XIINXALLOTE BIRXICHO 4
Yihowa Qaagooshshu Ayyaana Ayirrisate Assineemmore Maassiꞌranno
“Konne ane qaaggora assidhe!”—LUQ. 22:19.
FAARSO 19 Mootichu Hurbaate
GUULCHO a
1-2. Diru kiiro Qaagooshshu Ayyaana ayirrinseemmohu mayiraati?
MITU 2,000 diri albaanni Yesuusi heeshshosi ninke daafira sayise oye hegere heeshsho afiꞌneemmo faro faninonke. Yesuusi reyara albaanni noo hashsha shiimare asse yaano timanna woyine qixxeesse rosaanosi isi baxillunni assinore qaagganno gede hajajino.—1 Qor. 11:23-26.
2 Yesuusa lowo geeshsha banxeemmo daafira hajajosi ayirrinseemmo. (Yoh. 14:15) Diru kiiro Qaagooshshu Ayyaani yannara Yesuusi reyo mayi tiro afidhinoro huuccatto assiꞌne seekkine hiincate yanna gaaꞌmine isi assinonkerira galatu noonketa leellinsheemmo. Qoleno dandaami deerrinni lowo manni konne baxxino ayyaana ninke ledo ayirrisanno gede koyisate albinni roore soqqammeemmo. Hakkiinni saeno aye coyino Qaagooshshu Ayyaana ayirrinseemmota hoolannonkekki gede assiꞌrate murciꞌnoommo.
3. Konni birxichira maa xiinxallineemmo?
3 Konni birxichira Yihowa manni Yesuusi reyo qaagooshshe ayirrisate assannoha sase coye laꞌneemmo; insano (1) Qaagooshshu Ayyaana Yesuusi hajajino garinni ayirrisate, (2) manna Qaagooshshu Ayyaanira koyisate hattono (3) qarra ikkannori heeꞌrirono Qaagooshshu Ayyaana ayirrisate.
QAAGOOSHSHU AYYAANA YESUUSI HAJAJINO GARINNI AYIRRISA
4. Diru kiiro Qaagooshshu Ayyaaniwa hiikkoye halaale luphi assine kullanni? Konne halaale mulluri gede assine laꞌꞌa hasiissannonkekkihu mayiraati? (Luqaasi 22:19, 20)
4 Diru kiiro Qaagooshshu Ayyaaniwa duucha xaꞌmuwara dawaro qoltannota Qullaawu Maxaafi aana xintantino lallawo macciishshineemmo. Mannu oosora wodo hasiissinohu mayiraatironna mittu manchi reyo lowo manni cubbo dibbannohu hiittoonniitiro ronseemmo. Timunna woyine maa riqibbannoronna timanna woyine qamassannori ayeootiro qaagiissinanninke. (Luqaasi 22:19, 20 nabbawi.) Qoleno uulla ragiꞌrate hexxo noonsari mayi atoote afidhannoro hiincineemmo. (Isa. 35:5, 6; 65:17, 21-23) Konne halaale mulluri gede assine laꞌꞌa dihasiissannonke. Lowo biliyoone ikkanno manni konne halaale dihuwatino; hattono Yesuusi kakkalo afidhino waaga diafino. Qoleno insa Qaagooshshu Ayyaana Yesuusi rosiisino garinni diayirrissanno. Mayira?
5. Yesuusiti roore rosaano reyite gooffuhu gedensaanni mannu Qaagooshshu Ayyaana ma garinni ayirrisa hanafino?
5 Roore Yesuusi rosaano reyite gooffanni heedheennanni kaphu Kiristaani songote giddora eino. (Mat. 13:24-27, 37-39) Insa “shokkashsho coye rosiissanni, lowo ammanaasine insawa [qoꞌlitino].” (Soq. 20:29, 30) Kaphu Kiristaani rosiisannohu ‘shokkashshu rosi’ giddo mittu “Kiristoosi lowo manni cubbo hunara mitte hige kakkalamino” yaannohu Qullaawu Maxaafi rosi ledo sumuu yaannokki rosooti; insa isi kakkalo duucha hige shiqa hasiissanno yite rosiissanno. (Ibi. 9:27, 28) Xaa yannara noohu batinyu manni konne kaphu roso ammananno. Kuni manni lamalate kiiro mito woyite barru baala “Qurbaane” ayirrisate beetekiristaane haꞌranno. b Wole ammaꞌno kayinni Yesuusi reyo qaagooshshe saꞌe saꞌe ayirrissanno; insa giddo kayi rooru manni Yesuusi kakkalo afidhino waaga diafino. Mitootu, ‘Yesuusi reyo addinta cubbiꞌya maaramanno gede assitanno?’ yite heddanno. Insa hatto yite heddannohu mayiraati? Yesuusi kakkalo cubbinkera maaro afiꞌneemmo gede diassitanno yine rosiinsanninsa daafiraati. Yesuusiti addu harunsaano mannu Yesuusi kakkalo afidhino waaga huwatanno gedenna Qaagooshshu Ayyaana isi hajajino garinni ayirrisanno gede kaaꞌlitinohu hiittoonniiti?
