1. Maganu mannu oosora hedinori maati?

 MAGANU mannu oosora hedinori danchareeti. Isi umi labbaahanna meyaata yaano Addaaminna Heewani kalaqinohu biifado kaashshu basera heeꞌraraati. Maganu hedinohu insa ooso iltanno gede, uulla gudisse gannate assitanno gedenna saada towaattanno gedeeti.—Kalaqama 1:28; 2:8, 9, 15; Jeefote Hedo 6 lai.

2. (a) Maganu hedinore wonshannota mayinni anfeemmo? (b) Qullaawu Maxaafi hegerera heeꞌrate daafira mayyaanno?

² Ninke gannatete heeꞌneemmo yanna daggannoha lawannohe? Yihowa togo yiino: “Ani ikkanno yoommori ikkanno; anino hedoommore asseemmo.” (Isayaasi 46:9-11; 55:11) Ee, Yihowa hedinore wonshanno; tenne hoolannosihu dino. Isi uulla kalaqinohu dimullaati. Isi uulla ‘kalaqinohu fano heedhara diꞌꞌikkino.’ (Isayaasi 45:18) Maganu mannu uulla woꞌmate aana heeꞌrara hasiꞌranno. Isi uullate aana hiittoo manni heeꞌrara hasiꞌranno? Qoleno mageeshshi geeshsha heeꞌrara hasiꞌranno? Qullaawu Maxaafi togo yaanno: “Keeraano [woy, hajajantannori] baatto ragidhanno; ise aanano hegerera heedhanno.”—Faarso 37:29; Yohaannisi Ajuuja 21:3, 4.

3. Mannu xiwamannotanna reyannota hendeemmo wote, mayine xaꞌminammora dandiineemmo?

³ Ikkollana, xaa yannara mannu xiwamanno hattono reyanno. Duuchawa mannu olamanno; qoleno mimmito shaanno. Maganu mannu togo ikkara hedinokkita huwata dandiineemmo. Ikkina togoori ikkanni noohu mayiraati? Tenne kulannonkehu Qullaawa Maxaafa callaho.

4, 5. (a) Edenete kaashshu basera hamashshu widoonni Heewani coyishiishinohu ayeti? (b) Ammanamino manchi mooraancho ikkara dandaannohu hiittoonniiti?

⁴ Qullaawu Maxaafi Maganoho ‘Daawuloosi woy Sheexaane’ yinanni baarigaari noosita kulannonke. Sheexaanu Edenete kaashshu basera hamashshu widoonni Heewani coyishiishino. (Yohaannisi Ajuuja 12:9; Kalaqama 3:1) Isi hamashshu coyiꞌranni nooha lawise coyiꞌrino.—Jeefote Hedo 7 lai.

⁵ Ikkina Maganu Sheexaane Daawuloosi asse kalaqinohu nooni? Dino! Maganu Addaamiranna Heewanira uulla qixxeessi wote iima noohu mittu sokkaasinchi, soorrame Daawuloosi ikkino. (Iyyoobi 38:4, 7) Kuni hiitto ikke ikkanno? Tenne huwatate, hanni mittu ammanamino manchi soorrame mooraancho ikkanno gara hedi. Kuni manchi ilami wote mooraancho diꞌꞌikkino. Ikkirono, manni jajja woy woxe halchanna yora hanafanno. Isi woꞌmanka wote tenne hedanno wote, busha yortosi lexxitanni hadhanno. Hakkiinni, injo afiꞌranno wote, halchino coye mooranno. Konni garinni mooraancho ikkanno.—Yaiqoobi 1:13-15 nabbawi; Jeefote Hedo 8 lai.

6. Mittu sokkaasinchi Maganu baarigaara ikkinohu ma garinniiti?

⁶ Kuni sokkaasinchino hatto ikkino. Yihowa Addaaminna Heewani kalaqi gedensaanni, insa ile ilame ‘baatto woꞌmanno’ gede kulinonsa. (Kalaqama 1:27, 28) Hakku sokkaasinchi, ‘Kuni baalunku manni Yihowa agure ane magansiꞌra dandaanno!’ yee hedinoha ikkara dandaanno. Woꞌmanka wote tenne hedi kiiro, Yihowaha ikkinore roore halchanni haꞌri. Hakku sokkaasinchi mannu iso magansiꞌrara hasiꞌrino. Hakko daafira Heewanira kapho coyiꞌre ise soꞌrisiisino. (Kalaqama 3:1-5 nabbawi.) Konni garinni, isi Sheexaane Daawuloosi, Maganu baarigaara ikkino.

