1, 2. Duuchu manni mayyee xaꞌmanno?

 ALAMETE aana mannu oosora barru baala danonna qarru iillanno. Lawishshaho, aante noote gedee odoo macciishsha rosantinote: Hambabalatte katama uullate gantino. Mittu manchi qawwe adhe beetekiristaane eꞌꞌe, haammata manna shiino; gama madiissino. Onte ooso nooseta mitte mancho kaansere amadde shiteenna qaaqquullise mullawa gati.

² Togoo qarrinna dano iillitanno wote, batinyu manni “Mayira?” yee xaꞌmanno. Lowo manni, ‘Alamete aana mannu mimmito giwannohunna qarru batiꞌrinohu mayiraati?’ yaanno. Ati hatto yite hedde egennootto?

3, 4. (a) Imbaaqoomi mayyee xaꞌmino? (b) Yihowa isira mayyee qolino?

³ Qullaawu Maxaafi, jawaata ammana noonsa manni nafa togoo xaꞌmo xaꞌminota kulannonke. Lawishshaho, masaalaanchu Imbaaqoomi Yihowa togo yee xaꞌmino: “Konne qarra baala afeemmo gede mayira assittoe? Tenne beebba assinanna mayira sammi yite laꞌꞌatto? Kuneeti lowo geeshsha batidhino baonna beebba gaangeessite nooe. Base baalate gibbonna yekkeerama no.”—Imbaaqoomi 1:3.

⁴ Imbaaqoomi 2:2, 3 Maganu Imbaaqoomi xaꞌmino xaꞌmora qolino dawaronna qarra hoolate eino qaale kultannonke. Yihowa manna lowo geeshsha baxanno. Qullaawu Maxaafi, ‘Isi kiꞌnere malanno’ yaanno. (1 Pheexiroosi 5:7) Isinni Maganu, mannu qarramanna laꞌꞌa ninke gimbeemmohunni roore giwanno. (Isayaasi 55:8, 9) Konnira hanni, ‘Alamete aana qarru batiꞌrinohu mayiraatiyya?’ yitanno xaꞌmo laꞌno.

5. Batinye ammaꞌnote rosiisaano mannaho qarru iillanno wote mayitanno? Qullaawu Maxaafi mayyaannoyya?

⁵ Ammaꞌnote rosiisaano, qeesootunna ammaꞌnote murrooti mannaho qarru iillannohu Maganu fajjo ikkinohuraati yitanno. Mitu manni, qarrano ikko faffo mittu manchira iillanno coyi baalunku Maganu balaxe murinoho yaanno. Qaaqquulluno ikko jajjabbu manni reyannohu iima Maganu ledo heeꞌraraati yaanno mannino no. Togo yaa kayinni digaraho. Yihowa horonta bushare diassanno. Qullaawu Maxaafi togo yaanno: “Woꞌmanka Dandaanno Magani, [horontanni] busha coye diassanno.”—Iyyoobi 34:10.

6. Batinyu manni alamete aana noo qarri baalunkura Magano busha assannohu mayiraati?

⁶ Batinyu manni alamete aana batiꞌrino qarrira Magano busha assannohu alame gashshinohu isooti yee hedanno daafiraati. Ikkollana Fooliishsho 3te ronsummonte gede, alamete gashshaanchi Sheexaane Daawuloosiiti.

7, 8. Alamete aana qarru batiꞌrinohu mayiraati?

⁷ Qullaawu Maxaafi “tini gobba [woy, alame] gudisante bushunni amadantinota” kulanno. (1 Yohaannisi 5:19) Tenne alame gashshinohu Sheexaanu urungichahonna mararro nookkiho. Isi ‘kalqe [woy, alame] baala soꞌrisiisanni no.’ (Yohaannisi Ajuuja 12:9) Batinyu manni isi faale haꞌranno. Alamete aana kaphu, gibbonna macca gibbanno coyi woꞌminohu mittu korkaati konneeti.

⁸ Alamete aana qarru batiꞌranno gede assinohu wolu coyino no. Addaaminna Heewani finqiltu gedensaanni, oosonsara cubbo ragisiissino. Mannu cubbo ragiꞌrino daafira, wolu manni qarramanno gede assanno. Duucha wote mannu kuꞌu koꞌonne roorate sharramanno. Giwamanno, olamanno, hattono woloota beebba assiꞌranno.  (Rosiisaancho 4:1; 8:9) Mito wote mannaho qarru iillannohu “yannanna hedeweelcho xaaddannonsa” daafiraati. (Rosiisaancho 9:11, NW) Mannaho busha yannara busha bayicho heeꞌransanni danonna bushu coyi iillansara dandaanno.

