Tenne xagge iimi adda nabbawannohu mitu manni hatto yee xaꞌmara dandaanno. Kayinni konni qummeeshshira Memfeboste yinannihu lamu manni no; hattono tenne xagge wirro laꞌne ronseemmori no.

Israeelete Moote Saaoolira lamala labballi oosonna lamu seenni noosi. Saaoolihu bayiru beetti Yoonaataaniiti. Gedensaanni Saaooliti Ritsifa yinanniti irkote galtesi isira Memfeboste yinanni beetto iltino. Dhagge ikkanno coyi Yoonaataani beetti suꞌmino Memfebosteeti. Hakko daafira Moote Saaooli beetti suꞌminna beettisi beetti suꞌmi Memfebosteeti.

Mitte yannara Moote Saaooli Israeelete manni ledo heeꞌrannoha Gebaooni manna fee gudate woꞌnaalino. Hatte yannara lowoha Gebaooni manna shinoonniha ikkara dandaanno. Tini lowo soꞌrooti. Mayira? Korkaatuno Iyyaasu yannara Israeelete roorrooti Gebaooni manni ledo keeru gondooro eꞌino.—Iya. 9:3-27.

Hakku gondoori Moote Saaooli yannarano loosannoho. Moote kayinni konne gondooro diige Gebaooni manna fee gudate woꞌnaalino. Tini ‘Saaooliranna minisi mannira . . . sao’ abbitino. (2 Sam. 21:1) Gedensoonni Daawiti moote ikkino. Reyotenni gatinohu Gebaooni manni assinoonninsa beebba Daawitira kuꞌli. Daawiti, Yihowa Israeelete baatto maassiꞌranno gede, Saaooli assino farrittora maa assine kiinsansara hasidhannoro xaꞌminsa. Gebaooni manni woxe dixaꞌmirino; hatteentenni gudise ‘hunansara hedino’ manchita lamala labballi ooso sayinse uyinanninsa gedenna shinanni gede xaꞌmiꞌrino. (Kir. 35:30, 31) Daawitino yitinorira maahoyye yiino.—2 Sam. 21:2-6.

Hakkuyira albaanni Saaoolinna Yoonaataani olunniwa reyitino; Yoonaataani beetti Memfeboste kayinni lubbotenni no. Isi anje heeꞌreenna iillitinosi danonni bisu xeꞌne noosiha ikkino daafira ahaahisi Gebaooni manna beebba assiꞌri yannari dikarsamino. Daawiti Yoonaataani ledo gondooro eꞌꞌe isira jaala ikkino; kuni gondoori Yoonaataani sirchonna beettosi Memfebosteno kaaꞌlannoho. (1 Sam. 18:1; 20:42) Qullaawu Maxaafi togo yaanno: “Moote [Daawiti], Saaooli beetti Yoonaataani ledo Kaaliiqi albaanni eino gondoori daafira, Yoonaataani beetto Memfeboste sayise diuyino.”—2 Sam. 21:7.

Daawiti Gebaooni manni xaꞌmiꞌrinore assinonsa. Isi lame Saaooli oosonna onte oososi ooso sayise uyino; lame Saaooli ooso giddo mittu suꞌmi Memfebosteeti. (2 Sam. 21:8, 9) Daawiti assinori Israeelete baatto mundeete shedinni keeraabbanno gede assino.

Tenne xaggenni ronseemmori no. Maganu seeri teeꞌlinoha diꞌꞌikkino. Togo yaanno: “Oosono annunna amate daafira shinoonke.” (Mar. 24:16) Lame Saaooli oosonna onte oososi ooso Saaooli assinorira karsama hooggoommero Yihowa insa shinanni gede difajjanno. Seeru lede togo yaanno: “Annu annunku umisi cubbi daafira reyona.” Shiniri lamu Saaooli oosonna ontu oososi ooso Saaooli Gebaooni manna gudise hunate kai woyite kaaꞌlantukki digattino. Hakko daafira lamalunku loossino soꞌrora waagansa mixxitino.

Tini xagge mittu manchi hedannorinni woy assannorinni soꞌro loose assi yinoonnierella assoommo yee gata dandaannokkita leellishshanno. Lawishshu maxaafi togo yaanno: “Assattore buuxxe afittoro, loosattori gara ikkannohe.”—Law. 4:24-27; Efe. 5:15.