7. (a) Addaaminna Heewani reyinohu mayiraati? (b) Ninke geedhineemmohunna reyineemmohu mayiraati?

 ⁷ Addaaminna Heewani Maganoho hajajama agure, hoolloonni haqqicho guma itino. (Kalaqama 2:17; 3:6) Insa Yihowa baddalino daafira, Yihowa balaxe coyiꞌrinonte gede, gedensaanni hige lamunku reyino. (Kalaqama 3:17-19) Addaaminna Heewani oosono cubbaataamma ikkitino daafira, insano reyitanno. (Roomu Sokka 5:12 nabbawi.) Insano cubbaataamma ikkitino gara huwatate, hanni mitto lawishsha laꞌno. Hanni hiinxidhino mixashshora gannoonni buddeena hedi. Hattee mixashshora gannoonni buddeeni hiinxa woy muso adhe kaꞌꞌanno. Addaami Maganoho hajajama hooginohura cubbaataamo ikkino. Ninke baalunku Addaami ooso ikkinoommo daafira, isi gede ninkeno cubbaataammaho woy “muso” noonkereeti. Baalunku geedhineemmohunna reyineemmohu cubbaataamma ikkinoommo daafiraati.—Roomu Sokka 3:23; Jeefote Hedo 9 lai.

8, 9. (a) Sheexaanu Addaaminna Heewani mayyee hedara hasiꞌrino? (b) Yihowa finqiltinore bayichonko shiinokkihu mayiraati?

⁸ Sheexaanu Addaaminna Heewani Maganoho hajajama giwanno gede xixxiiwi wote, insa Yihowara finqilanno gede assino. Isi, Addaaminna Heewani Yihowa kaphaanchoho, hattono danchare hoꞌlannoho busha gashshaanchooti yite heddara hasiꞌrino. Sheexaanu, ‘Mannu ooso assitannore Maganu kula dihasiissannosi; qoleno Addaaminna Heewani danchanna busha ikkinore uminsa afa dandaanno’ yiinohu gedeeti. Tennera Yihowa ma assiyya? Isi finqiltinore bayichonko shee finqille huna dihoogino. Ikkina hatto assa Sheexaanu kaphaancho ikkinota anfanni gede assitannoni? Deeꞌni, diassitanno.

⁹ Hakko daafira, Yihowa finqiltinore bayichonko dishiino. Isi mannu ooso insaneeto gashshitanno gede yanna uyinonsa. Tenne assasi Sheexaanu kaphaancho  ikkinotanna mannaho woyyannore afinohu Yihowa ikkinota buunxanni gede assitanno. Fooliishsho 11te, tenne hajore lende ronseemmo. Kayinni Addaaminna Heewani ikkito daafira mayyaatto? Insa Sheexaanu yiinore ammante Maganoho hajajama giwansa garaho? Addaamiranna Heewanira noonsare baalankare uyinonsahu Yihowaati. Isi insara guuta heeshsho, heedhannota biifado qaenna  hagiirsiisanno looso uyinonsa. Sheexaanu kayinni insara horo danchare asse diegenninonsa. Ati insa ikkoottoro ma assatto?

10. Mittu mittunku manchi maa doodha dandaanno?

¹⁰ Ninke mittu mittunkuno doodhineemmori no; doodhineemmo coyi heeshsho afiꞌneemmo woy hoongeemmo gede assara dandaanno. Yihowa Gashshaanchonke assiꞌne isira hajajama doodhanna Sheexaanu kaphaancho ikkinota buuxisa dandiineemmo. Woy Sheexaanu gashshaanchonke ikkara doodha dandiineemmo. (Faarso 73:28; Lawishsha 27:11 nabbawi.) Alamete aana Maganoho hajajamanno manni shiimaholla. Isinni, tenne alame gashshaanchi Magano diꞌꞌikkino. Magano ikka hoogina ayetiyya?

