1-2. Ninke baalanka miincankera dandiinannihu ma garinniiti?

 YESUUSI, taalo yoo yaannose gede agurtukkinni mitto daanya huuccidhino gunnitte daafira kulanno lawishsha coyiꞌrino. Hakkawaro heeꞌrannoha roore manna miincanni daafira, Yesuusi rosaano giddo batinyeho tenne mancho qarri leellinonsaha ikkara dandaanno. (Luq. 18:1-5) Xaa yannara ninkeno miincanninke daafira hatte mancho qarri leellannonke.

² Yannankera, mannu manna mulla kae giwanno, taashshe dilaꞌꞌanno hattono beebba assiꞌranno; togoo coyi rosaminoha ikkino daafira mannu miicannonke woyite dhagge diassiꞌneemmo. (Ros. 5:8) Ikkirono ammanate roduuwinke dimiiccannonke yine hendeemmoha ikkara dandaanno; kayinni insa miiccankera dandiitanno. Hige ammanate roduuwinke miiccannonkehu affanni heedhe diꞌꞌikkino. Insa guuntete xeꞌne noonsareeti. Yesuusi gibbannosiri miiccusi woyite assinorinni lowore rosa dandiineemmo. Gibbannonkeri miiccannonke woyite cincine saꞌꞌa dandiineemmoha ikkiro, ammanate roduuwinke miiccannonke woyite isinni hakkiinni roore cinca hasiissannonke! Wolootu woy ammanate roduuwinke miiccannonke woyite Yihowara mayi macciishshamannosi? Isira ninkeri huluullannosi?

3. Miincanninke woyite Yihowara ninkeri huluullannosi? Mayira?

³ Yihowa danchare assinankera hasiꞌranno; hattono wolootu miiccannonketa afanno. Isi “halaale [“taashsho” NW] baxanno.”  (Far. 37:28) Yesuusi, Yihowa yannasira ‘rahe halaalu yoo afiꞌnanni gede assannota’ buuxisinonke. (Luq. 18:7, 8) Qoleno Yihowa muli yanna giddo shetto baala hunanno; hattono miicannonkeri diheeꞌranno.—Far. 72:1, 2.

4. Yihowa xaa yannara ninke kaaꞌlate maa qixxeessino?

⁴ Albillitte keeraanchimma woꞌmitannota agadhine heeꞌnoommote tenne yannara, Yihowa miincanninketa dandiine saꞌneemmo gede kaaꞌlannonke. (2 Phe. 3:13) Isi miincanninke woyite coyi roore bushanno gede assinummokkinni dandiine saꞌneemmo gara rosiisannonke. Miincanninke woyite dandiine saꞌneemmo gede kaaꞌlate, Yihowa Beettisi guuta lawishsha ikkannonke gede assino. Qoleno isi miincanninke woyite harunsa dandiineemmota kaaꞌlitanno amaale aannonke.

MIINCANNIꞌNE WOYITE ASSITINANNIRE QOROPHE

5. Miincanninke woyite assineemmore qoropha hasiissannonkehu mayiraati?

⁵ Miincanninke woyite lowo geeshsha xissiisiꞌnammoranna yaandammora dandiineemmo. (Ros. 7:7) Ammanantino soqqamaano lawishshaho, Iyyoobinna Imbaaqoomino xissiisidhino hattono yaaddino. (Iyo. 6:2, 3; Imb. 1:1-3) Togoo woyite xissiisiꞌranna yaada nooreentilla; kayinni miincanninke woyite gara ikkinokkire assineemmokki gede qoropha hasiissannonke.

