1. Yihowa mannira hiittoo fonqoli iillansara dandaanno?

 LOWO qarri iillanni noohe? Songote giddo mitu roduuwi xissiissinoheha ikkara dandaanno. (Yai. 3:2) Woy Yihowara soqqamattoha ikkootto daafira ledokki loossannori woy rossannori mishshannoheha ikkara dandaanno. (1 Phe. 4:3, 4) Woy maatekki miilla gambooshshe haꞌrattota woy ammanakkire mannaho kulattota hooltahera woꞌnaaltanni nooha ikkara dandaanno. (Mat. 10:35, 36) Iillinohe fonqoli lowo geeshsha xissiisinoheha ikkiro hexxo mudhattoha ikkara dandaanno. Iillannohe fonqoli ikkihano ikkiro Yihowa gara ikkinore assatto gede hayyo aannoheta hattono konne fonqolo dandiite saꞌꞌatto gede jawaante aannoheta addaxxa dandaatto.

2. Roomu Sokka 15:4 kultanno garinni Maganu Qaale nabbawanke kaaꞌlitannonkehu hiittoonniiti?

² Yihowa Qaalisi giddo guuntete xeꞌne noonsa manni, qarra dandiite saꞌino gara kultanno xagge borreessiisino. Isi hatto assinohu insa xaggenni ronsammoraati. Hakko daafira Yihowa soqqamaasinchu Phaawuloosi tenne hedo coyiꞌranno gede assino. (Roomu Sokka 15:4 nabbawi.) Tenne xagge nabbawanke jawaantenna hexxo afiꞌneemmo gede assitannonke. Ikkirono horo afiꞌrate Qullaawa Maxaafa nabbawatenni sainore assa hasiissannonke. Qullaawu Maxaafi rosi hedonke biddi assannonke gedenna wodaninkera coanno gede assiꞌra hasiissannonke. Iillinonke qarra dandee saꞌꞌate biddishshu hasiisinonkeha ikkiro maa assa dandiineemmo? Aante noota shoole hayyo harunsa dandiineemmo: (1) Huuccatto, (2) Heda, (3) Hiincanna (4) Loosu aana hosiisa. Hanni tenne hayyo harunsa dandiineemmo  gara laꞌno. b Hakkiinni kuri hayyo horoonsiꞌne Moote Daawitinna soqqamaasinchu Phaawuloosira iillinonsarinni maa ronseemmoro laꞌneemmo.

3. Qullaawa Maxaafa nabbawattora albaanni ma assa hasiissannohe? Mayira?

³ (1) Huuccatto. Qullaawa Maxaafa nabbawattora albaanni, nabbawattorinni horo afiꞌra dandaatto gara afate kaaꞌlahera Yihowa huucciꞌri. Lawishshaho, iillinohe qarra dandiite saꞌꞌate amaale hasidhanni noottoha ikkiro, Qaalisi giddonni harunsattoha xintu seera afiꞌratto gede kaaꞌlahera Yihowa huucciꞌra dandaatto.—Fil. 4:6, 7; Yai. 1:5.

4. Qullaawu Maxaafi rosi xawe leellannohe gede kaaꞌlahera dandaannori maati?

⁴ (2) Heda. Yihowa dhagge ikkitannota hedate dandoo uyinonke. Qullaawu Maxaafi rosi xawe leellannohe gede nabbawatto xagge giddo ikkanni noore seekkite hedi, hattono xaggesi nabbabbanni nootto mancho ikkoottohu gede assite hedi. Hakku manchi lainore laꞌꞌate hattono isira macciishshaminosire huwatate woꞌnaali.

5. Hiincate yaa mayyaate? Hiinca dandaattohu hiittoonniiti?

⁵ (3) Hiinca. Hiincate yaa nabbamboonnirenna hakkonne coye loosunni leellisha dandiinanni gara seekkine hedate. Tini nabbamboommore konni albaanni anfoommori ledo xaadinse hedatenna mitto coye seekkine huwatate kaaꞌlitannonke. Qullaawa Maxaafa hiincinikkinni nabbawa, sagale qishiꞌrate abbiꞌnoonnire qishiꞌnikkinni agurate gedeeti. Hiinca kayinni addi addire gamba assine coommitanno sagale wodhate gedeeti. Ateneeto togo yite xaꞌmakki hiincate kaaꞌlitannohe: ‘Xaggete giddo kulloonni manchi kaaꞌlannosire maa assino? Yihowa kaaꞌlinosihu hiittoonniiti? Tenne xaggenni rosoommori cince saꞌꞌate kaaꞌlannoehu hiittoonniiti?’

