1. Ninkeneeto mayine xaꞌmineemmoha ikkara dandaanno?

 MULI YANNA giddo ikkannore yaano kaphu ammaꞌno baꞌannota, Maagoogi Googi Maganu manna siannotanna Armagedooni oli daafira hedatto woyite yaadatto? ‘Hattee waajjishshanno yannara ammanamoommoha ikke saꞌꞌa dandaammokka?’ yite ateneeto xaꞌmite egennootto? Hatto yite hedde egennoottoha ikkiro konni birxichihu cuꞌmote qummeeshshira nooti Yesuusi coyiꞌrino hedo kaaꞌlitannohe. Yesuusi rosaanosi togo yiinonsa: “Wodaniꞌne masoonke; Magano ammanne; aneno ammanne.” (Yoh. 14:1) Kaajjado ammana albillitte iillannonkere waajjinummokki saꞌneemmo gede kaaꞌlitannonke.

2. Ammananke kaajjishiꞌra dandiineemmohu hiittoonniiti? Konni birxichira maa ronseemmo?

² Xa iillanni noonkeha ammananke fonqolanno coye ma garinni saꞌnanni heeꞌnoommoro xiinxalline, albillitte iillannonke fonqolira ammananke kaajjishiꞌra dandiineemmo. Xaa yannara fonqolu iillannonke woyite maa assineemmoro hedanke, ammananke hiitte doogganni kaajjishiꞌra hasiissannonkero afate kaaꞌlitannonke. Mitto mittonka fonqolo dandiine saꞌnummo kiiro, ammananke roore kaajjado ikkitanno. Tini albillitte iillannonke fonqolo cincine saꞌꞌate kaaꞌlitannonke. Konni birxichira, Yesuusi rosaano ammanansa kaajjishiꞌra hasiissannonsata affanno gede assinoha iillinonsaha shoole coye laꞌneemmo. Hakkiinni ninkerano togoo coyi iillankera dandaannohu hiittoonniitironna tini albillitte iillannonkerira qixxaambeemmo gede kaaꞌlitannonkehu hiittoonniitiro ronseemmo.

3. Maatewoosi 6:30, 33 kultanno garinni, Yesuusi ammanate daafira xawise kulinori maati?

³ Mittu minaanni minaamasiranna oososira hasiissannonsa sagalenna uddano hattono heedhanno mine qixxeessa hasiꞌrannoti  egennantinote. Tenne qarrissanno yannara kuri coyibba qixxeessa shota diꞌꞌikkitino. Mitu ammanate roduuwinke loosonsa hooggino hattono diinaggaabbe hasidhurono wole looso afiꞌra didandiitino. Wolootu kayinni afidhino loosi Kiristaanaho malinokkiha ikkino daafira agurtino. Togoo coyi iillinkerono Yihowa maatenkera hasiisannonkere wonshannonketa addaxxa hasiissannonke. Yesuusi ilaalu aana sabbaki woyite rosaanosira tenne xawise kulinonsa. (Maatewoosi 6:30, 33 nabbawi.) Yihowa horo tuge agurannonkekkita woꞌmunni woꞌma addaxxineemmoha ikkiro, Maganu Mangiste balaxisiisa dandiineemmo. Yihowa maalaamittete hasiisannonkere wonshanni noonketa huwantummoro, isi albinni roore xawe leellannonke hattono ammananke kaajjitanno.

4-5. Mitte maate maalaamittete hasiisannonsare hoogge qarrantu yannara kaaꞌlinonsari maati?

⁴ Hanni Venizuweelaho heedhannoti mitte maate maalaamittete hasiisannonsare hoogge qarrantu yannara Yihowa kaaꞌlinonsahu hiittoonniitiro laꞌno. Hakkuyira albaanni Kastiroꞌꞌoo maate gatensa loosidhe dancha heeshsho heedhanno. Hakkiinni massaara qodhinohu shittino manni baattonsa adhe insa qaensanni fushshe shorrino. Maatete anni Migeeli togo yiino: “Xa roore anga maalaamittete hasiisannonkere afiꞌneemmohu mannu uyinonketa shiima baatto loosiꞌneeti. Barru baala soodo, Yihowa hakko barrira hasiisannonkere aannonke gede huucciꞌreemmo.” Tenne maatera heeshsho lowo geeshsha qarraho; ikkirono insa baxillaanchu iimi Anninke barraho hasiisannonsare wonshannonsata woꞌmunni woꞌma addaxxite, ganyite songote gambooshshe hadhanno hattono soqqansho fultanno. Insa heeshshonsa giddo Maganu Mangiste balaxisiissino Yihowano hasiisannonsare wonshanni noonsa.

