Qullaawu Maxaafi Rosaano sabbakate loosonsa umo fushshate, waajjitannokkire ikka hasiissinonsa. Korkaatuno insa jooguulleho “dancha duduwo” duduwa calla ikkikkinni bushuulleho “rabbate barra” kula hasiissannonsa.

Kanaadaho heeꞌrinohu Roduu Jooni Henirii Haskini mannu giwisirono waajjikkinni sabbakino. Isi 1921 badheessu woggara, mittu Metodistete ammaꞌno qeesichinni xaadino. Roduu Haskini togo yee isi ledo hasaawa hanafi: “Atinna ani Qullaawu Maxaafi daafira dancha hasaawa hasaawa hasiissannonke. Sumuu yaa hoongoommo coyi heeꞌriro nafa, hasaawanke agurre keerunni babbaxxa dandiineemmo.” Kayi coyi hatto diꞌꞌikkino. Roduu Haskini hakkawoyite ikkinore kulanni togo yiino: “Shiima daqiiqa hasaambummohu gedensaanni, [qeesichu] hanqe saanqa lowo geeshsha ganino daafira, saanqu hincilaallo uulla giggiltuha lawinoe.”

Qeesichu “Hadhe ammaninokki manna disabbakaa?” yee boolaqiꞌri. Roduu Haskini kayinni cuqqi curuqqino diyiino; isiwiinni baxxe haꞌri woyite kayinni wodanisinni, ‘Dihasaawanni noommonku ammanoottokkihu ledootiyya!’ yee hedino.

Qeesichu layinki soodo beetekiristaanete sabbakanni, Roduu Haskini suꞌma hunino. Roduu Haskini togo yiino: “Isi konne katama soꞌrisiisaano baala rooru soꞌrisiisaanchi dayinona qorophe yiino; qoleno ane shinanni gede kulino.” Ikkirono Roduu Haskini tenne waajje sabbaka diagurino; isinni lowo mannira farciꞌrino. Togo yiino: “Soqqanshoꞌyanni lowo geeshsha hagiidhoommo. Mitu manni isinni, ‘Ati Maganu mancho ikkoottota anfoommo!’ yiinoe; qoleno hasiisannoheri heeꞌriro uyineemmohe yiinoe.”

Mannu Qullaawu Maxaafi yaannore roore huwatanno gede kaaꞌlate, Qullaawu Maxaafi Rosaano xa Baqqi Yiiyye! yineemmo metseetera Qullaawu Maxaafi xaꞌmonna dawaro ganyite qixxeessite fushshitanno. Qoleno annuwunna amuuwu oosonsa ledo hasaabbara yine wedellootaho qixxeessinanniti Qullaawu Maxaafi xaꞌmuwa no. Annuwunna amuuwu “oosonsa tenne xaꞌmuwa xaꞌmite, oosonsa Qullaawu Maxaafi giddonni dawaro afidhanno gede kaaꞌlitannonsa.” “Qullaawu Maxaafi giddo meꞌꞌe maxaaffa no?” yitannote gedee xaꞌmuwa ooso Qullaawu Maxaafi daafira xinta ikkinore  affanno gede kaaꞌlitannote. “Mittu mittunku addu Kiristaanchi dartu iillaera dandaanno yee heda hasiissannosi?” yitannote gedee xaꞌmuwa kayinni wedellootu waajjitannokki sawaakoota ikkitanno gede kaaꞌlitannonsa.

Hakkawaro roore Qullaawu Maxaafi egenno noonsarira qixxeessinanniti Qullaawu Maxaafi xaꞌmonna dawarono no; tenne xaꞌmuwara dawaro noohu Qullaawa Borro Xiinxallo yinanni maxaaffa giddo umi maxaafiraati. Tini qixxaawo lowo kume ikkanno manna kaaꞌlitino; ikkirono, gedensoonni tenne xaꞌmuwa qixxeessa agurroonnita egensiinsoonni. Mayira?

Hakkawaro dirijjitete giddo albisa ikkite loossanni noo roduuwi, haaro Qullaawu Maxaafi rosaano Qullaawu Maxaafiha xinta ikkino halaale dirimu dirimunni rossuro woyyannota huwattino. Konni daafira, Bocaasa 1921nni Maganu Gingilaate yinanni maxaafa fushshinoonni. Konne maxaafa adhannohu hasatto noonsa manni uminsa xiinxallannota Qullaawu Maxaafi xiinxallo hanafanno gedeno koyinsanni. Tini xiinxallo mannu “Maganu mannu oosora hegere heeshsho oye maassiꞌrannota” huwatanno gede kaaꞌlitino. Tenne xiinxallo gari hiittooti?

Mittu manchi konne maxaafa adhanno woyite, maxaafu giddonni hiikkonne qoola nabbawannoro kultannota shiinqa kaarde ledo uyinannisi. Aantanno lamalara, nabbawino qooli aana xintantino xaꞌmuwa amaddino kaarde uyinannisi. Hattee kaardera jeefote, tenne hiikkonne qoola nabbawannorono kullanni.

Tonaa lame lamala geeshsha lamalate kiiro, rosaanchoho qooxeessisira noo songo widoonni kaarde sonkannisi. Roore anga tenne kaarduwa sokkannori, geerra roduuwaati woy minunni mine hadhe soqqante affannokkireeti. Lawishshaho, Ameeriku gobbara, Pensiliveeniyaho, Milvali yinanniwa heedhannoti Ana Katriin Gardiner togo yitino: “Maganu Gingilaate yinanni maxaafi fulita, qaafa dandiitannokkiti rodooꞌya Tayli, xaꞌmo borreessinoonni kaarduwa mannaho sokkanni albinni roore soqqama dandiitino.” Hatti xiinxallo gooffanno woyite, rosaanchu Qullaawu Maxaafire albinni roore rosanno gede kaaꞌlate marre hasaawinsanni.

Hakku diri goofita, Roduu Jooseefi Frankiliini Raazerfordi baalante songora sokka borreesse soyino. Isi sokkate giddo, “Tayixe loonsoommohu [Maganu] Mangiste loosi wolu diri baalunkunni roore halaꞌladoho, hattono dancha guma abbinoho” yiino. Isi lede togo yiino: “Xaano loonsannihu lowo loosi gate no. Wolootuno konne maassamino looso loossanno gede jawaachishshensa.” Qullaawu Maxaafi Rosaano tenne amaale harunsitinoti xabbe leeltino. Insa 1922nni, mittoreno waajjitukkinni Maganu Mangiste albinni roore egensiissino.