1. Yesuusi Yihowa rosaanosi agaranno gede huucciꞌrinohu mayiraati?

 YESUUSI gaꞌa gede reyara hashsha rosaanosira iillannonsa qarra hedino. Isi jaallasi baxanno daafira, ‘bushuwiinni gatisannonsa gede’ Annasi huucciꞌrino. (Yoh. 17:14, 15) Yesuusi iimira haꞌrihu gedensaanni Sheexaanu Daawuloosi Yihowara soqqama hasidhannorira baalaho ola kayisannota afino. Konnira Yihowa mannira agarooshshu hasiisannonsa.

2. Yihowa huuccattonke macciishshe dawaro qolannota mayinni anfeemmo?

² Yihowa Beettosi Yesuusa baxanno daafira huucciꞌrino huuccattora dawaro qolino. Yihowa hagiirsiisate dandiinummore baala assinummoro, isi ninkeno baxannonke; hattono huuccattonke macciishshe kaaꞌlannonke qoleno agarannonke. Yihowa shaqqado Anna ikkino daafira oososi baxillunni towaaxxa diaguranno. Hatto assa hoogiro suꞌmisi mishamanno!

3. Xaa yannara Yihowa agarooshshi hasiisannonkehu mayiraati?

³ Xaa yannara albinni roore Yihowa agarooshshi hasiisannonke. Sheexaanu “lowo hanqinni” iiminni dirrino. (Aju. 12:12) Isi mitootu ninke miiccanno woyite ‘Maganoho soqqantanni nooha lawannonsa’ gede assino. (Yoh. 16:2) Magano ammanannokkihu wolu manni kayinni tenne alame manni gede ikkineemmokki daafira darammeemmo gede assannonke. Ikkihano ikkiro waajja dihasiissannonke. Mayira? Korkaatuno Maganu Qaali togo yaanno: “Mootichu kayinni ammanaminohona, jawaachishannoꞌne; bushuwiinnino agarannoꞌne.” (2 Tes. 3:3) Yihowa agarannonkehu hiittoonniiti? Hanni isi hatto assannota lame doogga laꞌno.

4. Efesooni Sokka 6:13-17 kultanno garinni, Yihowa ninke agarate maa qixxeessinonke?

⁴ Yihowa Sheexaanu siꞌꞌinni agarannonkeha olu uduunne qixxeessinonke. (Efesooni Sokka 6:13-17 nabbawi.) Kunni ayyaanaamittennihu olu uduunni kaajjadohonna lowo geeshsha kaaꞌlannoho. Ikkirono kuni olu uduunni agarooshshe ikkannonkehu mitto mittonka qodhinummoronna fushsha hoongummoro callaati. Mittu mittunku olu uduunnichi maa riqiwanno? Hanni tenne daafira seekkine laꞌno.

5. Halaalu sinnaari woy qawatto maati? Tenne qawatto qodha hasiissannonkehu mayiraati?

⁵ Halaalu sinnaari woy qawatto Maganu Qaali giddo noo halaaleeti. Tenne qawatto qodha hasiissannonkehu mayiraati? Sheexaanu “kaphu anna ikkino” daafiraati. (Yoh. 8:44) Isi lowo kume diro kaphanni keeshshino; hattono ‘kalqe baala soꞌrisiisino.’ (Aju. 12:9) Qullaawu Maxaafi giddo noo halaali kayinni soꞌneemmokki gede agarooshshe ikkannonke. Ikkina lawishshu qawatto qodha dandiineemmohu hiittoonniiti? Hatto assate Yihowa daafira halaale rosa, iso “ayyaanunninna halaalunni” magansiꞌra hattono baalunku coyinni ammanammoommore ikka hasiissannonke.—Yoh. 4:24; Efe. 4:25; Tit. 2:10.