⁵ Togoo qarri iillinsarono Migeelinna minaamasi Yuuri Yihowa towaatinonsa gara illachishino. Mito woyite Yihowa ammanate roduuwinsa mitore uyitannonsa gede asse woy Migeeli injaanno looso afiꞌranno gede kaaꞌlitannosi gede asse towaatinonsa. Wole woyite kayinni Yihowa, sinu biiro widoonni hasiisannonsare afidhanno gede asse kaaꞌlinonsa. Yihowa insa horo tuge diagurinonsa. Tini maatensa ammana lexxitanno gede assitino. Yihowa kaaꞌlinonsata mite doogo kultuhu gedensaanni bayira beettonsa Yoseliini togo yitino: “Yihowa kaaꞌlinonke gara laꞌꞌanke lowo geeshsha jawaachishshinonke. Isi jaalaꞌyaati hattono woꞌmanka woyite kaaꞌlannoeta addaxxeemma.” Ise ledde togo yitino: “Maatenkera iillino qarri albillitte iillannonkehu rooru fonqolira qixxaambeemmo gede assinonke.”

6. Miinju qarri amadannonke woyite ammananke kaajjishiꞌra dandiineemmohu hiittoonniiti?

⁶ Ateno miinju qarri amadinohe? Hatto ikkiro tini qarra ikkitannoheti egennantinote. Ikkirono tenne qarrissanno yanna ammanakki kaajjishiꞌrate horoonsiꞌra dandaatto. Huuccatto assidhe Yesuusi Maatewoosi 6:25-34 kulino hedo nabbawi hattono hiinci. Qoleno Yihowa isira diinaggaabbe soqqantannorira hasiisannonsare wonshinonsata leellishannoha yannanke woꞌnaalsha nabbawi. (1 Qor.  15:58) Togo assakki iimi Anninke atera iillino gedee qarri iillinonsare kaaꞌlinonte gede, ateno kaaꞌlannoheta albinni roore addaxxatto gede assitannohe. Yihowa atera mayi hasiisannohero, hattono hasiisannohere wonshanno gara afino. Yihowa kaaꞌlanni nooheta heeshshokkinni laittoro, ammanakki roore kaajjitanni hadhanno; tini qolte albillitte iillannoheha kawiinni saino fonqolo dandiite saꞌꞌatto gede kaaꞌlitannohe.—Imb. 3:17, 18.

7. Maatewoosi 8:23-26 kultanno garinni, “lowo hombobolatte” Yesuusi rosaano ammana fonqolantanno gede assitinohu hiittoonniiti?

⁷ Yesuusinna rosaanosi yowolotenni hadhanni heedheenna hombobolatte kaꞌuta, Yesuusi tenne faro horoonsiꞌre rosaanosi ammanansa kaajjishiꞌra hasiissannonsata huwattanno gede kaaꞌlinonsa. (Maatewoosi 8:23-26 nabbawi.) Hombobolatte kaꞌeenna wayi yowolote giddora eꞌꞌe woꞌma hanafi; Yesuusi kayinni yowolote giddo goxe no. Yesuusi rosaano lowo geeshsha masse iso goxinowiinni kayisse gatisannonsa gede xaꞌmidhino; Mootichu kayinni shaqqillunni, “Kiꞌne ammaꞌna xeꞌinoꞌneri! Mayira waajjitinanni?” yee seejjinonsa. Waajjitinori Yesuusi rosaano Yihowa, Yesuusano ledosi noo mannano gatisa dandaannota huwata hasiissinonsa. Ninke tenne xaggenni maa ronseemmo? Kaajjado ammana ‘lowo hombobolatteno’ ikkito hombobolattete gedee qarra dandiine saꞌneemmo gede kaaꞌlitannonke.

8-9. Aneelira ammanase fonqolannori mayi iillinose? Kaaꞌlinoseri maati?