6. Qullaawu Maxaafi rosaano 1872nni huwattino coyi maati?
6 Charlesi Teezi Raasili massaggannoti Qullaawu Maxaafi rosaano 19ki sani jeefora Qullaawa Borro seekkite xiinxalla hanaffu. Insa Yesuusi kakkalo afidhino waaganna isi reyo ma garinni ayirrisa hasiissannonsaro afa hasidhino. Insa Qullaawa Maxaafa xiinxallite 1872nni Yesuusi kakkalo ikkinohu baalunku mannira ikkinota huwattino. Huwattinore uminsare calla affe agura dihasidhino. Hatteentenni insa maxaaffa, gaazeexxanna metseetta qixxeessite tenne mannaho egensiissino. Shiima yanna gedensaanni insa umi xibbi diri Kiristaani faale hadhe Qaagooshshu Ayyaana dirunni mitte higge ayirrisa hanaffino.
7. Albiri Qullaawu Maxaafi rosaano xiinxallite huwattinori kaaꞌlinonkehu hiittoonniiti?
7 Kuri Kiristaani xiinxallite huwattinori xaa yannara ninke lowo geeshsha kaaꞌlinonke. Hiittoonni? Yihowa kaaꞌlonni, Yesuusi kakkalo afidhino waaganna tini kakkalo manna baala kaaꞌlitinohu hiittoonniitiro wodanchinoommo. (1 Yoh. 2:1, 2) Qoleno Qullaawu Maxaafinni Magano waajjanno mannira lame hexxo noota ronsoommo; boodu manni iima reyitannokki heeshsho afiꞌranno, hattono lowo miliyoone ikkanno manni uullate aana hegere heeshsho afiꞌranno. Yihowa mageeshshi geeshsha baxannonkeronna Yesuusi kakkalo mitto mittonka kaaꞌlitinonke gara huwantummoro albinni roore Yihowawa shinqeemmo. (1 Phe. 3:18; 1 Yoh. 4:9) Hakko daafira alba heedhinori ammanantino roduuwinke gede, wolootu ninke ledo Qaagooshshu Ayyaana Yesuusi hajajino garinni ayirrissara koyinseemmo.
MANNA QAAGOOSHSHU AYYAANIRA KOYISA
Qaagooshshu Ayyaani zamachi yannara dancha gede soqqamate maa assa dandaatto? (Gufo 8-10 lai) e
8. Yihowa manni woloota Qaagooshshu Ayyaanira koyisate assinori maati? (Misile lai.)
8 Yihowa manni lowo diro manna Qaagooshshu Ayyaanira koyisanni keeshshino. Yunayitidi Isteetisete heedhanno roduuwi 1881 hanafora Pensiliveeniyaho Aligeeniya yinanniwa konne baxxino ayyaana ayirrisate roduuwu mine gamba yitanno gede koyinsoonni. Gedensoonni Qaagooshshu Ayyaana mitte mittenti songo ayirrissanno gede assinoonni. Badheessa 1940 halashshaano hasatto noonsaha qoqqowinsara heeꞌranno manna koyissanno gede kulloonninsa. Hakkiinni 1960 Sinu biiro songuwate attammoonniha Qaagooshshu Ayyaaniha koyishshu woraqata qixxeessa hanaffino. Hakkuyinni hananfe lowo biliyoone ikkannoha Qaagooshshu Ayyaaniha koyishshu woraqata mannaho tuqinsoonni. Manna Qaagooshshu Ayyaanira koyisate sharrammeemmohu mayiraati?
9-10. Manna Qaagooshshu Ayyaanira koyisankenni horo afidhannori ayeooti? (Yohaannisi 3:16)
9 Mannu Qaagooshshu Ayyaana ledonke ayirrisanno gede koyinseemmohu mittu korkaati, ayyaana ayirrisate mite yee daanno manni Yihowanna Yesuusi baalunkura assitinonkere rosara hasiꞌneemmo daafiraati. (Yohaannisi 3:16 nabbawi.) Insa Qaagooshshu Ayyaaniwa laꞌannorinna macciishshitannori roore rosanna Yihowa soqqamaano ikka hasidhanno gede assannonsa yine hexxineemmo. Ikkirono wolootuno horo afidhanno.
