Tonaa sasu diri balla ikkieta, Yihowa ledo nooe jaaloomi baꞌꞌanni haꞌri. Rosu mini jaallaꞌya baxxuta ikkitanna anera kayi gate baꞌꞌanni nooeri nooha lawie. ‘Anniꞌyanna amaꞌya ea fula hoꞌlinoe, Kiristaanu heeꞌranno heeshshono duhaho’ yee hedoomma. Yihowa nooha ikkinota horo huluullamoommakkiha ikkirono, ayyaanaamitteꞌya kayi shoshshogitino.

Ikkollana qiiddino yinannieta giwoomma daafira, yinoomme yaate geeshshira calla Yihowara soqqameemma. Soqqansho fuleemma woyite horo qixxaaweemmakki daafira, mannu ledo hasaawa hanafanna sufa qarra ikkitue. Konnira soqqanshoꞌya gumiweelonna hagiirru nookkita ikkitu; tini qolte soqqansho roore giwissannoe gede assitino. ‘Mannu isi agurikkinni lamalatenna aganu kiiro soqqamanni noohu hiitto ikkeeti?’ yee hedumma.

Tonaa lamala diro ikkieta, mittuno hoolannoehu nookkiha hasiꞌrummata ikka halchumma. Konnira uduunneꞌya gamba assiꞌre fule Awustiraaliya haꞌrumma. Anniꞌyanna amaꞌya tennera baasa xissiisiꞌrino. Ane haꞌra yaachishshinonsaha ikkirono,  ayyaanaamittete coye assa diagurtanno yee hedino.

Awustiraaliya haꞌrummati isinni ayyaanaamittetenni roore shoshshoggumma. Gambooshshe hosa hanafumma. Anente gede techo gambooshshe dagge gaꞌa kayinni hashshi kilawe hadhe agganni sirba baxxanno wedellootiwa aana hanafumma. Hakkawarita qaageemma woyite, mitte lekka halaalu mine, mitte lekka kayinni alamete giddo wore noommata huwatoomma; mereeroho makkaraaroomma.

Lame diro meddi yitanno yanna gedensaanni xaadoommati mitte rodoo hedoommakki garinni, heeshshoꞌya layiꞌreemma gede assitinoe. Mine assiꞌnoommokkiri onte roduuwi mitteenni heeꞌneemmo; woradu aliidi laꞌꞌaanchonna minaamasi Taamara minenke wosinsinummo. Minaannise songote looso loosanno woyite, Taamara ninke ledo hasaabbanninna osoꞌlitanni yanna sayissanno. Tini lowo geya baxissinoe. Ise arshotenna ruxxi yinikkinni shinqannite. ‘Ayyaanaamittete loosi batiꞌrinosi manchino togo haariimanni godoꞌlanno yaate?’ yee dhagge assiꞌrumma.

Taamara chaachaarate. Halaalenna soqqansho baxxanno gari wolootuno baxxanno gede assannoho. Ise Yihowara woꞌma giddonni soqqantanno daafira hagiirraamete; ani kayi yinoomme yaate geeshshira calla soqqameemma daafira hagiirraame diꞌꞌikkoomma. Dancha akattasenna addinta hagiirraame ikkase aneno lowo geeshsha kaaꞌlitinoe. Ise lawishshi, mitto kaajja ikkinoha Qullaawu Maxaafi halaale huwateemma gede assinoe: Yihowa ninke baalunku ‘hagiidhinanni’ soqqammammosira hasiꞌranno.—Far. 100:2.

Taamara gede anino hagiirraame ikka hasiꞌroomma; kayi hagiirraame ikkate lowo coye biddi assiꞌra hasiissinoe. Tennera lowo yanna hasiissinoeha ikkirono, gedensoonni mito coye biddi assiꞌra hanafumma. Soqqansho qixxaawe fulanna sae sae kaaꞌlaancho suwisaancho ikke soqqama hanafumma. Tini waajja qeeꞌleemma gedenna worba ikkeemma gede kaaꞌlitinoe. Soqqanshonniwa albinni roore Qullaawa Maxaafa horoonsiꞌraꞌya roore hagiidheemma gede assitinoe. Shiima  yanna gedensaanni, aganu kiiro kaaꞌlaancho suwisaancho ikke soqqama hanafumma.

Yihowara hagiirrunninna woꞌma giddonni soqqantannori baalante dumera noo roduuwiwa aana hanafumma. Insa lawishshi balaxisiisa hasiissannoere hedeemma gedenna ayyaanaamittete coye assate rosichi heeꞌrannoe gede assiꞌrate kaaꞌlinoe. Soqqansho albinni roore baxa hanafumma; gedensoonni woꞌma yanna suwisaancho ikkumma. Lowo diri gedensaanni, songote giddo hagiirrunni beꞌe yuummakkinni heeꞌra hanafumma.

Mittu diri gedensaanni, Aleksi yinannihu Yihowanna soqqansho baxannohu shaqqadu rodii ledo egennamumma. Isi hatte yannara songote soqqamaanchooti; qoleno suwisaancho ikkinku lee dirooti. Aleksi sabbakkannori roore hasiissannowa haꞌre Malaawi gobbara mite yanna geeshsha soqqamino. Isi hakkiicho xaadinori misiyoone ikkite soqqantanno roduuwi dancha lawishsha ikkitinosi, hattono Maganu Mangiste balaxisiisa agurannokki gede jawaachishshinosi.

