Yesuusi bayira qarra yiinoti lawishshu hombobalatte muli yannara uulla gantanno. (Maatewoosi 24:21) Konne qarra wole qooxeessa xoonqe gata didandiineemmo. Ikkollana umonke gatisate assa dandiineemmori no. Maa assa dandiineemmo?

Yesuusi Kiristoosi ilaalaho sabbakanni heeꞌre, “Balaxxine Maganu Gashshootenna keeraanchimmasi hasidhe” yee hajajino. (Maatewoosi 6:33) Ikkina hatto assa dandiineemmohu hiittoonniiti?

Balaxxe Maganu Mangiste hasiꞌri. Hatto yaa, heeshshonke giddo baalunkurinni roorsine Maganu Mangiste balaxisiisa hasiissannonke yaate. (Maatewoosi 6:25, 32, 33) Hatto assa hasiissannonkehu mayiraati? Korkaatuno alamete aana noo qarra mannu ooso hoolte affannokki daafiraati. Hoola dandiitannoti Maganu Mangiste callate.

Keeraanchimmasi hasiꞌri. Maganunnita keeraancho higgenna xintu seera agadhate dandaaminkere baala assa hasiissannonke. Mayira? Korkaatuno, ninkera lawinonkere calla assineemmoha ikkiro, qarru giddo umbeemmo! (Lawishsha 16:25) Maganu biddishsha harunsineemmoha ikkiro kayinni, iso hagiirsiinseemmo, hattono ninkerano seyannonke.—Isayaasi 48:17, 18.

Balaxxe Maganu Mangistenna keeraanchimmasi hasiꞌra agurtooti. Yesuusi, mitootu lowo jiro duuꞌna harshammi yine heeꞌnanni gede assitanno yite hedde kabbi facci yitara  dandiitannota kule qorowisiisino. Wolootu kayinni heeshshonsa daafira quwa saꞌe yaaddanno daafira Maganu Mangiste balaxisiisate yanna hoogganno.—Maatewoosi 6:19-21, 25-32.

Yesuusi kayinni Maganu Mangiste doodhino manni xaa yannara heeshshote hasiisannonsare afiꞌrannotanna albillitte qole lowo atoote afiꞌrannota coyiꞌrino.—Maatewoosi 6:33.

Umi xibbi diro heedhinoti Yesuusi rosaano balaxxe Maganu Mangistenna keeraanchimmasi hasidhinoha ikkirono, qarrunna shetto baꞌanna dilaꞌino. Ikkollana hatto assansa agarooshshe ikkitinonsa. Hiittonni?

Yesuusi rosaano Maganunniha keeraancho seera harunsitino daafira, Maganoho hajajamannokki mannira iillannonsa qarrinni gattino. Insa Maganu Mangiste daggannota addaxxitino daafira, buutote qarra dandiite saꞌino. Qoleno iillinonsa qarra cincite saꞌanno gede Maganu “jawa wolqa” uyinonsa.—2 Qorontoosi 4:7-9.

Umi xibbi diro heeꞌrino Kiristaani Yesuusi, ‘Balaxxine Maganu Mangiste hasidhe’ yee hajajinonsa hajajo wonshino. Insa hakkawaro, alame woꞌmate Maganu Mangisteha dancha duduwo dudubbino. (Qolasiyaasi Sokka 1:23) Xaa yannara hatto assanno manni nooyya?

Ee no! Yihowa Farciꞌraasine, Maganu Mangiste tenne alame muli yanna giddo huntannota ammantanno. Hakko daafira insa Yesuusi hajajo wonshitanno; isi togo yee hajajino: “Gosa baalate naqaashshe ikkanno gede kuni Maganu Gashshootihu Danchu Duduwi gobba baalate kulamanno; hatte yannara goofimarchu daanno.”—Maatewoosi 24:14.

Ikkina maa assa hasiissannohe? Umi xibbi diro Beeriya yinannihu Meqedooniyu katamira heeꞌranno manni faale haꞌratto gede jawaachinsheemmohe. Insa, Phaawuloosi Maganu Mangisteha dancha duduwo kulinsata ‘hagiirrunni adhitino.’ Hakkiinni macciishshitinori gara ikkasi buuxate, ‘Qullaawa Borro seekkite’ xiinxallitino, hattono rossinore loosu aana hosiissino.—Soqqamaasinete Looso 17:11, 12.

Atino hatto assa dandaatto. Balaxxe Maganu Mangistenna keeraanchimmasi hasiꞌrittoro xaa yannara nafa agarooshshe afiꞌratto, hattono albillitte geedote salaamenna harshammo afiꞌratto.