1. Yihowa isonooto qansidhanno ama ledo heewisiisinohu mayiraati?

 “AMA qansidhannoha qaaqqose habbannoni?” Tini, Yihowa masaalaanchu Isayaasi waro xaꞌmino xaꞌmooti. Maganu mannasi, “Ise habbara dandiitanno; ani kayinni horonta dihaweemmoꞌne” yiinonsa. (Isa. 49:15) Yihowa duucha woyite isonooto amate ledo diheewisiisanno. Hakkawaro kayinni heewisiisino. Yihowa soqqamaanosi mageeshshi geeshsha baxannoro leellishate, amatenna qaaqqu baxille lawishsha asse horoonsiꞌrino. Jaazmiini yinanni rodoo, “Ama qansidhanno woyite, qaaqqise ledo baxxinohu geedote baxilli kalaqamanno” yitino; lowo amuuwi tini gara ikkitinota ammananno.

2. Yihowa oososi giddonni mittu nafa isiwiinni xeertiꞌranno woyite mayi macciishshamannosi?

² Yihowa oososi giddonni mittu nafa, Kiristaanu gambooshshe haꞌranna sabbaka aguranno woyite afanno. Isi, diru kiiro kumunni kiirranni soqqamaanosi ayyaanaamittetenni qiiddanna b laꞌꞌanno woyite mageeshshi geeshsha xissiisiꞌrannoro hanni hendo!

3. Yihowa hasatto maati?

³ Ayyaanaamittetenni qiiddino roduuwi giddo batinyu songo higganno; ninkeno anga fanne haaꞌneemmonsa! Yihowano ninkeno insa songo higgara hasiꞌneemmo! (1 Phe. 2:25) Ikkina insa kaaꞌla dandiineemmohu hiittoonniiti? Tenne xaꞌmora dawaro afiꞌnammora albaanni, hanni mitu roduuwi gambooshshe  haꞌranna sabbaka agurtinohu mayiraatiro laꞌno.

4. Mitoota loosu ma assino?

⁴ Mitoota loosu itinonsa. Hangi c yinannihu Iisiyaho heeꞌranno rodii togo yiino: “Loosu qalxe amadinoe. Afiꞌraamo ikkummoro, Yihowara roore soqqameemmo yee umoꞌya dogoommo. Konnira lowo saate looseemmo. Hakkiinni gambooshshe hosa hanafummo; sunu sununni coꞌonta haꞌra agurummo. Sheexaanu alame, mannu sunu sununni Maganuwiinni xeertiꞌranno gede assitannote.”

5. Mitte rodoo iillinosehu buutote qarri gawajjinosehu hiittoonniiti?

⁵ Mito roduuwanke qarru qalxe amadinonsa. Ane yinanniti Biritaaniyaho heedhannoti onte ooso ama togo yitino: “Qaaqquulliꞌya giddo mittu ilami woyite bisu xeꞌne noosiho. Gedensoonni mitte qaaqqoꞌya songotenni bohantino; wolu qaaqqiꞌya kayinni surre xissamino. Kade amadeemmari baeennae gambooshshe haꞌranna soqqama agurumma. Sunu sununni ayyaanaamittetenni qiidumma.” Tenne rodoonna maatese, hattono togoo qarri tuncu yiinonsare wole manna lowo geeshsha mararreemmonsa!

6. Mittu Kiristaanchi Qolasiyaasi Sokka 3:13 noo amaale harunsa hoogiro, Yihowa manniwiinni xeertiꞌrara dandaannohu hiittoonniiti?

⁶ Qolasiyaasi Sokka 3:13 nabbawi. Mite Yihowa soqqamaano ammanate roduuwinsa assitinorinni xissiisidhino. Soqqamaasinchu Phaawuloosi roduuwinke ‘koffi assitannonke’ woyiti heeꞌrara dandaannota coyiꞌrino. Wole agurina insa miiccankera nafa dandiitanno. Qoropha hoongummoro, tennera quwa saꞌne giirammammora dandiineemmo. Tini, mittu rodii sunu sununni Yihowa manniwiinni xeertiꞌranno gede assitasira dandiitanno. Hanni Wodiidi Ameerikira heeꞌrannohu Pabilo yinanni rodii lawishsha laꞌno. Isi gara ikkinokkire assino yine beebba kassansoonnisi daafira, songote giddo noosita soqqanshote qoosso hoogino. Ikkina isi hiitto ikkiyya? Pabilo “Tennera hanqe, sunu sununni songotewiinni xeertiꞌroommo” yiino.