⁸ Hanni Puwerto Rikote heedhannote mitte mine assidhinokkite Aneeli yinanni rodoo woꞌnaalsha laꞌno; ise iillinose qarra dandiite saꞌꞌase ammanase kaajjitanno gede assitino. Ise heedhanno qooxeessa “lowo hombobolatte” gantino. Isera fonqolu iilla hanafinohu 2017nni Harikeeni Maariya yinanni hombobolatte minese diiggu yannaraati. Tenne hombobolattenni kainohunni ise loosose hooggino. Aneeli togo yitino: “Hattee qarrissanno yanna giddo lowo geeshsha yaadoomma; ikkollana huuccattotenni Yihowa addaxxanna yaaddo hexxo mudheemma gede assitaera wodha hasiissannoekkita rosoomma.”

⁹ Aneeli hajajamano iillinose fonqolo dandiite saꞌanno gede kaaꞌlitinoseta coyidhino. Ise togo yitino: “Yihowa dirijjite uyitanno biddishsha harunsaꞌya wodanaaꞌmeemma gede kaaꞌlitinoe. Yihowa ayyaanaamittetenni jawaateemma gede kaaꞌlinoe hattono roduuwu maalaamittete hasiisannoere uyitannoe gede asse kaaꞌlinoe.” Ise ledde togo yitino: “Yihowa xaꞌmiꞌroommahunni roorse uyinoe hattono ammanaꞌya albinni roore kaajjitino.”

10. Heeshshokki giddo lowo qarri iillinoheha ikkiro maa assa dandaatto?

¹⁰ Heeshshokki giddo lowo qarri iillinohe? Iillinohe qarri kalaqamu danonni kainoha ikkara dandaanno. Woy buutote dhibbi amadeennahe hexxo mudhite gurchaawoottoha ikkara dandaanno. Mito woyite iillinohe coyi yaachishahera dandaanno; ikkirono yaaddo Yihowa addaxxa  aguratto gede assitahera wodhitooti. Giddokkita kulte huuccatto assidhe Yihowawa shiqi. Konni albaanni Yihowa kaaꞌlinohe gara hiincite ammanakki kaajjishiꞌri. (Far. 77:11, 12) Yihowa xaano ikko albillitte horonta tuge agurannohekkita addaxxa dandaatto.

11. Albisa ikkite soqqantannorira hajajamate murciꞌra hasiissannonkehu mayiraati?

¹¹ Fonqolo dandiine saꞌneemmo gede kaaꞌlankera dandaannori woluri maati? Aneeli yitinonte gede hajajama kaaꞌlitannonke. Yihowanna Yesuusi ammantannonsare addaxxa rosi. Albisa ikkite soqqantannori uyitannonke biddishshi mito woyite kaaꞌlannokkiha lawankera dandaanno. Ikkirono Yihowa hajajammummoro maassiꞌrannonke. Qaalesinna ammanantino soqqamaanosi xagge xiinxalline hajajama heeshsho gatissannota anfoommo. (Ful. 14:1-4; 2 Dud. 20:17) Togoo xagge hiince. Togo assaꞌne xaano ikko albillitte, Yihowa dirijjite uyitanno biddishsha harunsate nooꞌne hasatto lexxitanno gede assitannoꞌne. (Ibi. 13:17) Hatto ikkiro muli yannara daannoha lowo qarra waajjitinanni gede assannori dino.—Law. 3:25.

12. Luqaasi 18:1-8 kultanno garinni ammanatenna taashshote xeꞌne cince saꞌꞌate mereero mayi xaadooshshi no?

¹² Yesuusi taashshote xeꞌne rosaanosi ammana fonqolantanno gede assitannota afino. Isi taashshote xeꞌne dandiite saꞌanno gede insa kaaꞌlate mitto lawishsha kulinonsa; kuni lawishshi noohu Luqaasi maxaafi giddooti. Yesuusi rosaanosira, taalo yoo yaannose gede mitto kaajjado daanya wiꞌlitanni agurtukkinni huuccidhino mancho xagge kulinonsa. Ise agurtukkinni huucciꞌrase kaaꞌlitannoseta affino. Gedensoonni daanyu eeggifatase macciishshe qolinose. Ninke tennenni maa ronseemmo? Yihowa taashsho baxannoho. Hakko daafira Yesuusi togo yiino: “Maganu hashsha barra Isiwa higge raartannorira roorse halaalu yoo diyaannonsa?” (Luqaasi 18:1-8 nabbawi.) Yesuusi lede togo yiino: “Manchi Beetti daanno woyite uullate aana [togoo, NW] ammaꞌna afiꞌra ikka?” Taashsho xeꞌinore assinanninke woyite, cincinenna hexxo mudha agurre gunnitte manchote gedeeti kaajjado ammana noonketa leellisha hasiissannonke. Togoo ammana heedhunkero, bayichonko woy gale hose Yihowa kaaꞌlannonketa addaxxa dandiineemmo. Qoleno huuccatto afidhino wolqa ammana hasiissannonke. Mito woyite huuccattonkera dawaro afiꞌneemmohu hendoommokki garinni ikkara dandaanno.

