1. Ninkeneeto mayine xaˈmineemmoha ikkara dandaanno?

MULI YANNA giddo ikkannore yaano kaphu ammaˈno baˈannota, Maagoogi Googi Maganu manna siannotanna Armagedooni oli daafira hedatto woyite yaadatto? ‘Hattee waajjishshanno yannara ammanamoommoha ikke saˈˈa dandaammokka?’ yite ateneeto xaˈmite egennootto? Hatto yite hedde egennoottoha ikkiro konni birxichihu cuˈmote qummeeshshira nooti Yesuusi coyiˈrino hedo kaaˈlitannohe. Yesuusi rosaanosi togo yiinonsa: “Wodaniˈne masoonke; Magano ammanne; aneno ammanne.” (Yoh. 14:1) Kaajjado ammana albillitte iillannonkere waajjinummokki saˈneemmo gede kaaˈlitannonke.

2. Ammananke kaajjishiˈra dandiineemmohu hiittoonniiti? Konni birxichira maa ronseemmo?

² Xa iillanni noonkeha ammananke fonqolanno coye ma garinni saˈnanni heeˈnoommoro xiinxalline, albillitte iillannonke fonqolira ammananke kaajjishiˈra dandiineemmo. Xaa yannara fonqolu iillannonke woyite maa assineemmoro hedanke, ammananke hiitte doogganni kaajjishiˈra hasiissannonkero afate kaaˈlitannonke. Mitto mittonka fonqolo dandiine saˈnummo kiiro, ammananke roore kaajjado ikkitanno. Tini albillitte iillannonke fonqolo cincine saˈˈate kaaˈlitannonke. Konni birxichira, Yesuusi rosaano ammanansa kaajjishiˈra hasiissannonsata affanno gede assinoha iillinonsaha shoole coye laˈneemmo. Hakkiinni ninkerano togoo coyi iillankera dandaannohu hiittoonniitironna tini albillitte iillannonkerira qixxaambeemmo gede kaaˈlitannonkehu hiittoonniitiro ronseemmo.

3. Maatewoosi 6:30, 33 kultanno garinni, Yesuusi ammanate daafira xawise kulinori maati?

³ Mittu minaanni minaamasiranna oososira hasiissannonsa sagalenna uddano hattono heedhanno mine qixxeessa hasiˈrannoti  egennantinote. Tenne qarrissanno yannara kuri coyibba qixxeessa shota diˈˈikkitino. Mitu ammanate roduuwinke loosonsa hooggino hattono diinaggaabbe hasidhurono wole looso afiˈra didandiitino. Wolootu kayinni afidhino loosi Kiristaanaho malinokkiha ikkino daafira agurtino. Togoo coyi iillinkerono Yihowa maatenkera hasiisannonkere wonshannonketa addaxxa hasiissannonke. Yesuusi ilaalu aana sabbaki woyite rosaanosira tenne xawise kulinonsa. (Maatewoosi 6:30, 33 nabbawi.) Yihowa horo tuge agurannonkekkita woˈmunni woˈma addaxxineemmoha ikkiro, Maganu Mangiste balaxisiisa dandiineemmo. Yihowa maalaamittete hasiisannonkere wonshanni noonketa huwantummoro, isi albinni roore xawe leellannonke hattono ammananke kaajjitanno.

4-5. Mitte maate maalaamittete hasiisannonsare hoogge qarrantu yannara kaaˈlinonsari maati?

⁴ Hanni Venizuweelaho heedhannoti mitte maate maalaamittete hasiisannonsare hoogge qarrantu yannara Yihowa kaaˈlinonsahu hiittoonniitiro laˈno. Hakkuyira albaanni Kastiroˈˈoo maate gatensa loosidhe dancha heeshsho heedhanno. Hakkiinni massaara qodhinohu shittino manni baattonsa adhe insa qaensanni fushshe shorrino. Maatete anni Migeeli togo yiino: “Xa roore anga maalaamittete hasiisannonkere afiˈneemmohu mannu uyinonketa shiima baatto loosiˈneeti. Barru baala soodo, Yihowa hakko barrira hasiisannonkere aannonke gede huucciˈreemmo.” Tenne maatera heeshsho lowo geeshsha qarraho; ikkirono insa baxillaanchu iimi Anninke barraho hasiisannonsare wonshannonsata woˈmunni woˈma addaxxite, ganyite songote gambooshshe hadhanno hattono soqqansho fultanno. Insa heeshshonsa giddo Maganu Mangiste balaxisiissino Yihowano hasiisannonsare wonshanni noonsa.