6. Keeraanchimmanniti gagasu uddano maati? Tenne uddano uddiꞌra hasiissannonkehu mayiraati?

⁶ Keeraanchimmanniti gagasu uddano Yihowaho keeraancho biddishshaati. Tenne uddano uddiꞌra hasiissannonkehu mayiraati? Gagasu uddano bagadu olamaanchu wodana qasannokki gede agartannonte gede, keeraanchimmannniti gagasu uddanono tini alame lawishshu wodananke woy giddiidi ayimmanke huntannokki gede agartannonke. (Law. 4:23) Yihowa iso woꞌmu wodaninkenni banxammosiranna soqqammammosira hasiꞌranno. (Mat. 22:36, 37) Konnira Sheexaanu alamete coye yaano Yihowa giwanno coye banxeemmo gede asse wodananke bebbeehate woꞌnaalanno. (Yai. 4:4; 1 Yoh. 2:15, 16) Tini qinaa hooggusiro Yihowa seera diingeemmo gede assate waajjishiishannonke.

7. Keeraanchimmannita gagasu uddano uddiꞌra dandiineemmohu hiittoonniiti?

⁷ Yihowa garanna gara ikkinokki coyi daafira fushshino biddishsha harunsine keeraanchimmannita gagasu uddano uddiꞌneemmo. (Far. 97:10) Mitootu Yihowa biddishshi furro fuuqqo hoolannohu gede assite heddanno. Qullaawu Maxaafi biddishsha harunsineemmokkiha ikkiro, olamanni heeꞌre ‘Ayirritinoe’ yee uddiꞌrinota gagasu uddano fushshe hoolino olamaanchi gede ikkineemmo. Tini gowwimmate! Yihowa baxxannorira hajajosi “kaajjado” woy ayirritannota ikkitukkinni heeshshonsa gatissannote.—1 Yoh. 5:3.

8. Dancha duduwo kulate qixxaawo koattimma wodhate yaa mayyaate?

⁸ Phaawuloosi dancha duduwo kulate qixxaawo lekkaꞌnera koattimma wodhe yee jawaachishinonke. Wole yaattonni Maganu Mangisteha dancha duduwo duduwate woꞌmanka woyite qixxaawa hasiissannonke. Qullaawu Maxaafi sokka wolootaho kulleemmo woyite ninke ammanano kaajjitanno. Alamete doyichora heedhannori Yihowa Farciꞌraasine afidhu faro baalantenni dancha duduwo dudubbanni noota afanke jawaachishshannonke; lawishshaho, insa loosu basera, rosu mine, daddalu basera, minunni mine hadhe, suuqete, Yihowa Farciꞌraasine ikkinokki fiixansa xaꞌmitanno woyite hattono affino mannira sabbakkanno; mininni fula dandiitannokki woyite nafa sabbaka diagurtanno. Waajjine sabbaka agurreemmoha ikkiro, olu yannara koatte woy caamma fushshe  hooꞌlino olamaanchi gede ikkineemmo; togoo olamaanchi lekka shiimurinni madirara dandaanno. Hattono hajajaanchisi kulannosire assa didandaanno.

9. Ammanate wonqo wonqiꞌra hasiissannonkehu mayiraati?

⁹ Ammanate wonqo Yihowara noonke ammana leellishshanno. Isi eino qaale baala wonshannota ammanneemmo. Tini ammana “giirate gede wala yaannoha bushu koottalo baala hunate” kaaꞌlitannonke. Tenne wonqo wonqiꞌra hasiissannonkehu mayiraati? Korkaatuno tini wonqo kaadaasinete rosi soꞌrisiisannonkekki gedenna mannu ammanankenni kainohunni qacifatinkero hexxo mudhineemmokki gede kaaꞌlitannonke. Ammana hooggunkero wolootu Yihowa seera diingeemmo gede xixxiibbannonketa qeelle saꞌꞌa didandiineemmo. Loosu basera woy rosu mine ammanankera gaarammeemmo woyite ammanate wonqo wonqiꞌnanni heeꞌnoommo. (1 Phe. 3:15) Ayyaanaamittete coye assineemmokki gede guficho ikkannonkeha lowo woxe baantanninke looso gimbeemmo woyiteno tenne wonqo wonqiꞌnanni heeꞌnoommo. (Ibi. 13:5, 6) Mannu giwanni heeꞌreennankenni Yihowara soqqammeemmoha ikkiro, ammanate wonqo agarooshshe ikkitanni noonke.—1 Tes. 2:2.