6. Abeseloomi lawishshinni maa ronseemmo? (Misileno lai.)

⁶ Mittu manchi miicannonke woyite uminkenni rabbisiꞌrate woꞌnaalleemmoha ikkara dandaanno. Rabbisiꞌra kayinni coyi roore bushanno gedella assitanno. Hanni Moote Daawiti beetti Abeseloomi lawishsha laꞌno. Isi Aminooni rodoosi Tiimaari seyatita lowo geeshsha hanqino. Muse seeri garinni Aminooni loosino bunshera reya hasiissannosi. (Lew. 20:17) Abeseloomi hanqasi gara ikkiturono, Aminooni shaate kayinni silxaane dinosi.—2 Sam. 13:20-23, 28, 29.

7. Faarsaanchu mannu manna miicanna laiti umi qara hiitto ikkino?

⁷ Manna miiccannori qorichishantukkinni gattannoha lawanno daafira, ‘Isi gara ikkinore assa kaaꞌlitannori no?’ yine hendeemmoha ikkara dandiineemmo. Faarsaanchu bushuullu keeraano miiccanni heedhenni, qawaaxxidhe heedhanna laino daafira, “Kuneeti bushuullu togooreeti qarrantukkinni  heedhanno” yiino. (Far. 73:12, NW) Isi mannu manna miicanna lae hexxo mudhino; hattono Yihowara soqqama kaaꞌlitannori nooronna teꞌee huluullame togo yiino: “Konne coye afammora hedoommo; kuni kayinni anera qarraho.” (Far. 73:14, 16) Isinni lede togo yiino: “Ani kayinni gufiꞌre hoogoommo; uwammora shiimurilla gatinoe.” (Far. 73:2) Alberto yinanni rodiirano togoori iillinosi.

8. Mittu rodii miincisita hiitto ikkino?

⁸ Alberto yinanni rodoo songote woxe moorino yine beebba kassansoonnisi. Hakko daafira isi qoossosi hoogino; hattono tenne macciishshitinori batinyu roduuwi iso ayirrisa agurtino. Isi hakkawarita qaage, “Giiramoommo, hanqoommo hattono hexxo mudhoommo” yiino. Isi xissiisiꞌrino daafira tini ayyaanaamittesi gawajjitino; hattono ontu diri geeshsha gambooshshe nafa daa agurino. Kuni woꞌnaalshi miincoonninke daafira giirammeemmoha ikkiro, mayi kalaqamara dandaannoro leellishanno.

MIINCANNIꞌNETA DANDIITINE SAꞌꞌATE YESUUSI LAWISHSHA HARUNSE

9. Yesuusa miincoonnisihu ma garinniiti? (Misileno lai.)

⁹ Yesuusi miincoonnisita dandee sae guuta lawishsha ikkinonke. Hanni iso maatesino wolu mannino beebba assiꞌrinosi gara  laꞌno. Ammaninokki fiixisi iso wodana difayyino yiinosi, ammaꞌnote massagaano loosannohu agaanintete wolqanniiti yitinosi, Roomu olanto qacifattinosi, gantinosi, hattono jeefote shitinosi. (Maq. 3:21, 22; 14: 55; 15:16-20, 35-37) Ikkirono Yesuusi konne baalanna wole coye rabbisiꞌrikkinni dandee saino. Isi lawishshinni maa ronseemmo?

10. Yesuusi beebba assiꞌnoonnisita dandee sainohu hiittoonniiti? (1 Pheexiroosi 2:21-23)

¹⁰ Umi Pheexiroosi 2:21-23 nabbawi. a Miincanninke woyite maa assa hasiissannonkero anfeemmo gede, Yesuusi guuta lawishsha ikkinonke. Isi sammi yaa hasiissannosihunna coyiꞌra hasiissannosihu mamooteetiro afino. (Mat. 26:62-64) Yesuusi isi daafira coyiꞌnanni kaphira baalaho dawaro diqolino. (Mat. 11:19) Isi coyiꞌri woyite beebba assidhinosire dixonino woy diwaajjishiishino. Yesuusi heeshshosi “halaale coyiꞌranno Maganira eeggo uyino” daafira, isonooto eemadhannota leellishino. Isi beebba assiꞌnanni heeꞌnoonnisita Yihowa laꞌꞌanni noota afino. Yesuusi, Yihowa yannasira baalanka coye taashshannota addaxxino.