⁵ Togoo qarri iillinsarono Migeelinna minaamasi Yuuri Yihowa towaatinonsa gara illachishino. Mito woyite Yihowa ammanate roduuwinsa mitore uyitannonsa gede asse woy Migeeli injaanno looso afiˈranno gede kaaˈlitannosi gede asse towaatinonsa. Wole woyite kayinni Yihowa, sinu biiro widoonni hasiisannonsare afidhanno gede asse kaaˈlinonsa. Yihowa insa horo tuge diagurinonsa. Tini maatensa ammana lexxitanno gede assitino. Yihowa kaaˈlinonsata mite doogo kultuhu gedensaanni bayira beettonsa Yoseliini togo yitino: “Yihowa kaaˈlinonke gara laˈˈanke lowo geeshsha jawaachishshinonke. Isi jaalaˈyaati hattono woˈmanka woyite kaaˈlannoeta addaxxeemma.” Ise ledde togo yitino: “Maatenkera iillino qarri albillitte iillannonkehu rooru fonqolira qixxaambeemmo gede assinonke.”

6. Miinju qarri amadannonke woyite ammananke kaajjishiˈra dandiineemmohu hiittoonniiti?

⁶ Ateno miinju qarri amadinohe? Hatto ikkiro tini qarra ikkitannoheti egennantinote. Ikkirono tenne qarrissanno yanna ammanakki kaajjishiˈrate horoonsiˈra dandaatto. Huuccatto assidhe Yesuusi Maatewoosi 6:25-34 kulino hedo nabbawi hattono hiinci. Qoleno Yihowa isira diinaggaabbe soqqantannorira hasiisannonsare wonshinonsata leellishannoha yannanke woˈnaalsha nabbawi. (1 Qor.  15:58) Togo assakki iimi Anninke atera iillino gedee qarri iillinonsare kaaˈlinonte gede, ateno kaaˈlannoheta albinni roore addaxxatto gede assitannohe. Yihowa atera mayi hasiisannohero, hattono hasiisannohere wonshanno gara afino. Yihowa kaaˈlanni nooheta heeshshokkinni laittoro, ammanakki roore kaajjitanni hadhanno; tini qolte albillitte iillannoheha kawiinni saino fonqolo dandiite saˈˈatto gede kaaˈlitannohe.—Imb. 3:17, 18.

7. Maatewoosi 8:23-26 kultanno garinni, “lowo hombobolatte” Yesuusi rosaano ammana fonqolantanno gede assitinohu hiittoonniiti?

⁷ Yesuusinna rosaanosi yowolotenni hadhanni heedheenna hombobolatte kaˈuta, Yesuusi tenne faro horoonsiˈre rosaanosi ammanansa kaajjishiˈra hasiissannonsata huwattanno gede kaaˈlinonsa. (Maatewoosi 8:23-26 nabbawi.) Hombobolatte kaˈeenna wayi yowolote giddora eˈˈe woˈma hanafi; Yesuusi kayinni yowolote giddo goxe no. Yesuusi rosaano lowo geeshsha masse iso goxinowiinni kayisse gatisannonsa gede xaˈmidhino; Mootichu kayinni shaqqillunni, “Kiˈne ammaˈna xeˈinoˈneri! Mayira waajjitinanni?” yee seejjinonsa. Waajjitinori Yesuusi rosaano Yihowa, Yesuusano ledosi noo mannano gatisa dandaannota huwata hasiissinonsa. Ninke tenne xaggenni maa ronseemmo? Kaajjado ammana ‘lowo hombobolatteno’ ikkito hombobolattete gedee qarra dandiine saˈneemmo gede kaaˈlitannonke.

8-9. Aneelira ammanase fonqolannori mayi iillinose? Kaaˈlinoseri maati?