7. Mittu manchi tiiꞌꞌisi bushiishanni waadannosiha ikkiro, ma ikkara dandaanno?

⁷ Alba cubbo loosino mancho, tiiꞌꞌisi bushiishanni waadasiranna Maganu dibaxannoe yee hedanno gede assasira dandaanno. Cubbisira maaro eꞌꞌeenna Maganu gatona yiinosiha ikkirono, isi kayinni Maganoho soqqamate diꞌꞌikkoommoho yee hedara dandaanno. Firaansisko yinanni rodiino hatto yee hedino. Isi togo yiino: “Alba fooreenna seejjinoonnie. Umi qara gambooshshe haꞌra aguroommokkiha ikkirono, lowo geeshsha yaadoommo daafira, Yihowa manni mereero heeꞌrate diꞌꞌikkoommoho yee hedoommo. Tiiꞌꞌiꞌya bushiishanni waadinoe; Yihowa horo gatona diyiinoe yeeno hedoommo. Gale hose sabbakanna gambooshshe haꞌra agurummo.” Kuri roduuwi daafira hedatto woyite mayi macciishshamannohe? Insa mararattonsa? Roorenkanni Yihowara insa daafira mayi macciishshamannosi?

8. Yihowa alba isira soqqantannore hawannoni? Xawisi.

⁸ Yihowa alba isira soqqantannore xa kayinni yannate geeshshano ikkiro mannisi ledo gamba yaa agurtinore dihawannonsa; qoleno isira soqqantino soqqansho dihawanno. (Ibi. 6:10) Yihowa mannasi mageeshshi geeshsha towaatannoro leellishate masaalaanchu Isayaasi kaajja lawishsha horoonsiꞌrino. Isi togo yiino: “Allaalaanchu gede hoshshasi towatanno; wiliiꞌle isiwa gamba asse hanqafanno.”  (Isa. 40:11) Bayiru Allaalaanchi Yihowa hoshshasi giddonni mitte geꞌrecho ballekkanno woyite hiitto ikkanno? Yesuusi coyiꞌrino lawishshi Yihowara macciishshamannosire leellishanno; isi togo yiino: “Hanni ma heddinanni? Mittu manchira xibbu geꞌreewi noosi; hakkuri giddonni mitte baꞌuro, honsayina honse hakko ilaalu iima agure baꞌinota mitticho hasiꞌrara dihaꞌranno? Halaale kuleemmoꞌnena, afiꞌranno yannara bainokkiri honsayina honsentenni roore baꞌe leeltino geꞌrecho daafira hagiidhanno.”—Mat. 18:12, 13.

9. Hundi waro danchu allaalaanchi geꞌreewosi ma garinni towaatanno? (Aaniidi qoolira noo misile lai.)

⁹ Yihowa allaalaanchu gedeeti yaa garankolla. Mayira yiniro, hundi yannara danchu allaalaanchi geꞌreewosi seekke towaatanno. Lawishshaho, Daawiti doobbichunna dibi yinanni moyichi ledo gaarame geꞌreewosi gatisino. (1 Sam. 17:34, 35) Danchu allaalaanchi geꞌreewisi giddonni mitte nafa ballekkannota afanno. (Yoh. 10:3, 14) Togoo allaalaanchi 99 geꞌreewo hoowete giddoo agure woy wolu manchira wodhe baꞌinota hasiꞌranni haꞌranno. Yesuusi konne lawishsha horoonsiꞌre kaajja roso rosiisinonke; isi togo yiino: “Gordoho heeꞌrannohu Anniꞌneno kuri shiimmaaddu giddonni mittuno baꞌꞌara dihasiꞌranno.”—Mat. 18:14.