6. Ronsoommore loosunni leellisha hasiissannonkehu mayiraati?

⁶ (4) Loosu aana hosiisa. Yesuusi ronsoommore loosu aana hosiinseemmokkiha ikkiro, mine shaafu aana miꞌnino manchi gedeere ikkinoommota coyiꞌrino. Togoo manchi daafure loosinoha ikkirono daafurisi kaphoho. Mayira yiniro minisi bubbenna lolahu daanno woyite diigamannoho. (Mat. 7:24-27) Hatteente gede ninkeno, huuccatto assiꞌne, hende hattono hiincine kaꞌne ronsoommore loosunni leellisha hoongummoro yannankenna wolqanke mulla guxxinoommo yaate. Ronsoommore loosunni leellisha hoongummoro fonqolu woy dartu iillannonke woyite ammananke baꞌara dandiitanno. Xiinxallineemmohanna ronsoommore loosunni leellinsheemmoha ikkiro kayinni gara ikkinore assineemmo, giddiidi keere afiꞌneemmo hattono ammananke kaajjitanno. (Isa. 48:17, 18) Hanni aleenni laꞌnummota shoole hayyo horoonsiꞌne Moote Daawitira iillinosirinni maa ronseemmoro laꞌno.

7. Xa hiittenne Qullaawu Maxaafi xagge xiinxallineemmo?

⁷ Jaalikki woy maatekki miili xissiise egenninohe? Hatto ikkiro Moote Daawiti beetti Abeseloomi xagge xiinxallakki kaaꞌlitannohe; isi annasi kaadino hattono annisi gashshoote adhate woꞌnaalino.—2 Sam. 15:5-14, 31; 18:6-14.

8. Yihowa kaaꞌlannohe gede ma assa dandaatto?

⁸ (1) Huuccatto. Nabbawootto xagge heddanni xissiisiꞌrootto gara Yihowara hasaaphi. (Far. 6:6-9) Xissiisinohere badde kuꞌli. Hakkiinni iillinohe qarra dandiite saꞌꞌate kaaꞌlannohe biddishsha afiꞌratto gede kaaꞌlahera Yihowa huucciꞌri.

9. Daawitinna Abeseloomi mereero mayi kalaqamino?

 ⁹ (2) Heda. Daawiti xagge nabbawatto woyite hakka woyite ikkinorenna kuni coyi gawajjinosihu hiittoonniitiro hedi. Daawiti beetti Abeseloomi mannu baxannosi gede assiꞌrate lowo diro sharramino. (2 Sam. 15:7) Abeseloomi injiitinosi yanna hede, Israeelete manni iso gashshaancho asse adhanno gede ammansiisanno manna Israeelete gobba woꞌma soyino. Isi Daawitira muli jaalanna amaalaancho ikkinoha Akixofeeli nafa ammansiise isira finqilanno gede assino. Abeseloomi isonooto moote asse lallawino hattono Daawiti amade shaara woꞌnaalino; Daawiti hatte yannara lowo geeshsha dhiwame nooha ikkara dandaanno. (Far. 41:1-9) Daawiti tenne afiti Yerusaalametenni xooqe haꞌrino. Gedensoonni Abeseloomi olanto Daawiti olanto ledo qasantino. Finqiltino olanto qeelantino, Daawiti beetti Abeseloomino reyino.

10. Moote Daawiti mayyee hedara dandaanno?

¹⁰ Hanni kuni baalu ikki woyite Daawitira mayi macciishshaminosiro hedi. Isi Abeseloomi baxanno hattono Akixofeeli ammananno. Ikkirono insa lamunku kaaddinosi. Insa isi lowo geeshsha xissiisiꞌranno gede assitinosi hattono shaate nafa woꞌnaaltino. Daawiti wolootu jaallasino Abeseloomira halantara dandiitanno yee insa ammana hoogara dandaanno. Isi umisi daafira calla hedanna callichisi wole gobba xooqa dandaanno. Woy hexxo mudhe facci asse agurara dandaanno. Ikkirono Daawiti kuri coyibba diassino. Hatteentenni isi iillinosi qarra dandee saino. Isi hatto assa dandiinohu mayiraati?

11. Daawiti qarru iillisi yannara maa assino?

¹¹ (3) Hiinca. Tenne xaggenni maa rosa dandaatto? Ateneeto togo yite xaꞌmi: “Daawiti kaaꞌlannosire maa assino?” Daawiti mase qece diyiino hattono muddame gara ikkinokkire diassino. Isi assannori baeennasi jalli yeeno digatino. Hatteentenni kaaꞌlannosi gede Yihowa huucciꞌrino. Qoleno kaaꞌlitannosi gede jaallasi xaꞌmirino. Isi assara hedinore rahe assino. Daawiti lowo geeshsha xissiisiꞌrinoha ikkirono woloota ammana digiwino woy dicaaccaawino. Isi Yihowa addaxxino hattono jaallasi ammanino.

