1. Yihowa ninkewa shiqa hasiꞌrannota mayinni anfeemmo?

 YIHOWA isiwa shinqeemmo gede koyisinonke. (Yai. 4:8) Isi Maganonke, Annankenna Jaalanke ikka hasiꞌranno. Isi huuccattonkera dawaro qolanno hattono qarru yannara kaaꞌlannonke. Qoleno isi ninke rosiisatenna agarate dirijjitesi horoonsiꞌranno. Ikkina Yihowawa shiqate maa assa hasiissannonke?

2. Yihowawa shiqa dandiineemmohu hiittoonniiti?

² Huuccatto assiꞌne, Qaalesi nabbambenna hiincine Yihowawa shiqa dandiineemmo. Togo assinummoro isira noonke baxillinna galati lexxanno. Isira hajajammeemmosi hattono hasiisannosi guweenya uyineemmosi. (Aju. 4:11) Yihowa roore anfummo kiiro isonna dirijjitesi albinni roore addaxxineemmo.

3. Daawuloosi Yihowawiinni badankera woꞌnaalannohu hiittoonniiti? Maganonke Yihowanna dirijjitesi agurreemmokki gede kaaꞌlannonkeri maati? (Faarso 31:13, 14)

³ Ikkirono, roorenkanni qarru iillannonke woyite Daawuloosi Yihowawiinni badankera woꞌnaalanno. Isi tenne assannohu hiittoonniiti? Isi sunu sununni Yihowanna dirijjitesi addaxxa agurreemmo gede assate woꞌnaalanno. Ikkirono isita xagarrote hayyo gargadha dandiineemmo. Ammananke kaajjado ikkituronna albinni roore Yihowa addaxxineemmoha ikkiro Yihowanna dirijjitesi diagurreemmo.—Faarso 31:13, 14 nabbawi.

4. Konni birxichira maa xiinxallineemmo?

⁴ Konni birxichira songote gobbayidinni iillankera dandaannoha sase fonqolo laꞌneemmo. Kuni mittu mittunku fonqoli  Yihowanna dirijjitesi addaxxineemmokki gede assankera dandaannoho. Kuni qarri Yihowawiinni badankera dandaannohu hiittoonniiti? Yihowaranna dirijjitesira ammanamme heeꞌrate maa assa dandiineemmo?

5. Iillannonke qarri Yihowanna dirijjitesi addaxxa qarra ikkitannonke gede assara dandaannohu hiittoonniiti?

⁵ Mito woyite qarru iillannonke; lawishshaho maatenke gibbankera woy loosonke hoongammora dandiineemmo. Togoo qarri Yihowa dirijjite addaxxineemmokki gede assankeranna Yihowawiinni badankera dandaannohu hiittoonniiti? Iillinonke qarri lowo yanna keeshshiro hexxo mudhinammoranna dadillinammora dandiineemmo. Sheexaanu tenne faro horoonsiꞌre Yihowa baxannonketa huluullammeemmo gede assankera woꞌnaalanno. Daawuloosi iillinonke qarrira Yihowa woy dirijjitesi bushiinshammora hasiꞌranno. Israeele Gibitsete noo yannara mitu Israeelete mannira togoo coyi iillinonsa. Umi qara insa borojjimmatenni fushshitannonsa gede Yihowa Musenna Aarooni shoominota ammantino. (Ful. 4:29-31) Gedensoonni kayinni Feriooni qarra ledinsata insa, “Feriooninna ledosi gashshaano illete gibbannonke gedenna shitannonke gede assitinoonni” yite Musenna Aarooni bushiishshino. (Ful. 5:19-21) Insa Maganunnire ammanantino soqqamaano busha assitino. Tini dadillissannote! Iillinohe qarra lowo yanna dandiite heedhanni noottoha ikkiro, Yihowaranna dirijjitesira noohe ammana kaajjite heedhanno gede assiꞌra dandaattohu hiittoonniiti?

