Mitu Kiristaani maatensanna ammanate roduuwinsa ledo xaadate yanna abbitino tekinooloje horoonsiˈranno. Ikkollana gikki yiino Kiristaani, “Egennaamu manchi bushare afiro maaxamanno; hawanyu kayinni eˈˈe qarramanno” yitanno amaale dideanno.—Law. 27:12.

Yihowa ninke agara hasiˈrannota anfoommo. Konnira babbadooshshe kalaqa hasidhannoriwa, bohantinoriwa woy kaphu hedo tareessitannoriwa aana dihasiˈneemmo. (Rom. 16:17; 1 Qor. 5:11; 2 Yoh. 10, 11) Sonogote giddo noorirano mitootaho danchu amanyooti noonsakkiha ikkara dandaanno. (2 Xim. 2:20, 21) Jaalla doodhineemmo woyite tenne dea dihasiissannonke. Sokka sonkanni appilikeeshiine widoonni dancha jaalla doodha qarra ikkitara dandiitanno.

Hakko iso appilikeeshiinete widoonni lowo manni noo gaamo wido ikkate hendeemmo woyite qoropha hasiissannonke. Lowo manni noo gaamo giddora einohu mitu Kiristaani qarru giddo uwino. Mittu Kiristaanchi lowo xibbe woy kume ikkanno manni noo gaamo giddora eˈˈe heeˈre hiitto ikke qoropha dandaanno? Gaamote giddo noohu mittu mittunku manchi ayimmanna ayyaanaamittesi afa didandiinanni. Faarso 26:4, “Kaphaanote songo disongeemmo; lawisiisaanote ledo dihoseemmo” yitanno. Kuni qummeeshshi sokka sonkanni appilikeeshiine anfoommo manni ledo calla xaadate horoonsiˈra hasiisannonketa leellishannoha diˈˈikkino?

Gaamote giddo noo manni shiima ikkiro nafa, mittu Kiristaanchi hasaawanni mageeshshi yanna gudannoronna mayi hajo daafira hasaambanniro buuxa hasiissannosi. Hasaambanni gundanni yanna woy hasaambanni hajo ikkitutano ikkituro, anino hasaawa hasiissannoe yine heda dihasiissannonke. Phaawuloosi Ximootewoosi, mitootu ‘manni coyi giddora eˈanni, hasiisannokkire coyidhannota’ kule qorowisiisinosi. (1 Xim. 5:13) Xaa yannarano elektiroonikisete uduunne horoonsidhe hatto assitannori heedhara dandiitanno.

Gikki yiino Kiristaanchi ammanate roduuwasi dimishanno hattono insa fojo woleho dikulanno; qoleno wolootu togoore kultanna dimacciishshanno. (Far. 15:3; Law. 20:19) Iibbinshe woy buunxikkinni coyiˈnannire dimacciishshanno hattono woleho ditareessanno. (Efe. 4:25) JW Biroodikaastenna jw.org webisayitenke widoonni falakkinota ayyaanaamittete sagalenna addaxxinanni mashalaqqe afiˈneemmo.

Mite Yihowa Farciˈraasine mitore hiˈrate, hidhate hattono mitore egensiisate woy loosu egensiishsha fushshate sokka sonkanni appilikeeshiine horoonsidhanno. Kuni ayyaanaamittete coye ikkikkinni daddalu hajooti. ‘Woxu baxille qorophanno’ Kiristaani roduuwu maamara horo daddaloho dihoroonsiˈranno.—Ibi. 13:5.

Qarrantinore woy dano iillitinonsa roduuwa kaaˈlate sokka sonkanni appilikeeshiine horoonsiˈne woxe gamba assa garahoyyani? Roduuwanke banxeemmo daafira insa kaaˈlanna jawaachisha hasiˈneemmo. (Yai. 2:15, 16) Kayinni lowo manni noo gaamo widoonni hatto assate woˈnaalleemmoha ikkiro, sinu biiro woy songo togoo roduuwa kaaˈla qarra ikkitannonsa gede assinanni heeˈnoommo. (1 Xim. 5:3, 4, 9, 10, 16) Qoleno Maganu geˈreewo towaatate baxxino qeechi nooe yine hendeemmoha lawisannore assa dihasiˈneemmo.

Assineemmori baalu Yihowara ayirrinye abbannoha ikkara hasiˈneemmo. (1 Qor. 10:31) Konnira sokka sonkanni appilikeeshiine woy wole tekinooloje horoonsiˈneemmo woyite qarra abbara dandaannore hedanna qoropha hasiissannonke.