10 Yihowara soqqama agurtinoreno koyinseemmo. Hatto assineemmohu Maganu xaa geeshsha baxannonsata qaagganno gede assateeti. Insa giddo batinyu koyinseemmo koyishshira dagganno; hattono insanni xaadankenni lowo geeshsha hagiidhineemmo. Qaagooshshu Ayyaana daansa insa konni albaanni Yihowara soqqante hagiidhitino gara qaagganno gede kaaꞌlitannonsa. Hanni Moniika yinanni rodoo woꞌnaalsha laꞌno. c Ise Yihowara wirro soqqama hanaffinohu Koroonu fayya ubbuhu gedensaanniiti. Moniika 2021hu Qaagooshshu Ayyaanira dagguhu gedensaanni togo yitino: “Kuni Qaagooshshu Ayyaani anera baxxinoho. Mite yee 20 diri gedensaanni mannaho farciꞌranna Qaagooshshu Ayyaana daanno gede koyisa hanafoomma. Manna koyisate danduummare baala assoommohu Yihowanna Yesuusi assitinoere lowo geeshsha naadeemma daafiraati.” (Far. 103:1-4) Yihowa assineemmore lowo geeshsha naadannota anfoommo daafira mannu dayirono daa hoogirono Qaagooshshu Ayyaanira diinaggaambe koyinseemmo.
11. Yihowa manna Qaagooshshu Ayyaanira koyinseemmo woyite assineemmore maassiꞌrinohu hiittoonniiti? (Hage 2:7)
11 Yihowa manna Qaagooshshu Ayyaanira koyisate assinoommore lowo geeshsha maassiꞌrinonke. Koroonu fayyanni kainohunni mito coye agamboonniha ikkirono 2021hu Qaagooshshu Ayyaanira 21,367,603 manni gamba yiino. Tini kiiro alamete doyichora noote Yihowa Farciꞌraasine kiironni lame ero saꞌannote! Hige Yihowa illachishannohu mannu kiiro calla diꞌꞌikkino. Isi mitto mittonka mancho illachishanno. ( Luq. 15:7; 1 Xim. 2:3, 4) Manna Qaagooshshu Ayyaanira koyinseemmo woyite Yihowa suwashshu wodani noonsa manninni xaandeemmo gede assannonketa dihuluullammeemmo.—Hage 2:7 nabbawi.
QARRA IKKANNORI HEEꞌRIRONO QAAGOOSHSHU AYYAANA AYIRRISA
Yihowa Qaagooshshu Ayyaana ayirrisate assineemmore maassiꞌranno (Gufo 12 lai) f
12. Yesuusi reyo qaagooshshi ayyaana ayirrinseemmokki gede qarra ikkankera dandaannori maati? (Misile lai.)
12 Yesuusi masaalinonte gede tenne goofimarchu yannara duuchu gari qarri iillannonke; lawishshaho maatenke gibbannonke, dartu iillannonke qoleno olu, dhibbu woy wolu qarri amadannonke. (Mat. 10:36; Maq. 13:9; Luq. 21:10, 11) Togoo coyi iillannonke woyite mito woyite Yesuusi reyo qaagooshshi ayyaana ayirrisa qarra ikkitannonke. Roduuwinke togoo qarra qeelte saꞌꞌate maa assitino? Yihowa kaaꞌlinonsahu hiittoonniitiyya?
13. Yihowa Artemi usuru mine heeꞌre Qaagooshshu Ayyaana ayirrisate worbimmatenni assinore maassiꞌrinohu hiittoonniiti?
13 Usurama. Ammanansanni kainohunni usurreennansa noo roduuwi Yesuusi reyo qaagooshshi ayyaana ayirrisate dandiiture baala assitanno. Hanni Artemi yinanni rodii lawishsha laꞌno. Isi 2020hu Qaagooshshu Ayyaani yannara shiimicco kifilera mito onte ikkanno manni ledo usuramino. Isi usurame nooha ikkirono, Qaagooshshu Ayyaani timanna woyine qixxeessiꞌrate hasiisannosire afiꞌra dandiino; hattono isiniitira lallawo shiqishate qixxaawino. Kayinni ledosi usurantinori sijaara agganninna xonantanni no. Isi maa assiyya? Isi mitte saate calla sijaara aganna xonama agura dandiitannoro xaꞌminonsa. Hattee Qaagooshshu Ayyaani yannara insa sijaara aganna xonama agurtuta Artemi dhagge assiꞌrino. Artemi Qaagooshshu Ayyaani daafira kuleemmoꞌne yiinsa. Insa macciishsha dihasiꞌneemmo yitinoha ikkirono, Artemi Qaagooshshu Ayyaana ayirrisate assinore laꞌuhunna macciishshituhu gedensaanni baalankare kulannonsa gede xaꞌmitinosi.