13. Taashsho xeꞌinore assinoonninsata mitte maate huuccatto kaaꞌlitinonsahu hiittoonniiti?

¹³ Hanni Kongo Dimokiraatiki Rippaabilikera heedhannote Veero yinanni rodoo woꞌnaalsha laꞌno. Veeronna Yihowa Farciꞌraasincho ikkinokki minaannise hattono 15 diro ikkannose qaaqqonsa, qooxeessinsara gaance kalaqantino daafira qaensanni xooqa hasiissinonsa. Insa xooqanni doogote heeꞌreenna doogo cuffe noo olanto amadde shitannonsata kulte waajjishiishshunsa. Veero wiꞌla hanaffuta, qaaqqose ise wodanaaꞌmitanno gede kaaꞌlate Yihowa suꞌma gantanni huurose naggi assite higge higge huucciꞌra  hanaffu. Ise huuccidhe kaꞌuta olantote roorrichi “Tee qaaqqo huucciꞌra ayi rosiisinohe?” yee xaꞌmise. Qaaqqono, “Amaꞌya Maatewoosi 6:9-13 noo huuccatto horoonsidhe rosiissinoe” yite qoltu. Roorrichuno, “Tee qaaqqo annikkinna amakki ledo keerunni haꞌri, Maganiꞌne Yihowa agaroꞌne!” yiise.

14. Ammananke fonqolara dandaannori maati? Dandiine saꞌneemmo gede mayi kaaꞌlannonke?

¹⁴ Togoo woꞌnaalshuwa huuccatto afidhino wolqa ajinshe laꞌneemmokki gede kaaꞌlitannonke. Ikkollana huucciꞌnoommo huuccattora bayichonkonni woy maalale ikkanno garinni dawaro afiꞌnoommokkihalla ikki? Yesuusi kuli lawishshira noote gunnitte mancho gede agurtinikkinni huuccidhe; hattono Maganinke tuge agurannoꞌnekkitanna maltino yannara mite doogganni huuccattoꞌnera dawaro qolannota addaxxe. Yihowa qullaawa ayyaanasi aannoꞌne gede eeggifattine huucciꞌra agurtinoonte. (2 Qor. 4:7) Muli yannara Yihowa lowo geeshsha maassiꞌrannoꞌne daafira albi qarra baala habbinannita deꞌinoonte. Yihowa kaaꞌlonni iillannoꞌne fonqolo ammanantine saꞌiniro, albillitte iillannoꞌne fonqolono dandiitine saꞌꞌate jawaante afidhinanni.—1 Phe. 1:6, 7.

15. Maatewoosi 17:19, 20 kultanno garinni, Yesuusi rosaanora tuncu yiinonsa fonqoli maati?

¹⁵ Yesuusi rosaanosira, ammana guficho ikkannore qeelte saꞌanno gede kaaꞌlitannonsata rosiisinonsa. (Maatewoosi 17:19, 20 nabbawi.) Insa hakkuyira albaanni busha ayyaana fushshitinoha ikkirono, mitte yannara kayinni fushsha didandiitino. Insa tenne assa dandiitinokkihu mayiraati? Yesuusi insara ammana ajjinonsata kulinonsa. Isi kaajjado ammana heedhunsaro ilaalu gedee qarra qeelte saꞌꞌa dandiitannota kulinonsa! Xaa yannara ninkerano qeelle saꞌꞌa dandiineemmokkiha lawanno qarri tuncu yaankera dandaanno.