Aleksinna ani 2003nni adhammummo; hatte yannanni kayinse mitteenni woꞌma yanna soqqansho soqqammanni heeꞌnoommo. Lowoha kaajja roso ronsoommo; Yihowano duucha doogganni maassiꞌrinonke.

Hakkiinni 2009nni, Indooneezhiyu giddichora noote Timoori-Leesti yinannite shiima gobbara misiyoone ikkine soqqammeemmo gede sonkinke. Hatte yannara masano mansoommo, hagiidhano hagiidhinoommo. Ontu agani gedensaanni, Timoori-Leestiha qara katama Dili haꞌnummo.

Hakko heeꞌnoommo heeshsho alba heeꞌneemmo heeshshonni baxxitinote. Hakkiicho haaro budenna qaale, hattono inte egenninoommokki sagalenna hakkiicho heeꞌnanni gara rosa hasiissinonke. Soqqanshonniwa duucha woyite, buximanna gadadu amadinohu, hattono gari roso rosinokki manninni xaandeemmo. Qoleno olunna gaancunni  kainohunni gawajjaminohanna xissiisiꞌrinoha lowo manna xaandoommo. a

Hakkiicho soqqansho lowo geeshsha hagiirsiissanno! Lawishshaho mitte hige, Maariya b yinannite 13 diro ikkannosete dadillaame qaaqqonni xaadoomma. Ise boodu diri albaanni ama shiidhino; qoleno annisenni hakkeya dixaaddanno. Ise dumera noo oosonte gede, Maariyarano ragu tunsinose. Mitte higge ise giddoseta wiꞌlitanni kuꞌlitinoeta qaageemma. Ikkollana, hatte yannara ise coyidhanno qaale hakkeya rosoommakki daafira, yitannori dileellinoe. Yihowa ise jawaachisha dandeemma gede kaaꞌlaera huucciꞌre kae, mite sheshifachishshanno qummeeshshuwa nabbawummase. Boodu diri giddo halaalu Maariya akata, ikkitonna heeshsho soorre biddi assanna laoomma. Maariya cuuantino; qoleno xa ise umisera Qullaawa Maxaafa xiinxallissanno manni noose. Maariya halaꞌlado ayyaanaamittete maate afidhino; hattono tini maate lowo geya baxxannoseta affino.

Yihowa Timoori-Leesti gobbara loonsanni heeꞌnoonniha sabbakate looso maassiꞌranni no. Rooru roduuwi cuuantinohu saihu tonnu diri giddo ikkirono, insa giddo batinyu suwisaano, songote soqqamaanonna cimeeyye ikkite soqqantanni no. Wolootu kayinni tirote looso loonsanni biirora qooxeessu qaalinni ayyaanaamittete sagale qixxeessinanni gede kaaꞌlitanni no. Insa gambooshshunniwa faarsitanna, muushshi yitanna hattono ayyaanaamittetenni lophitanna laeemma woyite tashshi yaannoe!

Timoori-Leeste gobbara heeꞌneemmo heeshsho Awustiraaliyaho heeꞌneemmo heeshshonni baxxitinote; kayinni tenne saꞌinoti hagiirsiissanno heeshsho dino. Mito woyite makeenunni moola qulxuꞌmenna akaakilte hogophe dikko haꞌranno manni ledo cifamme haꞌneemmo. Wole yannara qole, Qullaawa Maxaafa xiinxallinseemmohu mitu mannihu mininsa ruukkashshohonna iibbillu batiꞌrinoho; qoleno ishininohonna lukkuwu kawa kaꞌaa fulannoho. Ikkollana fonqolo ikkannori heeꞌrirono duucha woyite, ‘Tini baxissanno heeshshooti!’ yee hedeemma.

Anniꞌyanna amaꞌya anera Yihowa daafira rosiisatenna qarrissannote wedellichimmate yannara nafa ane kaaꞌlate dandiire baala assino daafira galaxxeemmansa. Lawishsha 22:6 yitannori gara ikkinota umiꞌya heeshshonni laoomma. Anniꞌyanna amaꞌya anenna Aleksi lowo geeshsha naadannonke; hattono Yihowara soqqammanna laꞌꞌanno woyite lowo geya hagiidhanno. Xa 2016 kayinse Awustiraaleezhiyunnite sinu biiro hunda woradu aliidi laꞌꞌaano ikkine soqqammanni heeꞌnoommo.

Alba soqqansho hagiirsiissannoekkita hedeemma woyite dhagge assiꞌreemma. Xa soqqansho lowo geya baxeemma! Heeshshonke giddo iillannonke qarri ikkihano ikkiro, addu hagiirre afiꞌneemmohu Yihowara woꞌmu wodaninni soqqammummoro calla ikkinota huwatoomma. Aleksi ledo Yihowara soqqamoommahu saihu 18 diri, heeshshoꞌya giddo woꞌmunku woyitinni roore hagiirraame ikkoommaho. Faarsaasinchu Daawiti, Yihowa daafira coyiꞌrinori halaale ikkinota xa huwatoomma; isi togo yiino: “Ate addaxxitannorira baalaho kayinni tashshi yaannonsa; . . . baxxannohere baala agarattonsa; insano woꞌmanka woyite hagiidhitanno.”—Far. 5:11.