11, 12. (a) Sheexaanu Yesuusira eemmohe yee coyiꞌrinori maa huwanteemmo gede assannonke? (b) Sheexaanu alamete gashshaancho ikkinota kultanno qummeeshshuwa hiikkuriiti?

¹¹ Yesuusi alame gashshinohu ayetiro afino. Mitte hige Sheexaanu isira “alamete gashshooti ayirrinye baala [leellishinosi].” Hakkiinni Yesuusira togo yiino: “Anera kumbuulittoero [woy, magansiꞌrittoero] konne baala eemmohe.” (Maatewoosi 4:8, 9; Luqaasi 4:5, 6) Hanni konne coye hedi: Hakku gashshooti baalu Sheexaanunniha ikka hoogoommero, isi Yesuusira eemmohe yaa dandaannoni? Didandaanno. Baalunku gashshooti Sheexaanunniho.

¹² ‘Sheexaanu alamete gashshaancho hiitto ikke ikkanno? Kalqete alame kalaqinohu Woꞌmanka Dandaanno Magano Yihowa diꞌꞌikkino?’ yite hedattoha ikkara dandaanno. (Yohaannisi Ajuuja 4:11) Ee, Kalaqaanchu Yihowaati; ikkirono Yesuusi, Sheexaanu “tenne alame [gashshaancho]” ikkinota xawise coyiꞌrino. (Yohaannisi 12:31; 14:30; 16:11) Soqqamaasinchu Phaawuloosi, Sheexaanu Daawuloosi  ‘tenne gobba [woy alame] magano’ ikkinota coyiꞌrino. (2 Qorontoosi 4:3, 4) Soqqamaasinchu Yohaannisino “tini gobba gudisante bushunni amadantino” yee borreessino.—1 Yohaannisi 5:19.

13. Haaro alame hasiissannonkehu mayiraati?

¹³ Tini alame roore bushshanni hadhanni no. Olu, mussinnu, doganna finqille woꞌmitino. Mannu ooso aye geeshshano sharranturo, konne baalanka qarra hoolte diaffanno. Maganu kayinni muli yannara tenne busha alame Armagedooni olinni hunanno; hakkiinni keeraanchimma woꞌmitinota haaro alame abbanno.—Yohaannisi Ajuuja 16:14-16; Jeefote Hedo 10 lai.

14. Maganu Mangistesira moote ikkara doorinohu ayeti? Qullaawu Maxaafi Yesuusire mayyee masaalino?

¹⁴ Yihowa iimi Mangistesira Moote ikkanno gede Yesuusi Kiristoosi doorino. Qullaawu Maxaafi lowo kumi diri albaanni, Yesuusi “Keeru Roorricha” ikke gashshannotanna gashshootisira gumulo heedhannokkita masaalino. (Isayaasi 9:6, 7) Yesuusi rosaanosi gashshootisi daafira huuccidhanno gede rosiisanni togo yiino: “Gashshootikki dayo, hedoottori gordoho ikkinonte gede, baattote aanano ikko.” (Maatewoosi 6:10) Fooliishsho 8te, Maganu Mangiste uullate gashshoote hunte bayichonsa amaddanno gara ronseemmo. (Daanieeli 2:44 nabbawi.) Maganu Mangiste konne assituhu gedensaanni uulla gannate assitanno.—Jeefote Hedo 11 lai.

15. “Haaro baatto” yiniti maati?

¹⁵ Qullaawu Maxaafi togo yee hexxo aanno: “Ninke kayinni uyinonke hexxo garinni keeraanchimma heedhannoha  haaro gordonna haaro baatto agadhineemmo.” (2 Pheexiroosi 3:13; Isayaasi 65:17) Mito wote Qullaawu Maxaafi “baatto” woy “uulla” yaannohu uullate aana heeꞌranno manna kulateeti. (1 Duduwo 16:31) Konni daafira, “haaro baatto” yiniti, Maganoho hajajamannohonna isi maassiꞌrino mannaati.

