“Mangistekki Daggo”—Lowo Miliyoone Ikkanno Manni Huucciꞌranno Huuccatto
Ati “Mangistekki daggo” yite huuccidhe egennootto? Batinyu manni lowo diro hatto yee huucciꞌranni keeshshino. Mayira? Korkaatuno Yesuusi harunsaanosi, “Mangistekki daggo” yitine huuccidhe yiinonsa.
Umi qara Yesuusi harunsaano isi Maganu Mangiste daafira coyiꞌrinori giddo buuxxinokkiri no. Insa mitte higge, “Israeelete Gashshoote xaanni galagalchite qolattoni?” yite xaꞌmitinosi. Insa Yesuusi tenne xaꞌmora dawaro ‘Ee’ woy ‘Deeꞌni’ yee qolinokkihu mayiraati yite heddinoha ikkara dandaanno. (Soqqamaasinete Looso 1:6, 7) Hatto yaa, Maganu Mangiste maatironna tini Mangiste daggannohu mamarootiro afa didandiineemmo yaateni? Deeꞌni!
Tenne Agarooshshu Shae ittimera, aante noo xaꞌmuwara dawaro afiꞌneemmo:
Maganu Mangiste hasiissannonkehu mayiraati?
Maganu Mangiste Moote ayeti?
Maganu Mangiste uulla gashshitannohu mamarooti?
Maganu Mangiste maa assitanno?
Xaanni Maganu Mangiste doodha hasiissannonkehu mayiraati?
Maganu Mangiste maati?
Kurino Lai
KAA'LANNOHA QULLAAWU MAXAAFI ROSO
Maganu Mangiste Maati?
Yesuusi uullate aani soqqanshosi gumuli yanna geeshsha, wolu baalunku coyinni roorse Maganu Mangistere rosiisino. Harunsaanosi lowo xibbe diro tini Mangiste dagganno gede huuccidhanni keeshshitino.