6. Iillannonke qarra dandiine saꞌꞌate daafira masaalaanchu Imbaaqoomiwiinni maa ronseemmo? (Imbaaqoomi 3:17-19)

⁶ Huuccattotenni giddokkita gudisse Yihowara kuꞌli hattono isi kaaꞌlo hasiꞌri. Masaalaanchu Imbaaqoomira lowo qarri iillinosi. Isi mitte yannara Yihowa isi daafira hedannota huluullamino. Hakko daafira isi huuccattotenni giddosita gudise Yihowara hasaaphino. Isi togo yiino: “Kaaliiqaꞌya eeggatena, ani qoonqoꞌya naggi asse wiꞌlanna macciishshattoekkihu mamooti geeshshaati? . . . Tenne beebba assinanna mayira sammi yite laꞌꞌatto?” (Imb. 1:2, 3) Yihowa ammanamino soqqamaanchisi giddosita kuꞌle huucciꞌrino huuccatto macciishshino. (Imb. 2:2, 3) Imbaaqoomi Yihowa mannasi gatisino gara hiincihu gedensaanni galagale hagiirraamo ikkino. Isi Yihowa isi daafira hedannotanna iillannosi qarra baala dandee saꞌꞌanno gede kaaꞌlannosita ammanino. (Imbaaqoomi 3:17-19 nabbawi.) Tennenni ninke maa ronseemmo? Qarru iillannohe woyite Yihowa huucciꞌri hattono macciishshamannohere isira hasaaphi. Hakkiinni isi kaaꞌlo hasiꞌri. Hatto assittoro Yihowa dandiite saꞌꞌate hasiissanno jawaante aannoheta addaxxa dandaatto. Yihowa kaaꞌlinoheta huwatatto woyite isira noohe ammana albinni roore kaajjitanno.

7. Shirleyira fiixa ikkanno manchi ma assasera woꞌnaalino? Ise Yihowa addaxxa agurtannokki gede kaaꞌlinoseri maati?

⁷ Ganyite ayyaanaamittete coye assi. Hanni hatto assa Paappuwa Niwu Giinii heedhannote Shirleyi yinanni rodoora qarru iillise yannara kaaꞌlitinose gara laꞌno. b Shirleyi maate buxanete; mito woyite gari sagale nafa afiꞌra qarra ikkitannonsa. Mittu fiixa ikkannose manchi Yihowara noose ammana shoshshoggitanno gede assate woꞌnaalino. Isi togo yiinose: “Maganunnihu qullaawu ayyaani kaaꞌlanni nooe yaatta, hanni kaaꞌlo mama nooyya? Maatekki xaa geeshsha buxanete, sabbakeemma yitanni mulla yanna guxxatta.” Shirleyi  togo yitino: “‘Maganu ninke daafira hedannonso dihedanno?’ yee aneneeto xaꞌmeemma; hakko daafira bayichonkonni Yihowa huucciꞌrumma hattono giddoꞌyata gudise isira hasaaphumma. Qullaawa Maxaafanna borruwanke nabbawa hattono sabbakanna gambooshshe haꞌra diaguroomma.” Ise mulenni Yihowa maatese towaatanni noota wodanchitino. Maatese dihudidhino hattono hagiirraammaho. Shirleyi, “Yihowa huuccattoꞌyara dawaro qolinoe” yitino. (1 Xim. 6:6-8) Woꞌmanka woyite ayyaanaamittete coye assattoha ikkiro, atino qarru woy huluullo Yihowawiinni baddahera diwodhatto.

8. Yihowa dirijjite giddo albisa ikkite soqqantanno roduuwira mayi iillansara dandaanno?

⁸ Diinnanke xaadooshshu buusinna dagoomittete webisayite widoonni, Yihowa dirijjite giddo albisa ikkite soqqantannori daafira kaphonna gara ikkinokkire tareessitanno. (Far. 31:13) Mito roduuwanke usurroonninsa hattono jaddo loossino yine kassansoonninsa. Soqqamaasincho Phaawuloosi kaphunni kassanse usurrisi yannara, umi xibbi diro heeꞌrino Kiristaanirano togoo coyi iillinonsa. Insa ma assituyya?

9. Soqqamaasincho Phaawuloosi usurrisi yannara mitu Kiristaani maa assino?

⁹ Phaawuloosi Roomaho usurami yannara umi xibbi diro heedhinori mitu Kiristaani iso kaaꞌla agurtino. (2 Xim. 1:8, 15) Mayira? Mannu Phaawuloosi jaddo loosinohu gede asse lainosi daafira saalteeti ikka? (2 Xim. 2:8, 9) Woy ninkerano dartu iillannonke yite waajjiteeti ikka? Insa iso kaaꞌla gibbino korkaati ikkihano ikkiro, hanni Phaawuloosira mayi macciishshaminosiro hedi. Isira lowo qarri iillinosi; isi insa daafira yee heeshshosi nafa qarru giddo tugino. (Soq. 20:18-21; 2 Qor. 1:8) Phaawuloosira kaaꞌlo hasiissusi yannara iso kaaꞌla gibburi gedeere ikka horo dihasiꞌneemmo! Albisa ikkite soqqantanno roduuwira dartu iillannonsa woyite maa qaaga hasiissannonke?