10. Hiziqeeli 34:11-16 kultanno garinni, Yihowa baino geꞌreewosi ma asseemmo yee qaale eino?

¹⁰ Yihowa hoshshasi giddonni ballekkino ‘shiimmaaddano’ ikko ninke mitto mittonka baxannonke. Maganu masaalaanchu Hiziqeeli widoonni, baino geꞌreewosi hasannotanna ayyaanaamittete hurre afiꞌranno gede kaaꞌlannonsata kule qaale eino. Yihowa insa kaaꞌlate, mittu Israeelaawichu allaalaanchi geꞌrechosi baꞌuro assannore assannota coyiꞌrino. (Hiziqeeli 34:11-16 nabbawi.) Allaalaanchu balaxe baꞌino geꞌrecho hasanno; togo assate lowo yannanna wolqa hasiissanno. Hakkiinni baꞌino geꞌrecho afihu gedensaanni, hoshshanniwa abbanno. Qoleno geꞌrecho madidhinoha woy hudidhinoha ikkiro, allaalaanchu sununni  asse irkise amade mada usurannose; hakkiinni hanqafe haaꞌre masse itisanno. ‘Maganu hoshsha allaaltanno’ cimeeyyeno songotewiinni xeertidhinore hakko garinni kaaꞌla hasiissannonsa. (1 Phe. 5:2, 3) Cimeeyye ballehinoha hasse hoshshanniwa higanno gede kaaꞌlitanno; hattono ayyaanaamittetenni huranno gede kaaꞌlite baxille leellishshanno. d

11. Danchu allaalaanchi maa afino?

¹¹ Danchu allaalaanchi geꞌreewisi baꞌꞌara dandaannota afino. Mitte geꞌrecho hoshshatewiinni faffuro, allaalaanchu gananni beebba diassiꞌranno. Hanni Yihowa hunda mite soqqamaasinesi yannate geeshshano ikkiro isiwiinni xeertidhu woyite kaaꞌlinonsa gara laꞌno.

12. Yihowa Yoonaasi kaaꞌlinosihu hiittoonniiti?

¹² Masaalaanchu Yoonaasi Yihowa assi yiinosire assa giwe wolewa xooqino. Ikkirono, Yihowa Yoonaasi facci asse diagurino. Yihowa danchu allaalaanchi gede Yoonaasi gatisinosi; hattono uyinosi looso loosa dandaanno wolqa oye kaaꞌlinosi. (Yon. 2:7; 3:1, 2) Gedensoonni Maganu, Yoonaasi mittu mittunku manchi heeshsho lowo geeshsha muxxe ikkitinota huwatanno gede kaaꞌlate, buqqiicho horoonsiꞌrino. (Yon. 4:10, 11) Tenne xaggenni ninke maa ronseemmo? Songote cimeeyye mittu halashshaanchi ayyaanaamittetenni qiidiro hexxo dimudhitanno. Hatteentenni halashshaanchu songotewiinni xeertiꞌranno gede assinosiri maatiro huwatate woꞌnaaltanno. Halashshaanchu Yihowawa higanno woyite, cimeeyye iso baxanna marara diagurtanno.

13. Yihowa Faarso 73te borreessaancho kaaꞌlino doogonni maa ronseemmo?

¹³ Faarso 73te borreessaanchi, bushuulleho faffinonsaha laweennasi hexxo mudhino. Isi, Maganu fajjo assa beebba daafurattella yee hedino. (Far. 73:12, 13, 16) Ikkina Yihowa maa assino? Isi dibushiishinosi. Isinni Maganu hakku faarsaasinchi coyiꞌrinore Qaalisi giddo borreessinanni gede assino. Gedensoonni faarsaasinchu Yihowa ledo dancha  jaalooma kalaqira sainori mitturino nookkita huwatino. (Far. 73:23, 24, 26, 28) Tennenni ninke maa ronseemmo? Songote cimeeyye mittu halashshaanchi Yihowara soqqama afidhino horo huluullama hanafiro, hakko halashshaancho bushiisha dihasiissannonsa. Hatteentenni, cimeeyye isi hatto yee heda hanafinohu mayiraatiro huwatate woꞌnaala hasiissannonsa. Insa Qullaawa Borro horoonsidhe hakko halashshaancho kaaꞌla dandiitannohu hatto assituro callaati.