10. Gatote gullee maati? Tenne gullee wodha hasiissannonkehu mayiraati?

 ¹⁰ Gatonniti siwiilu gullee Yihowa uyinonke hexxooti; isi reyotenni gatisannonketanna fajjosi wonshitannore baala maassiꞌrannota coyiꞌrino. (1 Tes. 5:8; 1 Xim. 4:10; Tit. 1:1, 2) Gullee olamaanchu umo agartannonte gede, gatote hexxono hedonke agartanno. Hiittoonni? Tini hexxo Maganu eino qaale illachinsheemmo gedenna qarru iillannonke woyite quwa saꞌne yaandeemmokki gede kaaꞌlitannonke. Tenne gullee wodha dandiineemmohu hiittoonniiti? Hedonke Maganu hedo ledo sumuu yitanno gede assiꞌneeti. Lawishshaho, baꞌanno jiro ikkikkinni Magano hexxineemmo.—Far. 26:2; 104:34; 1 Xim. 6:17.

11. Qullaawu ayyaani bise maati? Tenne bise horoonsiꞌra hasiissannonkehu mayiraati?

¹¹ Qullaawu ayyaani bise Maganu Qaale ikkinoho Qullaawa Maxaafaati. Tini bise baalunku gariha soꞌrisiisanno coye murate wolqa afidhinote; hattono manna kaphu rosinna gawajjanno rosichinni keere fushsha dandiitanno. (2 Qor. 10:4, 5; 2 Xim. 3:16, 17; Ibi. 4:12) Hojju xiinxallonna Maganu dirijjite uyitannonke qajeelshi tenne bise garunni horoonsiꞌnanni gara afate kaaꞌlannonke. (2 Xim. 2:15) Ayyaanaamittenniha olu uduunneno agurranna Yihowa agarooshshe ikkannonke gede qixxeessinonkeri wolurino noonke. Kuni coyi maati?

12. Woluri mayi hasiisannonke? Mayira?

¹² Worbu olamaanchi jawa olanto ledo callichisi olame qeela dandaannokkita afino; isira wolootu kaaꞌlo hasiissannosi. Ninkeno uminke wolqanni calla Sheexaanunna halesi ledo olamme qeelle anfeemmokki daafira roduuwinke kaaꞌlo hasiissannonke. Yihowa kaaꞌlo hasiissannonke woyite dode iillannonkeha alamete doyichoha roduuwu maamara uyinonke.—1 Phe. 2:17.

13. Ibiraawoota 10:24, 25 kultanno garinni, gambooshshunni mayi horo afiꞌneemmo?

¹³ Kaaꞌlo afiꞌneemmoti mitte doogo gambooshshe haꞌrate. (Ibiraawoota 10:24, 25 nabbawi.) Baalunku hexxo mudhineemmo woyiti no; kayinni gambooshshe haꞌranke jawaachishshannonke. Roduuwinke gambooshshunniwa dancha gede qixxaabbe qoltanno dawaro jawaachishshannonke. Insa shiqishshannoti Qullaawu Maxaafi aana xintantino lallawonna loonse leellinshanni ikkito Yihowara soqqamanke agurreemmokki gede kaaꞌlitannonke. Gambooshshu hanafara albaanninna goofihu gedensaanni roduuwu ledo hasaambeemmohu kianno hasaawino jawaachishannonke. (1 Tes. 5:14) Qoleno gambooshshe haꞌneemmo woyite woloota kaaꞌline hagiidhineemmo faro afiꞌneemmo. (Soq. 20:35; Rom. 1:11, 12) Gambooshshu kaaꞌlannonketi wole dooggano no. Gambooshshunniwa dancha gede sabbankeemmonna rosiinseemmo gara qajeelleemmo. Lawishshaho, Rosiisate Horoonsiꞌneemmo Borro dancha gede horoonsiꞌra dandiineemmo gara ronseemmo. Hakko daafira gambooshsheho dancha gede qixxaabbe. Gambooshshu yannara seekkitine macciishshe. Gambooshshunniwa rossinoonnire loosu aana hosiisse. Hatto assitiniro ‘Yesuusita dancha olanto ikkitinanni.’—2 Xim. 2:3.

