1. Faarso 15:1-5 xiinxalla kaaꞌlitannonkehu hiittoonniiti?

 SAI birxichira, heeshshonsa Yihowara sayisse uyitinori isi ledo kaajju jaaloomi heeꞌrannonsa gede assidhe lawishshu dunkaanisi giddo wosina ikka dandiitannota ronsoommo. Kayinni togoo jaalooma kalaqiꞌrate ikkadda ikka dandiineemmohu hiittoonniiti? Faarso 15 tenne daafira lowore kultannonke. (Faarso 15:1-5 nabbawi.) Tenne faarsora Maganunniwa albinni roore shiqate ma assa hasiissannonkero kulloonni.

2. Faarsaanchu Daawiti Yihowa dunkaani daafira qummi assinohu mayira ikkara dandaanno?

² Faarso 15 togo yite hanaffanno: “Kaaliiqa, minekki galannohu ayeti? Qullaawu Ilaalikki iima heeꞌrannohu ayeti?” (Far. 15:1) Faarsaanchu Daawiti Yihowa ‘dunkaani’ daafira qummi assi woyite hatte yannara Gebaooni noohu xaadooshshu dunkaani daafira hedanni nooha ikkara dandaanno. Qoleno Daawiti Maganunniha ‘qullaawa ilaala’ qummi assino; isi tenne coyiꞌrinohu Yerusaalamete nooha Tsiyooni Ilaala kulate ikkara dandaanno. Daawiti qullaawa mine minna geeshsha gondooru taawoota Gebaoonira wodiidoonni lowo kiilomeetire xeertiꞌre noo bayicho qasino.—2 Sam. 6:17.

3. Faarso 15 huwata hasiissannonkehu mayiraati? (Misileno lai.)

³ Hige rooru Israeelete manni xaadooshshu dukkaniwa soqqamara fajjinannikkiti egennantinote; gondooru taawooti noowa eanno gede fajjinanni manni shiimaho. Kayinni baalanti ammanantinoti Yihowa soqqamaano isi jaalla ikkite heedhuro, lawishshu dukkanisi giddo wosina ikka dandiitanno. Ninke baalunku halchineemmo coyi konneeti. Faarso 15 Yihowa jaalla ikkine heeꞌrate maa assa hasiissannonkero kultanno.

 SUWASHSHO DOOGO HADHE HATTONO HALAALE LOOSSE

4. Yihowa cuuamammora calla hasiꞌrannokkita anfeemmohu hiittoonniiti? (Isayaasi 48:1)

⁴ Faarso 15:2te Maganu jaali ‘suwashsho doogo haꞌrannotanna halaale loosannota’ kulloonni. ‘Haꞌranna loosa’ yaanno qaali mitto coye agurrikkinni assinannita leellishannoho. Ikkina addinta ‘suwashsho doogo haꞌra’ dandiineemmo? Ee. Guuta ikkino manchi dino; kayinni Yihowa isira hajajamate dandiinummore baala assineemmoha ikkiro, ‘suwashsho doogo haꞌnanni’ heeꞌnoommohu gede asse laꞌꞌanno. Heeshshonke Maganoho sayinse uyinummonna cuuammummo yannara isi ledo haꞌra hananfoommo. Hundi waro, mittu manchi Israeelicha ikkino daafira calla Yihowa dunkaani giddo wosincho ikkanno yaa ikkinokkita wodanche. Mitu manni suꞌmasi woshshinoha ikkirono, “halaalunninna keeraanchimmatenni” diheeꞌrino. (Isayaasi 48:1 nabbawi.) Addinta Yihowa hasiꞌrannohu Israeelete manni isi biddishsha rosanna harunsa hasiissannonsa. Hatteente gede xaa yannarano Magano hagiirsiisate cuuamatenninna Kiristaanu songo miila ikkatenni sainore assa hasiissannonke. ‘Halaale loosa’ hasiissannonke. Tenne assa dandiineemmohu hiittoonniiti?

5. Baalunku coyinni Yihowara hajajamate maa assa hasiissanno?

⁵ ‘Suwashsho doogo haꞌratenna halaale loosate’ ganyine gambooshshe haꞌratenni sainore assa hasiissannonke. (1 Sam. 15:22) Heeshshonke baalatenni calluwu heeꞌnoommo woyiteno Maganoho hajajamate dandiinummore baala assa hasiissannonke. (Law. 3:6; Ros. 12:13, 14) Shiimu coyira nafa Yihowara hajajama hasiissannote. Togo assa Yihowa addinta banxeemmota leellishshanno; isino baxannonke.—Yoh. 14:23; 1 Yoh. 5:3.