9. Yihowa qarru xaa geeshsha heeꞌrara sammi yiinohu noori heeꞌreennaati yineemmohu mayiraati?

⁹ Yihowa horonta qarra diabbanno. Alamete aana kaꞌꞌanno olira, jaddoranna miicora iso busha assa digaraho. Baatto huxidhanno gede, hambabalatte kaꞌanno gedenna lolahu daanno gede assannohu Magano diꞌꞌikkino. Ikkirono togo yite hedattoha ikkara dandaanno: ‘Yihowa taalle nookki wolqa noosi Magano ikkina, bushu coyi ikkannota hoolannokkihu mayiraati?’ Maganu ninke daafira lowo geeshsha hedannoha ikkinohura, qarru xaa geeshsha heeꞌrara sammi yiinohu korkaatu heeꞌreennaati.—1 Yohaannisi 4:8.

10. Sheexaanu Yihowa hettisinohu hiittoonniiti?

¹⁰ Edenete kaashshu basera, Daawuloosi Addaaminna Heewani soꞌrisiisino. Isi Magano busha Gashshaanchooti yiino. Sheexaanu, Maganu Addaamiranna Heewanira danchare hoolinohu gede asse coyiꞌrino. Yihowanni woyyino gashshaanchi isooti yite ammantaranna Maganu dihasiisannonke yite heddara hasiꞌrino.—Kalaqama 3:2-5; Jeefote Hedo 27 lai.

11. Hiittee xaꞌmora dawaro afa hasiissannonke?

¹¹ Addaaminna Heewani Yihowara hajajama gibbe finqiltino. Insa gara ikkinorenna gara ikkinokki coye ninke uminke afiꞌneemmo yite heddino. Yihowa kuri finqilaasine sodhinotanna ninkera woyyinore afinohu iso ikkinota buuxisa dandaannohu hiittoonniiti?

12, 13. (a) Yihowa finqiltinore hakkawoyintenni shiinokkihu mayiraati? (b) Yihowa, Sheexaanu tenne alame gashshaancho ikkaranna mannu ooso umonsa gashshitara fajjinohu mayiraati?

 ¹² Yihowa hedo Addaaminna Heewani ooso uulla woꞌmitanno gedeeti; qoleno insa gannatete heedhara hasiꞌrino. Daawuloosi baxire assirono tini Maganu hedo woꞌmitanno. (Kalaqama 1:28; Isayaasi 55:10, 11) Hakko daafira Yihowa Addaaminna Heewani hakkawoyintenni dishiino. Hatteentenni insa ooso iltara fajjinonsa. Hakkiinni Yihowa Addaaminna Heewani ooso gashshaanchonsa ikkannoha doodhitanno gede faro faninonsa.

¹³ Sheexaanu Yihowa hettisinohu lowo miliyoone ikkitanno sokkaasine macciishshitannaati. (Iyyoobi 38:7; Daanieeli 7:10) Konni daafira Yihowa, Sheexaanu kissesi gara ikkasenna teꞌee leellishanno gede yanna uyinosi. Qoleno mannu ooso Sheexaanu massagannansa uminsa gashshoote xintidhanno gedenna Maganu kaaꞌlo nookkiha qinaannonsatanna teꞌee leellishshanno gede yanna uyinonsa.

14. Maganu yanna aasi maa huwantanni gede assitino?

¹⁴ Mannu ooso lowo kume ikkano diro umonsa gashshate woꞌnaaltinoha ikkirono, diqiniinonsa. Sheexaanu kaphaancho ikkinoti leeltino. Mannu oosora Maganu kaaꞌlo hasiissannoti egennantinote. Masaalaanchu Ermiyaasi togo yaasi garankolla: “Kaaliiqaꞌya, mannu heeshsho angasi nookkitanna, haꞌrinshosino mannu umisi qineessiꞌre dandaannokkita afoommo.”—Ermiyaasi 10:23.

15, 16. (a) Yihowa qarru xaa geeshsha heeꞌrara sammi yiinohu mayiraati? (b) Yihowa Sheexaanu abbino qarra hoolinokkihu mayiraati?

