gara leellishshannota Gibitsete manni waamma giddo noo misilla
YOWOLO SEEKKITANNORI HAQALE HOROONSIDHANNOHU MAYIRAATI?
Togoo haqali Abbayi Lagi xeichira woˈme no. Qoleno haqalunni yowolo seekka diqarrissanno. Jajjabba markaawe roore woyite haqqunni seekka hananfoonniha ikkirono, qulxuˈme woshshaaxxitannorinna ugaaxaasine shiimmaadda yowolo haqalunni seekkiˈra agurtinoha dilawanno.
Mannu haqalunni seekkinoonni yowolo lowo yanna horoonsiˈranni heeˈrino. Yesuusi soqqamaasine waro heeˈrinohu Giriikete borreessaanchi Pilutaarki hakka warono mannu haqalunni seekkinoonni yowolo horoonsiˈrannota coyiˈrino.
^ GUFO 3 Haqalu muˈrannohu raarotenna sununni daadanno wayi giddooti. Togoo haqali hojja 5 meetire geya lophara dandaanno; qoleno agashshisi hundiido baqo 15 senti meetire ikkara dandaanno.