10. Albisa ikkite soqqantannorira dartu iillannonsa woyite maa qaaga hasiissannonke? Mayira?

 ¹⁰ Dartu iillannonkehu mayiraatironna iillannonke gede assannohu ayetiro qaagi. Layinki Ximootewoosi 3:12 togo yitanno: “Kiristoosi Yesuusinni maganittete heeshsho heeꞌra hasiꞌranno baali xiiwamanno.” Hakko daafira Sheexaanu albisa ikkite soqqantannore siasi dhagge diꞌꞌikkitannonke. Isi hatto assannohu insa Yihowara ammanantannokki gede assateetinna ninke waajjishiishateeti.—1 Phe. 5:8.

11. Onesifoori lawishshinni maa ronseemmo? (2 Ximootewoosi 1:16-18)

¹¹ Roduuwakki kaaꞌlanna ammanante insa ledo quraanyama agurtooti. (2 Ximootewoosi 1:16-18 nabbawi.) Umi xibbi diro heeꞌrinohu Onesifoori yinanni Kiristaanchi kayinni Phaawuloosi usurami yannara kaaꞌlinosi. Isi Phaawuloosi ‘usuramanni disaalino.’ Hatteentenni isi Phaawuloosi hasino; hattono isinni xaadi yannara mitore asse iso kaaꞌlanno faro hasiꞌrino. Onesifoori hatto asse umisi heeshsho nafa qarru giddo tugino. Ninke maa ronseemmo? Manna waajja dartu iillanni noonsa roduuwa kaaꞌlineemmonsakki gede assitankera wodha dihasiissannonke. Hatteentenni insara halamanna insa kaaꞌla hasiissannonke. (Law. 17:17) Insara ninke baxillinna kaaꞌlo hasiissannonsa.

12. Ruusiyaho heedhanno roduuwinke lawishshinni maa ronseemmo?

¹² Hanni Ruusiyaho heedhanno roduuwi muxxe ammanate roduuwansa usurri yannara insa kaaꞌlitino gara laꞌno. Insa yoote shiqinshi yannara batinyu roduuwi insara kaaꞌlamate yoote minira hadhino. Ninke maa ronseemmo? Albisa ikkite soqqantanno roduuwa suꞌmansa hunnanni woyite, usurranninsa woy darte iillinshanninsa woyite waajja dihasiissannonke. Insa daafira huucce, maatensa towaatte hattono mitore assitine kaaꞌlitinanninsata wole faro hasidhe.—Soq. 12:5; 2 Qor. 1:10, 11.

13. Mannu qacifatannonketi Yihowanna dirijjitesi addaxxineemmokki gede assitankera dandiitannohu hiittoonniiti?

¹³ Sabbankeemmohura woy Yihowahu amanyootu seeri garinni heeꞌneemmo daafira, fiixinke, ledonke loossannori woy ledonke rossannori qacifattankera dandiitanno. (1 Phe. 4:4) Insa, “Ate banxeemmohe; ammaꞌnokki kayinni furro fuuqqo hooltannote hattono kaphoho” yitankera dandiitanno. Mitootu qolte bohamino manniwa aanneemmokkita kulte mishshanni, “Atino xa manna baxeemmo yaatto?” yitankera dandiitanno. Togoo hedo wodaninke giddo huluullo kalaqqara dandiitanno. Hakkiinni, ‘Yihowa ani lowore assammora hasiꞌranno ikka? Dirijjitesi isi furro fuuqqo hooltannote ikka?’ yine heda hananfammora dandiineemmo. Togoo coyi iillanni nooheha ikkiro Yihowawanna dirijjitesiwa gamba yite heeꞌra dandaattohu hiittoonniiti?

14. Yihowa biddishshi garinni heeꞌneemmo daafira wolootu qacifattunkero maa assa hasiissannonke? (Faarso 119:50-52)

¹⁴ Yihowa biddishshi garinni heeꞌrate murciꞌri. Iyyoobi mannu qacifatisirono Yihowa biddishshi garinni heeꞌra diagurino. Iyyoobiri suꞌmi jaalla giddonni mittu, Iyyoobi Maganu biddishshi garinni heeꞌrirono heeꞌra hoogirono Maganu isi daafira hedannokkihu gede asse coyiꞌre Iyyoobi ammansiisate woꞌnaalino. (Iyo. 4:17, 18; 22:3) Iyyoobi kayinni konne kapho diammanino. Isi Yihowa garanna gara ikkinokkiri daafira fushshino biddishshi addaxxinanniha ikkinota afino; hattono Yihowa biddishsha harunsate murciꞌrino.  Isi wolootu ammanamannokki gede assitasira diwodhino. (Iyo. 27:5, 6) Ninke maa ronseemmo? Mannu qacifatannoheti Yihowa seera huluullamatto gede assitahera wodhitooti. Hanni heeshshokki giddo ikkino coye hedate woꞌnaali. Yihowa biddishshi gara ikkinotanna kuni biddishshi kaaꞌlinohe gara duucha higge dihuwatootto? Yihowa biddishshi garinni heedhannote Yihowa dirijjite wido ikkite heeꞌrate murciꞌri. Mannu baxi geeshsha qacifatiherono, tini Yihowawiinni dibaddannohe.—Faarso 119:50-52 nabbawi.