12. Yihowa Daawiti kaaꞌlinohu hiittoonniiti?

¹² Yihowa Daawiti kaaꞌlinohu hiittoonniiti? Mito geeshsha ledde xiinxallite, Yihowa Daawiti iillinosi qarra dandee saꞌꞌanno gede jawaante uyinosihu hiittoonniitiro afa dandaatto. (Far. 3:1-8; umoonni noo hedo lai.) Yihowa Daawiti assinore maassiꞌrinosi. Hattono Daawititi ammanantino jaallasi iso gatisate gaarantu yannara kaaꞌlinonsa.

13. Mittu manchi xissiisihero Daawiti lawishsha harunsa dandaattohu hiittoonniiti? (Maatewoosi 18:15-17)

¹³ (4) Loosu aana hosiisa. Ateneeto togo yite xaꞌmi: ‘Daawiti lawishsha harunsa dandeemmohu hiittoonniiti?’ Qarru iillannohe woyite qarra tirate assa hasiissannohere rakke assi. Iillinohe qarri garinni, Yesuusi Maatewoosi fooliishsho 18 kulino amaale woy konni qummeeshshiha xintu seera harunsa dandaatto. (Maatewoosi 18:15-17 nabbawi.) Kayinni coyi xissiisinohe daafira muddante gara ikkinokkire assattokki gede qorophi. Yihowa wodanaaꞌmatto gedenna gara ikkinore assatto gede kaaꞌlahera huucciꞌra hasiissannohe. Roduuwakki ammana agurtooti. Hatteentenni insa kaaꞌlitannohe woyite maahoyye yii. (Law. 17:17) Baalunkunni roore Yihowa Qaalisi widoonni aannohe amaale harunsi.—Law. 3:5, 6.

14. Layinki Ximootewoosi 1:12-16; 4:6-11, 17-22 illachishatto gede assahera dandaannori maati?

¹⁴ Ammanakkinni kainohunni maatekki miilla gibbinohe? Woy heeꞌrattohu Yihowa Farciꞌraasine looso hoolloonni woy agamboonni gobbaraati? Hatto ikkiro, 2 Ximootewoosi 1: 12-16; 4:6-11, 17-22 c nabbawakki jawaachishshannohe. Phaawuloosi tenne sokka borreessinohu usuru mine heeꞌreeti.

15. Yihowa ma assannohe gede huucciꞌra dandaatto?

¹⁵ (1) Huuccatto. Tenne xagge nabbawattora albaanni, qarrakkinna kuni qarri xissiisinohe gara Yihowara hasaaphi. Qarrakki isira badde kuli. Hakkiinni, Phaawuloosira qarru iillinosita kultanno xaggenni, iillinohe qarra dandee saꞌꞌate kaaꞌlannoheha xintu seera afiꞌratto gede Yihowa huucciꞌri.

16. Phaawuloosira iillinosiri maati?

¹⁶ (2) Heda. Phaawuloosira iillinori gedeeri iillinohehu gede assite hedi. Isi Roomaho usuru mine sansalatetenni usurame no. Isi hakkuyi albaannino usuramino; xa kayinni shinannisita afino. Iso jaallasi giddo mitu agurte hadhinosi hattono mannimmasi daafurtino.—2 Xim. 1:15.

17. Phaawuloosi mayyee hedara dandaanno?

¹⁷ Phaawuloosi alba iillinosi qarra qaage, ‘Diinaggaawe sabbaka aguroommoro xa diusurameemmo’ yee hedara dandaanno. Iisiyu qoqqowira noo jaallasi agurte hadhinositera caaccaawara dandaanno; hattono wole jaallasi ammana hoogara dandaanno. Kayinni Phaawuloosi kuri coyibba diassino. Phaawuloosi Yihowa addaxxinohunna jaallasi ammaninohu mayiraati?

18. Phaawuloosi qarru iillisi yannara maa assino?

¹⁸ (3) Hiinca. Ateneeto “Phaawuloosi kaaꞌlannosire maa assino?” yite xaꞌmi. Phaawuloosi shinannisita afinoha ikkirono, roore hasiisanno coyi Yihowa ayirranno gede assa ikkitinota dideino. Qoleno isi woloota jawaachishanno gara heda diagurino. Isi ganye huuccatto assiꞌre Yihowa addaxxannota leellishino. (2 Xim. 1:3) Phaawuloosi agurte hadhinosiri daafira quwa sae heda agure ammanante baxillunni kaaꞌlitinosi jaallasi lowo geeshsha galatino. Hattono Maganu Qaale xiinxalla diagurino. (2 Xim. 3:16, 17; 4:13) Baalunkunni roore Yihowanna Yesuusi baxxannosita woꞌmunni woꞌma addaxxino. Insa iso tugge diagurtinosi hattono ammaname soqqaminohura baꞌraassinosi.