⁸ Hanni Puwerto Rikote heedhannote mitte mine assidhinokkite Aneeli yinanni rodoo woˈnaalsha laˈno; ise iillinose qarra dandiite saˈˈase ammanase kaajjitanno gede assitino. Ise heedhanno qooxeessa “lowo hombobolatte” gantino. Isera fonqolu iilla hanafinohu 2017nni Harikeeni Maariya yinanni hombobolatte minese diiggu yannaraati. Tenne hombobolattenni kainohunni ise loosose hooggino. Aneeli togo yitino: “Hattee qarrissanno yanna giddo lowo geeshsha yaadoomma; ikkollana huuccattotenni Yihowa addaxxanna yaaddo hexxo mudheemma gede assitaera wodha hasiissannoekkita rosoomma.”

⁹ Aneeli hajajamano iillinose fonqolo dandiite saˈanno gede kaaˈlitinoseta coyidhino. Ise togo yitino: “Yihowa dirijjite uyitanno biddishsha harunsaˈya wodanaaˈmeemma gede kaaˈlitinoe. Yihowa ayyaanaamittetenni jawaateemma gede kaaˈlinoe hattono roduuwu maalaamittete hasiisannoere uyitannoe gede asse kaaˈlinoe.” Ise ledde togo yitino: “Yihowa xaˈmiˈroommahunni roorse uyinoe hattono ammanaˈya albinni roore kaajjitino.”

10. Heeshshokki giddo lowo qarri iillinoheha ikkiro maa assa dandaatto?

¹⁰ Heeshshokki giddo lowo qarri iillinohe? Iillinohe qarri kalaqamu danonni kainoha ikkara dandaanno. Woy buutote dhibbi amadeennahe hexxo mudhite gurchaawoottoha ikkara dandaanno. Mito woyite iillinohe coyi yaachishahera dandaanno; ikkirono yaaddo Yihowa addaxxa  aguratto gede assitahera wodhitooti. Giddokkita kulte huuccatto assidhe Yihowawa shiqi. Konni albaanni Yihowa kaaˈlinohe gara hiincite ammanakki kaajjishiˈri. (Far. 77:11, 12) Yihowa xaano ikko albillitte horonta tuge agurannohekkita addaxxa dandaatto.

11. Albisa ikkite soqqantannorira hajajamate murciˈra hasiissannonkehu mayiraati?

¹¹ Fonqolo dandiine saˈneemmo gede kaaˈlankera dandaannori woluri maati? Aneeli yitinonte gede hajajama kaaˈlitannonke. Yihowanna Yesuusi ammantannonsare addaxxa rosi. Albisa ikkite soqqantannori uyitannonke biddishshi mito woyite kaaˈlannokkiha lawankera dandaanno. Ikkirono Yihowa hajajammummoro maassiˈrannonke. Qaalesinna ammanantino soqqamaanosi xagge xiinxalline hajajama heeshsho gatissannota anfoommo. (Ful. 14:1-4; 2 Dud. 20:17) Togoo xagge hiince. Togo assaˈne xaano ikko albillitte, Yihowa dirijjite uyitanno biddishsha harunsate nooˈne hasatto lexxitanno gede assitannoˈne. (Ibi. 13:17) Hatto ikkiro muli yannara daannoha lowo qarra waajjitinanni gede assannori dino.—Law. 3:25.

12. Luqaasi 18:1-8 kultanno garinni ammanatenna taashshote xeˈne cince saˈˈate mereero mayi xaadooshshi no?

¹² Yesuusi taashshote xeˈne rosaanosi ammana fonqolantanno gede assitannota afino. Isi taashshote xeˈne dandiite saˈanno gede insa kaaˈlate mitto lawishsha kulinonsa; kuni lawishshi noohu Luqaasi maxaafi giddooti. Yesuusi rosaanosira, taalo yoo yaannose gede mitto kaajjado daanya wiˈlitanni agurtukkinni huuccidhino mancho xagge kulinonsa. Ise agurtukkinni huucciˈrase kaaˈlitannoseta affino. Gedensoonni daanyu eeggifatase macciishshe qolinose. Ninke tennenni maa ronseemmo? Yihowa taashsho baxannoho. Hakko daafira Yesuusi togo yiino: “Maganu hashsha barra Isiwa higge raartannorira roorse halaalu yoo diyaannonsa?” (Luqaasi 18:1-8 nabbawi.) Yesuusi lede togo yiino: “Manchi Beetti daanno woyite uullate aana [togoo, NW] ammaˈna afiˈra ikka?” Taashsho xeˈinore assinanninke woyite, cincinenna hexxo mudha agurre gunnitte manchote gedeeti kaajjado ammana noonketa leellisha hasiissannonke. Togoo ammana heedhunkero, bayichonko woy gale hose Yihowa kaaˈlannonketa addaxxa dandiineemmo. Qoleno huuccatto afidhino wolqa ammana hasiissannonke. Mito woyite huuccattonkera dawaro afiˈneemmohu hendoommokki garinni ikkara dandaanno.