11. Coyiꞌneemmore qoropha dandiineemmoti mite doogga hiittenneeti? (Misillano lai.)

¹¹ Miincanninke woyite coyiꞌneemmore eemadhine Yesuusi lawishsha harunsa dandiineemmo. Mitu coyi hakkeya xissiisa hooginkero sammi yine agura dandiineemmo. Woy coyi roore bushanno gede assineemmokki gede sammi yaa doodhineemmoha ikkara dandaanno. (Ros. 3:7; Yai. 1:19, 20) Mito woyite kayinni gara ikkinokkire laꞌneemmo woyite woy halaaleho gaarama hasiissannonke woyite coyiꞌra hasiissannonkeha  ikkara dandaanno. (Soq. 6:1, 2) Coyiꞌneemmoha ikkiro, wodanaaꞌminenna ayirrinyunni coyiꞌrate sharrama hasiissannonke.—1 Phe. 3:15. b

12. ‘Heeshshonke halaale coyiꞌranno Maganira eeggo uyiꞌra’ dandiineemmohu hiittoonniiti?

¹² ‘Heeshshonke halaale coyiꞌranno Maganira eeggo uyiꞌneno’ Yesuusi lawishsha harunsa dandiineemmo. Wolootu miiccannonke woyite woy beebba assidhannonke woyite iillannonkere Yihowa afannota addaxxineemmo. Yihowa jeefote baalanka coye taashshannota afanke miincanninketa dandiine saꞌneemmo gede kaaꞌlitannonke. Yihowa addaxxineemmohanna isi baalanka coye taashshanno yanna agadhineemmoha ikkiro, hanqinenna koma amaxxine dikeeshshineemmo. Hanqineemmohanna koma amaxxineemmoha ikkiro, hagiirrinkenna Yihowa ledo noonke jaaloomi baꞌꞌanno.—Far. 37:8.

13. Miincanninke woyite cincine heeꞌneemmo gede kaaꞌlannonkeri maati?

¹³ Hige woꞌmunni woꞌma Yesuusi lawishsha harunsa didandiineemmo. Mito woyite gedensoonni gaabbisannonkere coyiꞌnammora woy assinammora dandiineemmo. (Yai. 3:2) Qoleno lowo geeshsha miincinkero heeshshonke diro woꞌma baasa xissiisiꞌnammora dandiineemmo. Togoo coyi iillinoheha ikkiro, Yihowa iillanni noohere afannota addaxxa dandaatto. Qoleno Yesuusa lowo geeshsha miincoonnisi daafira qarrikki leellannosi. (Ibi. 4:15, 16) Yihowa guuta lawishsha ikkannonkeha Beettosi uyinonketano agurranna miincanninke woyite dandiine saꞌneemmo gede kaaꞌlitanno amaaleno aannonke. Hanni Roomu Sokka maxaafinni kaaꞌlannonkeha lame qummeeshsha laꞌno.

“DARGA MAGANU HANQIRA AGURRE”

14. “Darga Maganu hanqira agurre” yaa mayyaate? (Roomu Sokka 12:19)

¹⁴ Roomu Sokka 12:19 nabbawi. Soqqamaasinchu Phaawuloosi Kiristaanu “darga Maganu hanqira” aguranno gede kulino. Yihowa taashsho yannasiranna hedino garinni abba geeshsha cincine agadhine, darga isi hanqira agura dandiineemmo. Jooni yinanni rodii miincisihu gedensaanni togo yiino: “Gara ikkinokkire asseemmokki gede hanqo eemadha hasiissinoe; kayinni tini shota diꞌꞌikkitinoe. Roomu Sokka 12:19 Yihowa agadheemmo gede kaaꞌlitinoe.”