16. Geyidi iillitinoseta buutote xisso dandiite saꞌanno gede ammana kaaꞌlitinosehu hiittoonniiti?

¹⁶ Hanni Guwatimaalaho heedhannote rodoo Geyidi woꞌnaalsha laꞌno. Insa songote gambooshshiwiinni higanni heeꞌreenna minaannase Eedi shinoonni. Geyidi tenne buutote xisso dandiite saꞌanno gede ammana kaaꞌlitinosehu hiittoonniiti? Ise togo yitino: “Huuccatto duhaꞌya Yihowara tuqqeemma gede kaaꞌlitinoe; tini giddoyidi keere afiꞌreemma gede assitinoe. Yihowa maateꞌyanna songote giddo noo jaallaꞌya widoonni towaatinoe. Yihowara diinaggaawe soqqamaꞌya xissoꞌyanni beedho afiꞌreemma gede kaaꞌlitinoe; hattono gaꞌara yaanni quwa sae yaadummakki mitto mittonka barra saeemma gede kaaꞌlitinoe. Konni iillinoe qarrinni, albillitte baxi qarri iillierono Yihowa, Yesuusinna Yihowa dirijjite kaaꞌlonni cince saꞌꞌa dandeemmata huwatoomma.”

17. Ilaalu geeshshi qarri tuncu yaannonke woyite maa assa dandiineemmo?

¹⁷ Shiidhe xissiisidhe nootto? Qullaawu Maxaafi giddo reyotenni kaino mannire kultanno xagge nabbabbe, kaote hexxo daafira noohe ammana kaajjishiꞌrate yanna gaaꞌmi. Maatekki miili songotenni bohamino daafira dadillite nootto?  Maganu aanno seejjo woꞌmanka woyite dancha ikkitinota albinni roore ammanate xiinxalli. Tuncu yiinohe fonqoli ikkihano ikkiro, tenne faro ammanakki kaajjishiꞌrate horoonsiꞌri. Giddokkita gudisse Yihowara hasaaphi. Roduuwunniwa gambo gibbooti; roorenkanni insawa gamba yite heeꞌri. (Law. 18:1) Iillinoheri wiꞌlatto gede assanni nooheha ikkiro nafa dandiite saꞌꞌatto gede kaaꞌlannohere assa agurtooti. (Far. 126:5, 6) Ganyite gambooshshe haꞌra, soqqansho fulanna Qullaawa Maxaafa nabbawa agurtooti. Qoleno Yihowa aahera qaale einoha dhagge ikkanno atoote illachishi. Yihowa kaaꞌlanni nooheta huwatitto kiiro, ammanakki albinni roore kaajjitanni hadhanno.

18. Ammanaꞌne shoshshoggitinota wodanchitiniro maa assa dandiitinanni?

¹⁸ Konni albaanni iillinoꞌnehu woy xa iillanni nooꞌne qarri ammanaꞌne shoshshogishinoha ikkiro hexxo mudhitinoonte. Iillinoꞌne qarra ammanaꞌne kaajjishiꞌrate kaaꞌlitannoꞌne faro gede assitine laꞌe. Yesuusi soqqamaasine gede “Ammaꞌna ledinke” yitine huuccidhe. (Luq. 17:5) Qoleno konni birxichira kulloonni manni woꞌnaalsha hiince. Migeelinna Yuuri gede Yihowa kaaꞌlinoꞌne yanna qaagge. Veero qaaqqonna Aneeli gede roorenkanni qarru tuncu yaannoꞌne woyite Yihowa seekkitine huuccidhe. Qoleno Geyidi gede, Yihowa maateꞌne woy jaallaꞌne widoonni hasiisannoꞌnere wonshannoꞌneta deꞌinoonte. Yihowa xa iillanni nooꞌne qarra dandiitine saꞌinanni gede kaaꞌlannoꞌne gede assidhiniro, albillitte iillaꞌnera dandaanno fonqolono cincitine saꞌinanni gede kaaꞌlannoꞌneta, albinni roore addaxxitinanni.

19. Yesuusi huluullaminokki coyi maati? Atino huluullamattokki coyi maati?

¹⁹ Yesuusi rosaanosi ammanansa kaajjishiꞌra hasiissannonsata huwattanno gede kaaꞌlinonsa; ikkirono insa albillitte iillannonsa fonqolo Yihowa kaaꞌlonni dandiite saꞌannota horo dihuluullamino. (Yoh. 14:1; 16:33) Qoleno isi kaajjado ammana lowo manni bayira qarra gate saꞌꞌanno gede assitannonsata dihuluullamino. (Aju. 7:9, 14) Atino hakko manni wido ikkatto ikka? Xaa yannara afiꞌritto faro baala horoonsidhe ammanakki lexxitannonna kaajjitanno gede assiꞌrittoro, Yihowa eltonni hakko manni wido ikka dandaatto!—Ibi. 10:39.