6. Ibiraawoota 6:10-12 kultanno garinni konni albaanni ammanamme assinoommo coyi baalunni roorannori maati?

 ⁶ Yihowa konni albaanni isira assinoommore lowo geeshsha naadanno. Kayinni alba ammanamme assinoommori calla Yihowa dunkaani giddo wosina ikkine heeꞌrate ikkadda ikkineemmo gede diassannonke. Ibiraawoota 6:10-12 tenne daafira xawisse kultanno. (Qummeeshsha nabbawi.) Yihowa alba assinoommoha dancha coye dihawanno. Kayinni isi “goofimarchu geeshsha” woꞌma lubbonkenni magansiꞌnammosira hasiꞌranno. “Hexxo mudha hoongummoro” Yihowa hegere jaallasi asse baꞌraasannonke.—Gal. 6:9.

WODANIꞌNENNI HALAALE COYIDHE

7. Wodaninkenni halaale coyiꞌrate yaa mayyaate?

⁷ Yihowa dunkaani giddo wosincho ikka hasiꞌrannohu “wodanisinni halaale coyiꞌra” hasiissannosi. (Far. 15:2) Hatto yaa kapha hooga calla diꞌꞌikkitino. Yihowa coyiꞌneemmorinna assineemmorinni ammanammammora hasiꞌranno. (Ibi. 13:18) Tini lowo geeshsha hasiissannote; korkaatuno Yihowa “busha assitannore giwanno; suwashshu wodanirira kayinni wodanisire kulanno.”—Law. 3:32.

8. Hiikkonne amanyoote qoropha hasiissannonke?

⁸ ‘Wodaninsanni halaale coyidhannori’ mannu noowa Maganoho hajajantannore labbe badheenni seerasi didiigganno. (Isa. 29:13) Insa doga qorophitanno. Doganno manchi Yihowa aanno biddishshi woꞌmanka woyite kaaꞌlannoha ikkasi huluullamanno. (Yai. 1:5-8) Isi mittu coyi hakkeeshshi geeshsha dihasiisannoho yee hedannoha ikkiro Yihowara hajajama hoogara dandaanno. Hakkiinni isi Yihowa seera diigasi qarra abbitannosikkiha lawisiro roore bunshe assa hanafanno; tini magansiꞌrasi Yihowa albaanni waaga afidhinokkita ikkitanno gede assitanno. (Ros. 8:11) Ninke kayinni baalunku coyinni ammanammoommore ikka hasiꞌneemmo.

9. Yesuusi umo Naatinaeeli ledo xaadi woyite coyiꞌrinorinni maa ronseemmo? (Misileno lai.)

⁹ Yesuusi umo Naatinaeeli ledo xaadi woyite coyiꞌrinorinni dancha giddore ikka hasiissannota ikkitinota ronseemmo. Filiphoosi  jaalasi Naatinaeeli Yesuusinni xaadisi woyite dhagge ikkannori ikkino. Yesuusi Naatinaeelinni xaade egenninokkiha ikkirono, “Kuni xagarro afiꞌrinokkihu halaalaancho Israeelete manchooti” yiino. (Yoh. 1:47) Yesuusi wole rosaanosi ammanantinore ikkitinota afinoha ikkirono Naatinaeeli kayinni roore ammanaminoha ikkinota huwatino. Naatinaeeli ninkente gede guuntete xeꞌne noosi manchooti. Ikkirono isi lawisiisannoha diꞌꞌikkino, hattono ammanaminoho. Yesuusi tennera dhagge assiꞌrino; hakko daafira Naatinaeeli galatinosi. Yesuusi ninkeno hatto yiinkero tini lowo ayirrinyeeti!