13. Taashsho xeˈinore assinoonninsata mitte maate huuccatto kaaˈlitinonsahu hiittoonniiti?

¹³ Hanni Kongo Dimokiraatiki Rippaabilikera heedhannote Veero yinanni rodoo woˈnaalsha laˈno. Veeronna Yihowa Farciˈraasincho ikkinokki minaannise hattono 15 diro ikkannose qaaqqonsa, qooxeessinsara gaance kalaqantino daafira qaensanni xooqa hasiissinonsa. Insa xooqanni doogote heeˈreenna doogo cuffe noo olanto amadde shitannonsata kulte waajjishiishshunsa. Veero wiˈla hanaffuta, qaaqqose ise wodanaaˈmitanno gede kaaˈlate Yihowa suˈma gantanni huurose naggi assite higge higge huucciˈra  hanaffu. Ise huuccidhe kaˈuta olantote roorrichi “Tee qaaqqo huucciˈra ayi rosiisinohe?” yee xaˈmise. Qaaqqono, “Amaˈya Maatewoosi 6:9-13 noo huuccatto horoonsidhe rosiissinoe” yite qoltu. Roorrichuno, “Tee qaaqqo annikkinna amakki ledo keerunni haˈri, Maganiˈne Yihowa agaroˈne!” yiise.

14. Ammananke fonqolara dandaannori maati? Dandiine saˈneemmo gede mayi kaaˈlannonke?

¹⁴ Togoo woˈnaalshuwa huuccatto afidhino wolqa ajinshe laˈneemmokki gede kaaˈlitannonke. Ikkollana huucciˈnoommo huuccattora bayichonkonni woy maalale ikkanno garinni dawaro afiˈnoommokkihalla ikki? Yesuusi kuli lawishshira noote gunnitte mancho gede agurtinikkinni huuccidhe; hattono Maganinke tuge agurannoˈnekkitanna maltino yannara mite doogganni huuccattoˈnera dawaro qolannota addaxxe. Yihowa qullaawa ayyaanasi aannoˈne gede eeggifattine huucciˈra agurtinoonte. (2 Qor. 4:7) Muli yannara Yihowa lowo geeshsha maassiˈrannoˈne daafira albi qarra baala habbinannita deˈinoonte. Yihowa kaaˈlonni iillannoˈne fonqolo ammanantine saˈiniro, albillitte iillannoˈne fonqolono dandiitine saˈˈate jawaante afidhinanni.—1 Phe. 1:6, 7.

15. Maatewoosi 17:19, 20 kultanno garinni, Yesuusi rosaanora tuncu yiinonsa fonqoli maati?

¹⁵ Yesuusi rosaanosira, ammana guficho ikkannore qeelte saˈanno gede kaaˈlitannonsata rosiisinonsa. (Maatewoosi 17:19, 20 nabbawi.) Insa hakkuyira albaanni busha ayyaana fushshitinoha ikkirono, mitte yannara kayinni fushsha didandiitino. Insa tenne assa dandiitinokkihu mayiraati? Yesuusi insara ammana ajjinonsata kulinonsa. Isi kaajjado ammana heedhunsaro ilaalu gedee qarra qeelte saˈˈa dandiitannota kulinonsa! Xaa yannara ninkerano qeelle saˈˈa dandiineemmokkiha lawanno qarri tuncu yaankera dandaanno.