16. Maganu haaro alamera heeꞌranno mannira hiittee kaajja elto aanno? Tenne elto afiꞌrate maa assa hasiissannonke?

¹⁶ Yesuusi, Maganu abbannotera haaro alamera heeꞌranno manni “hegere heeshsho” afiꞌrannota coyiꞌrino. (Maarqoosi 10:30) Tenne elto afiꞌrate maa assa hasiissannonke? Tenne afate Yohaannisi 3:16 nna 17:3 nabbawi. Xa kayinni hanni Qullaawu Maxaafi uulla Gannate ikkitanno wote heeshsho hiittoota ikkitanno yaannoro laꞌno.

17, 18. Albillitte uullate aana keeru woꞌmannotanna teense heeꞌneemmota mayinni anfeemmo?

¹⁷ Bunshe, olu, jaddonna finqille diheedhanno. Bushu manni uullate aaninni coꞌo yee goofanno. (Faarso 37:10, 11) Maganu “baattote qacce geeshsha nooha ola uurrisanno.” (Faarso 46:9; Isayaasi 2:4) Uullate aana Magano baxannohunna isira hajajamanno manni woꞌmanno. Qoleno, gawalo nookki salaame heedhanno.—Faarso 72:7.

¹⁸ Yihowa manni teese heeꞌranno. Hunda Israeele Maganoho hajajantanno wote, isi agarannonsa daafira yaaddukki heedhanno. (Leewaawoota 25:18, 19) Gannatete heeꞌneemmo wote, waajjineemmohu woy waajjishannonkeri diheeꞌranno. Woꞌmanka wote beꞌe yinummokki teense heeꞌneemmo!—Isayaasi 32:18; Mikiyaasi 4:4 nabbawi.

19. Maganu abbannote haaro alamera sagale woꞌmitannota huluullammeemmokkihu mayiraati?

¹⁹ Sagale woꞌmitanno. “Baatto gide laashshito; ilaallate aana jajju woꞌmo.” (Faarso 72:16) “Maganu [Yihowa] maassiꞌrannonke daafira, baatto gide laashshitanno.”—Faarso 67:6.

20. Uulla gannate ikkitannota mayinni anfeemmo?

 ²⁰ Uulla gudisante gannate ikkitanno. Mannaho biifadu mininna danchu gati heeꞌrannonsa. (Isayaasi 65:21-24; Yohaannisi Ajuuja 11:18 nabbawi.) Uulla gudisidhe hunda Edenete kaashshu base gede biifado ikkitanno. Yihowa hasiisannonkere baalankare aannonke. Qullaawu Maxaafi isi daafira togo yaanno: “Ikkannonsa geeshshire aattonsa; woꞌmunku halcho wonshatto.”—Faarso 145:16.

21. Mannunna saadate mereero salaame heedhannota leellishannori maati?

²¹ Mannunna saadate mereero salaame heedhanno. Saada woy gobba moyichi manna digawajjanno. Qaaqquullu, xaa yannara lowo geeshsha waajjinanni moyichi mule nafa godoꞌliro ikkannori dino.—Isayaasi 11:6-9; 65:25 nabbawi.

22. Yesuusi xiwantinore ma assanno?

²² Xiwanu diheeꞌranno. Yesuusi uullate aana noo waro, lowo manna hursino. (Maatewoosi 9:35; Maarqoosi 1:40-42; Yohaannisi 5:5-9) Kayinni isi Maganu Mangiste Moote ikkino daafira albillitte woꞌmanka hursanno. Hakkawote “‘Dhiwamoommo’ yaannoha dianfanni.”—Isayaasi 33:24; 35:5, 6.

23. Maganu reyitinore ma assanno?

²³ Reyitinori kaꞌanno. Maganu lowo miliyoone ikkannoha reyino manna kayisara hexxo uyino. Isi “cubbaataammanna keeraano reyotenni kayisanno.”—Yohaannisi 5:28, 29 nabbawi; Soqqamaasinete Looso 24:15.

24. Gannatete heeꞌnanni heeshsho hiittoota labbannohe?

²⁴ Ninke baalunku mitte doodha hasiissannonke. Yihoware rosanna isira soqqama doodha, woy iso agurre uminke hasatto harunsa dandiineemmo. Yihowara soqqama doodhineemmoha ikkiro, albillitte kaajja heeshsho heeꞌneemmo. Hanni Yesuusi Kiristoosirenna isi Maganu hedinoha dhaggete coye wonshanno gara lende ronso.