Mitte elto silxaane noosihu woy lowo geeshsha ayirrinseemmo manchi uyinonketa ikkituro hattenne elto naandeemmo. Wole elto lowori gede assine laꞌneemmohu kayinni, shiimare ikkiturono banxeemmohu mininke manni woy jaalinke uyinonketa ikkitinohura ikkara dandaanno. Sai birxichira kullihu Joordaani, Raasili elinosire lowori gede asse laꞌꞌannohu iseraati. Ikkina, tini wodote ledo mayi xaadooshshe afidhino?

Umihunni, Qullaawu Maxaafi “Isi widoonni heeshsho afiꞌneemmo gede, Maganu . . . mitto Beettosi tenne gobba soyino” yaanno. (1 Yohaannisi 4:9) Tini, Maganu uyinonke elto muxxete yineemmo gede assitannonke. Maganunnita roortino silxaane afiꞌrinohu mittuno dino. Ibiraawootu gaꞌre wido ikkinohu mittu faarsaasinchi Yihowa a uullate ‘aana woꞌmunkura Aliidiha’ ikkinota coyiꞌrino. (Faarso 83:18) Elto aankera dandaannohu Isi geeshsha ikkannohu wolu dino.

Layinkihunni, Maganu “Annankeeti.” (Isayaasi 63:16) Hiittoonni? Heeshsho uyinonkehu isooti. Qoleno, baxillaanchu anni oososi daafira hedannonte gede, Isino ninke daafira hedanno. Maganu hundi dagasi daafira coyiꞌranni togo yiino: “Israeele! Kiꞌne anera ayirrado oosooti; [kiꞌne] roorse baxeemmoꞌnere diꞌꞌikkitinoonni? . . . Kiꞌne daafira wodaniꞌya digoxanno; . . . ani Kaaliiqi kiꞌne marareemmoꞌne.” (Ermiyaasi 31:20) Xaa yannarano Maganu soqqamaanosi mararannonsa. Isi wolqaataamo Kalaqaanchonke calla ikkikkinni ammanamino Annankeetinna Jaalankeeti. Tini, isi aannonke elto baalanta naandeemmo gede diassitannonke?

Mite elto naandeemmohu, uyinke manchi giddeessineennasi ikkikkinni baxillunni kakkae uyinonkeha ikkirooti. Baxillunni kakkae aanno manchi bado qollannie yee dihedanno.

Maganu Beettosi uyinonkehu baxannonke daafiraati. Qullaawu Maxaafi togo yaanno: ‘Ninkera Maganu baxilli xawinohu kunninniiti; Maganu mitto Beettosi soyino.’ Maganu togo assinohu mayiraati? “Isi [Yesuusi] widoonni heeshsho afiꞌneemmo gedeeti.” (1 Yohaannisi 4:9) Maganu togo assanno gede giddeessinosihu nooni? Horo dino! Yesuusiti wodote kakkalo ‘Maganu eltooti.’—Roomu Sokka 3:24.

Maganu qixxeessinoti wodote qixxaawo isi ‘eltooti’ yineemmohu mayiraati? Qullaawu Maxaafi togo yee xawisanno: “Ninke cubbaataamma ikkine heeꞌneenna Kiristoosi ninke daafira reyino. Konni garinni Maganu lowo geeshsha baxannonketa leellishino.” (Roomu Sokka 5:8) Maganu laanfe noonsare, kaaꞌlannohu noonsakkirenna cubbaataamma mannu ooso kaaꞌlanno gede kakkayisinosihu baxilleho. Maganu tenne elto uyinonkehu ninke assinoommosiri noo daafira diꞌꞌikkino; qoleno tenne eltora baata didandiineemmo. Ee, Maganu uyinonketi tini elto isi baxannonketa leellishshannote.

Mite elto naandeemmo gede assannonkehu, elto uyinke manchi hattenne elto aate assinoreeti. Mittu manchi lowo geeshsha baxanno coye ninkera aannonke wote, hakkonne coye lowori gede assine laꞌneemmo.

Maganu “mitto Beettosi” uyinonke. (Yohaannisi 3:16) Maganu Yesuusa lowo geeshsha baxanno daafira, Isi ninkera aannori kawiinni sainori dino. Maganu kalqete alame kalaqi yannara Yesuusi Maganu ledo loosino; hatte yannara isi Magano ‘hagiirsiisino.’ (Lawishsha 8:30) Yesuusi Maganu ‘baxanno Beettosiiti’; hattono “illete leellannokki Magani lawishshaati.” (Qolasiyaasi Sokka 1:13-15) Maganunna Yesuusi gedee jaalooma afiꞌrinohu dino.

Ikkirono, “Maganu mitto Beettosi mararikkinni sayise uyinonke.” (Roomu Sokka 8:32) Yihowa uyinonkeri baalankare rooreho. Isi tenne elto aate lowore assino.

Mite elto lowo geeshsha hasiissannonketa woy ranke afiꞌra hasiissannonketa ikkituro hattenne elto lowori gede assine laꞌneemmo. Lawishshaho, hanni buutote dhibbi amadinohehu gede assite hedi. Ati konne dhibba akkaꞌmate anga diassitannohe. Mittu manchi umisinni kakkae konne dhibba akkaꞌmatto woxella uyihe! Hakkonne mancho lowo geeshsha digalatatto?

“Addaaminni kainohunni mannu baalu reyannonte gede, Kiristoosi widoonni mannu baalu heeshsho afiꞌranno.” (1 Qorontoosi 15:22) Ninke baalu Addaami sircho ikkinoommo daafira, ‘reyonna’ dhibba miliqa didandiineemmo; woy uminkenni Maganu ledo araaramanna cubbunni wolapha didandiineemmo. Qoleno ninketano wolu manni ‘heeshshono’ gatisa didandiineemmo. Qullaawu Maxaafi togo yaanno: “Insa giddo mittuno wole woda didandaanno; woy isi daafira Maganoho wodo ikkannore baate diafanno. . . . Kuni ayewoteno insara wolqansara aleenniiti. (Faarso 49:7, 8, NW) Maganu uyinonke wodora baante dandiineemmokki daafira kaaꞌlannonkehu hasiisannonke. Kaaꞌlannonkehu hoogoommero, hexxo dinoonkereeti.

Yihowa baxillunni kakkae, Yesuusi widoonni baalunku ‘heeshsho afiꞌneemmo’ gede heeshshonke gatisanno “xagicho” uyinonke. Wodo heeshsho afiꞌneemmo gede assitinonkehu hiittoonniiti? “Beettisi Yesuusi mundee cubbu baalunni keereensitinonke.”  Ee, duꞌnantinote Yesuusi mundeera ammana noonketa leellinshummoro, cubbinkera maaronna hegere heeshsho afiꞌneemmo. (1 Yohaannisi 1:7; 5:13) Wodo reyino manna kaaꞌlitannohu hiittoonniiti? “Reyo dagginohu mittu manchi widoonni ikkitinonte gede, reyotenni kaꞌꞌano dagginohu mittu manchi Kiristoosi widoonniiti.”—1 Qorontoosi 15:21. b

Yesuusiti wodote kakkalo taalle nookki eltooti; korkaatuno tenne elto uyinonkehu lowo geeshsha ayirradohonna, lowonta baxannonkeho. Maganu Yihowa uyinonkeri geeshshire aankera dandaannohu dino. Qoleno reyotenna cubbu borojjimmanni gatissinonke elto geeshsha hasiissannonketi wole elto dino. Ee, kulle guda dandiinannikkite wodote kakkalora tana nafa daggannoti wole elto dino.