Durriissa Lubbo Shitannoreeti!
Sheexaanunna durriissa ayee woteno xagaraammahonna gawajjitannoreeti. Biꞌre Sheexaanu ammanamino manchi Iyyoobita saadanna soqqamaanosi shiino. Hakkonni gedensaanni “jawaata bubbe” kayise Iyyoobi ooso noo mine diige tonne oososi shiino. Qoleno Sheexaanu Iyyoobi “lekkate qubbichinni kayise umisi dananchi geeshsha buuto madiissisi.”—Iyyoobi 1:7-19; 2:7.
Yesuusi uulla noo yannara, durriissa mito mito manna duuddootanna balloota assitino. (Maatewoosi 9:32, 33; 12:22) Mittu manchi bisosi kinnatenni biciꞌranno gede assitino. (Maarqoosi 5:5) Hakkii saeno mitto beetto raaranno, uullate gaꞌne cancanamannonna ‘fittifatanno’ gede assitino.—Luqaasi 9:42.
Albi yannara, durriissa mito mito manna xissantannonna woloota kayinni huxidhe uullate gaꞌnite fittifattanno gede assitanno
Yannankerano, Sheexaanunna durriissa lubbo shaate badhe dihigganno. Isinni, iiminni tugantu yannanni kayise bunshete assootinsa lexxanni haꞌrino. Alamete doyichchonni shiqqanno rippoorte xagarronsa buxisiissanno. Mito mito manna xissote gawajjitanno. Woloota hashsha goxichcho hoolte qarrissanno woy waajjishshanno haaqenni bararraaqissanno. Woloota kayinni siimu xaadooshshinni batteessitanno. Ledeno woloota machcharaarsitanno, lubbo shitanno woy umonsa shitanno gede assitanno.
Yannankera durriissa mito mito manna finqiltanno gede assitanno; woloota kayinni hashsha, waajjishshanno haaqenni bararraaqissannno
Surinaamete heedhannotera Lintina yinannitera, durriisu woy bushu ayyaani, 16 maatese miilla shiinonna iserano 18 diro woꞌma bisisenna surrese aana gawajjo illishinose. Illinoserichchinni kaꞌe durriissa “hasidhannore maahoyye yaannokki mancho shita geeshsha gawajja hagiirsiissannonsa” yitino.
Ikkollana Yihowa isira soqqantannore Sheexaanu gawajjonni agara dandaanno.—Lawishsha 18:10.