16. Geyidi iillitinoseta buutote xisso dandiite saˈanno gede ammana kaaˈlitinosehu hiittoonniiti?

¹⁶ Hanni Guwatimaalaho heedhannote rodoo Geyidi woˈnaalsha laˈno. Insa songote gambooshshiwiinni higanni heeˈreenna minaannase Eedi shinoonni. Geyidi tenne buutote xisso dandiite saˈanno gede ammana kaaˈlitinosehu hiittoonniiti? Ise togo yitino: “Huuccatto duhaˈya Yihowara tuqqeemma gede kaaˈlitinoe; tini giddoyidi keere afiˈreemma gede assitinoe. Yihowa maateˈyanna songote giddo noo jaallaˈya widoonni towaatinoe. Yihowara diinaggaawe soqqamaˈya xissoˈyanni beedho afiˈreemma gede kaaˈlitinoe; hattono gaˈara yaanni quwa sae yaadummakki mitto mittonka barra saeemma gede kaaˈlitinoe. Konni iillinoe qarrinni, albillitte baxi qarri iillierono Yihowa, Yesuusinna Yihowa dirijjite kaaˈlonni cince saˈˈa dandeemmata huwatoomma.”

17. Ilaalu geeshshi qarri tuncu yaannonke woyite maa assa dandiineemmo?

¹⁷ Shiidhe xissiisidhe nootto? Qullaawu Maxaafi giddo reyotenni kaino mannire kultanno xagge nabbabbe, kaote hexxo daafira noohe ammana kaajjishiˈrate yanna gaaˈmi. Maatekki miili songotenni bohamino daafira dadillite nootto?  Maganu aanno seejjo woˈmanka woyite dancha ikkitinota albinni roore ammanate xiinxalli. Tuncu yiinohe fonqoli ikkihano ikkiro, tenne faro ammanakki kaajjishiˈrate horoonsiˈri. Giddokkita gudisse Yihowara hasaaphi. Roduuwunniwa gambo gibbooti; roorenkanni insawa gamba yite heeˈri. (Law. 18:1) Iillinoheri wiˈlatto gede assanni nooheha ikkiro nafa dandiite saˈˈatto gede kaaˈlannohere assa agurtooti. (Far. 126:5, 6) Ganyite gambooshshe haˈra, soqqansho fulanna Qullaawa Maxaafa nabbawa agurtooti. Qoleno Yihowa aahera qaale einoha dhagge ikkanno atoote illachishi. Yihowa kaaˈlanni nooheta huwatitto kiiro, ammanakki albinni roore kaajjitanni hadhanno.

18. Ammanaˈne shoshshoggitinota wodanchitiniro maa assa dandiitinanni?

¹⁸ Konni albaanni iillinoˈnehu woy xa iillanni nooˈne qarri ammanaˈne shoshshogishinoha ikkiro hexxo mudhitinoonte. Iillinoˈne qarra ammanaˈne kaajjishiˈrate kaaˈlitannoˈne faro gede assitine laˈe. Yesuusi soqqamaasine gede “Ammaˈna ledinke” yitine huuccidhe. (Luq. 17:5) Qoleno konni birxichira kulloonni manni woˈnaalsha hiince. Migeelinna Yuuri gede Yihowa kaaˈlinoˈne yanna qaagge. Veero qaaqqonna Aneeli gede roorenkanni qarru tuncu yaannoˈne woyite Yihowa seekkitine huuccidhe. Qoleno Geyidi gede, Yihowa maateˈne woy jaallaˈne widoonni hasiisannoˈnere wonshannoˈneta deˈinoonte. Yihowa xa iillanni nooˈne qarra dandiitine saˈinanni gede kaaˈlannoˈne gede assidhiniro, albillitte iillaˈnera dandaanno fonqolono cincitine saˈinanni gede kaaˈlannoˈneta, albinni roore addaxxitinanni.

19. Yesuusi huluullaminokki coyi maati? Atino huluullamattokki coyi maati?

¹⁹ Yesuusi rosaanosi ammanansa kaajjishiˈra hasiissannonsata huwattanno gede kaaˈlinonsa; ikkirono insa albillitte iillannonsa fonqolo Yihowa kaaˈlonni dandiite saˈannota horo dihuluullamino. (Yoh. 14:1; 16:33) Qoleno isi kaajjado ammana lowo manni bayira qarra gate saˈˈanno gede assitannonsata dihuluullamino. (Aju. 7:9, 14) Atino hakko manni wido ikkatto ikka? Xaa yannara afiˈritto faro baala horoonsidhe ammanakki lexxitannonna kaajjitanno gede assiˈrittoro, Yihowa eltonni hakko manni wido ikka dandaatto!—Ibi. 10:39.