10. Yihowa uyinonketa coyiꞌrate dandoo garimale horoonsiꞌra hasiissannonkekkihu mayiraati? (Yaiqoobi 1:26)

¹⁰ Faarso 15 kulloonnihu assa hasiissannonkehu rooru coyi wolootu ledo noonke aante ledo xaadooshshe afiꞌrinoho. Faarso 15:3 Yihowa dunkaani giddo wosiꞌnanno manchi daafira kultanni, “Lame arrawo coyiꞌrannokkiho; jaalisira bunshe assannokkiho; ollaasi heꞌmannokkiho” yitanno. Konni garinni coyiꞌrate dandoonke garimale horoonsiꞌra, woloota gawajjitanno hattono Yihowa dunkaani giddo wosina ikkate ikkadda ikkineemmokki gede assitanno.—Yaiqoobi 1:26 nabbawi.

11. Suꞌma hunate yaa mayyaate? Suꞌma hune kae maaro eannokki mancho hiissinanni?

¹¹ Faarsaanchu suꞌma hunate daafirano qummi assino. Suꞌma hunate yaa mayyaate? Suꞌma hunate yaa nookkire coyiꞌne mittu manchiha suꞌnaado suꞌma bushiishate. Suꞌma hunmanno manchi maaro ea hoogiro Kiristaanu songonni fushshinanni.—Erm. 17:10.

12-13. Hendummokki jaalinke suꞌma hunnammora dandiineemmohu hiittoo woyite ikkara dandaanno? (Misileno lai.)

¹² Faarso 15:3 Yihowa dunkaani giddo heeꞌranno manchi olliisira bushare assannokkitanna jaalisi suꞌma hunannokkitano kultanno. Jaalinke suꞌma hunnammora dandiineemmohu ma garinniiti?

 ¹³ Gara ikkinokkire coyiꞌne hendummokki mittu manchi suꞌma hunnammora dandiineemmo. Lawishshaho: (1) mitte rodoo woꞌma yanna soqqansho soqqama agurtino, (2) mittu minaanninna minaama Beeteeletenni fulino, woy (3) mittu rodii songote cimeessa woy songote soqqamaancho ikke soqqama agurino. Kuri roduuwi qoossonsa hoogginohu insawa gatteennaati yaanna tenne daafira kayinse wolootaho hasaawa garaho? Insa agurtanno gede assinonsahu ninke anfoommokki korkaati heeꞌrara dandaanno. Hakkiino sae Yihowa dunkaani giddo heeꞌranno manchi ‘jaalisira bunshe assannokkihonna ollaasi heꞌmannokkiho.’

YIHOWA WAAJJITANNORE AYIRRISSE

14. Yihowa dunkaani giddo heedhannori ‘cubbaataamma naaddannokkihu’ hiittoonniitiro xawisi.

¹⁴ Faarso 15:4 Yihowa jaali ‘cubbaataamma naadannokkita’ kultanno. Tenne assa dandiineemmohu hiittoonniiti? Ninke uminkenni kaꞌne mittu manchi cubbaataamohoronna teꞌee mura didandiineemmo. Mayira? Guuntete xeꞌne noonkere ikkinoommo daafira insawa shiqa qarra ikkitannonkekki manna banxeemmo; wolootu kayinni caacceessitannonke daafira insa gimbeemmo. Konnira giwa hasiissannonkehu Yihowa ‘cubbaataammaho’ yiinore callaati. (1 Qor. 5:11) Lawishshaho, cubbaataammu gara ikkinokkire assite maaro eꞌannokkireeti, ammananke ayirrissannokkireeti woy Yihowa ledo noonke jaalooma shoshshoggishate woꞌnaaltannoreeti.—Law. 13:20.

15. ‘Yihowa waajjitannore ayirrinseemmoti’ mitte doogo hiittenneeti?

¹⁵ Faarso 15:4 ‘Yihowa waajjitannore ayirrisa’ hasiissannonketano kultanno. Hakko daafira Yihowa jaallara danchumma leellinsheemmonna ayirrinseemmonsa doogga hasiꞌneemmo. (Rom. 12:10) Hiittoonni? Faarso 15:4 tenne assa dandiineemmota mitte doogo kulloonni; qummeeshshu, Yihowa dunkaani giddo heeꞌranno manchi ‘qarramiro nafa coyiꞌrino qaale soorrannokkita’ kulanno. Coyiꞌnoommo qaale agadha hooga woloota gawajjitara dandiitanno. (Mat. 5:37) Lawishshaho, Yihowa dunkaanisi giddo heedhannori adhantu woyite eino qaale agadhite heedhara hasiꞌranno. Annuwunna amuuwu oosonsara eꞌino qaale wonshate sharrantanna laꞌꞌanno woyiteno hagiidhanno. Maganohonna mannaho noonke baxilli eꞌnoommo qaale wonshate dandiinummore baala assineemmo gede kakkayisannonke.