14. Koroonu fayya nooha ikkirono Qaagooshshu Ayyaana ayirrisate maa assinoonni?
14 Koroonu fayya. Koroonu fayya ubbu yannara Yihowa Farciꞌraasine Qaagooshshu Ayyaana xaadde ayirrisa didandiitino. Ikkirono tini Qaagooshshu Ayyaana ayirrissannokki gede diassitinonsa. d Interneete noonsa roduuwi Qaagooshshu Ayyaana viidiyote widoonni ayirrissino. Interneete noonsakkiri lowo miliyoone ikkitanno roduuwina? Mite gobbara lallawo raadoonetenna televizhiinete widoonni sayisate qixxaawo assinoonni. Qoleno sinu biiro xeertote noo roduuwi macciishshitanno gede Qaagooshshu Ayyaani lallawo 500 saꞌꞌanno afiinni qaddaꞌnanni gede assitino. Hakkiinni saeno roduuwu hakko heedhanno roduuwira tini lallawo iillitanno gede assitino.
15. Suu yinannite Qullaawu Maxaafi rosaancho lawishshinni maa rosootto?
15 Maatenke gibbannonke woyite. Mitoho maatensa gibbannonsati Qaagooshshu Ayyaana ayirrissannokki gede lowo qarra ikkitannonsa. Hanni Suu yinannite Qullaawu Maxaafi rosaancho lawishsha laꞌno. Ise 2021ha Qaagooshshu Ayyaana ayirrisate mittu barri gate heeꞌreenna Qullaawu Maxaafi rosiisaanchosera maatese gibbannose daafira Qaagooshshu Ayyaana ayirrisa dandiitannokkita kultuse. Rosiisaanchose Luqaasi 22:44 nabbabbuse. Hakkiinni qarru iillannonke woyite Yesuusi lawishsha harunsine Yihowa huucciꞌranna woꞌmunni woꞌma iso addaxxa hasiissannonketa kultuse. Hakkiinni Suu Qaagooshshu Ayyaani barra timanna woyine qixxeessidhino; hattono jw.org aana noota baxxitinota Soodo Magansiꞌra pirogiraame macciishshitino. Hatte hawarro ise callichose kifilesera heedhe silkesenni Qaagooshshu Ayyaani pirogiraame macciishshitino. Hakkuyi gedensaanni Suu Qullaawu Maxaafi rosiisaanchosera togo yite borreessitinose: “Bero lowo geya jawaachishoottae. Qaagooshshu Ayyaana ayirrisate danduummare baala assoomma; Yihowano kaaꞌlinoe. Mageeshshi geeshsha hagiidhoommaro hige mayyee kulohe!” Aterano togoo qarri iillihero Yihowa kaaꞌlannoheha lawannohe?
16. Yihowa Qaagooshshu Ayyaana ayirrisate assineemmore maassiꞌrannota huluullammeemmokkihu mayiraati? (Roomu Sokka 8:31, 32)
16 Yihowa Yesuusi reyo qaagooshshe ayirrisate assineemmore lowo geya naadanno. Yihowa assinonkere naandeemmota leellinsheemmo woyite maassiꞌrannonketa dihuluullammeemmo. (Roomu Sokka 8:31, 32 nabbawi.) Hakko daafira tayixeha Qaagooshshu Ayyaana ayirrisatenna Qaagooshshu Ayyaani woggara albinni roore soqqamate dandiinummore baala assino.
FAARSO 18 Wodote Kakkalora Magano Galata
a Dotteessa 4, 2023 Maakisanyote barra alamete doyichora lowo miliyoone ikkanno manni Kiristoosi reyo Qaagooshshi Ayyaana ayirrisate gamba yaanno. Konne ayyaana ayirrisate gamba yaannohu lowo manni konni albaanni daye diegenninoho. Mitu qole Yihowara soqqamanna Qaagooshshu Ayyaana daa agurinku lowo diro ikkinonsa mannaati. Mitootu qolte qarra ikkannori tuncu yiinsarono konne ayyaana ayirrisate dagganno. Nootto gari ikkihano ikkiro Yihowa konne ayyaana ayirrisate assattore maassiꞌrannota addaxxa dandaatto.
b Tenne ammananno manni ayyaana ayirrinsanni yannara timunna woyine Kiristoosi maalinna mundeera soorrantanno yaanno. Insa konne ayyaana ayirrinsi kiiro Yesuusi maalinna mundee kakkalo ikkite shiqqanno yite heddanno.
c Mite suꞌmuwa soorrinoonni.
d JW.ORG aana nooha “2021ha Qaagooshshu Ayyaana Ayirrinsoonni Gara” yaanno birxicho lai.