15. Coye biddi assa geeshsha Yihowa agadha lowo geeshsha hasiissannota ikkitinohu mayiraati?

¹⁵ Coye biddi assa geeshsha Yihowa agadhineemmoha ikkiro horo afiꞌneemmo. Hatto assineemmoha ikkiro, duhu shaalannonke hattono coye uminkenni tirate woꞌnaala abbitanno qarrinni ganteemmo. Yihowa kaaꞌlannonketa kulino. Isi, “Miincannihe woyite, coye ani afeemmona anera aguri” yiinonkehu gedeeti. Yihowa “ani bado qoleemmo” yee eino qaale ammanneemmoha ikkiro, coye isi woyyino garinni taashshannota addaxxine isira agurreemmo. Aleenni kulliha Jooni hatto assa kaaꞌlitinosi. Isi togo yiino: “Cincella Yihowa agadhummoro, isi coye anenni roore woyyino garinni tiranno.”

“WOꞌMANKA WOYITE BUSHA DANCHUNNI QEELI”

16-17. Huuccatto ‘woꞌmanka woyite busha danchunni qeelleemmo’ gede kaaꞌlitannonkehu hiittoonniiti? (Roomu Sokka 12:21)

¹⁶ Roomu Sokka 12:21 nabbawi. Phaawuloosi Kiristaanu ‘busha danchunni qeelanno’ gedeno jawaachishinonsa. Yesuusi Ilaalu Sibikatesi yannara togo yiino: “Baarigaarraꞌne baxxe; xiibbannoꞌnerirano huuccatto  asse.” (Mat. 5:44) Kuni isi assinoreeti. Yesuusi Roomu olanto haqqaho sutte misimaaretenni gantusi woyite qarramino gara hendeemmoha ikkara dandaanno. Yesuusa beebba assiꞌnoonnisi hattono lowo xisso dandee saino. Iso mageeshshi geeshsha gawajjinoonnisiro woꞌmunni woꞌma heda didandiineemmo.

¹⁷ Yesuusi iillinosihu bushu coyinni diqeelamino. Isi olanto qorichishantanno gede assantenni, “Anna, diaffe assitanni noona gatona yiinsa” yee huucciꞌrino. (Luq. 23:34) Miiccannonkeri daafira huucca wodanaaꞌmineemmonna hanqineemmokki gede kaaꞌlitannonke; hattono insara noonke lao soorrantanno gede nafa assitara dandiitanno.

18. Huuccatto Albertonna Jooni miincanninsata dandiite saꞌanno gede kaaꞌlitinonsahu hiittoonniiti?

¹⁸ Huuccatto konni birxichira aleenni kulliri lamu roduuwi miincanninsata dandiite saꞌanno gede kaaꞌlitinonsa. Alberto togo yiino: “Miiccinoe roduuwira huuccatto assoommo. Insa miiccinoe daafira giirameemmokki gede kaaꞌlaera Yihowa duucha hige huucciꞌroommo.” Alberto galagale ammaname Yihowara soqqamanni no; tini hagiirsiissannote. Jooni qole togo yiino: “Xissiisinoe rodii daafira duucha hige huuccatto assoommo. Huuccatto hanqeemmokki gedenna konne rodoo gatona yeemmo gede kaaꞌlitinoe. Qoleno huuccatto giddiidi keere afiꞌreemmo gede kaaꞌlitinoe.”

19. Tenne alame gumulo geeshsha maa assa hasiissannonke? (1 Pheexiroosi 3:8, 9)

¹⁹ Tini busha alame noo geeshsha miincankera dandiinanni. Iillannonke qarri ikkihano ikkiro, kaaꞌlannonke gede Yihowa huucciꞌra agurroonke. Qoleno miincanninke woyite Yesuusi assinore harunsino; hattono woꞌmanka woyite Qullaawu Maxaafiha xintu seera loosu aana hosiinso. Hatto assineemmoha ikkiro, Yihowa atoote afiꞌneemmota addaxxa dandiineemmo.—1 Pheexiroosi 3:8, 9 nabbawi.