14. Eeliyaasira kaaꞌlo hasiissinosihu mayiraati? Yihowa kaaꞌlinosihu hiittoonniiti?

¹⁴ Masaalaanchu Eeliyaasi Mootitte Elzaabeeli shitannoe yee xooqino. (1 Mot. 19:1-3) Isi ‘Ane agurranna Yihowara soqqamannohu wolu masaalaanchi dino; asseemmorino waaga diafiꞌrinoreeti’ yee hedino. Isi lowo geeshsha yaadino daafira reyo halchino. (1 Mot. 19:4, 10) Yihowa Eeliyaasi dibushiishino; hatteentenni callichosi ikkinokkitanna Maganu wolqa addaxxa dandaannota, hattono loosannohu lowo loosi noota kule jawaachishinosi. Yihowa Eeliyaasi dhiwinosire hasaaphanna shaqqillunni macciishshino, hattono wole looso uyinosi. (1 Mot. 19:11-16, 18) Tennenni ninke maa ronseemmo? Baalunku, roorenkanni songote cimeeyye Maganu geꞌreewo shaqqillunni towaata hasiissannonke. Mittu halashshaanchi caacceessinosire kuꞌlanno woyite woy Yihowa maaro hasiissannoeha diꞌꞌikkoommo yee giddosita fushshe hasaaphanno woyite, cimeeyye seekkite macciishsha hasiissannonsa. Hakkiinni songotewiinni  xeertiꞌrino halashshaanchi Yihowa baxannosita huwatanno gede kaaꞌlitannosi.

15. Yohaannisi 6:39 kultanno garinni, Yesuusi Annisi geꞌreewo ma garinni laꞌꞌanno?

¹⁵ Yihowa ballehino geꞌreewosi ma garinni laꞌnammora hasiꞌranno? Yesuusi tennera dancha lawishsha ikkinonke. Isi baalunku geꞌreewi Maganu albaanni muxxe ikkinota afino daafira, “Israeelete giddonni geꞌreewu gede ikke ballehino manni” baalu Yihowawa higanno gede kaaꞌlate dandaamisire baala assino. (Mat. 15:24; Luq. 19:9, 10) Yesuusi dancha allaalaancho ikkino daafira, Yihowa geꞌreewi giddonni mitte nafa baꞌannokki gede assate sharramanno.—Yohaannisi 6:39 nabbawi.

16-17. Cimeeyyete Yihowawiinni xeertidhinore kaaꞌlate daafira mayi macciishshamannonsa? (“ Songotewiinni Xeertidhinorira Mayi Macciishshamannonsa?” yitanno saaxine lai.)

¹⁶ Soqqamaasinchu Phaawuloosi Efesooni songo cimeeyye Yesuusi lawishsha harunsitanno gede amaalinonsa. Isi togo yiinonsa: “Mootichu Yesuusi, ‘Adhannonkunni aannohu baꞌraaꞌrinoho’ yiinonte gede, angankenni loonse wolqa hoogginore kaaꞌla hasiissannonke.” (Soq. 20:17, 35) Xaa yannara cimeeyyete Yihowa manna towaatate baxxino qeechi noonsa. Ispeenete heeꞌrannohu Salvaadoori yinanni cimeessi togo yiino: “Yihowara ballehino geꞌreewisiti mageeshshi geeshsha huluullitannosiro hedeemmo woyite, insa kaaꞌlate danduummore baala assate kaeemmo. Ayyaanaamittete allaalaancho ikkoommo daafira, Yihowa hoshshasi towaatammora hasiꞌrannota wodanchoommo.”

¹⁷ Konni birxichira kulloonnihu Yihowawiinni xeertiꞌrino manni kaaꞌlineennansa isiwa higino. Xaano Yihowawa higa hasiꞌrannohu lowo manni no. Aananno birxichira insa Yihowawa higganno gede kaaꞌlate maa assa dandiineemmoro ronseemmo.