19. Yihowa Phaawuloosi kaaꞌlinosihu hiittoonniiti?

¹⁹ Yihowa Phaawuloosi Kiristaancho ikkino daafira dartu iillannosita balaxe kulinosi. (Soq. 21:11-13) Yihowa Phaawuloosi kaaꞌlinosihu hiittoonniiti? Isi Phaawuloosi huucciꞌrino huuccattora dawaro qolinosi hattono wolqa uyinosi. (2 Xim. 4:17) Phaawuloosi baraarsha afiꞌrate jawaate loosino daafira isi konne baraarsha afiꞌrannota dihuluullamino. Yihowa, Phaawuloosi ammanantino jaallasino kaaꞌlitannosi gede assino.

20. Roomu Sokka 8:38, 39 kultanno garinni Phaawuloosi iillinosi qarra cince saꞌꞌanno gede kaaꞌlinosiri maati? Ati isi lawishsha harunsa dandaattohu hiittoonniiti?

²⁰ (4) Loosu aana hosiisa. Ateneeto togo yite xaꞌmi, ‘Phaawuloosi lawishsha harunsa dandeemmohu hiittoonniiti?’ Phaawuloosi gede ninkerano ammanankenni kainohunni dartu iillankera dandaannota heda hasiissannonke. (Maq. 10:29, 30) Fonqolu iillannonke woyite ammanamme heeꞌrate ganyine huuccatto assiꞌranna woꞌmanka woyite Qaalesi xiinxalla hasiissannonke. Baalunkunni roorino coyi Yihowa ayirranno gede assa ikkitinota woꞌmanka woyite qaaga hasiissannonke. Yihowa tuge agurannonkekkitanna aye manchi assannorino isi baxilliwiinni badankera dandaannokkita addaxxa dandiineemmo.—Roomu Sokka 8:38, 39 nabbawi; Ibi. 13:5, 6.

21. Ayanna Hekiteri iillinonsa qarra qeelte saꞌanno gede kaaꞌlinonsari maati?

²¹ Heeꞌnoommo gari ikkihano ikkiro, Qullaawu Maxaafi giddo kulloonni xaggenni jawaante afiꞌra dandiineemmo. Lawishshaho,  Jaappaanete gobbara heedhannoti Aya yinanni suwisaancho, Yoonaasi xagge gudumaaleho waajjitukkinni soqqantanno gede kaaꞌlitinoseta coyidhino. Indoneezhiyaho heeꞌrannoha Hekiteri yinanni wedellicha, maatesi Yihowa Farciꞌraasine ikka hooggurono Ruuti lawishshi Yihowa daafira rosatenna isira soqqamate kaꞌꞌanno gede assinosi.

22. Qullaawu Maxaafi diraaminninna Ammanatenni Insa Faale Hadhe yaanno maxaafira noo xaggenni horo afiꞌra dandaattohu hiittoonniiti?

²² Jawaachishshannoheta Qullaawu Maxaafi lawishshuwa hiikkiinni afiꞌra dandaatto? Viidiyubba, diraamu gariti Qullaawu Maxaafi niwaawe hattono Ammanatenni Insa Faale Hadhe (Amaaru Afoo) yaanno maxaafi Qullaawu Maxaafi xagge seekke huwatate kaaꞌlannonke. d Seekkine xiinxalline qixxeessinoonnita kuri viidiyubba laꞌꞌattora woy macciishshattora hattono borro nabbawattora albaanni atera kaaꞌlitanno hedo afiꞌratto gede kaaꞌlahera Yihowa huucciꞌri. Xaggesi nabbabbanni nootto mancho ikkoottohu gede assite hedi. Kuni ammanaminohu Yihowa soqqamaanchi assinorenna Yihowa isi iillinosi qarra dandee saꞌꞌanno gede kaaꞌlinosihu hiittoonniitiro hiinci. Hakkiinni konne roso loosu aana hosiisi. Kaaꞌlinohe daafira Yihowa galati. Woloota jawaachishattonna kaaꞌlatto faro hasidhe Yihowa assinoherira galatattota leellishi.

23. Isayaasi 41:10, 13 kultanno garinni Yihowa ma assankera qaale eino?

²³ Sheexaanu gashshinote tenne alamera heeꞌneemmo heeshsho qarru batiꞌrinote; mito woyite isinni kande amandeemmori baꞌꞌankera dandaanno. (2 Xim. 3:1) Ikkirono yaada woy waajja dihasiissannonke. Yihowa iillanni noonke qarra afino. Isi umbeemmo woyite jawaata ikkitinote qiniiticho angasinni amade kayisannonketa kulinonke. (Isayaasi 41:10, 13 nabbawi.) Isi kaaꞌlannonketa woꞌmunni woꞌma addaxxine, Qullaawa Borronni jawaante afiꞌranna iillannonke qarra baala qeelle saꞌꞌa dandiineemmo.