16. Yihowa jaalla ayirrinseemmoti wole doogo hiittenneeti?

¹⁶ Yihowa jaalla ayirrinseemmoti wole doogo insa wosinsiꞌratenna shaqqille leellishate. (Rom. 12:13) Ammanate roduuwinke ledo yanna sayisa insanna Yihowa ledo noonke jaaloomi kaajjanno gede assitanno. Roorenkanni insa wosinsiꞌneemmo woyite Yihowa lawishsha harunsineemmo.

WOXU BAXILLE QOROPHE

17. Faarso 15te woxu daafira qummi assinoonnihu mayiraati?

¹⁷ Faarso 15 Yihowa dunkaani giddo heeꞌranno manchi daafira kultanni, “Woxesi qallote aannokkiho; keeraanchunnire wirate gubbo itannokkiho” yitanno. (Far. 15:5) Tenne harancho faarso giddo woxu daafira qummi assinoonnihu mayiraati? Korkaatuno woxe quwa saꞌne baxa wolootu ledonna Maganu ledo noonke aante gawajjitara dandiitanno. (1 Xim. 6:10) Hundi waro mitootu roduuwinsara woxe liqiissitanno woyite, qallo adhitanni buxane roduuwansa beebba assidhanno.  Qoleno mitu daanyooti gubbo adhite beebbaataammaho gara ikkitinokki yoo yitino. Togoo assoote Yihowa tiyyiꞌre giwanno.—Hiz. 22:12.

18. Woxu daafira hiittoo lao noonkero afate hiikkuri xaꞌmuwa kaaꞌlitannonke? (Ibiraawoota 13:5)

¹⁸ Woxu daafira hiittoo lao noonkero afate ninkeneeto layiꞌra danchate. Ateneeto togo yite xaꞌmi: ‘Duucha woyite hedeemmohu woxunna woxunni hidhinanni coyi daafiraati? Woxe liqiiꞌrummoro, liqiissinoe manchira dihasiisannosi yee qolummokki keeshsheemmo? Woxe afiꞌra woloota rooroommohu gede asse hedeemmo gedenna shaqqille leellisha qarra ikkitannoe gede assitanno? Ammanate roduuwiꞌyara woxu noonsa daafira calla woxe shorritannori gede asse hedeemmo? Roore jaala ikka hasiꞌreemmohu dureeyyete ledo callaati?’ Yihowa wosina ikka taalle nookki qoossooti. Woꞌmanka woyite woxu baxille qorophine tini qoossonke baꞌannokki gede assiꞌra dandiineemmo. Hatto assineemmoha ikkiro Yihowa horo diagurannonke!—Ibiraawoota 13:5 nabbawi.

YIHOWA JAALLASI BAXANNO

19. Yihowa Faarso 15 kulloonnire assinammora hasiꞌrannohu mayiraati?

¹⁹ Faarso 15 jeefote “Hattoo manchi horontanni dimasanno” yitanno. (Far. 15:5) Kowiicho faarsaanchu, Maganu tenne faarsora kulloonnire assinammora hasiꞌrannohu mayiraatiro xawisino. Yihowa hagiirraamma ikkinammora hasiꞌranno. Hakko daafira isi atootesinna agarooshshe afiꞌneemmo gede assannonke biddishsha uyinonke.—Isa. 48:17.

20. Yihowa dunkaani giddo heedhannori albillitte maa afidhanno?

²⁰ Yihowa dunkaanisi giddo heedhara fajjinori albillitte dhagge ikkanno atoote afidhanno. Ammanantinori buurantino roduuwi iima Yesuusi qixxeessinonsahu ‘lowo dargira’ hadhe heedhanno. (Yoh. 14:2) Uullate aana heeꞌrate hexxo noonsari Yohaannisi Ajuuja 21:3 kulloonni hexxo quqquxante agadhitanno. Yihowa ninke baalanka jaallasi ikkineemmo gedenna hegerera dunkaanisi giddo heeꞌneemmo gede koyisinonke; tini ninkera lowo ayirrinyeeti!