¹⁵ Yihowa qarru xaa geeshsha heeꞌrara sammi yiinohu mayiraati? Isi bushu coyi ikkannota hoolannokkihu  mayiraati? Sheexaanu gashshooti qinaannokkita leellishate yanna hasiissanno. Mannu ooso addi addi gari gashshoote woꞌnaaltino; ikkirono diqiniinonsa. Sayinsetenna tekinoolojete lopho nooha ikkirono, albinni roore miico, buxima, jaddonna olu batiꞌrino. Mannu ooso Maganu kaaꞌlo nookkiha umonsa qiniino garinni gashsha didandiitanno.

¹⁶ Ikkollana, Yihowa Sheexaanu abbino qarra dihoolino. Hoolinoha ikkoommero, Maganu umisi Sheexaanu gashshootira kaaꞌli yaate; isi kayinni horonta hatto diassanno. Qoleno Maganu qarra hooloommero, mannu ooso umonsa qiniino garinni gashsha dandiitannoha lawannonsa. Hatto yee heda kayinni kaphoho; Yihowa qole konni kaphira dikaaꞌlamanno. Isi horonta dikaphanno.—Ibiraawoota 6:18.

17, 18. Yihowa, Sheexaanu abbino gawajjo baalanta ma assanno?

¹⁷ Yihowa Sheexaanunna mannu ooso finqilte abbitino gawajjo baalanta hoola dandaanno? Ee dandaanno. Maganoho woꞌmunkuri dandaamanno. Yihowa, Sheexaanu kisse baalanti kapho ikkitinoti xabbe leeltanno yanna afino. Tini leeltu gedensaanni, Yihowa alba hedino garinni uulla gannate assanno. “Waammate giddo noori” reyotenni kaꞌanno. (Yohaannisi 5:28, 29) Hatte yannara mannu horonta dixiwamanno woy direyanno. Yesuusi Sheexaanu daafinore baalankare taashshanno. Yihowa Yesuusi widoonni ‘Daawuloosi looso diiganno.’ (1 Yohaannisi 3:8) Hakka geeshsha kayinni Yihowa iso anfeemmo gedenna iso Gashshaanchonke ikkara doodhineemmo gede cince yanna uyinonke daafira galanteemmosi. (2 Pheexiroosi 3:9, 10 nabbawi.) Isi anfammosira hasiꞌranno. Qoleno qarru iillannonke wote nafa, kaajjine uurrineemmo gede kaaꞌlannonke.—Yohaannisi 4:23; 1 Qorontoosi 10:13 nabbawi.

 ¹⁸ Yihowa iso Gashshaanchonke ikkanno gede doodhinammora dimurrisannonke. Isi mannu oosora doodhate qoosso uyino. Hanni tini muxxe elto mayi tiro afidhinoro laꞌno.

19. Yihowa uyinonketi dhaggete elto maati? Tenne elto naada hasiissannonkehu mayiraati?

¹⁹ Yihowa dhagge ikkitinota doodhate qoosso uyinonke daafira saadatewiinni baxxinoommoreeti. Saada heedhannohu kalanqoonninsa garinni callaati; ninke kayinni heeꞌneemmo gara, hattono Yihowa hagiirsiisanna teꞌee doodha dandiineemmo. (Lawishsha 30:24) Qoleno, uyinoonnise biddishsha harunsite calla loossanno maashine gede diꞌꞌikkinoommo. Hiittoo manna ikkineemmoro, hiittoo manna jaalanke assiꞌneemmoronna heeshshonkenni maa assineemmoro doodha dandiineemmo. Yihowa, heeshsho aa calla ikkikkinni heeshshonkenni hagiidhinammora hasiꞌranno.

20, 21. Doodha dandaattohu danchu coyi maati?

²⁰ Yihowa banxammosira hasiꞌranno. (Maatewoosi 22:37, 38) Isi, qaaqqisi murrinsikki umisinni “Baxeemmohe anna” yaannosita baxanno anni gedeeti. Yihowa isira soqqama woy giwa doodhineemmo qoosso uyinonke. Sheexaanu, Addaaminna Heewani Yihowara soqqama giwa doodhitino. Atina doodhate qoossokki ma garinni horoonsiꞌratto?

²¹ Doodhate qoossokki horoonsidhe Yihowara soqqami. Magano hagiirsiisanna Sheexaane giwa doodhinohu lowo miliyoone ikkanno manni no. (Lawishsha 27:11) Maganu qarra baalanka hunanno wote haaro alamera heeꞌrate xa maa assa dandaatto? Aantanno fooliishsho tenne xaꞌmora dawaro qoltanno.