15. Biriziti mannu qacifatinosehu mayiraati?

¹⁵ Hanni Hindete heedhannote mitte Biriziti yinanni rodoo woꞌnaalsha laꞌno. Ammaꞌnosenni kainohunni ise maatese miilla qacifattannose. Ise 1997nni cuuantuhunni shiima yanna gedensaanni, Yihowa Farciꞌraasincho ikkinokki minaannise loososi hoogino. Hakko daafira isi Birizitinna oososi adhe wolu katamira heedhanno annisinna amasiwa haꞌrate kai. Ikkirono Birizitira qarru roore lexxinose. Minaannisera loosu noosikki daafira ise maatesera hasiisannore wonshate woꞌma yanna loosa hasiissinose. Qoleno muli songooti yinanniti ise noowiinni 350 kiilo meetire xeertidhanno. Hattono minaannise anninna ama ammanasenni kainohunni ise giwinose. Qarru roore lexxinonsa daafira Biriziti maate agurte higa hasiissinonsa. Hakkiinni hedeweelcho minaannise reyi. Qoleno gedensaanni oosose giddonni mitte 12 diri qaaqqo kaanserete dhibbinni reyitu. Bushshiyoti baꞌona Biriziti fiixi tennera ise busha assino. Insa ‘Ise Yihowa Farciꞌraasincho ikka hooggoommero kuni coyi baalu diꞌꞌikkanno’ yee coyiꞌrino. Ikkirono ise xaa geeshsha Yihowa addaxxanna dirijjitesiwa gamba yite heeꞌra diagurtino.

16. Biriziti Yihowanna dirijjitesiwa gamba yite heeꞌrasenni atoote afidhinohu hiittoonniiti?

¹⁶ Biriziti songotewiinni lowo geeshsha xeertidhe heeꞌra hanaffu yannanni kayise, woradu aliidi laꞌꞌaanchi qooxeessise mannira sabbakkanno gedenna minese gambooshshe assidhanno gede jawaachishinose. Umi qara isera kuni assa dandiitannokkire lawinose. Ikkirono ise uyinoonnise biddishsha  harunsitino. Ise wolootaho dancha duduwo dudubbino, minese gambooshshe assidhino hattono oosose ledo maatete magansiꞌra assiꞌrate yanna gaaꞌmitino. Ise mayi guma afidhuyya? Biriziti Qullaawu Maxaafi xiinxallo hanafisiisanna batinye manna Qullaawa Maxaafa xiinxallisa dandiitino; Qullaawu Maxaafi rosaanose giddonni gamu cuuantino. Ise 2005nni woꞌma yanna suwisaancho ikkite soqqama hanaffino. Yihowa addaxxasenna dirijjitesira ammanamase ise baꞌraassinose. Xa oosose Yihowara ammanante soqqantanni no; hattono hakko qooxeessira xa lame songo no! Biriziti iillinose qarranna mannu qacifatinoseta dandiite saꞌꞌate Yihowa jawaante uyinoseta huwattino.

17. Ma assate murciꞌra hasiissannonke?

¹⁷ Sheexaanu, qarru iillannonke yannara Yihowa dikaaꞌlannonke, hattono dirijjitesi wido ikka qarralla leddinonke yine hendammora hasiꞌranno. Sheexaanu, albisa ikkite soqqantanno roduuwi suꞌma hunnanni woyite, darantanno gede assinanninsa woyitenna usurranninsa woyite waajjinammora hasiꞌranno. Isi mannu qacifatinonke daafira Yihowa biddishshanna dirijjitesi addaxxa agurrammora hasiꞌranno. Ikkirono isita xagarrote hayyo seekkine egenninoommo hattono didogammeemmo. (2 Qor. 2:11) Sheexaanu kapho giwatenna Yihowaranna dirijjitesira ammanante heeꞌrate murciꞌri. Yihowa horo tuge agurannohekkita qaagi. (Far. 28:7) Hakko daafira mitturino Yihowawiinni badahera wodhitooti!—Rom. 8:35-39.

18. Aananno birxichira maa xiinxallineemmo?

¹⁸ Konni birxichira songote gobbayidinni iillankera dandaanno qarri daafira ronsoommo. Ikkirono songote giddo kalaqamanno qarrino Yihowaranna dirijjitesira ammanammeemmokki gede assankera dandaanno. Konne qarra qeelle saꞌꞌa dandiineemmohu hiittoonniiti? Aananno birxichira tenne hajo daafira xiinxallineemmo.