14. Kaaꞌlitannonkeri wolu ayeooti?

¹⁴ Kiirre gundannikkiri wolqaataamma sokkaanono kaaꞌlitannonke. Mittu sokkaanchi calla mageeshshi wolqa afiꞌrinoro heda dandiineemmo! (Isa. 37:36) Hatto ikkiro wolqaataammu batinye sokkaano mageeshshire assa dandiitannoro hanni hendo. Yihowate wolqaataame olanto ledo taalamanno manchi woy agaaninte dino. Mittu ammanamino  Kiristaanchi Yihowa ledosi heeꞌriro diinnasi baxxu geeshshitano ikkituro qeela dandaanno. (Eje. 6:16) Tini halaaleho! Ledoꞌne loossannori, ledoꞌne rossannori woy Yihowa Farciꞌraasine ikkinokki fiixiꞌne kiꞌne waajjishiishate woꞌnaalanno woyite tenne qaagge. Konne ola calluwiꞌne olantinanni heedhinoonnikkita qaagge. Yihowa biddishsha harunsitinanni heedhinoonni daafira isi kaaꞌlannoꞌne.

15. Isayaasi 54:15, 17 kultanno garinni, ayeno Maganu manni sabbakannokki gede hoola dandaannokkihu mayiraati?

¹⁵ Tini Sheexaanu gashshino alame gibbannonke gede assannori duuchuri no. Poletiku hajora anga horo diwodhineemmo; qoleno ola diolammeemmo. Maganu suꞌma dudumbeemmo, keere abbitannoti Maganu Mangiste calla ikkitinota kulleemmo; hattono Maganunniha keeraancho seera harunsineemmo. Tenne alame gashshaanchi waajjo kapho kaphannohanna lubbo shaannoha ikkinoti xawo fultanno gede assineemmo. (Yoh. 8:44) Qoleno Sheexaanu alame muli yanna giddo baꞌannota dudumbeemmo. Sheexaanunna halesi sabbankeemmota hoola horo didandiitanno. Afiꞌnummo faro baala horoonsiꞌne Yihowa guwisiꞌneemmo! Sheexaanu wolqaataamo ikkirono Maganu Mangiste sokka alamete doyichora sabbankeemmota hoola didandiino. Yihowa agara hoogoommenkero konne looso loosa didandiineemmo.—Isayaasi 54:15, 17 nabbawi.

16. Yihowa bayiru qarri yannara mannasi gatisannohu hiittoonniiti?

¹⁶ Albillitte mayi ikkanno? Bayiru qarri yannara Yihowa gatisannonke. Umihunni, isi uullate mootoolla Bayira Baabiloone yaano kaphu ammaꞌno huntanno gede assanno woyite ammanantino soqqamaanosi gatisanno. (Aju. 17:16-18; 18:2, 4) Hakkiinni isi gattinota Sheexaanu alame Armagedooni oli yannara hunanno woyiteno mannasi gatisanno.—Aju. 7:9, 10; 16:14, 16.

17. Yihowawa gamba yine heeꞌnummoro mayi horo afiꞌneemmo?

¹⁷ Yihowawa gamba yine heeꞌnummoro Sheexaanu hegerera gawajjannonkere assa didandaanno. Isinni hegerera baꞌꞌannohu iso umosiiti. (Rom. 16:20) Hakko daafira olunniha woꞌma uduunne uddiꞌno hattono fushshine hoolloonke! Konne ola callikki olamate woꞌnaaltooti. Ammanate roduuwakki kaaꞌli. Yihowa biddishshano harunsi. Hatto assittoro, baxillaanchu iimi Annikki jawaachishannohetanna agarannoheta addaxxa dandaatto.—Isa. 41:10.